მოდელების ინდივიდუალობა - მანანა ანთელიძის ბლოგი

დარწმუნებით შემიძლია ვთქვა, რომ მოდის სამყარო არ იქნებოდა ასე მიმზიდველი, მისი განუყოფელი ნაწილი რომ არ ყოფილიყვნენ მოდელები - განსხვავებული ფიზიკური მონაცემების ადამიანები, რომლებსაც პოდიუმიდან თუ სარეკლამო ბილბორდებიდან მოაქვთ ჩვენამდე დიზაინერების ჩანაფიქრი.

გარდა გარეგნობისა - სიმაღლის, პროპორციების... მათ უნდა გააჩნდეთ სხვა მახასიათებლები: სხეულის უნაკლო ფლობა, არტისტიზმი, დამაჯერებლობა. ამას ეუფლებიან სამოდელო სააგენტოებში. ყველაზე წარმატებულები ხდებიან ისინი, ვინც პასუხობენ ყველა ამ მოთხოვნას და ამავდროულად, ინარჩუნებენ ინდივიდუალობას - დღეს ეს მეტად მნიშვნელოვანია. რატომ? ამაზე პასუხი მოდის ტენდენციების ცვლილებებშია და ეს შესამჩნევი გახდა უკვე ორი სეზონით ადრე,

მაგალითად, Marni-ს და Jacquemus-ის ჩვენებებში, რაც აღიქმებოდა როგორც a la Martin Margiela.  მაგრამ არავინ არ წასულა ამ გზაზე ისე შორს და უშიშრად, როგორც Demna Gvasalia Balenciaga-ს 2016-17 F/W-ის კოლექციაში.



მოდის კრიტიკოსებს ამ ჩვენების შესახებ განსხვავებული დამოკიდებულება აქვთ, მაგრამ თითქმის არავინ დავობს იმაზე, რომ ჩვენების პირველი ლოოკ-ი იყო ამ სეზონის ყველაზეც მნიშვნელოვანი და შთამბეჭდავი. ჩვენებაზე მყოფი, მშვიდი და გაწონასწორებული Suzy Menkes, პირველივე მოდელის გამოჩენისას უჩვეულოდ აღელდა და მობილურით გადაიღო ის და თითქმის ყველა სხვა გამოსვლაც. Laird Borrelli-Persson-მა კი ასე შეაფასა პირველი გამოსვლა: `..Frankenstein-ის და 50-იანი წლების Haute Couture-ის შეხვედრის შედეგად შეიქმნა 21-ე საუკუნის მონსტრი (გარგოყლეს - გროტესკული, მითური არსება)".


რამ გამოიწვია ყველა მნახველში (მათ შორის, ჩემშიც) ასეთი მძაფრი ემოციები? რა თქმა უნდა, არა მარტო კუზიანმა მხრებმა და უადგილო ადგილას გაბერილმა თეძომ. ჩვენ არაერთხელ გვინახავს დეკონსტრუქციის ბრწყინვალე მაგალითები (Comme Des Garсons, Watanabe...), მაგრამ ამ look-ში მთავარია - არაჩვეულებრივი თანხვედრა მოდელის ჩაცმულობის ყველა დეტალთან, სათვალეების ჩათვლით. ეს იყო ახალი ესთეტიკის მკვეთრი და ძლიერი გამოხატულება.


დააკვირდით პირველს და დანარჩენ მოდელებს Balenciaga-ს ჩვენებაში. ისინი განსხვავდებიან იმ ცნობილი მოდელებისგან, რომლებიც აღფრთოვანებას იწვევდნენ ბოლო წლების განმავლობაში: 

Karlie Kloss, Candice Swanepoel, Adriana Lima, Doutzen Kroes, Miranda Kerr...


რა აქვთ საერთო ამ მოდელებს? ძალიან ლამაზები არიან - უნაკლო სახეებით, ბრწყინვალე სხეულებით და, ალბათ, უმთავრესი- სექსუალურები არიან.
რა აქვთ საერთო მოდელებსBalenciaga-ს ჩვენებიდან? ისინი განსხვავებულნი არიან წინამორბედებისგან და ასევე ერთმანეთისგან, ხანდახან კი (ო, ღმერთო ჩემო!) განსხვავებულად ულამაზოებიც არიან.
უნებურად ჩნდება კითხვა: რით არის გამოწვეული ასეთი, თითქოს აბსურდული, ცვლილებები?


პასუხი ერთია: როდესაც რაიმე მოსაწონი მიაღწევს თავის მაქსიმალურ გამოვლენას, ირთვება ქანდარის მექანიზმი და დროთა განმავლობაში სრულიად საპირისპირო, მოდური ხდება.
ანალოგიური გარემოება შეიქმნა მოდაში მე-20 საუკუნის მიწურულს. ახლაც ძნელია, მოიძებნოს მოდით დაინტერესებული ადამიანი, რომელსაც არ სმენია 90-იანი წლების სუპერმოდელების სახელები:Linda Evangelista, Kristi Turlington, Naomi Campbell და მათთან ერთად Cindi Crawford, Claudia Shiffer, Tatiana Patitz.  მათ ჰქონდათ ყველაფერი: სილამაზე, პროფესიონალიზმი, ქარიზმა. პოპულარობით უსწრებდნენ გამოჩენილ ადამიანებს ყველა სფეროში და უტოლდებოდნენ ჰონორარებით ყველაზე ძვირად ღირებულ მსახიობებს. მოდამ გახადა ისინი მილიონების კერპებად. მაგრამ თანამშრომლობა იყო ურთიერთმომგებიანი: ყველაფერი, რასაც რეკლამას უკეთებდნენ - სუნამო, ტანსაცმელი თუ ცხოვრების წესი- მაშინვე მოდური ხდებოდა.


 


`We don’t Vogue, we are Vogue"- ეს სიტყვები ეკუთვნის Linda Evangelista-ს, პირველს ამ სუპერმოდელ-ებს შორის.
ეს იყო glamour-ის ერა და ისინი მწვერვალზე იდგნენ. გლამოურ ნიშნავს შარმს, ჯადოსნურ მომხიბვლელობას, ითვალისწინებს ცხოვრებას ფუფუნებაში, მისი მნიშვნელოვანი საფუძველი სხეულის ეროტიზმია.
მოდელები იდეალურად ერგებოდნენ დიზაინერების შემოქმედებას. იმ დროს Dior-ის ჩვენებები Gianfranco Ferré-ს არტდირექტორობით, Versace-ს ჩვენებები Giani Versace -ს თაოსნობით იმართებოდა და მართლაც ჯადოსნური სანახაობა იყო. ვერავინ წარმოიდგენდა მაშინ, რომ ეს ერა ოდესმე დამთავრდებოდა.
მაგრამ სწორედ ამ მწვერვალების მიღწევის შემდეგ ქანდარა ქვემოთ დაიძრა და არსებული ატმოსფერო ზედმეტად ხელოვნური, ზედაპირული და ბურჟუაზიული გამოჩნდა. გაჩნდა ახლის მოთხოვნილება _ დაიწყო ახალი ესთეტიკის ძიება. Kate Moss -ის და Stella Tennant-ის გამოჩენამ შეცვალა მოდის ვექტორი glamour-დან უნდერგროუნდ-ზე. თითქოს გაბრაზებულები, გამხდრები და ოდნავ მოხრილებიც, არსებულ სტანდარტებს აცდენილი მოდელები აღიქმებოდნენ როგორც "ანტიტესის of the სუპერმოდელ". მათ შეცვალეს გემოვნება და ახლა მათ ჰბაძავდა მილიონები. მოდური გახდა უნისეხ ტანსაცმელი, უნისეხ სუნამოები...


დღევანდელი ანტი-სუპერმოდელ განსხვავებულია. მას არ გააჩნია ავადმყოფური სიგამხდრე, პირიქით, სტანდარტთან შედარებით შეიძლება უფრო დიდი ზომებიც ჰქონდეს. ის თავის თავში დარწმუნებული ქალია და არა უსუსური გოგო, ის არ აწონებს თავს არავის - მისი იმიჯი არ უსვამს ხაზს სექსუალობას.


რამდენად დიდი ხნით დაიმკვიდრებს თავს ეს ტიპაჟი, ძნელი სათქმელია. მაგრამ ერთჯერადი რომ არ არის, უეჭველია. ასევე დარწმუნებით შემიძლია ვთქვა, რომ ისეთი ტოტალური შენაცვლება "ძველის" "ახლით", როგორც მე-20 და 21-ე საუკუნეების გასაყარზე მოხდა, არ იგეგმება - დღეს ბევრად მეტი დიზაინერი ქმნის, ვიდრე მაშინ, რაც გულისხმობს ტენდენციის გაუთვალისწინებლობის უფრო დიდ შანსს. და მაინც, საგულისხმოა ის ფაქტი, რომ რამდენიმე მოდის სახლმა ამ სეზონზე არ აირჩია ჩვენებისთვის უდავოდ ლამაზი, ყველა პარამეტრით უნაკლო მოდელები სწორედ იმ მიზეზით - ისინი ზედმეტად ლამაზები არიან(!).

რა გამოსავალი აქვთ ამ მოდელებს? რა თქმა უნდა, არა თავის დამახინჯება, არამედ ძლიერი "მე"-ს შექმნა, სადაც ამ უნაკლო გარეგნობიდან გამოიხედავს "უნიკალური" პიროვნება. იპოვეთ ის! შეიძინეთ ინდივიდუალობა!

 

ავტორი მანანა ანთელიძე

ჟურნალი "ბომონდი"

ივნისის ნომერი

like
1