ივანე ქეშიკაშვილის ბლოგი - ტრიუმფალური მაღალი მოდა პარიზის პოდიუმებზე

ჩემი მკითხველისთვის ცნობილია, რომ ერთ-ერთი ძირითადი და უმთავრესი, რასაც მოდაში, როგორც ხელოვნების დარგში, ვაფასებ და მართლაც უდავოდ ლეგენდარულია, წარსულის მოდა და მაღალი მოდა, ე.წ. „ოტ კუტურია“. ჟურნალი „ბომონდის“ ფურცლებიდან ხშირად

მისაუბრია წარსულის დიდოსტატებზე, გასული საუკუნეების მოდასა და ხელოვნებაზე. ამჯერად ჩემი ბლოგი მინდა დავუთმო, სულ ცოტა ხნის წინ დასრულებულ ნამდვილი, მაღალი მოდის კვირეულს და მასში მონაწილე როგორც ახალ, ასევე საუკუნოვან მოდის სახლებს.
საზოგადოებაში არსებობს აზრი, რომ მაღალი მოდა წარსულის მოდაა, მაგრამ ეს რომ მართლაც ასე იყოს, მეისონ მარჯიელას და ირის ვან ჰერპენს ვერასოდეს ვიხილავდით პარიზის მაღალი მოდის კვირეულზე. „ოტ კუტური“ არის უმაღალესი ხარისხის სამკერვალო ხელოვნება, რომელიც ექსკლუზიურად დამკვეთის სხეულზე იქმნება. ის მსოფლიოში არსებული ათასობით ბრენდიდან, სულ რამდენიმე ათეული მოდის სახლს გააჩნია. მაღალი მოდა დიდი ბრენდების სპეციალურ სახელოსნოებში იბადება, რომლის შექმნის დროსაც არ იყენებენ საკერავ მანქანებს ან სხვა დანადგარებს. ყველაფერი საგულდაგულოდ, მხოლოდ ადამიანის ხელით იქმნება, მატერიიდან დაწყებული, კერვით დამთავრებული.
როგორც აღვნიშნეთ, პირველი ივლისიდან ხუთ ივლისამდე პარიზში შემოდგომა-ზამთარი 2018-ის მაღალი მოდის კვირეული გაიმართა. ღონისძიების ფარგლებში ოცდათხუთმეტმა მოდის სახლმა გამართა ჩვენებები.



კვირეული ჰოლანდიელმა დიზაინერმა რონალდ ვან დერ კემპმა გახსნა. დიზაინერს გამოყენებული ჰქონდა მატერიები თავისი ძველი კოლექციებიდან და ჩვენების დამთავრების შემდეგ განაცხადა: „მე ძალიან სპონტანურად შევქმენი ეს კოლექცია და გამოვიყენე მხოლოდ ის მასალები და მატერიები, რაც მქონდა შემორჩენილი. ეს არის კუტურის ძველი ღირებულებები, რომელიც შესრულებულია გადანახული ნარჩენი მასალებისგან. ამით ჩემი მთავარი სათქმელი განვაცხადე, რომ ძველი შეგვიძლია არ გამოიყურებოდეს ნარჩენად!“. ერთი შეხედვით, ლუქები საკმაოდ სადად გამოიყურება, მაგრამ კოლექცია მთლიანობაში საინტერესო და დასამახსოვრებელია. სამოსში აშკარად იგრძნობოდა ტერი მუგლერისა და კრისტიან დიორის 80-იანი წლების „ოტ კუტურის“ შოუების გავლენა, საიდანაც როლანდს გადმოტანილი ჰქონდა დიდი მხრების სილუეტი, ხავერდის ხალათებისა და კაბების ინსპირაცია.



ჟივანშის სახელის ხსენების დროს, ალბათ ყველას ვარასკვლავები გვახსენდება. იუბერ დე ჟივანში თავიდანვე ხშირად ქმნიდა სამოსს უკვე ლეგენდად ქცეული ადამიანებისთვის. მისი შთაგონების წყარო კი ოდრი ჰეპბერნი გახლდათ, რომელიც თითქმის ყველგან, ფილმსა, თუ რეალურ ცხოვრებაში, ჟივანშის კოსტიუმებს ატარებდა. ბრენდის ახალი კრეატიული დირექტორიც, კლერ ვაით კელერი, აგრძელებს ბრენდის კრედოს და უკვე მოიხვეჭა ვარსკვლავური დიზაინერის სახელი. შეგახსენებთ, წელს სწორად ჟივანშის მოდის სახლის მიერ შექმნილი კაბა ეცვა პრინცესა მეგან მარკელს საკუთარ ქორწილში. კლერმა კოლექცია თებერვალში გარდაცვლილ ბრენდის დამფუძნებელ იუბერ დე ჯივანშის შემოქმედებას მიუძღვნა. ამის გაკეთება მართლაც სარისკო იყო. მაგრამ ბრენდის ისტორიაში პირველმა მდედრობითი სქესის კრეატიულმა დირექტორმა, ამოცანას თავი ძალიან წარმატებულად გაართვა და მსოფლიო პრესაში უდიდესი გამოხმაურება გამოიწვია. კოლექციის მთავარი ინსპირაცია ოდრისთვის შექმნილი კოსტიუმებია, რომელსაც მსახიობი 50-იან და 70-იან წლებში ატარებდა. ძალიან კარგად და შთამბეჭდავად იყო წარმოდგენილი ჩვენებაზე ამ ორი სრულიად განსხვავებული დეკადების სტილის შეჯამება და ბალანსი. კოლექციის მთავარი ფერები შავი, გაყინული მეტალისფერი და თეთრია, რომელიც 70-იანი წლების ელექტრო ნარინჯისფერითა და დისკოს ბურთის ფაქტურებით იყო გამდიდრებული. დაუვიწყარი და ბრენდის ისტორიით ინსპირერებული კოლექციის ნახვის შემდეგ, ისღა დაგვრჩენია, დაველოდოთ მომავალ სეზონს და ვნახოთ, როგორი იქნება კლეირ ვაით კელერის მომავალი მაღალი მოდის კოლექცია.



„ოტ კუტურის“ შეფ მეცნიერად წოდებულმა ირის ვან ჰერპენმა კვლავ გააოცა საზოგადობა და მომავლის მოდა წარმოადგინა. ძალიან რთულია ილაპარაკო ვან ჰერპენის კოლექციების ინსპირაციებზე. მისი შექმნილი სამოსი სხვადასხვა რაკურსით დაკვირვებისას, ყოველთვის ბევრ რამეს გვაგონებს. როგორც დიზაინერმა განაცხადა, მისი მთავარი იდეა იყო, რომ ქსოვილს შეენელებინა მოძრაობა. ირის ვან ჰერპენის კოლექციები ყოველთვის ინსტალაციის სახითაა წარმოდგენილი. შემოდგომა 2018-ის პრეზენტაციის სახეც ინოვაციური გახლდათ. დამონტაჟებული მოძრავი ჭერი, კოლექციას ეფექტურობას მატებდა. ბრენდის სამოსში ყოველთვის იგრძნობა ბიოლოგია, ფიზიკურობა და ალგორითმულობა. დიზაინერის უტოპიური და დისტოპიური იდეების ერთობლიობამ, კვალ ახალი და ინოვაციური სიტყვა თქვა მსოფლიო მოდის განვითარებაში.



ნაზი, ელეგანტური და ფრანგული - ამ მეტაფორებით შეგვიძლია დავახასიათოთ ლეგენდარული მოდის სახლის, კრისტიან დიორის, ახალი კოლექცია. ფრანგული მოდის სახლის კრეატიულმა დირექტორმა, მარია გრაცია ქიურიმ ახალი კოლექცია მთლიანად პასტელურ ფერებში წარმოდგვიდგინა. ჭუჭყიანი ვარდისფერი, ჩაისფერი, მწვანე, ბეჟი - აღნიშნულმა ფერებმა ჩვენება დაუვიწყარი გახადა. რაც შეეხება მასალას, ძირითადად გამოყენებული იყო ატლასის, აბრეშუმისა და ქაშმირის ქსოვილები. „ოტ კუტური არის რაღაც დამალული“ - განაცხადა მარიამ ჩვენების დასრულების შემდეგ. „როდესაც მიდიხარ ატელიეში, შენ ზრუნავ საკუთარ თავზე და იცი, რომ ისინიც აუცილებლად იზრუნებენ შენზე“. მისი სამოსი არის დაფარული ურთიერთობებისთვის, რაც სოციალური მედიის საუკუნეში ძალიან რთულია. „ხელოვნება მარადიულია, ეს არის ოცნება მომავლისთვის“.



შავ, შამპანურისფერ და ვარდისფერ ტონებში წარმოდგენილი არმანის კოლექცია სკულპტურული და რეგალიური აღმოჩნდა. ჯორჯო არმანიმ ჩვენება პარიზში იტალიის საელჩოში გამართა. 96 ლუქისგან შემდგარი Armani Prive-ს კოლექციში პირველი 50 ლუქი კლასიკურ შამპანიურისფერ და შავ ფერებში იყო წარმოდგენილი, სადაც მრავალად იყო გამოყენებული ხავერდი. წითელი ხალიჩისთვის განკუთვნილი კოლექცია ვარსიფერი ბუმბულების შემოტანამ კიდევ უფროდასამახსოვრებელი გახადა. ფლამენგოების ერთობლიობის ეფექტით შექმნილი მოსაცმელები, შავი ხავერდის კაბებს ელეგანტურობასა და ქალურობას მატებდა. წარმოდგენილი კოლექციების ფონზე, თამამად შეგვიძლია ვთქვათ, რომ ვარდისფერი მაღალ მოდას კვლავ დაუბრუნდა და ისევ ტენდნეციური გახდა.



ალბათ თანამედროვე მაღალი მოდა არაფერი იქნებოდა, რომ არა შანელი და მისი კრეატიული დირექტორი კარლ ლაგერფელდი. შანელის ჩვენებები ყოველთვის სახელგანთქმულია დეკორაციებით. ამ სეზონზე კარლის ინსპირაცია პარიზის ფართე ტროტუარები და დაბალი ქვის კედლები გახდა, რომელიც მეჩვიდმეტე საუკუნეში აშენებულ Institut de Paris-ის გარე ხედია. კოლექცია კი 50-იანი წლების საფრანგეთია, რომელიც კარლის უსაყვარლესი პარიზული ეპოქაა. სამოსი ძირითად ნაცრიფერსა და ქვისფერში იყო წარმოდგენილი, რომელსაც ბრწყინვალებას მატებდა ხელით შესრულებული ამოქარგული დეტალები. ოტ კუტურის ახალ სეზონზე შანელმა წარმოადგინა ტრანსფორმირებადი სამოსი. ქვედაბოლოებსა და პიჯაკებს გვერდებში ჩაყოლებული აქვს ელვა შესაკრავები, რომელიც რეგულირდება და საშუალებას იძლევა, დღის მანძილზე განსხვავებულ გარემოებებში სხვადასხვაგვარად გამოიყურებოდე. „როდესაც ბანკირთან მიდიხართ შესახვედრად, ალბათ ამ ელვა შესაკრავებს ბოლომდე შეკრავთ, ხოლო იქიდან თუ თქვენს პარტიორს ხვდებით, მაშინ ბოლომდე გაიხსნით და გამოაჩენთ სხეულის ნაწილებს“ - განაცხადა კარლმა ჩვენების დასრულების შემდეგ. აღსანიშნავია ის ფაქტიც, რომ შანელი იმ იშვათ მოდის სახლს მიეკითვნება რომლის კოლექციის თვალიერების დროსაც იგრძნობა, თუ რომელი სეზონისთვისაა შექმნილი სამოსი. ახალ კოლექციაშიც ჭარბად იყო წარმოდგენილი პალტოები, პიჯაკები და მცირე რაოდენობის თხელი კაბები. აქრომატულ ფერებში შექმნილ კოლექციას შლეიფად მისდევდა ბრჭყვიალა დეტალები, რომელის მეშვეობითაც ბრენდის იდენტიფიცირება ძალიან მარტივია.



ერთ-ერთი ყველაზე საინტერესო კოლექცია მეისონ მარგიელამ წარმოადგინა. ბრენდის კრეატიული დირექტორი ჯონ გალიანო ყოველთვის გამოირჩევა ინოვაციებით და მსოფლიო მოდას ახალ, სკულპტურულ სამოსს სთავაზობს. მატერიებისა და ფერების სიმრავლე წარმოდგენილ ლუქებს სიხალისეს მატებდა. კოლექცია უფორმო, ოვერსაიზდ და ეპატაჟურია. მხოლოდ ჯონ გალიანოს შექმნილ ჩვენებაზე თუ ვნახავთ ხელსა და ფეხზე მიმაგრებულ მეტალის ტელეფონის ჩასადებებს. მსოფლიო პრესაში კოლექციამ დიდი გამოხმარეუბა გამოიწვია, ჯონ გალიანომ კი კიდევ ერთხელ დაამტკიცა კრეატიულობა და შთამბეჭდაობა.



არასდროს ჩაუვლია ვალენტინოს „ოტ კუტურის“ ჩვენებას ისეთი ხმაურით, როგორც წელს. ბრენდმა მართლაც ტრიუმფალურად დახურა პარიზის მაღალი მოდის კვირეული. ბოლო ჩვენება ყველაზე დასამახსოვრებელი და საუკეთესო აღმოჩნდა. ბრენდის კრეატიულმა დირექტორმა, პიერ პაოლო პიჩოლიმ, საზოგადოებას კლასიკური ფერებისგან შემდგარი კოლექცია შესთავაზა. მისი ინსპირაცია XVI -XVII საუკუნეების იტალიერლი ფერმწერების ნამუშევრები და ბერძნული მითოლოგია გახდა. იტალიური ხელოვნების დიდებით შეპყრობილმა პიერ პაოლომ, რომლის ერთ-ერთი ინსპირაცია კინორეჟისორი პაზოლინის ფილმებიც იყო, ჩვენების დასრულების შემდეგ განაცხადა: „მაღალი მოდა მოიცავს ღრმა და ინტიმურ პერპექტივას, რომელშიც უნდა ჩაეფლო შენი საკუთარი ხედვითა და სილამაზით“. ზღაპრული კაბები უამრავი დეტალებითა და სხვადასხვა ტექსტილის მასალებითაა გაფორმებული. კოლექცია საკმაოდ დრამატული, დასამახსოვრებელი და ვარსკვლავურია. ლუქებს შთამბეჭდაობას ხელით შექმნილი თავსაბურევები სძენდა, რომელიც ყოველთვის დამახასიათებელია ვალენტინოს ჩვენებებისთვის. ჩვენების დასრულების შემდეგ, ბრენდის დამფუძნებელი ვალენტინო გარავნი ფეხზე წამომადგარი და აცრემლიანებული ულოცავდა პიერ პაოლოს წარმატებულ კოლექციას. რამდენიმე დღის შემდეგ კი, ამერიკელი პოპ-დივა ბიონსე თავის კონცერტზე დამსწრე საზოგადოების წინაშე, სწორედ ვალენტინოს შემოდგომა 2018-ის „ოტ კუტურის“ კაბით წარდგა.

ივანე ქეშიკაშვილი
ფოტო: ანანო გარდაფხაძე

ასევე დაგაინტერესებთ:

ივანე ქეშიკაშვილის ბლოგი - დღეს მოდაშია ყველაფერი
ძველი ჰოლივუდის გლამური - ივანე ქეშიკაშვილის ბლოგი
ივანე ქეშიკაშვილის ბლოგი - ექსტრემალური მანიფესტაცია პოდიუმზე



 

 

 

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.