როგორ გავხდეთ და გავახდუნოთ ქმრები

რამდენიმე დღის წინ, ინტერნეტში სახალისო ფოტო-კოლაჟი ვნახე, რომელსაც ერქვა - "მამაკაცები ქორწინებამდე და ქორწინების შემდეგ".

 

 

დაუქორწინებელ მამაკაცებს ნავარჯიშევი, იდეალური სხეული ჰქონდათ, დაქორწინებულებს კი კოხტა ღიპები ამშვენებდათ... ამ მოვლენამ დამაფიქრა. საინტერესოა, რატომ სუქდება ასე ძალიან მამაკაცების უმრავლესობა განსაკუთრებით ქორწინების მერე? იშვიათად მინახავს უცოლო კაცს იმხელა ღიპი ჰქონდეს, რამხელაც ცოლიან კაცებში გვხვდება...


ეს კითხვა ჩემს რამდენიმე ნაცნობს დავუსვი და ყველასგან ერთი და იგივე პასუხი მივიღე: - "ალბათ იმიტომ, რომ ცოლები ზედმეტად კარგად ზრუნავენ მათი კვების რაციონზე. საჭმელი მაგათ არ აკლიათ და სასმელი..."

ამ პასუხმა ბოლომდე ვერ დამაკმაყოფილა, რადგან ყველამ ძალიან კარგად ვიცით, რომ ქვეყანაში, რომელსაც მცველად "ქართვლის დედა" ადგას თავზე, ზრდასრული მამაკაცების დედები უფრო მეტად ზრუნავენ ვაჟთა კვებაზე, ვიდრე მათი ცოლები...

ჩემი აზრით, "ქორწინების შემდგომი სიმსუქნის" პრობლემა სხვა რაღაცაშია. კერძოდ კი იმაში, რომ დაოჯახებული კაცი (გინდაც ქალი. ფემინისტი არ გეგონოთ) აღარ არის დაკავებული აქტიურად, საპირისპირო სქესის წარმომადგენლებისთვის თავის მოწონებაზე. იშვიათად ვარჯიშობს, ეშვება (თავი უკვე ქუდში აქვს), სხვა საზრუნავი უჩნდება, ან უბრალოდ ეზარება მომაბეზრებელი დიეტების დაცვა. ჩემი "პოსტიც" სწორედ დიეტას ეხება და არა "ქორწინების შემდგომი სიმსუქნის" მიზეზების კვლევას... რამდენიმე თვის წინ, ერთი სუპერ დიეტა აღმოვაჩინე, რომელიც ძალიან მარტივი და ეფექტურია. არ მოითხოვს შიმშილს და რაციონის განაწილებას...

ამ დიეტით ჩემმა ქმარმა პირველივე თვეს 7 კილო დაიკლო. ახლა აღარც ღიპი აქვს და აღარც ჩემზე დიდი ძუძუები.  დიეტა მართლა იდეალურია ქალებისთვისაც და მამაკაცებისთვისაც, რომლებსაც ჭარბი წონა და სიზარმაცე აწუხებთ...

ერთადერთი და აუცილებელი პირობა ისაა, რომ რეცეპტი ზუსტად უნდა დაიცვათ!

 

ჯადოსნური სუპის რეცეპტი:

ავიღოთ საშუალო ზომის ქვაბი და ჩავყაროთ შიგნით პატარა კუბებად დაჭრილი ბოსტნეული:


2 მწვანე ბულგარული;
4-5 საშუალო თავი ხახვი;
1 კბ. ნიორი;
ჩვეულებრივი ან ყვავილოვანი კომბოსტო, რომელსაც ასევე კუბებად დაჭრით (უფრო გემრიელი გამოდის ბროკოლით, ოღონდ დიდხანს ნუ მოხარშავთ. ბროკოლი ქვაბის გამორთვამდე 5-7 წუთით ადრე ჩაყარეთ);
1 პატარა პომიდორი (ჩაის კოვზით ტომატ-პასტაც შეგიძლიათ);
თითო ძირი მწვანილი (ქინძი, ოხრახუში, თითო ღერი ნიახურიც ჩაახარშეთ);
2 ცალი ბოსტნეულის კუბი ("გალინა ბლანკა");
მარილი, წიწაკა, პილპილი - გემოვნებით.


დაასხით 2 ლიტრი წყალი და მოხარშეთ. სუპი უცხიმოდ უნდა მიირთვათ იმდენჯერ, რამდენჯერაც მოგშივდებათ. თეთრი პური - დიეტურით შეცვალეთ, ან საერთოდ ამოიღეთ რაციონიდან. შეზღუდეთ ტკბილეული და ცხიმიანი საკვები. შეგიძლიათ მიირთვათ ხილი, მოხარშული ხორცი, სალათები - ოღონდ ზომიერად. მოერიდეთ შემწვარ-მოხრაკულებს და ერთ-ორ თვეში თქვენი შედეგი გაგვიზიარეთ!

 

P.S.  ეთანხმებით იმას, რომ ადამიანების უმრავლესობა ქორწინების მერე სუქდება? და თუ ეთანხმებით, თქვენი აზრით რა არის ამის მიზეზი? იქნებ თქვენც იცით რაიმე სუპერ-დიეტა, რომელსაც კომენტარებში გაგვიზიარებთ?

like
3

კომენტარები

ინგა
ეს საქართველოში და განუვითარებელ ქვეყნებში თორე იტალიაში ლამის ღრმა მოხუცებულობამდე დადიან სავარჯიშო დარბაზებში ცეკვებზე
2017-07-29 16:44
მიმი
მაგრა ვიხალისე :)))) ქორწინების მერე მართლა სუქდება უმეტესობა.
2016-01-13 13:33

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.