ლიკა რიგვავა - სილამაზე და ინტელექტი, მიმზიდველი გარეგნობის ორი მხარე

მის გარეგნობაში სილამაზე და ინტელექტი იკვეთება. საქმიანობა `ელიტ მოდელ ლუქში" დაიწყო და სილამაზის კონკურს "მის საქართველო 2013"-ის გამარჯვებულია.
მისი პოდიუმზე გამოჩენა Mercedes Benz Fashion Week თბილისის-ს უკავშირდება. სწორედ იქ იხილა
მოდელი ცნობილი გამოცემის Vogue  წარმომადგენელმა და 5 საუკეთესო ქართველ მოდელ გოგონას შორის დაასახელა. თანამშრომლობს როგორც ქართველ დიზაინერებთან და ადგილობრივ გამოცემებთან, ისე უცხოელ დამკვეთებთან. უმუშავია ისეთ გამოცემებთან როგორიცაა :Harpers Bazaar, Boutique, ID Magazine, Dazed Magazine, Schon Magazine. მარტის ნომრის გარეკანის სტუმარზე ლიკა რიგვავაზე გესაუბრებით...



- ლიკა, როგორ გახდით მოდელი?

- 2013 წელს მივიღე მონაწილეობა ელიტ მოდელ ლუქის კონკურსში. ეს იყო ჩემი პირველი ნაბიჯი ამ სფეროში, რის შემდეგაც აქტიურად ჩავერთე სხვადასხვა გადაღებაში. პოდიუმზე მოგვიანებით, 2 წლის შემდეგ, MBFW-ზე გამოვედი. მას შემდეგ ვთანამშრომლობ ფოტოგრაფსა და დიზაინერებთან.

- რა გხიბლავთ მოდელის საქმიანობაში ყველაზე მეტად?

-საინტერესო და მრავალფეროვანი სამუშაოა, შთაბეჭდილებებით დატვირთული. გიხდება გარდასახვა, ურთიერთობა სხვადასხვა ადამიანთან, პოდიუმსა თუ გადაღებაზე სხვადასხვა როლის მორგება. ეს არის ყველაზე მიმზიდველი ამ საქმიანობაში. რომ არაფეი ვთქვათ მის ესთეტიკურ მხარეზე. ვემსახურებით სილამაზეს. მოდის სფეროშიც ყოველთვის სიახლეებია და ამ მხრივაც მრავალფეროვანი სამუშაოა.



- რომელია თქვენთვის მნიშვნელოვანი პროექტები...

- საინტერესო თანამშრომლობა მქონდა არაერთ ცნობილ გამოცემასთან. ვმონაწილეობდი: Harpers Bazaar, Boutique, ID Magazine, Dazed Magazine, Schon Magazine გადაღებებში. ამ გადაღებების მნიშვნელოვანი ნაწილი `მერსედეს-ბენცის~ მოდის კვირეულის ფარგლებში გაიმართა. შესაბამისად, დროის მცირე მონაკვეთში ხარისხიანი პროდუქტი უნდა მიგვეღო. თან ასეთი გამოცემები ხარისხს განსაკუთრებულ ყურადღებას აქცევენ. გადაღებები მცირე დროში მიმდინარეობს, ხარისხიც ექსტრემალურია და გარკვეულ ღელვასაც უკავშირდება. ეს გადაღებები ყველაზე მეტად დამამახსოვრდა. ვთანამშრომლობ ქართველ დიზაინერებთანაც. მათ ჩვენებებში, ლუქბუქების გადაღებებში ვმონაწილეობ.

- ხშირად გიღებენ ფოტოსესიებში. გაიხსენეთ თქვენთვის საინტერესო ფოტოსესიები.

- რომელიმეს გამოყოფა გამიჭირდება, რადგან სხვადასხვა ხასიათისაა და ყოველი მათგანი რაღაცით საინტერესოა. განსაკუთრებით, როცა საქმე ცნობილ გამოცემებს ეხება, რაც კიდევ უფრო მამდიდრებს პროფესიული კუთხით.



- თუ გქონიათ ექსტრემალური, რთული გადაღება და როგორ გაართვით თავი?

- რასაკვირველია, მქონია. ნებისმიერ გადაღებას ახლავს პატარ-პატარა სირთულეები, რომლის გადალახვაც მთელ გუნდს უწევს. ასეთ დროს მობილიზებაა საჭირო. ვცდილობ, კონცენტრირებულად ვიმუშაო და ორიენტირებული ვიყო შედეგებზე. მოცემულ დავალებაში შეიძლება სირთულეს გარემო ქმნიდეს. მაგალითად, ზამთარში მქონდეს გადაღებები, ღია ცის ქვეშ. სირთულე შეიძლება იყოს ხასიათის შექმნაშიც. მიუხედავად ყველაფრისა, ვცდილობ, დავძლიო წინააღმდეგობები. პასუხისმგებლობის გრძნობა, რომელიც მაქვს ამა თუ იმ დიზაინერისა თუ გამოცემის მიმართ, ამ სირთულეების დაძლევაში მეხმარება.

- რა ფაქტორი განსაზღვრავს ამ საქმიანობაში წარმატებას?

- სხვადასხვა ფაქტორი. ეს შეიძლება იყოს დრო, ბევრი მუშაობა და მიზანდასახულობა, რომელიც მოდელს უნდა ჰქონდეს. ვერ ვიტყვი, რომ ადვილი საქმიანობაა. მცდარია აზრი, რომ მოდელის სამუშაო იოლია. საკმაოდ რთული სფეროა და კონკურენციაც დიდია, განსაკუთრებით საერთაშორისო ბაზარზე. მარტივად და სწრაფად არაფერი ხდება. რამდენიც უნდა ვილაპარაკოთ, რომ ბევრ მოდელს უმართლებს, ვგულისხმობ _ საჭირო დროს საჭირო ადგილას აღმოჩნდებიანო _ ასე არ არის. ეს პროფესია საკუთარ თავზე მუდმივ მუშაობას მოითხოვს. ყოველთვის მზად უნდა იყო, რომ არ მოდუნდე, რადგან ყოველთვის მოიძებნება შენი შემცვლელი.



- გარეგნობა თუ ინდივიდუალიზმი? _ რომელი უფრო მნიშვნელოვანია და რატომ?

- ეს ორი ფაქტორი მჭიდროდაა გადაჯაჭვული. რასაკვირველია, გარეგნობა მნიშვნელოვანია. როცა სამოდელო სფეროში გიწევს საქმიანობა, შენს ფიზიკურ მონაცემებსაც ექცევა დიდი ყურადღება. არსებობს სტანდარტები, რომელსაც უნდა აკმაყოფილებდე. თუმცა, რამდენად საინტერესოა შენი შინაგანი სამყარო, აუცილებლად აისახება გარეგნობაზე, ქმნის შენს ინდივიდუალურ მხარეს და საბოლოოდ მნიშვნელოვნად განსაზღვრავს შენს გარეგნობასაც. გარკვეული შტრიხი შეაქვს, რაც მიმზიდველს გხდის ამ სფეროში საქმიანობისთვის.

- სამოდელო სფეროს გარდა კიდევ რომელი სფერო გაინტერესებთ?

- მიუხედავად იმისა, რომ ჩემი საქმიანობა მომწონს, კარგად გავაცნობიერე, რომ ყოველთვის მოდელი ვერ ვიქნები. სამოდელო კარიერა გარკვეული დროის მონაკვეთს უკავშირდება. შესაბამისად, მოდელს აუცილებლად უნდა ჰქონდეს სხვა პროფესიაც, რომელიც დასაყრდენი იქნება მაშინ, როცა სამოდელო სფეროში ზედმეტი აღმოჩნდება. ასეთი პროფესია ჩემთვის ჟურნალისტიკასა და მასობრივი კომუნიკაციების სისტემაში საქმიანობაა. სწორედ ახლა ვეუფლები ამ პროფესიას და ვფიქრობ, წინ საინტერესო სამუშაო მელოდება. ბოლო დროს პოლიტიკურმა მეცნიერებებმა დამაინტერესა და მიმართულების შეცვლაზე დავიწყე ფიქრი.



- გატაცებები თუ გაქვთ?

- მიუხედავად იმისა, რომ ცოტა დრო მაქვს, გატაცებებისთვის მაინც ვიცლი. მიყვარს კითხვა და მუსიკის მოსმენა. ეს ორი რამ დიდ სიამოვნებას მანიჭებს. გარდა ამისა, სამკაულების შექმნამ გამიტაცა.

- როგორ იწყება თქვენთვის საქმიანი დღე?

- დაძაბული საქმიანი დღის მიუხედავად, აუცილებელი კომპონენტი, დღის დასაწყისში, ყავაა. ჩემთვის ყოველი დღე ყავით იწყება.

- რა გიქმნით სიმყუდროვეს დილით?

- შვილთან ურთიერთობა _ მასთან საუბარი თუ თამაში, დღის ყველაზე სასურველი დასაწყისია.

- როგორ ირჩევთ სამოსს საქმიანი შეხვედრებისთვის?

- ეს იქნება ყოველდღიური სამოსი თუ საქმიანი დღისთვის შესაფერისი, მასში კომფორტულად უნდა ვგრძნობდე თავს. ზოგადად სადა სტილი მომწონს, მიყვარს სხვადასხვა სტილის ერთმანეთთან შეხამება, კლასიკურისა და სპორტულის თამაში თუ ქეჟუალი. თუმცა, რაც უნდა მეცვას, ყოველთვის ვიყენებ ნაკლებ ფერს. არ ვიცვამ გადატვირთულად.



- როგორია თქვენთვის იდეალური ლუქი?

- მოდის სფეროში ვსაქმიანობ და ყოველთვის მაქვს შეხება სიახლეებთან. ამ მხრივ, ყოველი წელი ახალი და საინტერესოა, რაც ჩემს გემოვნებას აყალიბებს და ცვლის კიდეც. გემოვნებას ცვლის ასევე ასაკი. მიჭირს იდეალური ლუქის დასახელება, რადგან სხვადასხვა დროს განსხვავებული სტილია მოდური, ასეთი ლუქები მუდმივ ცვალებადობაშია.

- სად გიყვართ სამოსის შეძენა. თქვენი ფავორიტი ბრენდი...

- რომელიმე ერთი ბრენდი არ არის ჩემი ფავორიტი. საკმაოდ თამამი და გახსნილი ვარ ამ საკითხში. ნებისმიერ დროს, ნებისმიერ ადგილას, შეიძლება აღმოვაჩინო ჩემთვის საინტერესო სამოსი. ვცდილობ, ბრენდებით და საყვარელი მარკებით არ შევიზღუდო თავი.

- რომელი სტილი უკეთ გამოხატავს თქვენს ხასიათს?

- ჩემი ჩაცმის სტილი ვერ იქნება ხასიათზე დამოკიდებული. შეიძლება განწყობამ იმოქმედოს სამოსის არჩევისას, მაგრამ არა სტილზე. მომწონს, როცა სხვადასხვა სტილისა და ეპოქის სამოსს ერთმანეთში ვურევ.



- სამოსი, რომელსაც ვერ იხდენთ?

- მოხდენით შეიძლება ნებისმიერი სტილი მოვიხდინო, თუნდაც პროფესიიდან გამომდინარე. თუმცა ჩემს გარდერობში ცოტაა მოკლე ქვედაბოლო და ქუსლიანი ფეხსაცმელი. ასეთი სამოსი დისკომფორტს მიქმნის და შეიძლება იმიტომ.

- წვეულებაზე წასასვლელად როგორ ირჩევთ ლუქს?
- ასეთ შემთხვევაშიც სისადავეს ვიცავ. ვიცვამ სადად. მაკიაჟიც არ მიყვარს ზედმეტად. ეს იმიტომ, რომ აქსესუარებისთვისაც იყოს ადგილი, რათა ლუქი არ გამოვიდეს გადატვირთული.

- ეტიკეტს ყოველთვის იცავთ?

- მოდელის საქმიანობამ შეიძლება განსაზღვრა სამოსის მიმართ დამოკიდებულებაც. ვიცი, რა დროს რისი ტარება შემიძლია. შესაბამისად, ეტიკეტის დაცვას ყოველთვის
ვცდილობ.



- სად გიყვართ თავისუფალი დროს გატარება. სად ისვენებთ კომფორტულად?

- ვსწავლობ, ხშირად მაქვს გადაღებები... აქედან გამომდინარე, თავისუფალი დრო ცოტა მაქვს. ასეთ დროს ყველაზე მეტად ოჯახში ყოფნა მიყვარს. ვცდილობ, ოჯახის წევრებს მეტი დრო დავუთმო. დაღლილობის მოსახსნელად, ანდა უბრალოდ, განტვირთვისთვის საკუთარ თავთან მარტო დარჩენა მეხმარება.

- თავს როგორ უვლით, დიეტას მიმართავთ?

- განსაკუთრებულ მეთოდებს არ ვიყენებ. შეიძლება იმიტომ, რომ არ მჭირდება. სახის კანისთვის დამატენიანებელ საშუალებებს ვხმარობ. რაც შეეხება დიეტას, მშობიარობის შემდეგ მოვიმატე და დიეტის დაცვა დამჭირდა, რომ ძველი ფორმები აღმედგინა. დღეს სწორად ვიკვებები, ბევრ წყალს ვსვამ.



- როგორ ჩაიარა "ბომონდის" ფოტოსესიამ, რამდენად საინტერესო აღმოჩნდა თქვენთვის და რატომ. როგორი ხასიათი წარმოაჩინეთ და რა დავალება მიიღეთ ფოტოგრაფისგან?

- თქვენ რომ მკითხეთ რთულ გადაღებებზე... შეიძლება ეს გადაღებებიც რთულად ჩავთვალოთ, რადგან რთულ პირობებში მოგვიწია მუშაობამ. იყო ზამთარი, ქარი, სიცივე და უნდა წარმოგვედგინა გაზაფხული-ზაფხულის კოლექცია. ვიმუშავეთ მარტის ნომერზე და აქცენტი ქალის ხასიათზე, მის ძლიერ ბუნებასა და სილამაზეზე იყო გამახვილებული. მიმაჩნია, რომ დავალებას კარგად გავართვი თავი.

ქეთი დარჩია

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.