ვნების ინსტიქტი

ყოველთვის, როდესაც დამოუკიდებლად ვმოქმედებთ, ყველას გაგვაჩნია კონკრეტული მიზანი, რომელსაც პასუხისმგებლობა ახლავს თან.


ვფიქრობ, სწორედ ჩვენ ვართ საკუთარი თავის შემოქმედი - თავადვე ვემსახურებით ჩვენივე შექმნილ მოვალეობებს და ვქმნით ღირებულებებს, რომელსაც საბოლოო ჯამში მორალს ვუწოდებთ.

მივყვებით აუღელვებლად ცხოვრების დაუნდობელ რიტმს, ვიქმნით კარიერას, ვმსახურობთ და გვემსახურებიან. თითქოს, მორალურ ბიუროკრატიულ სისტემასაც კი ვაყალიბებთ, რომლის ფუნქციითაც ვამაყობთ. სად ქრება ჩვენ მიერ გადამალული სურვილები, რომელიც მოთხოვნილების ტოლფასიც შეიძლება ყოფილიყო? გვიფიქრია, იმაზე თუ როგორი ღრმაა თითოეულ ჩვენგანში აკრძალული ხილის ფენომენი?
და მაინც, ეგზისტენციალიზმი ჰუმანიზმია? ადამიანი ხომ, თავდაპირველად

საკუთარ თავს ეცნობა, შემდეგ კი წარმოდგენებს იქმნის სამყაროზე და მხოლოდ მას შემდეგ განსაზღვრავს არსებობის მნიშვნელობას, მოპოვებულ როლებს, რომელსაც დარჩენილი სიცოცხლის განმავლობაში მოირგებს.

ჟან პოლ სარტრიმ თქვა - ადამიანი არამარტო ისეთია, როგორადაც თავი წარმოუდგენია, არამედ ისეთიც, როგორიც მას სურს რომ იყოს.
რთულია ეგზისტენციალისტურ ფილოსოფიას ჩაუღრმავდე და იფიქრო არაცნობიერზე, რომელიც მშვიდად გვმართავს ან შეიძლება მარიონეტებადაც კი გვაყალიბებს, თუმცა შეუძლებელია დაუწერელი კანონების გარეშე არსებობა, თუნდაც იმიტომ, რომ ცხოველსა და ადამიანს შორის სხვაობა შევინარჩუნოთ, მაგრამ ცხოველური ინსტიქტები მარადიულია ადამიანში, ხასიათი კი უცვლელი...

ჩემი დღევანდელი ბლოგის სტუმარი ფოტოგრაფი სალი დუნდუაა, რომელმაც ეგზისტენციალისტური ხედვითა და ფროიდული ფილოსოფიით, პირობითად წარმოგვიდგინა არსება ხილის ნაყოფით, ან ხილის ნაყოფი არსებით, რომლის მთავარი ინსტიქტიც ვნებისა და ცდუნების პროვოცირებაა.



დათა ალექსეევი



FRUIT KISS



- სალი დუნდუა

ადამიანი იმ სამყაროში ცხოვრობს, რომელსაც აღიქვამს, ხედავს და განიცდის. საუკუნეების მანძილზე კაცობრიობა სხვადასხვა საშუალებებით ცდილობდა თვალსაწიერის გაცდენასა და სამყაროს მშვენიერების სრულყოფილ შეცნობას. მიმაჩნია, რომ ფოტოგრაფია ერთ-ერთი საშუალებაა იმისთვის, რომ ჩვენ გავცდეთ მოცემულობას, ჩაკეტილ სივრცეს და სამყარო ჭეშმარიტად შევიმეცნოთ. ზუსტად ამ ჭეშმარიტების ძიებაში გამიჩნდა სურვილი, თვითონვე ვყოფილიყავი მემატიანე, იმისა, რასაც ადამიანები ჩაკეტილი თვალსაწიერის გამო ვერ ხედავენ, ეს ყველაფერი კი აუცილებლად უნდა აღმებეჭდა საკუთარ ობიექტივში. ძალა, რომელიც მეხმარება სამყაროს აღქმაში და შემდგომ მის გადმოცემაში არის მუსიკა. ჩემთვის მუსიკა ინსპირაციის წყაროა, რომელსაც დასახულ მიზნამდე მივყავარ.
„Fruit Kiss” ქვეტექსტურად ეხება გრძნობებს ვნებასთან ერთად, მხოლოდ იმას რაც ჩვენში სუფევს და რომელთა გამოხატვა შეასაძლოა რეალურად გვინდოდეს, მაგრამ ვერ ვბედავდეთ...



იდი, ეგო და სუპერ ეგო.

სანამ გადავალ მთავარ საკითხზე, მინდა მოკლე მიმოხილვა გავაკეთო ეგოსა და სუპერ ეგოს მნიშვნელობაზე. ცნობიერების მეორე და მესამე დონე არის ეგო და სუპერ ეგო. სუპერ ეგო სოციალიზაციის პროცესთან ერთად ფორმირდება, იგი იდის დამთრგუნავი მექანიზმია და ცდილობს გაცხოველებული სწრაფვები შეცვალოს და გახადოს მორალური, ხოლო ეგო სურვილებს, როგორიც არ უნდა იყოს, ცდილობს უპოვოს სოციალური მექანიზმი, რომლითაც მძაფრ სურვილს ახსნის და ასევე განახორციელებს.ამ სამი ელემენტიდან მინდა გამოვყო ერთ-ერთი - „იდი“. წარმოვიდგინოთ სამყარო ეგოსა დ სუპერ ეგოს გარეშე, სადაც ცხოველურ დონეზეა დაყვანილი ადამიანის სურვილები და ქმედებები. შინაგანი სამყარო სრულიად იცვლება და ახლოს მიდის ადამიანის რეალურ სახემდე...


ამ პროექტით შევეცადე მეჩვენებინა თვალები, რომლებიც გამოხატავენ რეალური ვნებით სახეცვლილებებს. თვალები, საიდანაც ჩანს ტანჯვის სურვილი, გიბიძგებს სიღრმისეულად შეიგრძო მისტიკური, დაფარული მხარე.


ხელები, რომლებიც გაჩერებულია დამორჩილებასა და დაუმორჩილებლობას შორის, სურვილს გიჩენს უფრო მეტი დაინახო მის ქცევაში... ხილი, რომელიც მთავარ როლს ასრულებს, შუამავალია ადამიანებს შორის. ნაყოფი ამ შემთხვევაში წარმოდგენილია იმ ელემენტის სახით, რომელიც გვეხმარება დაფარული და სხვისთვის მიუწვდომელი ემოციების გამოხატვაში. თითოეული ხილის სახეობას თავისი დატვირთვა აქვს, ამ შემთხვევაში ადამიანთან ვაიგივებ შესაძლებელია საკუთარ თავთანაც კი, სუბიექტთან, რომელიც ვნებითი ქცევის გამოხატვის ეპიცენტრშია სადაც ქრება ეგო, სუპერ ეგო და რჩება მხოლოდ იდი. ადამიანი „იდთან“ და „იდი“ ადამიანთან.

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.