ინტერიერი ავანგარდული ელემენტებით


ინტერიერში მოსწონს სისადავე ავანგარდული შტრიხებით. ნამუშევრებში იგრძნობა მინიმალიზმი და ჰარმონია, რაც საცხოვრებელი სივრცისთვის მნიშვნელოვანია.
მუშაობს როგორც საცხოვრებელი სახლის, ასევე საზოგადოებრივი ადგილების მოწყობაზე. წარმოგიდგენთ ინტერიერის დიზაინერ ნინო დიასამიძის ნამუშევრებს.



ნინო დიასამიძე

- ხელოვნების კოლეჯი, შემდეგ სამხატვრო აკადემიის არქიტექტურის ფაკულტეტი დავამთავრე. ინტერიერის დიზაინი მიზიდავდა, ამიტომ სწავლასთან ერთად კერძო დაკვეთებზეც ვმუშაობდი. გამოცდილებაც ნელ-ნელა დავაგროვე  სხვადასხვა კომპანიასთან, მათ შორის,სარეკლამო სფეროში, გრაფიკული დიზაინის მიმართულებით მუშაობა ძალიან დამეხმარა. პირველი პროექტებიც ამ პერიოდისაა. იმ წლებიდან დამამახსოვრდა ერთ-ერთი პირველი ნამუშევარი, რომელიც ლუდის მაღაზიისთვის შეიქმნა. დამკვეთს უნდოდა, პროექტი საინტერესო და კრეატიული ყოფილიყო. ასეთმა მიდგომამ შებოჭილობისგან გამათავისუფლა. ანუ, არა მხოლოდ მისი იდეები უნდა დამეკმაყოფილებინა, რაღაც ახალიც შემეთავაზებინა. საქმე ლუდის მაღაზიას შეეხებოდა და გადაწყვეტილებებიც შესაბამისი უნდა ყოფილიყო. გარდა იმისა, რომ ლუდის მაღაზიისთვის დამახასიათებელი განწყობა უნდა შემექმნა, ეს სივრცე მიმზიდველიც უნდა ყოფილიყო, უხეშად რომ ვთქვათ, მადის აღმძვრელიც. ყველა ობიექტს შესაბამისი განწყობა სჭირდება, ეს იქნება საცხოვრებელი ბინა თუ საზოგადოების თავშეყრის ადგილი. როცა იდეების დამუშავებას იწყებ, ითვალისწინებ დამკვეთის სურვილს და მიმართულებასაც ადვილად პოულობ. შესაბამისად, ლუდის მაღაზია კარგი გამოვიდა. იმის გამო, რომ ეს სივრცე ლუდის მოყვარულთა ადგილად უნდა ქცეულიყო, გამოვიყენე ამავე კომპანიის სარეკლამო პოსტერები, რომლებიც კედლებზე განვათავსე. კედელზე მიმაგრებული ლუდის ბოთლის ფორმის საათიც მიგვანიშნებდა, რომ აქ ლუდის მოყვარულებს უნდა მოეყარათ თავი. გამოვიყენე ასევე დაბრენდილი შპალერი და ლუდის კასრებით ავაწყვეთ მაგიდებიც. იქაურობა გადატვირთული რომ არ ყოფილიყო, წონასწორობა დავიცავით და ეს დეტალები ზომიერად გავანაწილეთ. ამდენად, არ შეგექმნებოდა შთაბეჭდილება, რომ ყველაფერი ერთ სივრცეში იყო ჩაყრილი. გადატვირთული ინტერიერი გამაღიზიანებელია. მნიშვნელოვანია ჰარმონიაც, რაც დეტალების ზუსტი გადანაწილებით მიიღწევა



-თქვენი რომელი საინტერესო და მნიშვნელოვანი პროექტი გახსენდებათ?

- ახლახან დავამთავრე კერძო საცხოვრებელი სახლის ინტერიერზე მუშაობა. საინტერესო პროექტი იყო, მისი არქიტექტურული მხარეც საინტერესო გახლდათ. ორსართულიანი სახლია და თბილისში მდებარეობს. სახლს არასტანდარტული მაღალი ჭერი და ვიტრაჟები ჰქონდა, ასეთი ინტერიერი საინტერესო გამოდის. ასეთ სახლში დღის სინათლეც უხვად შემოედინება. ნამუშევარი ეფექტურია და ხარისხიანი. ასეთ ინტერიერს ძალიან მოუხდა მინიმალისტური სტილი, _ სტუდიოს ტიპის დიდი მისაღები ოთახით და ელექტრობუხრით. დამკვეთის სურვილის გათვალისწინებით, ღია კრემისფერის, თეთრისა და ნაცრისფერის (ნაცრისფერი და კრემისფერი ამ ბრუნვებში არ იკუმშება) კომბინაცია შევარჩიეთ ინტერიერის ტონალობებად. ეს შეფერილობები კვლავ ტენდენციურად ითვლება, რაც მისასალმებელია, რადგან ინტერიერი ნათელი გამოდის და ასეთ სივრცეში მეტი ჰაერი იგრძნობდა. ასეთი გარემო მალე არ გბეზრდება. მოსაწყენი რომ არ იყოს, კონტრასტებსაც მივმართავ, რასაც ძირითადად დეკორით ვქმნი. ეს შეიძლება დიდი სარკე ან ხელნაკეთი, ორიგინალური ნივთები იყოს. ვცდილობ, თითოეულ ოთახში რაღაც განსხვავებული და ორიგინალური შევიტანო. ერთ-ერთი არაორდინარული პროექტი იყო კერძო სამსართულიანი სახლი ქალაქგარეთ. საინტერესო იყო ამ სახლის არქიტექტურული მხარეც. მისაღები ოთახის ჭერი გახსნილი იყო, რამაც საშუალება მომცა, ორიგინალური, ავანგარდული სტილის ჭაღი გამომეყენებინა, რომელიც სამივე სართულზე მისაღებ ოთახამდე ჩამოდიოდა. ჭერიდან ჩამოვუშვი საქანელა სკამი, რომელიც უცხო ელემენტი გახლდათ ინტერიერში. კიბეები შევმინე, რაც ასევე, ტენდენციურია. ინტერიერი მინიმალისტურად გადავწყვიტე, სადა, ნეიტრალურ ფერებში. მიუხედავად იმისა, რომ დიდი სივრცე იყო, კარგად ავითვისეთ. მისაღებში ტელევიზორის კუთხე მოეწყო. იქვე განთავსდა ელექტრობუხარი. მისაღებშივე განვათავსეთ ორიგინალური ფორმის სარკე.



- რომელი მიმდინარეობა მოგწონთ?

- თანამედროვე მინიმალიზმი, ასევე ლოფტის სტილი, რომელიც ავანგარდული ელემენტებით იქნება გაფორმებული. მიყვარს, როდესაც ინტერიერში არაორდინარული ნივთებია შეტანილი. ავანგარდული შეიძლება დეკორი იყოს, ასევე ავეჯი. ბაზარზე საინტერესო არჩევანია, რომლის გამოყენებაც შეიძლება. ყოველთვის ვეცნობი სიახლეებს, ამიტომ საქმის კურსში ვარ. ვცდილობ, დამკვეთს შევთავაზო ის სიახლეები, რაც ჩვენს ბაზარზე მოიპოვება. მაქვს სპეციალური საიტი, სადაც მომხმარებელს ვურჩევ, როგორ უნდა შეარჩიოს ფარდები სივრცისთვის, ასევე ავეჯი თუ დეკორატიული ნივთები. ჩემთვის მისაღები სადა ინტერიერია, რომელშიც ავანგარდული ხედვაცაა შეტანილი.

- თქვენი ნამუშევრებისთვის დამახასიათებელია აგურის ელემენტები... ეს ელემენტი რამდენად ეხამება სხვადასხვა სტილისა და მოცულობის სივრცეს?

- ეს ელემენტი იდეალურია ლოფტის სტილისთვის. ამ სტილისთვის დამახასიათებელია დიდი ვიტრაჟები, აგურის ეფექტი, სადა ნეიტრალური ფერები, რომელსაც ხშირად ვიყენებ. ერთ-ერთი ბოლო პროექტი მანსარდის სტილის ბინა იყო და ეს ელემენტები გამოვიყენე. მეორე სართულზე ღია საძინებელი მოვაწყვე, ხოლო ქვედა, მისაღები სივრცე ლოფტის სტილში გადავწყვიტე, სადაც აგურიც გამოვიყენე. საინტერესო იყო ამ დაკვეთაზე მუშაობა, რადგან ინტერიერის დიზაინერებს თანამედროვე მიმართულებებზე მუშაობის ფუფუნება ხშირად არ გვაქვს, დაკვეთა სტანდარტულ ინტერიერებზეა.

- რომელი მიმდინარეობა ითვლება ტენდენციურად. ბოლო წლებში რა შეიცვალა ინტერიერის დიზაინში?

- შეიცვალა დამკვეთების დამოკიდებულება, მოსახლეობა მიხვდა, რომ პროფესიონალი დიზაინერის რჩევების გათვალისწინება აუცილებელია, შესაბამისად, წინა წლებთან შედარებით, ინტერიერის დიზაინერზე მოთხოვნაც გაზრდილია. დამკვეთები უკვე ყველა ნიუანსს ყურადღებას აქცევენ. უნდათ ორიგინალური, განსხვავებული, ამავდროულად პრაქტიკული ინტერიერები. რაც შეეხება ტენდენციებს, მინიმალისტური და ლოფტის სტილია მოდური, სადაც აქცენტი ნეიტრალურ და სადა ტონალობებზეა. აბაზანაში ტენდენციური გახდა ხის ფაქტურები. საინტერესოა განათების სისტემები. ეს ეხება არა მხოლოდ ცენტრალურ განათებას, არამედ დეკორატიულსაც. საინტერესო ტენდენცია იგრძნობა ვინტაჟურ სტილთან მიმართებაშიც. აქტუალურია სკანდინავიური სტილიც.



მისაღები ოთახის კონცეფცია

- საცხოვრებელი სახლის სივრცე პრაქტიკული და ფუნქციური უნდა იყოს. დამკვეთმა უნდა ჩამოაყალიბოს საკუთარი კონცეფცია, რაშიც დიზაინერიც დაეხმარება. გასათვალისწინებელია ოჯახის წევრთა რაოდენობა და თაობები, ამ სივრცეში თანაცხოვრება რომ შეძლონ. თუკი ოჯახში პატარა ბავშვებიც არიან. ნიუანსებამდეა დეტალები გასათვალისწინებელი. სასურველია, თუ გარემო მინიმალისტურად იქნება გადაწყვეტილი აუცილებელი ნივთებით. ბავშვებისთვის კი გასათვალისწინებელია უსაფრთხოების ზომები, ამავდროულად პრაქტიკული მხარე. ასეთ დროს რბილ ავეჯზე ღია ტექსტილს იშვიათად ვიყენებ. ასეთ შემთხვევებში ყოველთვის დამკვეთის მხარეს ვართ და ვურჩევთ ისეთ გადაწყვეტილებებს, რაც მისთვის იქნება პრაქტიკული.

ტექსტილი

- ტექსტილის შერჩევის ორი ვარიანტია. ერთია, ნეიტრალური ფერები, რომელიც თანხვედრაში უნდა იყოს სივრცესთან და არ იკვეთებოდეს მისი ტონალობა. მეორე ვერსიაა კონტრასტებზე თამაში, ანუ, როცა ტექსტილს დეკორის ფუნქციასაც უთავსებ, როცა მისი ტონალობა მკვეთრია და ყურადღებას იქცევს. პატარა ზომის ფართობზე სასურველია, ფარდა ჭერიდან ჩამოდიოდეს, რაც ფართობის ზრდის ეფექტს ქმნის, სიმაღლეში ზრდის კედელს. ვფიქრობ, ჭერიდან ჩამოსული ფარდა ლამაზიცაა. როცა ტექსტილს საძინებლისთვის ვირჩევთ, უნდა გავითვალისწინოთ, ოთახი რამდენად მზიანია. თუკი სივრცეში დილით უხვად შემოედინება მზის სინათლე, მუქი ტექსტილის შერჩევაა სასურველი, დღის სინათლემ რომ არ შეგაწუხოს.



სამზარეულო

- სამზარეულო ყველაზე პრაქტიკული ადგილია საცხოვრებელ ბინაში, ამიტომ დიასახლისები მეტ სათავსს ითხოვენ. ძალიან მომწონს ღია თაროები, რაც ტენდენციურიცაა, თუმცა ასეთი გადაწყვეტილებებისგან ხშირად თავს იკავებენ. ასევე ტენდენციურია სამზარეულოს კარადები სახელურის გარეშე, როცა ავეჯს ერთიანი ზედაპირი აქვს. რაც შეეხება ორიგინალურ გადაწყვეტილებებს ამ სივრცეში, ეს განათების სისტემებით შეიძლება გადაიჭრას. შეიძლება კარადებს შორის დავამატოთ განათებები. სტუდიოს ტიპის ბინაში, სადაც პატარა ბარიც იქნება მოწყობილი, შეიძლება ორიგინალური ფორმის სანათები გამოვიყენოთ. სასურველია, თუ სამზარეულო ღია ფერში იქნება გადაწყვეტილი. ხშირად თავს ვიკავებ შავ-თეთრი ფერებისგან, რადგან რთული მოსავლელია. სამზარეულოს შავ ზედაპირს მკვეთრად აჩნდება ნათითურები. ტენდენციურია და ჩემთვისაც მისაღებია უხვად გამოყენებული ხის ფაქტურები.

სააბაზანო

- სააბაზანოს საცხოვრებელ ბინაში ყველაზე პრაქტიკული დატვირთვა აქვს. თუმცა, შეიძლება ეს სივრცეც საინტერესოდ გადავწყვიტოთ. როგორც აღვნიშნეთ, აქტუალურია ხის ფაქტურები და სააბაზანო სივრცესაც უხდება. ძალიან ეფექტური გამოდის ღია კრემისფერისა და ყავისფერის კონტრასტი, თეთრის, ნაცრისფერისა და რუხის შეხამებები. ბაზარზე უხვადაა წარმოდგენილი დეკორიც, რომლის გამოყენება ამ სივრცეში შესაძლებელია. მაგალითად, შეიძლება ეს იყოს მოზაიკა რომელიმე კედელზე. ძირითადად, სადა კომპოზიციებია ტენდენციური. თანამედროვე სამყაროში სისადავე ფასობს.



საძინებელი

- საძინებელში მნიშვნელოვანი ჰარმონიის დამყარებაა. ეს ეხება როგორც ავეჯსა და ტექსტილს, ასევე ნივთების ერთმანეთთან მიმართებასაც. სასურველია, თუ საგარდერობე ოთახისთვის გამოიყოფა ცალკე ფართობი, რათა საძინებელი კარადებით არ გადაიტვირთოს. საწოლი უნდა იყოს ლამაზი და მოსახერხებელი. ტენდენციურია საწოლის რბილი და მაღალი თავი, რაც დეკორის ფუნქციასაც შეითავსებს. საძინებელში სივრცის გასაზრდელად ხშირად სარკეებს ვიყენებ.

განათების სისტემები და დეკორი

- დეკორად ხშირად ვიყენებ მცენარეებს, რაც აცოცხლებს გარემოს, შეიძლება ფერწერული ნამუშევრებისა და პრინტების გამოყენებაც, თუკი დამკვეთის სურვილი იქნება. საინტერესო გარემოს ქმნის ხელნაკეთი ნივთებიც. რაც შეეხება განათების სისტემებს, უპირველესად, ვითვალისწინებ ბუნებრივ განათებას. განათება ზომიერი უნდა იყოს, ინტერიერში სიმყუდროვე რომ შევინარჩუნოთ.



პირადი სივრცე

_ ჩემი ოცნების სახლი ქალაქგარეთ, ზღვის სანაპიროზეა. (რომელ ქალაქს გულისხმობს, ზღვის სანაპიროც რომ იყოს და ქალაქგარეთაც) ნათელი... ერთსართულიანი, ისეთი სივრცით, სადაც არ იქნება ტიხრები, ეს სივრცე გარშემორტყმული იქნება დიდი ვიტრაჟებით. გადაწყვეტილი იქნება ღია, სადა ტონალობებში. ამ სივრცეში წარმოდგენილი იქნება უცხო, ავანგარდული სტილის ნივთები. ასეთ ნივთებს ყველა კუთხეში წარმოვადგენდი ისე, რომ არ დარღვეულიყო სივრცის ჰარმონია.



ქეთი დარჩია



like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.