მონიკა ბელუჩის სილამაზის ფორმულა, რომელიც შთაგაგონებთ!

მრავლისმთქმელი, გიშერივით შავი თვალები, რომელსაც ერთხელ თუ ნახავ ვერასდროს დაივიწყებ...


ნაზი და ქალური მზერა...
კეკლუცი და ეშმაკუნა ღიმილი...


თინეიჯერი მონიკა კაფეში შედის.... მისი სილამაზით აღფრთოვანებული ოფიციანტი ყურადღებით ისმენს, თუ რისი დაგემოვნება სურს უცნობ გოგონას... სადილის შემდეგ ბელუჩის ატყობინებენ, რომ დაწესებულებამ ხარჯი საკუთარ თავზე იკისრა. ეს პირველი შემთხვევა არ ყოფილა.


მონიკა ჯერ ჩიტა-დი-კასტელოში, შემდეგ კი პერუჯაში (იქ უნივერსიტეტში ჩააბარა) ყველაზე ლამაზ ქალიშვილად ითვლებოდა, მაგრამ ჩიტა-დი-კასტელო პატარა ქალაქი იყო, სადაც ყოფით პრობლემებში ჩაფლულ ხალხს მთელი ცხოვრება შეუმჩნევლად ეპარებოდა. დიდად არც პერუჯა განსხვავდებოდა

მისგან.


მონიკა იურიდიულ ფაკულტეტზე მოეწყო. ერთ-ერთ ლექციაზე საკუთარ თავს ჰკითხა: ,,მონიკა, აქ რა გინდა?!"
ასაკის მატებასთან ერთად მოთხოვნილებები იზრდებოდა, სტუდენტს თავის გასატანად მშობლების გაგზავნილი თანხა არ ჰყოფნიდა, ამიტომ მეგობრის რჩევით სამოდელო სააგენტო Liceo Classico-ს მიაკითხა. მონიკას გენეტიკურად ჰქონდა კამერის წინ პოზიორობის ნიჭი. დედამისი დაოჯახებამდე მოდელი იყო, მაგრამ საბოლოოდ კარიერა სიყვარულს შესწირა.


მონიკა: ,,დედა არაჩვეულებრივად ხატავდა. ერთხელ თავის ოთახში დამიბარა, ჩემს პორტრეტზე მუშაობდა. ჩემს სახელს ყოველთვის ორჯერ იმეორებდა... მონიკა, მონიკა, -დაიწყო მან -ნუ გეგმავ შენს ცხოვრებას შენი მეგობრების მსგავსად. შენ განსაკუთრებული ხარ და ზღაპრული მომავალი გელის!
დედა გათხოვების შემდეგ დიასახლისი გახდა. ვფიქრობ, უნდოდა მისი აუხდენელი ოცნებებისთვის ხორცი შემესხა".


ბელუჩის მილანში წასვლა გარდაუვალი იყო. მილანი თავისი ჩვენებებით, დიზაინერებით, მოდელებით, ტრენდებით, გლამურული სიახლეებით, ორიგინალური ექსპერიმენტებით, დახვეწილი წვეულებებითა და პერსპექტივებით თავისთან იხმობდა, რომ მოდის საგიჟეთში ჩაეთრია.


მილანში ჩასვლიდან ორ წელიწადში მონიკა დამწყებ, ნიჭიერ დიზაინერებს, დოლჩესა და გაბანას, შეხვდა. გოგონა იმდენად მოიხიბლა მათი ნამუშევრებითა და პიროვნული თვისებებით, რომ, D & G-ს მოდელობას თითქმის უსასყიდლოდ დათანხმდა.


მონიკა: ,,D & G არ არის მხოლოდ მსოფლიო დონის ბრენდი. ეს არის რეალური ისტორია სიყვარულზე, მეგობრობასა და ერთგულებაზე. ცხოვრების სამ უმნიშვნელოვანეს კომპონენტზე.
D & G სერიოზული ბრენდი იყო, როცა მონიკა დიორმა მიიწვია და მისი სახე გახდა. მოდელი აღნიშნავს, რომ ორივე ფირმასთან მუშაობა საინტერესო იყო. თითოეულმა იმპროვიზაციის საშუალება მისცა.


კინოინდუსტრიაში ყველაფერი ეპიზოდური როლებით დაიწყო. ზოგჯერ ფიქრობდა, რომ არაფერი გამოუვიდოდა: ,,,,ისინი ირონიული ღიმილით მიყურებდნენ და ფიქრობდნენ: ,,კიდევ ერთი მოდელი, რომელსაც მსახიობობა უნდა..." დღეს, 50 წლის ქალის გადმოსახედიდან მიიჩნევს, რომ ხალხი ყველაფერს გაპატიებს: ნიჭს, ინტელექტს, კარიერულ წინსვლას, პირად ბედნიერებას, მაგრამ ვერასდროს შეეგუება შენს სილამაზეს.


 


მონიკა ბელუჩის სილამაზის ფორმულა


1. ,,თმა შენი სავიზიტო ბარათია! თვალის ჩინივით გაუფრთხილდი მას"!
მსახიობი თავს კვირაში მხოლოდ ორჯერ იბანს. თვლის, რომ შამპუნის ქიმიური შემადგენლობა პირველ რიგში თმას, შემდეგ კი ორგანიზმს ვნებს. თმას იშვიათად იშრობს ფენით.


2. ,,პლასტიკური ქირურგის ჩარევის გარეშე".
მოდელი ყოველ დილით სახეს გრილი წყლით იბანს. ერიდება საფუძვლიანი მაკიაჟის გაკეთებას. არასდროს იცვლის ჩრდილებით სახის ფორმებს. არ მიესალმება ბოტოქსსა და სახის გადაჭიმვას. კანის ცვლილებებს ინტერესით აკვირდება. ,,სიბერეს თავისი სილამაზე აქვს. აუცილებლად უნდა დავაფასოთ ეს. მეტამორფოზაში ჩარევას არ ვაპირებ".


3. ,,მოუსმინეთ თქვენს სხეულს".
იოგათი ვარ დაკავებული. მაგალითად, ვასრულებ მკერდის ესპანდერს. იგი ავითარებს გულმკერდს, დაძაბულობისგან ათავისუფლებს მხრებსა და კისერს, პროპორციულს ხდის მუცელს და აშორებს მას ზედმეტ ცხიმს, აუმჯობესებს სისხლის მიმოქცევას თავის არეში. საკუთარ თავს კარგად თუ დააკვირდებით, სხეული აუცილებლად მიგახვედრებთ რა სახის ვარჯიში გჭირდებათ.


4. წყალი სიცოცხლის საწყისია!
მეცნიერები ამტკიცებენ, რომ თავდაპირველად სიცოცხლე წყალში ჩაისახა... ნაყოფიც, დედის მუცელში, წყალში იზრდება და ვითარდება. მონიკა ბელუჩის დღის რაციონი სითხის გარეშე წარმოუდგენელია! წყალი ჩვენი სხეულის 70%-ია. მსახიობი სითხეს ჭარბად იღებს, რომ ეს ბალანსი შეინარჩუნოს. ,,წყალი ნივთიერებათა ცვლას არეგულირებს, კანის ახალგაზრდულ იერზეც ზრუნავს". მონიკა კვირაში ოთხჯერ სულ ცოტა 45 წუთი ცურავს.


5. არავითარი მტანჯველი დიეტა!
ბელუჩი არ მალავს რომ უყვარს ჭამა და წასუსნავება. მიირთმევს აბსოლუტურად ყველაფერს, მაგრამ არა ნაყროვანებამდე.


ჩაცმის სტილი - ქალის ბუნების გარესამყაროსთან შერწყმა
მონიკა სოლიდურ სტილს ანიჭებს უპირატესობას. მას წვეულებებზე ხშირად დაინახავთ თეთრი პერანგით, შავი კოსტიუმით ან სადა კაბით. მოდელი იდეალურად უთავსებს ერთმანეთს საქმიან იმიჯსა და თავშეკავებულ სექსუალურობას.


მსახიობის გარდერობში მუდამ მოიძებნება ადგილი კოპლებიანი კაბისთვის.
იგი იშვიათად იკეთებს საყურეს, აქსესუარებიდან გამორჩეულად ყელსაბამი უყვარს.
მოდელი ძირითადად პატარა ჩანთებს ან ე.წ. კლატჩებს ატარებს. ჩანთაში მხოლოდ ყველაზე მნიშვნელოვან ნივთებს დებს: ,,ჩანთა აუცილებლად უნდა შეეფერებოდეს ფეხსაცმელს".


 


როდის არის მაკიაჟი დასრულებული?!


მონიკას მაკიაჟი კონცენტრირებულია თვალებზე, რადგან: ,,თვალები სულის სარკეა". შავი, ნაცრისფერი ან ყავისფერი ნებისმიერ სამოსს გემოვნებით ეხამება.


განსაკუთრებით უყვარს წითელი ფერის ტუჩსაცხი: ,,ქალი წითელ პომადას მაშინ ისვამს, როცა მამაკაცის ყურადღება აკლია. წითელ პომადას მაგიური ეფექტი აქვს! როცა კაცი ალისფერ ბაგეს ხედავს, გაღმერთებს! შეიძლება ისე მოინუსხოს, რომ კოცნა ვერ გაგიბედოს".


ბელუჩის D & G-ს ტუშის გარეშე ცხოვრება ვერ წამოუდგენია: ,,ტუში თუ არ მისვია მგონია, რომ მაკიაჟი დასრულებული არ არის".
მისაბაძი მაგალითი... სოფი ლორენი.
საყვარელი ტრადიცია... სუფრასთან დიდხანს ჯდომა. ამ დროს პიროვნება საკუთარ თავს ავლენს.
მიყვარს... იტალია! იტალიური გული მაქვს!
ვისვენებ როცა... ვხვდები მეგობრებს და საყვარელი ადამიანების გარემოცვაში ვატარებ დროს.
წარმატების მოსაპოვებლად აუცილებელია... ბედმა გაგიღიმოს. ხანდახან ქალები ბევრს შრომობენ, მაგრამ არ უფასდებათ. თავის წარმორჩენის საშუალება არ ეძლევათ.


მე... ბედნიერი ქალი ვარ! ძალიან გამიმართლა!


რთულია... იტალიური ფილმების ჩრდილიდან საერთაშორისო კინემატოგრაფიაში გადანაცვლება.
ასაკის მატებასთან ერთად... ვიმედოვნებ, რომ გარეგნობაზე მეტ ყურადღებას მიაქცევენ ჩემს ნიჭს.
თუ ძლიერი არ ხარ... ცხოვრება დაგანგრევს და გადაგთელავს.


ვსაუბრობ... 4 ენაზე: იტალიური, ფრანგული, ინგლისური, ესპანური. შვილებს ყოველთვის იტალიურად ველაპარაკები.


მონიკა ბელუჩი იტალიელ მამაკაცებსა და სტერეოტიპებზე...
,,იტალიელ კაცებს 35 წლის ასაკშიც კი მშობლების ხარჯზე შეუძლიათ ცხოვრება. სახლიდან ვითომ იმიტომ არ მიდიან, რომ დედასავით გემრიელ საჭმელს ვერავინ აკეთებს...

ჩვენს კულტურაში ძლივს შეელივნენ ქალიშვილობის ინსტიტუტს. სანამ მამაკაცები ქალებში ერთობოდნენ და სექსუალურ სურვილებს იკმაყოფილებდნენ, ქალები გათხოვებას ელოდებოდნენ და ქალწულები ბარდებოდნენ მეუღლეს. ევროპის სხვა ქვეყნებში ამაზე ეცინებათ".


 


როგორ უნდა გამოიყურებოდეთ მოდურად 50 წლის ასაკში


1. სწორი დამოკიდებულება
50 წლის ასაკში სექსუალურობაზე უფრო მნიშვნელოვანი ელეგანტურობაა. წლების მატებას არ უყუროთ როგორც სასჯელს, პირიქით, ეს ბედნიერებაა. თქვენ დააგროვეთ გამოცდილება, გადაინაცვლეთ ცხოვრების ახალ ეტაპზე, იპოვეთ საკუთარი თავი და გაერკვიეთ თქვენს სურვილებში! ყველა ქალს თავისი სტილი აქვს, მაგრამ თუ სურს რომ ეს სტილი გამორჩეულს ხდიდეს, სამოსი თავდაჯერებულობით უნდა ატაროს.


2. არ შეუშინდეთ ექსპერიმენტებს!
ვფიქრობ, მოსაზრება: ,,თმის შეღებვა და კაშკაშა მაკიაჟი მხოლოდ ახალგაზრდების გასართობია", სისულელეა. ვიცნობ 50 წელს გადაცილებულ ქალებს, რომლებიც ქერა თმითა და წითელი პომადით არაჩვეულებრივად გამოიყურებიან! იყავით მამაცი, სცადეთ სხვადასხვა სტილისა და ფერის ვარცხნილობები, გაეხვიეთ ესპერიმენტების ქარცეცლში!


3. საკითხს მარტივად მიუდექით
აუცილებელი არ არის გამხდარი იყოთ, მე სავსე ვარ, თუმცა ეს ხელს არ მიშლის სამოსის მოხდენაში.


4. იპოვეთ თქვენი ფერი
კალორიული საკვების დაგემოვნება მიყვარს, ამიტომ ხშირად დავდივარ შავი ფერით. ის ჩემს ნაკლოვანებებს მალავს, შეიძლება ითქვას რომ, სხვა ფერებისგან განსხვავებით, ზედმეტ კილოგრამებს მპატიობს. რომელია თქვენი ფერი?


5. არ დაემონოთ დენდენციებს!
ხალხი მოდურად მიმიჩნევს, მაშინ როცა მე არასდროს მივყვები მოდას. არ შემიძლია ტენდენციებს საკუთარი სურვილები და გემოვნება შევწირო. მაცვია ის, რაც მიხდება და რაც მომწონს.


6. არ ითამაშო სხვა ადამიანის როლი!
სამოსი საკუთარი ინდივიდუალურობის გამოვლენის საშუალებაა. მოდას არ მივყვები, რადგან ის ყველას ერთ ქვაბში ხარშავს. როგორ შეიძლება ორ ქალს იდენტურად ეცვას, მაშინ როცა მათ სრულიად განსხვავებული შინაგანი სამაყრო აქვთ? ნუ შეგრცხვებათ საკუთარი თავის. ნუ ეტრფით იდეალებს, სრულყოფილება ძალიან მოსაწყენია.


 


ყოფილი ცოლი


მონიკა პირველად 1990 წელს გათხოვდა, იტალიელ ფოტოგრაფ კლაუდიო ბასოზე. ოჯახის დანგრევიდან 5 წლის შემდეგ სიყვარული კვლავ ეწყვია. ფრანგმა მსახიობმა ვენსან კასელმა ოთხ წელწადში მონიკა ცოლობაზე დაითანხმა. წყვილის ქორწინებამ 14 წელს გასტანა.


მონიკა: ,,იმის მიუხედავად, რომ ვენსანი ჩემს ცხოვრებაში დიდი ხნის განმავლობაში უმნიშვნელოვანესი ფიგურა იყო, ჩვენი ურთიერთობა აღარასდროს აღდგება. მადლობას ვუხდი მას, რომ საკუთარი თავი მაპოვნინა. სარკის წინ დამაყენა და ჩემი უხილავი მხარე დამანახვა".


მონიკა: ,,ვიმედოვნებ, ჩემი არჩევანი ჩემი ქალიშვილებისთვის მაგალითი იქნება. ბედნიერებისთვის აუცილებელი არ არის გვერდით მამაკაცი გყავდეს". ამ სიტყვების მიუხედავად მსახიობი ამჟამად აზერბაიჯანელ მილიონერ ტელმან ისლამოვს ხვდება. ისინი ურთიერთობას არ მალავენ. მონიკას ანგარებიანი ქალის მარკა მიაკრეს, რადგან მისი მილიონერი შეყვარებული არცთუ ისე სიმპათიურია.


დედობა - ყველა ქალისთვის განკუთვნილი ბედნიერების მარცვალი


მონიკამ პირველი შვილი, დევა 2004 წელს გააჩინა, მეორეჯერ კი 45 წლის ასაკში დაორსულა.
მონიკა ხშირად უმეორებს თავის შვილებს, რომ მათ მშვენიერი ცხოვრება ელით წინ: ,,თქვენ ჩემზე გაცილებით უკეთესები ხართ. თუნდაც მხოლოდ იმიტომ რომ უაქცენტო პორტუგალუირით საუბრობთ და ფორტეპოანოზე არაჩვეულებრივად უკრავთ"!

თათული ღვინიანიძე

like
1

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.