ლაშა ბაკურაძის ფოტოგრაფიის ენა

ჟურნალი „ბომონდი“ წარმოგიდგენთ ახალბედა ქართველ ფოტოგრაფს ლაშა ბაკურაძეს. 22 წლის ფოტოგრაფი რამდენიმე წელია დაკავებულია ამ საქმიანობით და უკვე მოდის ბიზნესში წარმატებებსაც აღწევს. მის გადაღებულ ფოტოებს შევხვდებით ისეთ ცნობილ გამოცემებში, როგორიცაა Vogue Italia, Jute Magazine და სხვა. ის ასევე ხშირად იღებს ცნობილი ქართველი დიზაინერების ფოტოპროექტებს. ლაშა ინტერვიუში დაწვრილებით გვიყვება, თუ რას ნიშნავს მისთვის ფოტოგრაფია და რატომ აირჩია ე.წ. მოდის ფოტოგრაფია.



 - როდის გადაწყვიტე, რომ ფოტოგრაფი გამხდარიყავი?

- ფოტოგრაფია არის ენა, რომელიც ყველას ესმის. აქ არ არსებობს შეზღუდვები, საზღვრები, წესები, პოლიტიკა. აქ ხარ
შენ და შენი შინაგანი სამყარო. „მე“ რომელსაც რაღაც პროტესტი აქვს, რომელსაც რაღაცის თქმა სურს, უნდა იმის გადმოცემა, თუ რა მოსწონს ან პირიქით, რა უხარია ან არა. ფოტოთი ამბობ სათქმელს, მუხტავ ენერგიით, შეიგრძნობ, განიცდი წამს და თვით დროსაც კი აჩერებ. წარმოიდგინეთ, როცა ამხელა, უსაზღვრო და შეუზღუდავ შესაძლებლობებს გაძლევს ფოტოგრაფია, რატომ გავუშვებდი ამ შანსს ხელიდან? და სამი წლის წინ ჩემს ძირითად პროფესიად ავირჩიე სწორედ ფოტოგრაფია და დღესაც იგივე ენთუზიაზმით ვაკეთებ ჩემს საქმეს, როგორც თავდაპირველად.



- შენი აზრით, როგორია კარგი ფოტო?

- როცა დანახვის წამიდან შენს მეხსიერებაში ადგილს იკავებს თავისი ორიგინალური და ხატოვანი შტრიხებით. მკაფიოდ გადმოგცემს და გმუხტავს თავისი ენერგიით. ხოლო შემდეგ თუ მსგავსი შტრიხებით, განათებით, თემატიკით ან მოხაზულობით დაინახე ეს ყველაფერი, სწორად ის იწვევს ასოციაციას იმ „კარგი ფოტოსი“. კარგი ფოტო არასოდეს იშლება ადამიანის მეხსიერებიდან და ალბათ, ყველას აქვს ერთი კადრი მაინც გონებაში, რომელსაც სულ ხედავს.



- როგორ მოდის ინსპირაცია სხვადასხვა გადაღებისთვის?

- ჩემი პროფესია მოდის ფოტოგრაფიაა. საერთო ენას სამოსთან ვნახულობ. თვითონ ტანსაცმელი გადმომცემს რა სურს ან რას ითხოვს. როცა სამოსს ვხედავ, უკვე ვიცი როგორი მოდელი მოირგებს, რა ხასიათს უნდა ატარებდეს ფოტო, რას ამბობდეს და რას უნდა გზავნიდეს საზოგადოებასთან. გადაღებების პროცესში გამომიცდია, რომ არ არის გამორიცხული დალაგებული „mood board“ საერთოდ აირიოს, რადგან ინსპირაცია ხანდახან მუშაობის პროცესშიც იბადება.

- შენი გადაღებული პროექტებიდან რომელია განსაკუთრებულად საყვარელი და რატომ?

-  ასე ვერცერთს ვერ გამოვყობ, ყველა თავისებურად მიყვარს, რადგან ყველა ჩემი ნაწილია. თითოეული მათგანი ისეთია, როგორიც მინდოდა რომ ყოფილიყო და ყველას საკუთარი პატარა ისტორია აქვს. ამ განსხვავებული ისტორიების წყალობით, ყველა ჩემი გადაღებული პროექტი, ჩემთვის ძალიან დასამახსოვრებელი, განუმეორებელი და ძვირფასია.



- ვის თვლი საუკეთესო ფოტოგრაფად?

- ძალიან რთულია დავასახელო საუკეთესო ფოტოგრაფი. თითოეული ფოტოგრაფის შრომა იმდენად დიდი და დასაფასებელია, რომ მიჭირს კონკრეტულად ერთის დასახელება, მაგრამ ამ ჯერად, სტივენ მეისელი არის ის ფოტოგრაფი, რომლის ნამუშევრების თვალიერება არ მბეზრდება. ჩემთვის მისი ხედვა და ხელწერა ძალიან განსხვავებულია. მას დიდი ემოცია, შთაბეჭდილება და განცდა მოაქვს.

 - ლაშა, თანამშრომლობ უამრავ ქართველ დიზაინერთან. რატომ აირჩიე ე.წ. მოდის ფოტოგრაფია?

- კი, ასეა და მინდა ყველა დიზაინერს ძალიან დიდი მადლობა გადავუხადო ვინც მენდო და თავიანთი შემოქმედების ფართო საზოგადოებისთვის წარმოჩენა, ჩემი მეშვეობით, ჩემი ფოტოებით მოახდინეს. მოდა ცვალებადი და არასტაბილურია, ანუ ამით იმის თქმა მინდა, რომ სულ გამოწვევებისა და სიახლეების წინაშე ვარ. ახალი დიზაინერი ჩათვალეთ ახალი ხედვისა და ინსპირაციის წყაროა. სულ სიახლის ძიებაში ვარ, რადგან სხვადასხვა ადამიანზე მორგებული ერთი და იგივე ტანსაცმელი, ყოველთვის სხვადასხვაგვარად გვესაუბრება. ამიტომაც ავირჩიე მოდის ფოტოგრაფია და უფრო სწორად რომ ვთქვა, ალბათ უფრო ამ მიმართულებამ ამირჩია მე.



- ყველა ფოტო რაიმე ხასიათის ან ამბის მატარებელია. შენი ფოტოებით რა გინდა, უთხრა მნახველს?

- ფოტო თვითონ იტყვის თავის სათქმელს, რადგან ჩემს მიერ გადაღებული არცერთი ფოტო არ იმეორებს სათქმელს. არ არსებობს ფოტოები, საიდანაც ერთი და იგივე ემოცია მოდის. მთავარია სწორი რაკურსით უყურებდე შენს მუზასა და ნატურას. ის კი ყოველთვის სხვადასხვა ემოციის, ხასიათისა და ამბის მატარებელია. ამიტომ რთულია დავაკონკრეტო, თუ რა მინდა ვთქვა ჩემი ფოტოებით, ვფიქრობ ისინი თავად ყვებიან თავიანთ ისტორიას.

- რას ნიშნავს შენთვის ფოტოგრაფია?

- ფოტოგრაფია სრულფასოვანი ენაა, რომელსაც გაცილებით გლობალური და მასშტაბური კომუნიკაცია შეუძლია. დღესდღეობით ფოტოგრაფია ჩემი ცხოვრების განუყრელი ნაწილია. ის ჩემი ყოველდღიურობაა და ვერ წარმომიდგენია ამ დარგის გარეშე ადამიანის განვითარება. ჩემთვის, რაც მთავარია, ფოტოგრაფია ისტორიაა, რომელიც ყოველთვის ტოვებს დიდ, ვიზუალურ კვალს.



- აღწერე შენი სტილი, როგორც ფოტოგრაფის და ვიზუალური არტისტის?

-  შერჩეული არ მაქვს არც სტილი და არც ხედვა, რომ მკაფიოდ ერთი მიმართულებით ვიმოძრაო. ყველაფერი რაღაცისგან გამომდინარეობს, ყველაფერს თავისი დაწყების, შექმნის მიზეზი და მნიშვნელობა აქვს. მიყვარს მრავალფეროვნება ამ განხრით, რადგან მეტ გამოცდილებას ვიძენ. ვფიქრობ, რაიმე კონკრეტულ ერთ სტილს რომ მივდიო, აუცილებლად მომაქცევს ჩარჩოებში. ვთვლი, რომ არ არის აუცილებელი კონკრეტული სტილიზებული მიმდინარეობის არჩევა.

- როგორია შენი გეგმები?.....

- სამომავლო გეგმები ძალიან ბევრი მაქვს, რაზეც საუბარი ჯერ არ მინდა. ჩემთვის მთავარი შედეგია და სწორედ ამაზე ვარ ორიენტირებული. გპირდებით, რომ ჩემგან ძალიან ბევრ სიახლესა და საინტერესო პროექტს იხილავთ.

ტექსტი: ივანე ქეშიკაშვილი
like
1

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.