ვინ დაარქვა კოკო შანელს გაბრიელ ბონერი

კოკო შანელი დაიბადა სომურში, 1883 წლის 19 აგვისტოს წყნარ, თბილ საღამოს...

სომური პატარა ქალაქია საფრანგეთში, მდინარე ლუარას მარცხენა სანაპიროზე.

იმ დღეს სომურში ყოველწლიური დოღი იმართებოდა. კავალერიის სასწავლებლის ოფიცერი ინსტრუქტორები დილიდანვე ამხედრებულიყვნენ ჯიშიან ბედაურებზე თავიანთი სადღესასწაულო ფორმებით და საკუთარი ოსტატობით იწონებდნენ თავს მაყურებელთა წინაშე. საუკეთესო მხედრის ტიტულის მოსაპოვებლად მხედარი 77-ჯერ მაინც უნდა ჩამომხტარიყო გაჭენებული ცხენიდან - დოღის ცნობილი ქალაქის წესები სწორედ ამას მოითხოვდა. სახეზე ვუალჩამოფარებული გოგონები ხარბად უმზერდნენ ლურჯ ფორმაში გამოწკეპილ ახალგაზრდა ოფიცრებს და შიგადაშიგ ვნებიანი ამოოხვრით ამხნევებდნენ მონაწილეებს.



ამ სადღესასწაულო
აღტყინების ფონზე, მოულოდნელად, იქვე მდგარ ოციოდე წლის გოგონას სამშობიარო ტკივილები დაეწყო. გაფითრებული გაერიდა თანატოლებს, მუცელზე ხელმიფარებული მოკუნტული გალასლასდა საღამოს ბინდბუდში და, როგორც იქნა, მიაღწია მშობიარეთათვის განკუთვნილ თავშესაფარს...
მოსაღამოებულზე კი, ქვეყანას მოევლინა გოგონა, რომლის მამაც იმ პერიოდში ქალაქიდან ძალიან შორს იმყოფებოდა...

დრო, როდესაც კოკო შანელი დაიბადა, მომავალში უარყოფით კვალს დატოვებს მადმუაზელის ცხოვრებაში - მას საღამოს შიში დასჩემდება.

მონაზვნებმა ახალშობილს გაბრიელი დაარქვეს. შანელების ოჯახში ეს სახელი ადრე არავისთვის დაურქმევიათ. იქნებ მონაზონმა, რომელმაც სახელი მოიფიქრა, გადაწყვიტა, რომ ჩვილს, რადგან 20 წლის დედის გარდა ქვეყანაზე არავინ ჰყავდა, მფარველი ანგელოზი სჭირდებოდა? გაბრიელი ხომ სიტყვასიტყვით "ძლევამოსილს" ნიშნავს. სინამდვილეში მონაზონი, რომელმაც დედამისი ამშობიარა, თავად იყო გაბრიელ ბონერი.



და მან ახალდაბადებულ გოგონას თავისი სახელი და გვარი აჩუქა. კოკოს იმდენად უყვარდა თავისი სახელი, რომ ხშირად ამბობდა, ჩემი სრული სახელი და გვარი გაბრიელ ბონერ შანელიაო. არადა, ძალიან გვიან გაიგო ამის შესახებ, რადგან თავისი დაბადების მოწმობა წლების განმავლობაში არ უნახავს. არ დასჭირვებია და იმიტომ. მხოლოდ ომის დროს მოიკითხა. როცა სხვებს ეშინოდათ, მან მოითხოვა. და სწორედ მაშინ გაიგო სიმართლე.


ასევე დაგაინტერესებთ:

რატომ მარხავდა კოკო შანელი ბავშვობაში თოჯინებს? - აქამდე უცნობი ფაქტები ცნობილი დიზაინერის ცხოვრებიდან!



like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.