თაკო ნაცვლიშვილის ტრიუმფი და ფიასკო პოდიუმზე

თაკო იმ ულამაზესი სამყაროს ნაწილია, ბავშვობაში Fashion TV-ს სიუჟეტებში რომ გვინახავს.
მისი ბრწყინვალე სამოდელო კარიერა ბევრი გოგონასთვის საოცნებოა და იმედი, რომ ყველაფერი შესაძლებელია. იგი პირველი ქართველი მოდელია, რომელმაც მაღალი
მოდის
პოდიუმზე გზა გაიკვალა. უთანამშრომლია ყველა იმ პრემიუმმარკასთან, რომელიც მსოფლიო მოდის ინდუსტრიაში ამინდს ქმნის.

გადაღებებზე არაჩვეულებრივად ფლობს ემოციებს და სასიამოვნოა მასთან თანამშრომლობა. იგრძნობა, რომ მაღალი კლასის პროფესიონალთან გაქვს შეხება.
გარეგნულ სილამაზესთან ერთად, მისი მშვენიერი შინაგანი სამყარო საოცრად მიმზიდველია, რაც თაკოსთან შეხვედრას ყოველთვის სასიამოვნო წუთებად აქცევს.



- თაკო, ახლა, როცა სამოდელო კარიერის მწვერვალზე ხართ, გაიხსენეთ ის პირველი ნაბიჯი, რომელიც ამ გზაზე ყველაზე მეტად დაგეხმარათ?

- ჩემი წარმატებული კარიერა, უპირველესად, დედას დამსახურებაა. დედას მსოფლიოს წამყვან სააგენტობთან აქვს საქმიანი კონტაქტები, რაც საქმიანობაში დამეხმარა. თავიდანვე კარგ სააგენტოში მოვხვდი. მხოლოდ ამ სფეროში არა, თანამედროვე სამყაროში საჭირო კონტაქტები, ვფიქრობ, გადამწყვეტია.
მოდის ინდუსტრიაში მნიშვნელოვანია გარეგნული მხარეც. ჩემზეც ბევრი რამ იყო დამოკიდებული. ძალიან მონდომებული ვიყავი და მთელი ჩემი არსებით გადავერთე საქმეზე. საკუთარ თავზეც ბევრი ვიმუშავე.

- საკუთარ თავზე მუშაობა... რა ნაბიჯებს გულისხმობთ?

- ეს გულისხმობს სამუშაო ფორმაში ყოფნას. აუცილებელია ასევე თავდაჯერებულობა. მნიშვნელოვანია ის ფაქტორიც, რომ მაქსიმალურად ვთანხმდებოდი ფოტოსესიების გადაღებებს. შედარებით არამიმზიდველ წინადადებაზეც კი უარს არ ვამბობდი... გარკვეული თვალსაზრისით, ასეთმა მიდგომამ დიდი გამოცდილება
შემძინა. ჩემი პორტფოლიოც მიმზიდველი გამოვიდა, რაც ასევე მნიშვნელოვანია. როცა მოდელს შთამბეჭდავი პორტფოლიო აქვს, მეტ ყურადღებას იმსახურებს.



- პირველი მნიშვნელოვანი ნაბიჯი გაიხსენეთ და ის სააგენტო, რომელიც დაგეხმარათ?

- პირველი სააგენტო, რომელთანაც გავაფორმე თანამშრომლობის ხელშეკრულება, ჰონკონგში მდებარეობდა. მაშინ 15 წლის ვიყავი. ეს გახლდათ სააგენტო ELIT-ი. ჰონკონგში დავყავი დაახლოებით სამი თვე და გადავედი ტაივანში. აი, იქ მართლაც ძალიან გამიჭირდა. სრულიად სხვა სამყაროში აღმოვჩნდი, სრულიად სხვა კულტურისა და გამოცდილების მქონე ქვეყანაში.  ჩინეთი საკმაოდ საინტერესო, თუმცა რთული ქვეყანაა. იმდენად განსხვავებული დამოკიდებულება აქვთ თავად მოდის ბიზნესის მიმართ, რომ მუშაობა გამიჭირდა. ვცხოვრობდი მცირე ფართის ბინაში 6 გოგონასთან ერთად. დედა გამყვა პირობების სანახავად. როგორც კი ბინაში
შევედით და ის გარემო ვნახეთ, რომელიც დამხვდა, უკან დაბრუნებაზე დავიწყეთ ფიქრი. დედა ნერვიულობდა. მე დარჩენა გადავწყვიტე. გავრისკე, რადგან ასეთ რთულ პირობებში ცხოვრება და მუშაობა ის გამოწვევა იყო, რომელიც მჭირდებოდა. უნდა მიმეღო მსგავსი გამოცდილება, რომ ევროპაში გადასვლა და მუშაობა არ გამჭირვებოდა. სამოდელო კარიერის ყველა დეტალს რომ ვიხსენებ, ყველაზე რთული პერიოდი ჩინეთს უკავშირდება. შემდეგ, როცა ევროპაში გადავედი, აღარაფერი
მიქმნიდა დისკომფორტს. ჩინეთის მერე ყველაფერი მიმზიდველი მეჩვენებოდა. ასეთი სირთულე რომ არ გადამელახა, ევროპულ მიდგომას ვერ დავაფასებდი, ვერც ალღოს ავუღებდი.

- გაიხსენეთ პირველი ნაბიჯები, რომელიც ევროპულ სააგენტოებს უკავშირდება.…

- პარიზში რომ ჩავედი, 16 წლის ვიყავი. სააგენტოში გადამიღეს ფოტოები, შეხვედრები მქონდა ცნობილი მარკების, Versace-სა და Gივენცჰყ-ს წარმომადგენლებთან.
იმ პერიოდში პარიზში უნდა გამართულიყო 2015 წლის ოტ კუტიური. მათთვის ახალი სახე ვიყავი და დაინტერესდნენ. მოდის კვირეულებისთვის ახალ სახეებს
ყოველთვის ეძებენ. მაშინ გამოვედი იოჯი იამამოტოს ჩვენებაზე. მალევე დაიწყო პარიზის მაღალი მოდის კვირეული, სადაც გამოვედი: Versace- ს, Armani-ს, Elie Saab- ის, Dior-ის, Ralph&Russo- ს ჩვენებებზე.



- ასეთი წარმატება ალბათ მოულოდნელი იყო...

- ნამდვილად. იმდენად მიუჩვეველი ვიყავი მაღალი მოდის პოდიუმს, ამასთან მაღალი კლასის გამოცემებთან თანამშრომლობას, არ მეგონა, რომ ასე მალე მივაღწევდი პროფესიულ წარმატებას. ერთმა დიზაინერმა რომ შემამჩნია და ამირჩია, მალევე სხვებიც დაინტერესდნენ.

- რომელ დიზაინერთან შეხვედრა აღმოჩნდა დასამახსოვრებელი?

- ჩემთვის ყველაზე შთამბეჭდავი მაინც Versace-ს ჩვენება აღმოჩნდა. მაშინ პირველად მსოფლიოში ცნობილ ტოპმოდელებთან ერთად მომიწია პოდიუმზე გამოსვლამ. ბექსთეიჯშიც საინტერესო ამბები ხდებოდა. ნაომი ქემბელი შემოდიოდა ჩვენთან. თავი ფეშენთივის გადაცემებში მეგონა, მთელი ბავშვობა თვალს რომ ვადევნებდი. დაუჯერებელი ბედნიერება იყო, რომ ამ ყველაფრის ნაწილი ვიყავი. ბექსთეიჯში თავს ვერ ვაბრუნებდი, იმდენად ემოციურად ვიყავი. ჩემ უკან გამოსასვლელად ემზადებოდნენ ევა ჰერციგოვა და სხვა ტოპმოდელები. მათ თვალს სარკიდან ვადევნებდი. ახლა მივეჩვიე და ნაკლებად ვღელავ.

- მაღალი მოდის კვირეულზე მოდელებთან როგორ მუშაობენ? საინტერესოა პროფესიული უნარების ჩამოყალიბების ის გზა, რომელიც ამ პროცესში ვითარდება.

- შორიდან მიმზიდველად ჩანს ეს პროცესი. არადა, საკმაოდ რთული პროფესიაა. მოდა რთული სფეროა, წინააღმდეგობებით სავსე. თუ ყველგან ჩანხარ, აქტუალურობას არ კარგავ, ყველას ახსოვხარ. საკმარისია, წარმატებამ მოგადუნოს, რომ მეორე დღეს აღარავის ემახსოვრები. პოდიუმზე ტრიუმფი და ფიასკო ერთნაირი დოზითაა მოსალოდნელი. ამიტომ მოდა დაუნდობელი ინდუსტრიაა. ბევრი მოდელი ვიცი, ვინც "ჩაქრა". საკმაოდ დიდი სტრესია მოდელისთვის, რომელიც მაღალი მოდის კვირეულებზე გამოდიოდა, მასზე მოთხოვნა იყო და უცებ მისით არავინ ინტერესდება. ამ ფაქტორს ყოველთვის ვითვალისწინებ. ამიტომ
ვცდილობ, ჩემთვის შედარებით არამიმზიდველ წინადადებასაც დავთანხმდე. ხშირად ვმონაწილეობ ფოტოსესიებში. ყურადღებას აქცევენ, თუ ჟურნალის გარეკანზე
მოხვდები. ეს ყველაფერი იმიტომ, რომ მოპოვებული პოზიცია არ დაკარგო. სულ წინ უნდა იარო. ბაზარზე დიდი კონკურენციაა. ბევრი გოგონაა, რომელსაც წარმატებული კარიერა უნდა და ძალისხმევას არ იშურებენ ამისთვის.



- თუ გახსენდებათ ჩვენება, სადაც ძალიან გინდოდათ გამოსვლა, მაგრამ ქასთინგზე უარი მიიღეთ. როგორ უმკლავდებით ასეთ წუთებს?

- Chanel-ის ქასთინგზე სამჯერ გავედი. აქედან ორზე პირდაპირ მივიღე უარი. ბოლო გასვლაზე, სულ ახლახან, პირველი ეტაპი წარმატებით გავიარე. დამიბარეს ე.წ. "ფითინგზე". სამწუხაროდ, კოსტიუმები მკერდზე არ მომერგო. გულდასაწყვეტი იყო, რადგან პირველი ეტაპი გადალახული მქონდა და სადღაც გულის სიღრმეში დარწმუნებული ვიყავი, რომ ამ ჩვენებაზე გამოვიდოდი. მანამდეც მქონია ასეთი იმედგაცრუებები და მივეჩვიე. ამიტომ ასეთი წინააღმდეგობების გადალახვა აღარ
მიჭირს. ქასთინგზე ისე გავდივარ, რომ შედეგზე ნაკლებად ვფიქრობ. ფიასკოს შემთხვევაში გული რომ არ მეტკინოს, ამ საკითხს მარტივად ვუდგები.

- რომელ ჩვენებას გაიხსენებთ, რომელიც შთამბეჭდავი იყო თქვენთვის, ამავდროულად - მნიშვნელოვანი?

- ჩემთვის ყველაზე დასამახსოვრებელი აღმოჩნდა ჩვენება, რომელიც Armani- ს 40 წლის იუბილეს დაუკავშირდა. მარკამ ჩვენება ოტ კუტიურის ფარგლებში ჩაატარა.
მაღალი მოდის კვირეულისთვის რა კოსტიუმებიც დიზაინერს შეუქმნია, ჩვენ, მოდელებმა მოვირგეთ. უზარმაზარი ჩვენება იყო. ამის გარდა, მნიშვნელოვანი იყო ის საზოგადოება, რომელიც ჩვენებას ესწრებოდა: ლეონარდო დი კაპრიო, ტომ კრუზი, პირს ბროსნანი, ქეით ბლანშეტი, თინა თერნერი... მთელი შოუბიზნესი და ჰოლივუდი დარბაზში იმყოფებოდა. სტუმრები ბექსთეიჯშიც შემოდიოდნენ და მართლაც შთამბეჭდავი იყო. ამიტომ ყველაზე ემოციურად ეს ჩვენება დამამახსოვრდა.

- ჩვენებების შემდეგ თუ რჩები ავთერფართიზე?

- ავთერფართიზე იშვიათად დავდივარ. სულ ორჯერ დავესწარი, Armani- სა და ღალფ&ღუსსო- ს შოუს. ასეთ ივენთებზე ძირითადად ის სტუმრები იყრიან თავს, რომლებიც მოდის ჩვენებებს ამზადებენ. ნაკლებად შეხვდებით ცნობილ სახეებს. ორივე ივენთზე სასიამოვნო გარემო იყო შექმნილი. Ralph&Russo- ს ივენთზე
შეხვდებოდით არაბული ქვეყნების ბევრ წარმომადგენელს. ეს ივენთი ცნობილ კლუბში "მონტენი" გაიმართა.



- რომელ ფოტოსესიას გაიხსენებ, რომელიც თქვენთვის საინტერესო აღმოჩნდა? - დასამახსოვრებელი იყო Armani- ს გადაღებები. გავიგე, რომ იღებდნენ "ქემფეინისთვის". იღებდა ცნობილი ფოტოგრაფი. გადაღებულ ფოტოებს პირდაპირვე უგზავნიდნენ არმანის და ის ოფისიდან ამტკიცებდა. საკმაოდ ხანგრძლივი პროცესი იყო. ორი დღის განმავლობაში მიმდინარეობდა. ჯგუფის წევრებიც არაჩვეულებრივი ადამიანები და პროფესიონალები იყვნენ. ვისიამოვნე პროცესით
და გადამღებ ჯგუფთან ურთიერთობით. ეს დღეები ყოველთვის სასიამოვნოდ გამახსენდება. მნიშვნელოვანი გადაღება იყო პროფესიული კუთხით. ფოტოგრაფთან
მუშაობას გამოვყოფდი და ის, რომ თავად არმანი იყო ჩართული ამ პროცესში. ვცდილობდი, ზუსტი ვყოფილიყავი და მათი მოთხოვნა მაქსიმალურად დამეკმაყოფილებინა. მოდის სახლ Armani- ს ყველა მაღაზიის ვიტრინებზე ეს ფოტოები განათავსეს. ამის მერე კიდევ მეტი დიზაინერი დაინტერესდა ჩემით. ყველაზე
რთული გადაღება, რომელიც დღემდე მახსოვს, ნიუ-იორკში მქონდა. ზამთრის სეზონი იყო და ყინვაში ზაფხულის კოლექციას ვიღებდით. თან ძალიან ნელ ფოტოგრაფთან ვმუშაობდი. ერთ კადრზე ნახევარი საათი მუშაობდა. დილის 6 საათზე დაწყებული გადაღება საღამოს 11 საათზე დასრულდა. სიმართლე გითხრათ, ძალიან გამაღიზიანა ამ პროცესმა, მაგრამ ვერ გამოვხატავდი. მაქსიმალურად თავშეკავებული ვიყავი. არც სიცივე და ყინვა უნდა ასახულიყო ჩემს ემოციებზე. ყველაფერი ჩემი გაცივებით დასრულდა.

- რა აუცილებელ უნარებს უკავშირდება მოდელის პროფესია?

- მნიშვნელოვანია გარეგნული მხარე და სიმაღლე. ასევე მნიშვნელოვანია შინაგანი სამყარო, რომელიც მოდელის ხასიათსა და გარეგნობაზე აუცილებლად აისახება. საინტერესო უნდა იყო. აუცილებელია მიზანდასახულობა და თავდაჯერებულობა. შეიძლება სულ არ იყო ლამაზი, მაგრამ საინტერესო გარეგნობა თუ გაქვს, მიზანს აუცილებლად მიაღწევ. სამოდელო ბიზნესში ბევრი გოგონაა, რომელსაც ე.წ.  უნისექსი გარეგნობა აქვს, შედარებით მკაცრი სახე, მაგრამ წარმატებული კარიერა აქვთ.

- ნაბიჯი, რომელიც ყველაზე წარმატებული აღმოჩნდა და შეცდომა, რომელიც დაუშვით...

- წარმატებული ნაბიჯი იყო ჰონკონგში წასვლის გადაწყვეტილება. მიუხედავად იმისა, რომ ცუდ მოგონებებს უკავშირდება, ძალიან დიდი გამოცდილება მომიტანა.
ბევრი რამ გადავაფასე და მოვლენები სხვა რაკურსით დავინახე. ვფიქრობ, რომ შეცდომა არ დამიშვია.



- თავს როგორ უვლით მოდელები, რომ ფორმა შეინარჩუნოთ?

- ფორმის შენარჩუნებაზე ვმუშაობთ. ყოველდღიურად ვვარჯიშობთ. საქართველოში ერთ-ერთ სპორტულ კლუბში დავდივარ. ვვარჯიშობ ტრენაჟორებით, რადგან
მეტად შედეგიანია. ვარჯიშს ყოველთვის ტრენერთან კონსულტაციით ვიწყებ. ის მირჩევს პროგრამას, რომელიც მჭირდება, ზედმეტად დაკუნთული სხეული რომ არ გამომივიდეს. ასევე მივმართავ "გაწელვებს", რათა სხეულის ლამაზი ფორმები მივიღოთ. Victoria's Secret-ის ქასტინგის წინ ერთ-ერთ ცენტრს მივმართე, სადაც
Victoria's Secret-ის გოგონები ვარჯიშობენ. მავარჯიშებდა ცნობილი ტრენერი. ორი კვირის განმავლობაში აქტიურად დავდიოდი ამ კლუბში. ძალიან გამიჭირდა, რადგან უმკაცრესი ტრენერი მყავდა. ცრემლებამდე მივდიოდი. ასეთ დატვირთვას ვერ ვუძლებდი. სამაგიეროდ, ორ კვირაში საოცარ შედეგს მივაღწიე. ასეთი შედეგისთვის არსად მიმიღწევია. მნიშვნელოვანია სწორი კვებაც. რაციონი თუ სწორად არ შეირჩა, შრომა წყალში ჩაგეყრება. ვარჯიშის პარალელურად ორი თვე დიეტაზე ვიყავი.

- სახის კანს როგორ უვლით?

- რადგან ხშირად მიწევს პროფესიული მაკიაჟის ტარება, სახეს განსაკუთრებულ ყურადღებას ვაქცევ. ყოველდღიურად ყველა აუცილებელ პროცედურას ვიტარებ.
მაკიაჟს არასდროს ვიტოვებ სახეზე. მივმართავ სახის და თვალის ტონიკებს, წამწამებზე აუცილებლად ვიყენებ აბუსალათინის ზეთს. არაჩვეულებრივი შედეგი მომცა
ექიმის, ინა ზემცევას რეცეპტით მომზადებულმა ლოსიონმა. ყველაზე რთული თმის მოვლა აღმოჩნდა. გადაღებებსა და ჩვენებებზე ხშირად იყენებენ ლაქს და ცხელ უთოს, რაც თმას აზიანებს. შემდეგ უკვე რთულდება მისი მოვლა. ამიტომ, თმის დაზიანებულ ბოლოებს, ხშირად, ცხელი მაკრატლით ვიჭრი. "კერასტასის" ნიღბებიც მოაგვარებს პრობლემას. თმის დამარბილებელი და გამაჯანსაღებელი საშუალებაა.

- როგორი სტილის სამოსს ატარებ, რომელი დიზაინერები მოგწონს და სად იყიდება თქვენთვის საინტერესო ტანსაცმელი?

- თრეში სტილი არ მომწონს. კლასიკური სტილისკენ უფრო ვიხრები, მიუხედავად იმისა, რომ ყოველთვის არ ვატარებ ამ სტილის სამოსს. აუცილებლად შევიტან ხოლმე სპორტულ ელემენტს. უკეთეს კომბინაციას ვიღებ. არ ვარ ორიენტირებული ბრენდულ სამოსზე. ზედმეტად ბრენდებით შემოსილი ადამიანები არ მომწონს.
ბრენდული უნდა მქონდეს სამი აქსესუარი - ჩანთა, სათვალე და ფეხსაცმელი. იმიტომ, რომ ხარისხიანია. რაც შეეხება სამოსს, საშუალო კლასის მარკებიც მაკმაყოფილებს. ტანსაცმელს ვყიდულობ ნიუ-იორკსა და ლონდონში, რადგან ამ ქალაქებში ყველაზე კარგი არჩევანია. ინგლისელი დიზაინერების სამოსს სხვაგან ვერსად წააწყდები. მომწონს და ვატარებ ვინტაჟის სტილის სამოსს. ვინტაჟსთორებსაც ხშირად მივმართავ. ასეთ მაღაზიებში ბევრ საინტერესო და ხარისხიან ნივთს წააწყდები. ასეთი ადგილები ბევრია ნიუ-იორკში.



- თაკო, დამწყებ მოდელებს რას ურჩევდი, მათთვის მნიშვნელოვანია იმ გამოცდილების გაზიარება, რომელიც წარმატებაში დაგეხმარა?

- არასდროს მიაქციონ ყურადღება არავის აზრს, რომ არაფერი გამოუვათ და მსოფლიოში წამყვან პოდიუმებზე გამოსვლა მათთვის მხოლოდ ოცნებად დარჩება.
როცა რაღაც გულით გინდა და მიზანდასახულიც ხარ, ყველაფერი გამოგივა. არ უნდა იყვნენ პრეტენზიულები. არ უნდა თქვან უარი გადაღებებზე. ბევრი მოდელი
ვიცი, ვინც მხოლოდ მისთვის მიმზიდველ წინადადებას თანხმდება.

- რამდენიმე წლის მერე საკუთარ თავს სად ხედავთ?

- ისევ ევროპაში. სწავლის გაგრძელებაზე ვფიქრობ. მომდევნო სამი წელი მოდელის კარიერას დავუთმობ, რომ მაქსიმალურად ამოვწურო ყველა შესაძლებლობა.
შემდეგ წლებს სწავლას დავუთმობ. პარალელურად არც გადაღებებზე ვიტყვი უარს.

ქეთი დარჩია

ასევე დაგაინტერესებთ:

თაკო ნაცვლიშვილის ტრიუმფი Zuhair Murad-ის ჩვენებაზე პარიზში

თაკო ნაცვლიშვილი პლანეტის საუკეთესო გოგონად დასახელდა

თაკო ნაცვლიშვილი RALPH & RUSSO COUTURE-ის ჩვენებაზე - პარიზის მაღალი მოდის კვირეული
like
0

კომენტარები

eh-s 2018-11-08 11:22
sartod ra mosatani iyo exla eg shedareba...
Niania 2018-08-31 14:23
Fashion sfero martlac udznelesia,15 celze metia mag buzneshi bar NY-shi da avgnishnv rom es gogo asakatan ertad ufro damshvenda da damajerebeli gaxda,tumca jer vinaa aqvs yvelaferi,magram isic unda gaitvaluscinos,rom es sfero male "berdeba"!
Carmatebebi!
mixaria qartvelis gamochena!
kk 2018-05-08 09:12
ძალიან კარგი გოგოა და მინდა უფრო მეტს მიარწიეოს,შანელმა რომ დაიწუნა ძაან ღადაობა,კრისტენ სტიუარტი შანელის სახე რო იქნება და ლაგერფილდის მუზა ,კოკო შანელი ალბათ საფლავში ბრუნავს.
eh 2018-04-19 14:51
zalian lamazia mgram exla rom mxecma gogo mokla, maminacvalma is kidev amas sjobda

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.