ცხოვრებისგან სიამოვნების მიღება - ლამაზად დაბერების ფრანგული ფორმულა

მანანა ანთელიძე ყოველთვის ამომწურავ და კომპეტენტურ შეფასებებს აკეთებს მოდის ინდუსტრიისა და ცხოვრების სტილის აქტუალურ საკითხებზე.

მკითხველისთვის საინტერესო აღმოჩნდა გასული ბლოგის ფორმატი, სადაც კითხვა-პასუხის რეჟიმში ჟურნალის მთავარი რედაქტორი, თეა აგლაძე და ქალბატონი მანანა მოდის ახალი ესთეტიკის შესახებ მსჯელობდნენ. ახალი ნომრის თემაც ყველასათვის საინტერესო და აქტუალურია: ფრანგი ქალი, მისი დამოკიდებულება მოდისადმი, ფრანგული შიკისა და ლამაზად დაბერების ფორმულა, რომლის მიგნებაშიც სწორედ ეს სტატია დაგეხმარებათ.



- დღეს ჩვენი საუბრის თემაა ფრანგი ქალი, ე.წ. French Girl და ამ კონტექსტში ვერ ავუვლით გვერდს საფრანგეთის პირველ ლედის,

ბრიჯით მაკრონს. მსოფლიო პრესის ფურცლებზე დღემდე არ წყდება მასზე საუბარი და მთავარი თემაა ის 24 წელი, რომლითაც ბრიჯით მაკრონი ემანუელ მაკრონზე უფროსია. რატომ აღმოჩნდა ეს ფაქტი ასეთი ყურადსაღები?

- საზოგადოებაში არსებობს ჯერ კიდევ უძველეს დროში ჩამოყალიბებული სტერეოტიპი: კაცი უნდა იყოს ძლიერი და გამოცდილი იმისთვის, რომ კარგად ინადიროს და იომოს, შესაბამისად, კარგად დააპუროს და დაიცვას ოჯახი.


ფუნქციების გადანაწილება დღესაც იგივეა: ქალი უნდა იყოს იმდენად ახალგაზრდა, რომ შვილები გააჩინოს, კაცმა კი უნდა შეძლოს ოჯახის უზრუნველყოფა - რაც გულისხმობს საქმეში წარმატების მიღწევას, ე.წ. ფეხზე დადგომას, რაც, უმეტესწილად, ასაკის შესაბამისად არის შესაძლებელი. მაგრამ, როგორც ყველა კანონს აქვს გამონაკლისი, ასევე არსებობენ განსაკუთრებული ქალები და კაცები და მათი ურთიერთობები.

ვფიქრობ, ისეთი პირველი ლედი, როგორიც ბრიჯითია, სწორედ რომ საფრანგეთში უნდა დაბადებულიყო, სადაც უხვად მოიძებნება მსგავსი სიყვარულის არაერთი ისტორიული მაგალითი.

ერთ-ერთი მათგანია ჰენრი II ვალუასა (Henri II Valois) და დიანა დე პუატიეს (Diane de Poitiers) ურთიერთობა. ეს ამბავი მე-16 საუკუნეში მოხდა. ფავორიტი ქალი თითქმის 20 წლით იყო უფროსი მეფეზე და მისი გავლენა მეფის სიცოცხლის ბოლომდე იმდენად დიდი გახლდათ, რომ ვრცელდებოდა როგორც შიდაპოლიტიკურ გადაწყვეტილებებზე, ასევე საერთაშორისო ურთიერთობებზეც. ვფიქრობ, აქ საქმე არა მარტო მეფის სასიყვარულო ლტოლვას ეხებოდა, არამედ მის განათლებას, გემოვნებასა და ნიჭიერებას.


თუ ანალოგის ძიებას სახელმწიფოს მმართველებში გავაგრძელებთ, არ შეიძლება არ გაგვახსენდეს ნაპოლეონ ბონაპარტი (Napoleon Bonaparte) და მასზე უფროსი მეუღლე, ჟოზეფინა ბოგარნე (Jozephine Bogarne). სწორედ ჟოზეფინა იყო ბონაპარტის ყველაზე წარმატებული ქმედებების შთამაგონებელი. სხვათა შორის, ის იყო იმ დროის Icon Style - მასთან დაკავშირებულია "პირველი იმპერიის" მთავარი სილუეტები.



ჟოზეფინასთან განქორწინება, გამოწვეული პოლიტიკური მიზანდასახულობით, ბევრი ისტორიკოსის აზრით, ნაპოლეონ ბონაპარტის დასასრულის დასაწყისი გახდა. მისი ბოლო სიტყვები იყო: "ჯარი, საფრანგეთი, ჟოზეფინა".



ასეთი ურთიერთობების თემა ხშირად გვხვდება ფრანგულ კლასიკურ ლიტერატურაში. თუნდაც ონორე დე ბალზაკის (Honore de Balzac) საკულტო ნაწარმოებები, ე.წ. ბალზაკის წლოვანების ქალზე, რომელიც მხარს უჭერს თავის შეყვარებულს წარმატებისა და სიმდიდრის მოპოვების გზაზე.

ეს ნაწარმოებები ანარეკლია პირადი ურთიერთობისა თავის მუზასთან - ლორა დე ბარნისთან, რომელიც მასზე ბევრად უფროსი იყო. ბალზაკი ბოლო წუთებშიც მის გვერდით იყო.

- დღეს ფრანგული კინემატოგრაფი არა ერთი ქალის სახეს ქმნის, რომელიც ხანდაზმულობის ასაკშიც კი მიმზიდველი და სექსუალურია. საკმარისია გავიხსენოთ ბრწყინვალე ფანი არდანის (Fanny Ardant) გმირები.

- დიახ, ეს მნიშვნელოვანია. მინდა ხაზი გავუსვა იმ ფაქტს, რომ ამ ტიპის ქალები არასოდეს არ თამაშობენ "კეთილ დედიკოებს" ახალგაზრდა შეყვარებულებთან. ისინი თანასწორნი არიან განათლებით, კულტურით, მჭევრმეტყველებით. გამოირჩევიან მაღალი გემოვნებით, არიან ელეგანტურნი და ხშირად თავისი დროის Icon Style ხდებიან.



ყველაფერი ეს ბრიჯით მაკრონსაც ახასიათებს. L’Express წერს: "...მაღალი ქუსლები, კაბა უსახელო და მუხლს ზემოთ, ტყავის შარვალი - ის ყველაფრისთვის მზად არის. ის სუპერვუმენია".

საარჩევნო კამპანიის დაწყებისთანავე ბრიჯითმა მოახდინა სიცოცხლის მიმართ ახალგაზრული დამოკიდებულების დემონსტრირება - ქცევით, ტანსაცმლით - და ახალგაზრდა საფრანგეთმა მას მხარი დაუჭირა! მნიშვნელოვანია, რომ ის არ თამაშობს, ის ბუნებრივადაა ასეთი. ბევრი პოლიტიკოსი აღნიშნავდა, რომ 48 წლის მარი ლე პენის არჩევნების წაგებაში წვლილი იმ ზედმეტად კონსერვატიულმა იერმა შეიტანა, რომელიც მან აირჩია.

პერიოდულად ფრანგული პრესა ბრალს სდებს ბრიჯითს იმაში, რომ მისი გავლენა ქმარზე მეტად შესამჩნევია. ემანუელ მაკრონი ასე რეაგირებს: "მისი როლი იქნება ისეთივე, როგორიც იყო არჩევნებამდე... მის გარეშე არ ვიქნებოდი ის, ვინც დღეს ვარ. მას ვერავინ შეცვლის".

- ჩვენ ვისაუბრეთ იმაზე, რომ ეს ურთიერთობები, უმეტესწილად, დამახასიათებელია საფრანგეთისთვის. რით ახსნი ფრანგი კაცის ასეთ დამოკიდებულებას ფრანგი ქალის მიმართ?

- მხოლოდ ერთი მიზეზით - ქალის დამოკიდებულებით თავის თავთან, თავის წლოვანებასთან. Savoir vivre - ფრანგებისთვის ძალიან მნიშვნელოვანი გამოთქმაა და ნიშნავს ლამაზი ცხოვრების შეძლებას, მოხერხებას. მოხერხებას, მიიღო სიამოვნება, მიუხედავად ფულის რაოდენობისა და სტატუსისა.

ამერიკელმა ჟურნალისტმა, რებეკა პლენტიერმა, დაწერა წიგნი: "ლამაზად დაბერების გაკვეთილები - ფრანგ ქალთა საიდუმლო". ის წერს: "...მე გამაოცა 50 წელს გადაცილებული ლამაზი და ელეგანტური ქალების რაოდენობამ ქუჩებში, კაფეებში, ძვირად ღირებულ მაღაზიებში. ეს ქალები ბრწყინვალედ გამოიყურებიან, მიუხედავად იმისა, რომ კალიფორნიული სტანდარტების მიხედვით მათი კანი არ არის იდეალური, ისინი კომფორტულად გრძნობენ თავს თავიანთ ასაკში"...

როდესაც ჟურნალისტი ამ ფენომენის შესწავლას შეუდგა, დაასკვნა, რომ "ლამაზად დაბერება" შესაძლებელია სიცოცხლის, საკუთარი თავის მიმართ სრულიად განსხვავებული დამოკიდებულების შედეგად.



- და რას წარმოადგენს ეს განსხვავებული დამოკიდებულება? რატომ არ იყენებენ სხვა ქვეყნის ქალები ფრანგი ქალის გამოცდილებას?

- ამას ბევრი ცდილობს, მაგრამ სანამ ამ დამოკიდებულებას თავის თავში გამოიმუშავებ, French Girl უნდა გახდე. ეს ეტაპი აუცილებლადაა გასავლელი. და აი, სწორედ აქ იწყება სირთულეები, რადგან French Girl თითქოს წინააღმდეგობებიდან არის შექმნილი:

ის გამხდარია, მიუხედავად იმისა, რომ საფრანგეთში საჭმლის კულტია. ყველაფერთან ერთად, იგი რეგულარულად მიირთმევს კრუასანსა და სხვა ნამცხვარს, მუდმივად აგემოვნებს ღვინოს.
ის სიბერეში მომხიბლავია, მიუხედავად იმისა, რომ იშვიათად მიმართავს პლასტიკურ ქირურგიას.
იგი ყველაზე გემოვნებიანია, მიუხედავად იმისა, რომ ყველა ქვეყნის ქალზე ნაკლებად აინტერესებს მოდის ბოლო სიახლეები - მას არ ახასიათებს მოდური ციებ-ცხელება და ყოველ სეზონზე არ ლაშქრავს მაღაზიებს must-have-ების შესაძენად.

ერთი სიტყვით, მთავარი თეზისი ასეთია: იმისთვის, რომ ჰგავდე French Girl-ს, ერთდროულად მომხიბლავად და ბუნებრივად უნდა გამოიყურებოდე. ინტერვიუში ცნობილი French Girl-ს აცხადებენ, რომ ცოტა დროს უთმობენ ყოველდღიურ მაკიაჟს და ვარცხნილობას. მართლაც, მათ სახეზე არ ჩანს დეკორატიული კოსმეტიკის აშკარა კვალი და მათი თმა გაშლილია, უფრო მეტიც - გაწეწილი.



რაც შეეხება ტანსაცმელს, ხშირად აცვიათ ერთი და იგივე ან ძალიან მსგავსი სამოსი.
როდესაც კაროლინ მეგრეს (ჩaroline de Maigret) ჰკითხეს, თუ როგორ უნდა გახდე პარიზელი ქალი (რაც French Girl-ის სინონიმია), მან უპასუხა: "არ უნდა დაიძაბოთ ამის მისაღწევად". და კიდევ: "ფრანგი ქალი არ უნდა ცდილობდეს, იყოს უნაკლო".

 



ე.ი. როგორც კი მოინდომებ, იყო შენი იდეალის შესაბამისი, მაშინვე სცილდები მას.
აი, ეს სიტყვები კი დღეს ყველაზე მეტად აღიარებულ French Girl-ს, ფრანგული Vogue-ს რედაქტორს, Emmanuelle Alt-ს ეკუთვნის: "შეუძლებელია, მთელი ცხოვრება ერთი და იმავე იარაღით აცდუნო, მაგრამ ეს არ ნიშნავს, რომ თქვენ ამას ვერ შეძლებთ".



- ყოველივე ამის შემდეგ ჩნდება აზრი, რომ ფრანგი ქალის საიდუმლო ამოუხსნელია და დამსგავსებაც შეუძლებელია!

- მთლად ასეც არაა საქმე! მოპოვებული ინფორმაციისა და პირადი დაკვირვების საფუძველზე დაყრდნობით გამოვლინდა რამდენიმე ცხოვრებისეული პოზიცია, რომელიც French Girl-ს აყალიბებს:

1. ფრანგი ქალები სახის სილამაზის შენარჩუნებას აპარატურული თერაპიით ახერხებენ. გადაჭიმული სახე, როგორიც კეთრინ დენევის, ერთ დროს ყველაზე ცნობილ French Girl-ს, აქვს, დღეს უკვე ირონიულ ღიმილს იწვევს.

2. გენეტიკურად ფრანგ ქალს წვრილი ძვალი და ვიწრო თეძო აქვს. ამ პროპორციების შენარჩუნებას ხელს უწყობს მათი განსაკუთრებული დამოკიდებულება საჭმლის მიმართ! ისინი მიირთმევენ ხშირად, მაგრამ მცირე ულუფებით. მათთვის პროცესს დიდი მნიშვნელობა აქვს - კერძის გემო და მიწოდების ფორმა, კარგი ღვინო, საინტერესო ადგილები და პარტნიორები.

3. სხეულის ფორმის შესანარჩუნებლად ასევე დიდი მნიშვნელობა აქვს თავისუფალი დროის აქტიურად გატარების წესს - თამაშობენ ჩოგბურთს, სეირნობენ, დარბიან პარკებში, ცურავენ, ზომიერად ირუჯებიან... აი, ფიტნესკლუბებს კი არ სწყალობენ - მიაჩნიათ, რომ ყოველგვარი ძალადობა საკუთარ თავზე მავნებელია მათი განწყობისა და ამიტომ ჯანმრთელობისთვის.

4. ფრანგ ქალს გემოვნება ბავშვობიდან უყალიბდება (ბევრი მისაბაძი მაგალითი ჰყავს ირგვლივ), ზრდასრულ ასაკში ის უკვე უშეცდომო ხდება! მან კარგად იცის თავისი განსაკუთრებულობა და ოსტატურად იყენებს ამას - გარდერობში უფრო გააზრებული და დახვეწილი ტანსაცმელი ჩნდება.

სხვათა შორის, მათ, ვისაც აინტერესებს, თუ რას იცვამს French Girl, შეუძლიათ მიმართონ პირველწყაროებს, ცნობილ Fashion -ჟურნალისტსა და ბლოგერს, Gorance Dores-ს ან შეიძინონ Innes de la Fressange-ს წიგნი "პარიზელი და მისი სტილი". ეს დაგეხმარებათ თავშეკავებული პარიზული შარმით განიმსჭვალოთ.

5. French Girl-ს ახასიათებს სოციალური აქტივობა - დადიან სტუმრად, ბიენალეებზე, კონცერტებზე, კლუბებში... ეს მოვლილი სახისა და ხელების, ხარისხიანი, ბზინვარე თმის, შესაბამისი ტანსაცმლისა და, რა თქმა უნდა, ქუსლებზე შედგომის მაპროვოცირებელია!


და თუ ამ ყველაფერს შევაჯამებთ, ფრანგი ქალის საიდუმლო აშკარა გახდება: ის თავისი თავის პატივისცემაშია! ეს ნიშნავს მხოლოდ ერთს: არ დაიზაროთ, სიამოვნება მიიღოთ! არ ჩაჯდეთ სახლში - გაერთეთ, იმოძრავეთ, იმოგზაურეთ, გაიჩინეთ ჰობი, დატკბით ლამაზი ნივთებით, გემრიელი კერძებით, ხარისხიანი ღვინით და, რა თქმა უნდა, ურთიერთობით, მათ შორის - სექსუალურითაც!

- და ბოლო კითხვა: რამდენად ჰგავხარ ფრანგ ქალს?

- შეიძლება ითქვას, რომ საერთოდ არ ვგავარ, თუ არ ჩავთვლით იმ ფაქტს, რომ მეც არ ვწყალობ ფიტნესკლუბებს და ძალიან მიყვარს მოგზაურობა, გემრიელი საჭმელი და კარგი ღვინო!

მანანა ანთელიძე

"ბომონდი", აგვისტოს ნომერი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.