Taste Makers - დათა ალექსეევის ბლოგი

ხშირად მიფიქრია, რატომ დავუკავშირდი ქაოსურად არაპროგნოზირებად სფეროს, მოდის სამყაროს.
იმაზეც მიფიქრია, არის თუ არა მოდის ბლოგინგი ჩემი მისწრაფება, თუ ეს ერთადერთი ალტერნატივაა სტერეოტიპების დამსხვრევისთვის, რომელსაც პლატფორმა მაძლევს. ვერ ვიტყვი, რომ ძნელია ამ კითხვებზე პასუხის გაცემა, მაგრამ არც ადვილი, რადგან, დარწმუნებული ვარ, ცხოვრების სხვადასხვა ეტაპზე განსხვავებული აზრი მექნება. თუმცა მიზანი დარჩება ერთი - გესაუბროთ უფრო მეტ საინტერესო თემებზე, რომლის შთაგონებასაც ხელოვნების უკიდეგანო სივრცე, ჩვენთვის უცნობი ნიჭიერი ადამიანები და თქვენ, ჩემი მკითხველი, მაძლევთ.



დღესდღეობით, მოდის ბლოგინგი მაღალანაზღაურებადი და პრესტიჟული პროფესიაა, მოიცავს უამრავ
თემას და ათეულობით კატეგორიას. ერთ-ერთი წარმატებული კი პერსონალური "სთაილ" ბლოგია, რომელიც იკონური ადამიანის მოდურ დღიურს ჰგავს, ვისგანაც თამამად შეგიძლია გაითვალისწინო რჩევები და საკუთარ ჩაცმულობაში იდეების სწორი თანხვედრა ინოვაციად აქციო.

"მოდა წარმავალია, სტილი მარადიული" - ივ სენ ლორანი

წარმატებულმა "სთაილ" ბლოგერებმა კარგად გაიაზრეს კრეატიულობისა და სტილის ფენომენი, შესაბამისად, ერთი შეხედვით უბრალო გატაცებას მომხიბლავი რაკურსი და კომერციული მხარე მიანიჭეს.


დღევანდელი ჩემი ბლოგის სტუმარი ყოფილი მოდელი და ერთ-ერთი რეიტინგული ქართველი "სთაილ" ბლოგერი ნინი ბექაურია.



ნინის პირველი ნაბიჯები პერსონალური ბლოგის მიმართულებით 16 წლიდან, "Classique Mode" -ით იწყება. შემდეგი იყო "Label In Style", სადაც ძირითად აქცენტებს მსოფლიო მოდის სიახლეებსა და ტენდენციებზე აკეთებდა. ახლა კი მკაცრ კონცეფციაზე დაფუძნებულ პორტალ "Taste Maker-ს" წარმოადგენს, საიდანაც ქართველი ბლოგერის დასამახსოვრებელი ლუქების რეიტინგის ზენიტი იწყება.



"სტილის ძიება დიდი ხნის წინ დავასრულე, თითქმის ყველა ეტაპი გავიარე. არჩევანი კი მაქსიმალურად სადა და ანდროგენულ სამოსზე შევაჩერე, მინიმალიზმის ელემენტებით".
ნინი ბექაური

- დიდი ხანია მოდის სამყარომ დაგაინტერესა, რამ იქონია გავლენა შენი ინტერესების ჩამოყალიბებაში?

- ბავშვობიდან გაუაზრებლად ვფიქრობდი, რომ მოდა იყო ის სფერო, რომელთანაც აუცილებლად უნდა მქონოდა კარიერული კავშირი, მაშინ კარიერის მნიშვნელობაც კი არ ვიცოდი. მახსოვს, როგორც კი ინტერნეტთან წვდომის საშუალება გაჩნდა, იმ პერიოდის წამყვანი მოდელების ფოტოებს ვათვალიერებდი და ვკითხულობდი მათზე. გაუცნობიერებლად ჩემი ინტერესის სფერო მიყალიბდებოდა, ფაქტობრივად, ყველაფერს ვკითხულობდი მოდური ცხოვრების სტილზე, კონკრეტული ინტერესი კი სამოდელო კარიერაზე მქონდა. ბევრი თანატოლისთვის საოცნებო იყო პოდიუმზე გავლა და კამერების წინ პოზირება, თუმცა მე ცოტა განსხვავებული დამოკიდებულება მქონდა, უფრო სერიოზულად აღვიქვამდი და ნაკლებად ვლაპარაკობდი ამ თემაზე. შემდეგ უდიდესი გავლენა იქონია სამოდელო სააგენტომ, მივხვდი, რა უნდა მეკეთებინა.
თუმცა ეს არ იყო მოდელობა. სააგენტოში პირველი ქართველი მოდის ბლოგერი ნატუკა ქარქაშაძე გვესტუმრა, ძალიან საინტერესო თემებზე გვესაუბრა და ისე მომეწონა მისი დამოკიდებულება ბლოგის მიმართ, ეს ადამიანი იმ წუთიდან ჩემი ინსპირაცია გახდა, თითქოს მიმახვედრა, დამარწმუნა, რომ ქართველებსაც შეიძლება სერიოზული შანსი გვქონოდა საერთაშორისო ასპარეზზე.


- ანუ შენი მოწოდება, სამოდელო კარიერა არ ყოფილა...

- შეიძლება. ვფიქრობ, სწორად უნდა შეგვეძლოს საკუთარი შესაძლებლობების შეფასება. მოდელობა ერთი მხრივ კომფორტული ამპლუა იყო, თუმცა ძალიან მომთხოვნი ვიყავი საკუთარი თავის მიმართ. ფოტოსესიების დროს თითქოს რაღაც მაკლდა, რომ არც ისეთი ბევრი შესაძლებლობა მქონდა კონკრეტული დავალების შესასრულებლად ფოტოგრაფის წინაშე, რამდენიც მინდოდა. სააგენტოში ყოფნის ბოლო პერიოდში უკვე ვფიქრობდი, რომ არ გამომივიდოდა სამოდელო კარიერა და, საბედნიეროდ, ბლოგის შექმნის იდეაც გადამწყვეტ მომენტში ჩამომიყალიბდა.

- როდის გააცნობიერე, რომ "სთაილ" ბლოგის მიმართულებით უნდა გაგეგრძელებინა მოღვაწეობა?

- კარგად მახსოვს პირველი აკრედიტაცია თბილისის მოდის კვირეულზე, რომელიც ვარდების ბაღში გაიმართა. ამ სეზონიდანვე პირველად გამოვჩნდი. ნებისმიერ გვერდზე ვხვდებოდი, სადაც კვირეულის სტუმრების სტილი იყო გამოქვეყნებული. ამ დროს ვიფიქრე, რატომაც არა? ნამდვილად მიღირდა გამეკეთებინა ხარისხიანი მონოპროფილური ფორმატი, რომლის ინტერესის დონეც მაღალი იქნებოდა.



- ნებისმიერ განვითარებულ ქვეყანაში შემოსავლიანი წყაროა ონლაინბიზნესი, თუმცა საქართველოში ნაკლებად. რატომ მაინცდამაინც "სთაილ" ბლოგი და არა უფრო კომერციული სახის პორტალი?

- ამ კუთხით თავს იმდენად კომფორტულად ვგრძნობ, რომ კომერციული მხარე ნაკლებად მაინტერესებს. არ მიყვარს ჩარჩოები, აქ არის ჩემი ადგილი და არა სხვაგან. თუმცა, ყოფილა შემთხვევები, როდესაც მითანამშრომლია ტანსაცმლის ბრენდებთან.

წარმატებული ბლოგერები, ფაქტობრივად, ყველაზე ცნობილი და გავლენიანი მოდის სახლების ამბასადორები არიან. დიზაინერები სპეციალურად უგზავნიან ტანსაცმელსა და აქსესუარებს, მათი შეთანხმება კი ორივე მხარისთვის მომგებიანი და მარკეტინგული თვალსაზრისით კარგად გათვლილია. ყველამ კარგად ვიცით კიარა ფერანი, რომლის წლიური შემოსავალი რამდენიმე მილიონია, გარდა იმისა, რომ ფერანი ლუი ვიუტონის, ვერსაჩესა და შანელის სახე გახლავთ, სისტემატურად თანამშრომლობს სხვა უფრო ნაკლებად ცნობილ მოდის სახლებთანაც. ძალიან ხშირია ბლოგერების კოლაბორაციები დიზაინერებთან, მახსენდება ბრაიან ბოის დაუვიწყარი კოლაბორაციები პრადასა და გუჩისთან.

- წარმოიდგინე, რომ ყველაფრის შესაძლებლობა გაქვს, ფინანსური კუთხითაც და არა მარტო... რა იქნებოდა შენი პირველი შემოქმედებითი ნაბიჯი?

- ფინანსები, როგორც ყველგან, ამ ინდუსტრიისთვისაც უმნიშვნელოვანესია. ზუსტად არ ვიცი, მაგრამ ბოლო პერიოდია გატაცებული ვარ მაისურების მარტივი გაფორმებით, ძირითადად, წარწერებით. ვფიქრობ, ამ ჰობის უფრო სერიოზულად მივუდგებოდი, და კიდევ, აუცილებლად დავეხმარებოდი ქართველ მოდელებს საერთაშორისო ასპარეზზე წარმატებისთვის, რადგან ნამდვილად გამორჩეული გოგოები გვყავს, და მხოლოდ თბილისში გამართულ მოდის კვირეულზე არ უნდა მონაწილეობდნენ.


- რა არის მთავარი პრობლემა ქართული მოდის, როგორც მენეჯმენტის, კუთხით?

- გვჭირდება უფრო მეტი კვალიფიცირებული პერსონალი. ძალიან ცოტა მეგულება გამოცდილი ადამიანი. რაღა თქმა უნდა, როდესაც ერთი ან ორი ადამიანი ცდილობს საქმის კეთებას, რთულია. ამის გამო არც ისე სწრაფად მივიწევთ წინ, თუმცა, არაა ადვილი, ვინმე გაამტყუნო, როდესაც კვირეულის სეზონებს თითებზე ვითვლით. მთავარია, ვცდილობთ და მიხარია, რომ ვვითარდებით სეზონიდან სეზონამდე.

- დიზაინერი, რომელიც განსაკუთრებულად მოგწონს...

- Alexander Mqueen-მა წარუშლელი კვალი დატოვა ჩემს ცნობიერებაზე. სულ სხვა კუთხით დამანახვა ეს სფერო, ამიტომ განსაკუთრებული დამოკიდებულება მაქვს ამ ბრენდისადმი. რაც შეეხება ჩვენს თანამედროვეს, ძალიან მომწონს ალექსანდერ ვენგი და დემნა გვასალია.


- როდესაც შენს ბლოგს ვათვალიერებდი, საინტერესო დევიზი შევნიშნე, Drink, Dance, WearR.

- კარგია, რომ გამახსენე, თითქმის დავიწყებული მქონდა. DDW-ის იდეა მხოლოდ რუბრიკას უკავშირდებოდა, რომლის დაწყებასაც ვაპირებდი და გარკვეული მიზეზების გამო ვერ შედგა. შემდეგ მაისურზე გადავიტანე წარწერა. ასე ალბათ იმიტომ მიზიდავდა, რომ ღამის ცხოვრების მოყვარული ვიყავი, ცოტაოდენი ალკოჰოლი და გემოვნებიანი ტანსაცმელი კი საუკეთესო მიქსი იყო გასახალისებლად.

  

- რა აზრის ხარ ბოლო დროის ყველაზე პოპულარულ ტენდენციაზე No Bra & Less Make up?

- ნამდვილად ჩემი ფავორიტია! მაკიაჟი საერთოდ არ მიყვარს, იშვიათად თუ დავუშვებ გამონაკლისს, მხოლოდ ფოტოგადაღებისთვის. რაც შეიძლება No Bra-ს, ანუ "არა ბიუსჰალტერს" , ამისთვის ნამდვილად არასდროს მჭირდებოდა ტენდენცია. საჭიროების დროს მხოლოდ სპორტულ ბიუსტჰალტერს ვიყენებ.


- შენი პერსონალური სტილი მინიმალისტურ მიმართულებას მიეკუთვნება, რა იდეას ეფუძვნება ბლოგის სახელწოდება "Taste Makers"  ("გემოვნების შემქმნელები")?

- დღეს სწორედ ბლოგერების ხელშია უახლესი ტენდენციების დანერგვა და შემდეგ - გავრცელება, ამიტომ მგონია, რომ ჩემი საიტის სახელწოდება სწორად ასახავდა შინაარსს. რაც შეეხება ჩემს სტილს, უმთავრესია სიმარტივე. უდიდესი გავლენა მოახდინა თაყლორ თომასი Hill-მა ჩემს ჩაცმულობაზე. დღესაც ასე მგონია, რომ არავის შეუძლია თომასი Hill-ივით შექმნას განუმეორებელი ინტერპრეტაცია, ერთდროულად სპორტულისა და კლასიკური ხასიათის. ქუსლიანი ფეხსაცმელიც მხოლოდ მასზე მომწონს, რადგან იმდენად ანდროგენული იერი აქვს, რომ სისადავეს "ჰაი ჰილსებზეც" ინარჩუნებს.

- შენს ჩაცმულობაში საპროტესტო ხასიათის მესიჯებს ვხვდებით...

- ვიღაცისთვის პროტესტია, ვიღაცისთვის კი ღიმილის მომგვრელი. მსგავსი ხასიათის სამოსის მორგება და შემდეგ გამოჩენა საზოგადოებაში, ვფიქრობ, ერთ-ერთი საინტერესოო გზაა შენი იმჟამინდელი განწყობის აფიშირებისთვის. ვიღაც კედელზე წერს, ვიღაც სოციალურ ქსელში, მე კი ჩემი ემოციების გადატანას მხოლოდ მაისურზე ვამჯობინებ, ორსიტყვიანი ფრაზებით.


ტექსტი დათა ალექსეევი
ფოტო - დათა ალექსეევი, სალომე მაცაბერიძე

ასევე დაგაინტერესებთ:
ექსტრავაგანტური სილამაზე - დათა ალექსეევის ბლოგი
პიტო სეთურიძის ინსპირაცია - დათა ალექსეევის ბლოგი




























like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.