უნიფორმა - საქმიანი ადამიანების ერთფეროვანი არჩევანი

საინტერესო თემების განხილვა გრძელდება ქ.ნ მანანა ანთელიძის ბლოგში.
ამჯერად ყურადღება შევაჩერეთ ექსტრავაგანტურ მოდის მოყვარულ ადამიანებზე. აგრეთვე ფენომენზე, რომელსაც უნიფორმას უწოდებენ. რა იწვევს უცვლელ გარდერობს წლების განმავლობაში: დროის ნაკლებობა, კრეატიულობის ნაკლებობა თუ უბრალოდ გულგრილი დამოკიდებულება ჩაცმისადმი. ახალი ბლოგის მთავარი თემაა.



- ახალი წლის დადგომასთან ერთად, როგორც წესი, გვიმძაფრდება ახალი ნივთების შეძენის სურვილი, მათ შორის - ტანსაცმლის. მით უმეტეს, როცა ყველა ბეჭდვითი თუ ონლაინ საშუალებით კეთდება რეკლამა ბოლო სიახლეებისა, რომელსაც Must Have-ად წარმოგვიდგენენ.
როგორ ფიქრობ, არის თუ არა მოდის ინდუსტრიის ყველა ეს
საშუალება საკმარისი, რომ აიძულოს ადამიანი, შორს გადადოს ის, რაც წინა წელს, საახალწლოდ, შეიძინა და დაიხარჯოს ახალი ტანსაცმლისა და აქსესუარებისთვის?


- რა თქმა უნდა, ვიცნობთ ასეთ ადამიანებს და მათთვის ნაკლებად მნიშვნელოვანი საბაბიც კი არის საკმარისი. გარდა მოდური ტანსაცმლის დიდი სიყვარულისა, მათ უთუოდ უნდა გააჩნდეთ ფინანსური შესაძლებლობა გარდერობის მუდმივი განახლებისთვის.
მიუხედავად იმისა, რომ კარგად მესმის მათი დაუოკებელი სურვილისა, შეიძინონ ესა თუ ის ახალი ნივთი (თავად არაერთხელ ვყოფილვარ დატყვევებული!) წინააღმდეგი ვარ "სწრაფი მოდის".

  

- ერთ-ერთ წინა ბლოგში ჩვენ შევეხეთ "სწრაფი მოდის" მავნებლობის საკითხს - შენ ისაუბრე იმ ეკოლოგიურ კატასტროფაზე, რომელსაც იწვევს გადაყრილი ტანსაცმლის კოლოსალური რაოდენობა. ახლა კი ვსაუბრობთ არა მასსმარკეტ-ის ნაწარმზე, რომელსაც შედარებით დაბალი ფასი აქვს და ამიტომ ადვილადაა გამეტებული გადასაგდებად, არამედ დიზაინერულ ტანსაცმელსა და აქსესუარებზე.

- დიახ, მათ არ აგდებენ, მათ ინახავენ, მაგრამ დგება დრო და ვერც ერთი გარდერობი, ვერც საგარდერობე ოთახი ვერ იტევს ამ რაოდენობის ნივთებს. ასეთი მასშტაბური კოლექციის მფლობელი მისი მსხვერპლი ხდება.
ვიცნობ მოსკოველ ქალს, რომელიც იძულებული გახდა, თავისი ბინის გვერდით კიდევ ბინა ექირავებინა თავისი ტანსაცმლის, ფეხსაცმლისა და აქსესუარების შესანახად. ის Shopaholic-ია. ეს კი უკვე ავადმყოფური დამოკიდებულების ნიშანია, ნარკომანიის მსგავსი.
კიდევ უფრო რთულ შედეგს ვიღებთ, როცა სიყვარული და პროფესია ერთ ობიექტს - მოდას უკავშირდება. ამის მაგალითია Anna Dello Russo, ჟურნალ Vogue Japan-ის მთავარი რედაქტორი. ის ცნობილია, როგორც ერთ-ერთი ყველაზე ექსტრავაგანტურად ჩამცმელი ადამიანი მოდის სამყაროში.

- House of Lavande-სთან ინტერვიუში ამბობს, რომ პატარაობიდან შეპყრობილი იყო ტანსაცმლის სილამაზით, ამიტომაც თავისი ცხოვრება მოდას დაუკავშირა. 18 წლიდან ის უკვე Vogue Italis-ს და L'Uomo Vogue-ს რედაქტორია.



- მის გარდერობზე ბევრს წერენ. ADR-ს კოლექცია უნიკალურია თავისი სისტემური მიდგომით, განსაკუთრებული ადგილი უჭირავს მათ შორის ფეხსაცმლის კოლექციას.
- ეს შედგება 4 000-ზე მეტი წყვილი ფეხსაცმლისგან. გამაოგნებელი რაოდენობაა მუზეუმისთვისაც და საჭიროებს არა მარტო ადგილს, არამედ განსაკუთრებულ პირობებსაც. ADR აღნიშნავს, რომ კოლექციის საგნების განთავსება არ შეიძლება საცხოვრებელ ფართობში, მათზე რომ არ დაიყაროს ადამიანის ქმედებისგან გამოწვეული მტვერი, გარდა ამისა, ტემპერატურა და ტენიანობა უნდა იყოს უცვლელი.


როგორც ხედავთ, მოდის მიმართ განსაკუთრებული სიყვარული ბევრ სირთულესთან არის დაკავშირებული და რამდენად სერიოზულია ეს სირთულეები, ჩანს ADR-ის პასუხიდან ჟურნალისტის კითხვაზე - გყავთ თუ არა Boyfriend? - დიახ, მყავს, მაგრამ ის ჩემთან არ ცხოვრობს, აქ არ არის მისი ადგილი, აქ ტანსაცმელია.

- აქვე მინდა გავიხსენო მოდის სამყაროს მეორე უკიდურესობა Diane Pernet - ძალიან გავლენიანი პიროვნება French Internacional Fashion-ის ბლოგერი და კრიტიკოსი.

- დიახ, ის ერთ-ერთი პირველთაგანი იყო ონლაინჟურნალისტიკაში. ასევე, დამაარსებელი და დირექტორია Fashion Film Festival: A Shaded View on Fashion Film (ASVOFF).

- Diane Pernet-მა ასევე ადრეულ ასაკში იწყებს თავის გზას მოდის სამყაროში - ჯერ მოდის დიზაინით ნიუ-იორკში, კოსტიუმის დიზაინით ფილმებში, რედაქტორად სხვადასხვა მოდის ჟურნალში, მათ შორის Elle-სა და Vogue-ში. ამ დროს ყალიბდება მისი გარეგნული იერი: მაღლა აწეულ თმაზე შალი, ესპანური მანტილიის მსგავსი, მუქი სათვალეები, რომლებიც საიდუმლოდ ფარავენ თვალებს, ბლუზა და ბლაიზერი ფართო სილუეტის მაქსიქვედაბოლოსთან, ფეხსაცმელი მაღალ პლატფორმაზე. ყველაფერი ეს მუქი, უფრო ხშირად - შავი.

ტანსაცმლის ასეთი არჩევანი მან გააკეთა ჯერ კიდევ 80-იან წლებში. რამ უბიძგა ამისკენ? Diane Pernet პასუხობს, რომ მას ძალიან მოსწონდა ლუკინო ვისკონტისა და პაოლო პაზოლინის ნაღვლიანი, მაგრამ ძალიან სექსუალური გმირი ქვრივები. მიუხედავად იმისა, რომ პირველი ქმარი ადრე გარდაეცვალა, მისი შემდგომი ცხოვრება ეჭვს გვიჩენს, რომ მისი არჩეული იმიჯი პირადი გლოვის ნიშანია. მაშ, რა აიძულებს ქალს, რომელმაც იცის მოდა და, შეიძლება ითქვას, თავად ქმნის მას, უარი თქვას ასე ადვილად მისაღწევ მრავალფეროვნებაზე?

როგორც მოდის კრიტიკოსი, იგი ხაზგასმით ანიჭებს უპირატესობას ახალგაზრდა, ავანგარდულ დიზაინერებს, თვითონ კი 30 წელზე მეტია, პრინციპულად კონსერვატული რჩება თავისი ტანსაცმლის არჩევისას, რომელიც უნიფორმას დაამსგავსა.

- უნიფორმის წარმოთქმისას არ შეიძლება არ გაგვახსენდეს Karl Lagerfeld. ბევრს ახსოვს იგი სულ სხვა გარეგნობის, სრული და მოშვებული. როდის ჩამოყალიბდა მისი ცნობილი იმიჯი?



- მისი სახეცვლილება მოხდა 2000-იან წლებში და Dior Homme-ში Hedi Slimane-ის კრეატიულ დირექტორად დანიშვნასთანაა დაკავშირებული. Slimane-ის მამაკაცის დახვეწილმა კოლექციებმა მოაჯადოვა ყველა, მიუხედავად სქესისა: Madona, Tilda Swinton, Uma Thurman და სხვა უკვეთდა პერანგებს, შარვლებს, ბლაიზერებს დიდი რაოდენობით, უცვლელი სახით. მოხდა მისი ტანსაცმლის, ელეგანტურის და ამავდროულად, ოდნავ დაუდევრის ფეტიშირება.



Karl Lagerfeld-ზე ამ ტალღამ იმდენად იმოქმედა, რომ უბიძგა, სრულად შეეცვალა იმიჯი. იმისთვის, რომ მოერგო შლიმან-ის ვიწრო ბლაიზერები, მან 40 კილოზე მეტი დაიკლო. მისი საბოლოო სახე კი ძალიან ინდივიდუალურია. გამოირიცხა ყოველგვარი დაუდევრობა: მაღალი საყელო აიძულებს ამაყად თავის დაჭერას, მუდმივი შავი სათვალე ახდენს ყველასგან დისტანცირებას, თითგადაჭრილი ხელთათმანი სძენს როკერულ იერს, ამავე კატეგორიიდანაა მისი ფეხსაცმელიც. წლიდან წლამდე იცვლება მხოლოდ ბლაიზერის ფერი და ყელსაბამ-სამკაულები. მთავარი - სილუეტი უცვლელია. აი, აქაც, როგორც Diana Pernet-ის შემთხვევაში, ძნელი სათქმელია, რა არის ერთგულების საფუძველი. კრეატიულობის ნაკლებობას რომ ვერ დავაბრალებთ, ეს უდავოა.



- აქვე მახსენდება სხვა Fashion-დიზაინერები, რომელთა იერი ნაკლებად თეატრალურია, მაგრამ ასევე უცვლელი რჩება რამდენიმე ათეული წლის განმავლობაში. მაგალითად, Giorgio Armani - ლურჯი ჯამპერ, მუქი შარვალი და ჩოგბურთის ფეხსაცმელი. შეგვიძლია, გავაგრძელოთ სია: Michael Kors, DRies Van Noten, Tommi Hilfinger... და იმისთვის, რომ შევეცადოთ, გავიაზროთ, რატომ აცვიათ გამოჩენილ კრეატიულ ადამიანებს უნიფორმა, მინდა შევჩერდე დიზაინერ Vera Wang-ზე (ყველაზე მეტად ცნობილია საქორწინო კაბებით). დიზაინერს, რომელიც ქმნის კაბებს ქსოვილის დიდი რაოდენობისგან, ბევრი რთულად შესასრულებელი დეტალით, მუდმივად აცვია შავი ფერის ლაკონიური მაისური და ლეგინსები (არა შარვალი!). აი, ამ მაქსიმალური სისადავის დაპირისპირებაში რთულთან, ვხედავ არჩეული იერის ერთგულების მიზეზს. Vera Wang თითქოს აბსტრაგირებს მრავალფეროვანი სილუეტებიდან, ქსოვილებიდან, ფაქტურებიდან და თავად ლაკონიურ ფონად იქცევა თავისი შემოქმედებისთვის.



დაახლოებით ასეთივე მოტივაცია აქვს ახალგაზრდა ბრენდ Jonatan Andesron-ს კრეატიულ დირექტორს, რომელსაც ბოლო წლების პრესა ყველაზე პრესტიჟულ და საინტერესო ბრიტანელ დიზაინერად ასახელებს. ის ატარებს Sveater-ს და ჯინსებს, ერთი და იმავე ფირმის Sneakers-ებს და Ked-ს, თითქოს ფრთხილობს თავისი ყურადღების გაფანტვას, თავის თავზე დროის დაკარგვას.



- საინტერესოა, როგორია თანამედროვე გენიოსების, Stive Jobs-ისა და Marc Zuckerberg-ის გარდერობის შექმნის მოტივაცია?

- Stive Jobs-ი მუდმივად ატარებდა Issex Myire-ს შავ Longneck Sweater-ებს, Lev'is-ის ჯინსებს და New Balance-ის Sneakers-ებს.



Marc Zuckerberg-ის გარდერობი კიდევ უფრო მოსაწყენია - ბევრი ნაცრისფერი T-Sirt და Hoodie, ლურჯი ჯინსი და სპორტული ფეხსაცმელი. რატომ ასეთი ერთფეროვნება? ამ კითხვაზე ორივეს მსგავსი პასუხი ჰქონდათ: ეს აძლევს მათ საშუალებას, არ შეიწუხონ თავი არჩევანის გაკეთებაზე, რადგან არჩევანი არც არსებობს.



არ ვიცი, გარდერობის შექმნამდე იცოდნენ თუ არა მათ მეცნიერთა ბოლო კვლევების შესახებ, რომლის მიხედვით, ადამიანის ნებისყოფა უსაზღვრო არ არის და ნებისმიერი გადაწყვეტილების მიღება, თუნდაც არჩევანის გაკეთება, თუ რა ჩაიცვა, ამ ძვირფასი ნებისყოფის შემცირებას იწვევს!



არ ვიცი, რამდენად უნდა ვენდოთ ამ კვლევების შედეგებს, მაგრამ ფაქტი ასეთია: სულ უფრო მეტი ადამიანი და, როგორც წესი, თავისი საქმით ძალიან დაკავებული ადამიანები ირჩევენ ერთფეროვნებას.

- ჩვენ განვიხილეთ მოდის მიმართ დამოკიდებულებით განსხვავებულ ადამიანთა ორი ჯგუფი. როგორია შენი პოზიცია ამ საკითხის მიმართ?

- მოდა თამაშის მსგავსია კოსტიუმების ცვლით. ის შეიძლება თეატრს შევადაროთ - და მასში მონაწილეობის მიღება ძალიან მიმზიდველია.
პირველი ტიპის ადამიანებს, ე.წ. Shopaholic-ებს დაჰყავთ ეს თამაში აბსურდამდე და მის მსხვერპლად "Fashionvirtim-ად" იქცევიან. მეორე ტიპის ადამიანებს ან არა აქვთ დრო, მიიღონ მონაწილეობა ამ პროცესში, ან არ სჭირდებათ თავისი თავის გამოხატვა ტანსაცმლის საშუალებით - მათ სხვა თამაშები აქვთ.
მე პირადად ვემხრობი გარდერობის ოპტიმიზაციას - კაფსულა-კოლექციის შექმნას ყოველი ადამიანისთვის ინდივიდუალურად. კაფსულა-კოლექციის გათვალისწინებით კი ახალი ნივთების შეძენას მივყავართ ჩვენს გარდერობში ტანსაცმლის რაოდენობის შემცირებასთან.


ასევე დაგაინტერესებთ:

კომფორტის ზონიდან გამოსული ახალი ესთეტიკა - მანანა ანთელიძის ბლოგი

მოდელების ინდივიდუალობა - მანანა ანთელიძის ბლოგი



like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.