H&M-ის მოდური სამყაროდან -" ბომონდის" ექსკლუზიური სტუმრები დანილო დრობნიაკი და კლაუდია ოსვალდი არიან

შეუძლებელია, H&M-ის მოდურ სამყაროში აღმოჩნდე და არ დარჩე შეყვარებული. იშვიათია მსოფლიოში მაღაზიები, რომელიც ნებისმიერი სოციალური ფენის საზოგადოების გემოვნებასა და ბიუჯეტს ეფექტურად ერგება.
H&M კი ნამდვილად ერთ-ერთი მათგანია.

მოდა და ხარისხი საუკეთესო ფასად!

ბრენდის ისტორია 1947 წლიდან შვედეთში იწყება, სადაც ერლინგ პერსონმა დააარსა კომპანია Hennes, რაც შვედურად "ქალისას" ნიშნავს. კომპანია მხოლოდ და მხოლოდ ქალბატონების ტანსაცმლის წარმოებაზე მუშაობდა, სანამ თავად პერსონმა არ გადაწყვიტა მაღაზია Mauritz Widforss-ის შეძენა, რომელიც სანადირო ტანსაცმლითა და აქსესუარებით ვაჭრობდა. რა შეიძლებოდა ყოფილიყო ყველაზე სწორი და ლოგიკური კომბინაცია იმ
მიზნის მისაღწევად, რომელიც ერლინ პერსონმა დაისახა? კომერციული ფართი სტოკჰოლმში, ასორტიმენტის ზრდა და Henes and Maurici ანუ H&M.

მოგეხსენებათ, ბრენდი ნოემბერში ოფიციალურად გაიხსნა თბილისში," ბომონდის ექსკლუზიური სტუმრები კი სლოვენიაში, ხორვატიაში, სერბეთსა და უკვე საქართველოში H&M-ის მარკეტინგისა და PR-ის უფროსი დანილო დრობნიაკი და რეგიონული მენეჯერი კლაუდია ოსვალდი არიან. მათ ვრცლად ისაუბრეს საქართველოში H&M-ის შემოსვლასა და ბრენდის კრეატიულ და ტექნიკურ მხარეებზე.



- დანილო, როგორი გრძნობაა, იყო ისეთი ძლიერი ოჯახის წევრი როგორიც H&M-ია?

- დანილო
ბედნიერებაა, მუშაობდე ისეთ კომპანიაში, როგორიც H&M-ია. ჩვენ უნიკალური კორპორატიული სისტემა გვაქვს თავისი ღირებულებებით, რომელიც მე და ჩემს კოლეგებს გვაერთიანებს და გვაძლევს შესაძლებლობას, ვიყოთ ისეთები, როგორებიც ვართ. დღესდღეობით, ფუფუნებაა, არ მოექცე რუტინულ ჩარჩოებში ვფიქრობ, ეს ამ დიდი და ლამაზი ოჯახის წევრობის ერთ-ერთი მთავარი განმასხვავებელი ნიშაა.

- რას გვეტყვით თქვენი საქმიანობის განსაკუთრებელ მხარეებზე?

- დანილო
ყველაზე საოცარი ის არის, რომ ყოველდღიურად ახალი გამოწვევების წინაშე ვდგავართ. ეს არის ჩემი პროფილისა და ბრენდის განსაკუთრებულობა, სიახლე, რომელიც გაბედნიერებს. უამრავი აქტივობა იგეგმება ყოველდღიურად და საინტერესო კამპანიები წლის განმავლობაში, სადაც თითოეულ პროექტზე მუშაობისას ფუნდამენტური ცოდნის მიღების შესაძლებლობა გეძლევა.


-კლაუდია
ვეთანხმები დანილოს, მნიშვნელოვანია ყოველდღიური გამოწვევები, მაგრამ უმნიშვნელოვანესია, არ იყოს ეს ყველაფერი მოსაბეზრებელი. ჩვენი სამუშაო პროცესი მუდმივად შემეცნებითია. დიდ ყურადღებას ვაქცევ გულწრფელ ურთიერთობას კოლეგებთან. თავდაუზოგავი შრომით უნდა მივაღწიოთ ნებისმიერ მიზანს, თუმცა ამ პროცესით თუ სიამოვნება ვერ მივიღეთ, რა აზრი აქვს. გასართობი ნაწილი დიდ როლს ასრულებს ჩვენს კომპანიაში. გართობაში არასერიოზულობას და არაპროფესიონალიზმს არ ვგულისხმობ.
თითოეულ თანამშრომელს ვენდობით, ვაფასებთ ერთმანეთს და ვქმნით მრავალფეროვან, პოზიტიურ გარემოს ჩვენივე პროდუქტიულობისთვის. სხვანაირი გარემო, უბრალოდ ვერც წარმოგვიდგენია. ხალისი ერთ-ერთი მთავარი კომპონენტია ბრენდის წარმატების, ჩვენ ვქმნით მულტიკულტურულ გარემოს სხვადასხვა ქვეყნის მომხმარებლისათვის.


- უამრავი მიმდევარი ელოდებოდა H&M-ის შემოსვლას საქართველოში, განაპირობა თუ არა შემდეგმა პრინციპმა ეს ყველაფერი - "მოდა და ხარისხი საუკეთესო ფასად"

-კლაუდია
რა თქმა უნდა. ბრენდის კონცეფცია განსაზღვრავს მომხმარებლის ინტერესს. ეს პრინციპი გარკვეულწილად ბიზნესკომუნიკაციაა საზოგადოებასთან. მოუთმენლად ველით ყოველ დღეს, რათა ნებისმიერი მომხმარებელი კმაყოფილი დარჩეს ჩვენთან ვიზიტითა და ურთიერთობით.
ჩვენი მისიაა ყველაზე საყვარელი ბრენდი გავხდეთ ქართველებისთვის, რადგან "ფიდბექი", რომელსაც მომხმარებლისგან ვიღებთ, უდიდესი სტიმულია თითოეული მომუშავე პერსონალისთვის.


- დანილო
ეს ზუსტად ის საკითხია, რომელზეც მინდოდა საუბარი. ამ კითხვის პასუხი დაზუსტებით ვიცი. ნებისმიერი, ვინც ჩვენს მაღაზიაზე შეაჩერებს არჩევანს, აუცილებლად იგრძნობს ენერგიას, რომელსაც გავცემთ, ეს ენერგია კი აუცილებლად დაბრუნდება ჩვენთან. H&M-ის სამოსი შეიძლება იყოს მოდიდან გადმოსულიც და მოდის შემქმნელიც.
როდესაც მთავარი აქცენტები გათვალისწინებულია კრეატივისა და ხარისხის ბალანსზე, გარდაუვალია, მომხმარებელი შთაგონებული არ დარჩეს.



-რა კუთხით ხედავთ საკუთარ როლს საქართველოში როგორც H&M-ის პიარისა და მარკეტინგის უფროსი?

- დანილო
ვფიქრობ, მარკეტინგის ყველა სპეციალისტი ზედმიწევნით უნდა ფლობდეს კონკრეტული ბაზრის სტრუქტურას. კარგ სპეციალისტს აუცილებლად უნდა შეეძლოს ინსპირაციის განსაზღვრა ისე, რომ ადგილობრივ კულტურასაც სცეს პატივი. სწორი ტაქტიკაა ინდივიდუალური მიდგომა კონკრეტულ ქვეყანასთან.
ჩემი როლი H&M-ში, როგორც პიარისა და მარკეტინგის უფროსისა, არის ის, რომ შევქმნა მოდური ამინდი საინტერესო კუთხით - უახლესი ტენდენციებითა და
სარეკლამო კამპანიებით. ჩემი მიზანია, სურვილი ვაქციო ხედვად, როგორც გლობალურ, ასევე ლოკალურ ჩარჩოებში. იმასაც გეტყვით, რომ ვგეგმავთ ფანტასტიკურ წვეულებებს, ისეთს, როგორიც ჩვენი მაღაზიის გახსნა იყო საქართველოში.



- რას ფიქრობთ ქართველ ხალხზე ?

-დანილო
სამუშაო პროცესის დროს და წვეულებებზე უამრავი ადამიანი გავიცანი. ვფიქრობ, განსაკუთრებული გემოვნება გაქვთ ქართველებს, რადგან რეალობამ მოლოდინს გადააჭარბა. ბევრი მოდაზე შეყვარებული ადამიანი ვიხილე, რომლებიც ნამდვილად გამოირჩეოდნენ საინტერესო სტილით და ტემპერამენტით. ენით აღუწერელია ის შეგრძნება, რომელიც საქართველოში პირველად ჩამოფრენისთანავე ვიგრძენი, ამდენი პოზიტივი და დადებითი ემოცია დაუვიწყარია ჩემთვის. ზოგადად, ხალხი ქმნის ქალაქს და ქვეყანას, საქართველოს განსაკუთრებული მხარე სწორედ სასიამოვნო ადამიანები არიან.

-კლაუდია
საქართველო საოცარი ქვეყანაა, მოჯადოებული ვარ თბილისის სილამაზით.
არ დამავიწყდება კადრების შერჩევის პროცესი, რომელმაც აღტაცებული დამტოვა. აღფრთოვანებული ვარ ქართველი მომუშავე პერსონალით. მათ ნამდვილად გააჩნიათ განსაკუთრებული უნარ-ჩვევები, რომელიც აისახა მენეჯმენტზე. ჩვენ არ გვქონდა დიდი დრო ტრენინგებისთვის, სხვა ქვეყნებთან შედარებით ქართველებმა ძალიან მოკლე პერიოდში სრულყოფილად აითვისეს ყველა საკითხი. ძალიან მიხარია, რომ გაგიცანით, ბედნიერი ვარ, რომ გვიპოვეთ და გიპოვეთ!


- ძალიან რთულია ბრენდმა აწარმოოს პროდუქცია, რომელიც სოციალურად განსხვავებული ფენებისთვის სასურველთან ერთად ხელმისაწვდომიც იქნება.

-კლაუდია
ჩვენთვის პრიორიტეტულია ბოლომდე მივყვეთ H&M-ის ფონდის იდეას, რომელიც ძალიან კარგად არის ბალანსირებული საზოგადოების სხვადასხვა ფენის სეგმენტზე. ჩვენს ბრენდს, როგორც მსოფლიოს ნებისმიერ კუთხეში, ისე ნებისმიერი ადამიანის კარადაში შეხვდებით. ვცდილობთ, მომხმარებელს შევთავაზოთ საუკეთესო ვარიანტი როგორც ხარისხით, ასევე ფასითაც.

- ყოველ ზაფხულს კომპანია ლიმიტრებულ კოლექციას სთავაზობს მომხმარებელს, Concious Exclusive, რით არის გამორჩეული ეს ხაზი?

კლაუდია
პირველ რიგში Concious Exclusive-ის ნებისმიერ კოლექციაში დიდ როლს ასრულებს ესთეტიკური მხარე. რაც შეეხება ხარისხს, თამამად შემიძლია ვთქვა, რომ ამ ხაზის ნებისმიერი სამოსი დამზადებულია 100% ნატურალური ქსოვილით. დიდ აღფრთოვანებას იწვევს ჩემში ეს ხაზი და ამიტომაც, ყოველთვის მოუთმენლად ველოდები.



- H&M ცნობილია გასაოცარი კოლაბორაციებით სხვადასხვა დიზაინერსა და ბრენდებთან...

-კლაუდია
კოლაბორაცია ერთ-ერთი საოცარი მოვლენაა ბრენდის სისტემაში. ჩვენ წარმატებულად ვთანამშრომლობთ სხვადასხვა ცნობილ ბრენდსა და დიზაინერებთან. მეტის გაკეთებას შევძლებთ, რომ ყოველწლიურად გავერთიანდეთ ერთი მიზნისკენ ყველაზე კრეატიულ დიზაინერებთან. იცით? შეყვარებული ვარ H&M-ის ბოლო კოლაბორაციაზე ERDEM-თან, სამოსი ნამდვილი საოცრება იყო. სხვათა შორის დანილოს ეცვა კოსტიუმი ამ კოლექციიდან და ფანტასტიკურად გამოიყურებოდა.

-დანილო
გმადლობთ, კლაუდია, გეთანხმები, ნამდვილად ზღაპრული კოლექცია იყო. გავიხსენებდი პერიოდს, როდესაც H&M-ის ოჯახის წევრი გავხდი, ძალიან პოპულარული იყო ალექსანდერ ვენგი და შესაბამისად კოლაბორაცია BALMAIN-თან, რომელიც დღემდე ერთ-ერთი განსაკუთრებული კოლექციაა ჩემთვის.


- თუ წარმოგიდგენიათ კოლაბორაცია ლოკალურ არტისტებთან? მაგალითად , ქართველ დიზაინერებთან...

დანილო -
ჩვენ ძალიან დიდ მოდის ბრენდებთან ვთანამშრომლობთ, ვაკვირდებით სხვების შესაძლებლობებსაც, რომელი მოერგება ბრენდის კონტენტს, კრიტერიუმებს... როცა ბაზარზე შევდივართ, ხშირად გვეკითხებიან პოტენციურ თანამშრომლობაზე ლოკალურ დიზაინერებთან. ვფიქრობ, გამიჭირდება პასუხის გაცემა, ნებისმიერი სიურპრიზია ბრენდისგან მოსალოდნელი, ამიტომ რთულია ამ საკითხის წინასწარ განსაზღვრა, მაგრამ არავინ იცის რა იქნება ხვალ. შეიძლება საოცრებაც მოხდეს, და უცნობი დიზაინერის სახელმა დიდი პოპულარობა მოიპოვოს მსოფლიოში.


- საინტერესო იქნება მკითხველისთვის, როგორ მუშაობს კრეატიული ჯგუფი დიზაინისა და ხარისხის გაუმჯობესების მხრივ?

- დანილო
ეს H&M-ის უნიკალური მახასიათებელია. ჯგუფი თავდაუზოგავად მუშაობს დიზაინის მიმართულებით და საუკეთესო ხარისხის პროდუქტს აწარმოებს. ისინი ნამდვილად ქმნიან ტენდენციებს, მუდმივად ახალი ინსპირაციის ძიებაში არიან, ეს კი შედეგზე ნათლად აისახება ხოლმე. ჩვენი კრეატიული ჯგუფის წყალობით გვაქვს ისეთი შედევრები, როგორიცაა STUDIO COLLECTION, რომელიც წელიწადში მხოლოდ ორჯერ, გაზაფხული/ზაფხულისა და შემოდგომა/ზამთრის კოლექციებში გვხვდება. ასევე Consious EXclusive, კოლაბორაცია დიზაინერებთან, რომელიც ძალიან გვიყვარს და მომხმარებელს აღაფრთოვანებს, კიდევ სხვა, რომელიც ბევრი ფიქრისა და შრომის შედეგად ვითარდება.
მაღალი ხარისხის თვალსაზრისით, ცალკე გვყავს ჯგუფი, რომელიც ეძებს განსაკუთრებულ მატერიებსა და ქსოვილებს. პრიორიტეტულია პროდუქციის სისტემატური გაუმჯობესებისა და განვითარების ნებისმიერი ასპექტი.


- კლაუდია, გვიამბეთ H&M-ის ფონდის შესახებ, ვიცი, რომ უამრავი სასარგებლო პროექტი განხორციელებულა გლობალური მასშტაბით...

-კლაუდია
კომპანიის გავლენით, გვაქვს შესაძლებლობა, შევქმნათ მსოფლიო უკეთესი, ეს პასუხისმგებლობაა. H&M მსოფლიოს მასშტაბით თანამშრომლობს უამრავ გამოცდილ ორგანიზაციასთან, რომელიც მუშაობს განათლების, წყლის და პლანეტის კეთილდღეობის საკითხებზე. ბრენდს ნამდვილად აქვს უნარი, ამბიციური მიზნებით შეცვალოს მსოფლიო უკეთესობისკენ, სისტემატურად გამართოს საქველმოქმედო კამპანიები გლობალურ ბაზარზე. ჩვენი მომხმარებელისგან დიდ მხარდაჭერას ვგრძნობთ მსგავსი პროექტების ჩართულობაში. H&M-ის ფონდს ვაიგივებ ოჯახთან, რომელიც არ იშურებს ბიუჯეტს სასარგებლო პროექტების განხორციელებისთვის, რათა მსოფლიო საცხოვრებლად უკეთეს ადგილად აქციოს. სწორედ ეს არის ჩვენი ერთ-ერთი მისია.




- აპირებთ თუ არა საქართველოს სხვადასხვა ქალაქში მაღაზიების გახსნას?

-კლაუდია
რა თქმა უნდა, ვაპირებთ. თუმცა, მთავარი ფოკუსი ჯერ თბილისზე გვაქვს, სულ ახლახან შემოვიდა ბრენდი ბაზარზე, სამომავლოდ აუცილებლად ვიმუშავებთ H&M-ის გაფართოებაზე.



ტექსტი - დათა ალექსეევი
ფოტო - ლაშა ღუღუნიშვილი

like
2

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.