ინტერვიუ

ანნა მარგველაშვილი - როგორია იყო პრეზიდენტის ქალიშვილი
ანნა მარგველაშვილი არაერთხელ აღმოჩენილა საზოგადოების ყურადღების ცენტრში. არაერთგვაროვანი დამოკიდებულების მიუხედავად, ყოველთვის გამოირჩეოდა თავისუფლებით და საკუთარი პოზიციის დაცვით. ეს თვისებები აქვს ჩვენს პრეზიდენტსაც. საპრეზიდენტო ვადა მალე იწურება. რა იქნება ჩვენს პოლიტიკურ ცხოვრებაში, უახლოეს მომავალში არჩევნები განსაზღვრავს. როგორ შეიცვლება პრეზიდენტის და მისი ქალიშვილის ცხოვრება?...
მარგველაშვილები, - პოლიტიკის, ინტრიგებისა და საპრეზიდენტო რეგალიებს მიღმა...

- ანნა, ბატონი გიორგი ყოველთვის იქცევდა საზოგადოების ყურადღებას, ჯერ როგორც პოლიტიკურ პროცესებში ჩართული პიროვნება, ხოლო შემდეგ, როგორც ჩვენი ქვეყნის პრეზიდენტი. შესაბამისად, თქვენც არაერთხელ აღმოჩნდით საზოგადოების ყურადღების სამიზნე. ხომ არ გაღიზიანებდათ მის ჩრდილში ყოფნა და თვითდამკვიდრების გზებს ხომ არ ეძებდით?

- არასდროს დამჭირვებია თვითდამკვიდრებისთვის ბრძოლა. შეიძლება იმიტომ, რომ თავისუფლად ვიზრდებოდი და ყოველთვის მქონდა საკუთარი პოზიცია და ხმა ოჯახში. მამა ყოველთვის მეამაყებოდა, ყოველთვის ვთვლიდი, რომ მამა ყველაზე ჭკვიანი იყო და ყველას ჯობდა. დღემდე ამ დამოკიდებულებას ვინარჩუნებ მის მიმართ. მგონია, რომ ოჯახის წევრებში ძალიან გამიმართლა.



- ვის და რა თვისებებით ჰგავხართ, ან განსხვავდებით მამისგან?

- გარეგნობით მას ვგავარ. ხასიათით, ალბათ უფრო დედას. მამას ვგავარ იმით, რომ ორივეს ემოციური, ფეთქებადი ხასიათი გვაქვს. ხდება ისეც, რომ ზოგჯერ ერთმანეთთან კომუნიკაცია გვიჭირს, კომპრომისზე მე მივდივარ. თავად პრინციპული ადამიანია, მისი აზრი ყოველთვის არგუმენტირებულია. ამდენად, თავის პოზიციას მყარად იცავს. ეს პოზიცია ეხება ყველას. ზოგადად, სამყაროს თუ ადამიანების მიმართ გაანალიზებული, ობიექტური, დასაბუთებული შეფასება აქვს. ცდილობს, ასე იყოს... თავის პრინციპებს არ ღალატობს.

- რა იყო თქვენი სასაუბრო თემა, რა საკითხს განიხილავდა თქვენთან?

- მახსენდება ის, რომ პირველივე წინააღმდეგობასა თუ პრობლემაზე მამას მივმართავდი. 15 წლის ასაკში, თუნდაც პირად ცხოვრებაში არსებული პრობლემების შესახებ მამამ ყველაფერი იცოდა. ჩემს აზრს ყოველთვის ვუზიარებდი. ყოველთვის მაძლევდა ჩემთვის მნიშვნელოვან რჩევას. დღემდე მახსოვს მისი ფრაზები, რომელსაც მიზიარებდა როგორც ცხოვრებისეულ კრედოს.

- ასეთი ფრაზებიდან რომელს გაიხსენებდით?

- მასწავლიდა პრინციპულობას. რაც ყველაზე მეტად ჩამრჩა გონებაში, თავმოყვარეობას ეხება - საკუთარი თავმოყვარეობა არასდროს არ უნდა შემელახა.

- ამასობაში თქვენს ცხოვრებაში პოლიტიკა შემოვიდა. როგორი გავლენა მოახდინა პოლიტიკამ თქვენს ცხოვრებასა და ურთიერთობაზე?

- პოლიტიკური ზეგავლენა ნაკლებად შეგვეხო... უფრო ის არის, რომ ურთიერთობისთვის ნაკლები დრო რჩება. მე თბილისში ვცხოვრობ, მამა დუშეთშია. ერთად ცოტა დროს ვატარებთ. თუმცა, როცა მასთან საუბარი მსურს, ყოველთვის გამოძებნის დროს. არაფერი შეცვლილა ჩვენ შორის.



- როგორ ფიქრობთ, პრეზიდენტის პოზიციაში რა იყო მისთვის მომხიბვლელი და თქვენ რას ელოდით?

- პოლიტიკაში უცებ არ აღმოჩენილა. პოლიტიკურ პროცესებში აქტიურად იყო ჩართული. წინა ხელისუფლების რეჟიმს ხშირად აკრიტიკებდა და ყოველთვის აფიქსირებდა თავის პოზიციას. ამ კითხვის ნაწილზე, ალბათ თავად უნდა გიპასუხოთ. ამ თემას არასდროს შევხებივართ. რაც შეეხება ჩემს მოლოდინს... ძალიან ნეგატიური რეაქცია მქონდა. პირდაპირ ვიტყვი, პოლიტიკური სიტუაციებიდან გამომდინარე, ძალიან შემეშინდა, მის სიცოცხლეს საფრთხე არ შეჰქმნოდა. მახსოვს, ბებიას დავურეკე და ვეუბნებოდი, რად გვინდა ეს ყველაფერი-მეთქი. ძალიან ვინერვიულე. მის გადაწყვეტილებას, რასაკვირველია, პატივს ვცემ და მას შემდეგ ამ საკითხს აღარ შევხებივარ, თუნდაც იმიტომ, რომ მის გადაწყვეტილებებში არასდროს შემიტანია ეჭვი. ეს ნაბიჯი გადადგა, რადგან ასე ჩათვალა საჭიროდ.

- რა შეიცვალა ანა მარგველაშვილის ცხოვრებაში?

- ამ კითხვას ყველაზე ხშირად სვამენ, რომელზეც პასუხი არასდროს მაქვს. რაღაც შეიცვალა იმ მხრივ, რომ უცებ ყურადღების ცენტრში აღმოვჩნდი. განსაკუთრებით ჟურნალისტების ყურადღება მივიქციე. თავიდან ძალიან არ მომწონდა, რომ ჩემი პირადი ცხოვრება განხილვის საგანი გახდა. მანამდე სოციალურ ქსელში აქტიურად ვიყავი ჩართული. ეს ყველაფერი იმდენად მოულოდნელი რაკურსით შემომიტრიალდა, რომ... ყველამ ჭკუის დარიგება დამიწყო. თავიდან ყველაფერი მაღიზიანებდა. მერე, მივეჩვიე. უფრო სწორად, ყურადღებას რადგან არ ვაქცევდი, თავისთავად განელდა ჩემ მიმართ ინტერესი. ვთვლი, რომ ჩემი თემა აღარ არის საზოგადოებაში აქტუალური.

- მოახდინა თუ არა საზოგადოებრივმა აზრმა თქვენზე გავლენა და შეზღუდა თქვენი თავისუფლება?

- არა. ადრეულ ასაკში მქონდა პერიოდი, როცა დავდიოდი კლუბებში, ვერთობოდი. ეს ყველაფერი ასაკობრივი იყო. შემდეგ გავთხოვდი, გამიჩნდა შვილი და სხვა ინტერესები გამიჩნდა. ვიდეოს ჩაწერის და სიმღერის სურვილმა გადამიარა. ამიტომ შედარებით მშვიდად დავიწყე ცხოვრება.

- ახლა რა ინტერესები გაქვთ, როგორია ანა პოლიტიკური რაკურსის და პრეზიდენტის ქალიშვილის იმიჯის გარეშე?

- ვმუშაობ. ამდენად, ჩემი ყოველი დღე სამსახურში წასვლით იწყება. შინ დაბრუნებული დროს შვილთან ვატარებ. ორი წლის გახდა. შესაბამისად, მეტი ყურადღება სჭირდება. მეც მეტ პასუხისმგებლობას ვგრძნობ. მინდა, მას არაფერი, მათ შორის ჩემი ყურადღება არ მოვაკლო. შაბათ-კვირას მეგობრებთან ვატარებ. ამ დღეებში ბავშვი მამას მიჰყავს და ახლაც, გადაღებაზე წამოსულმა ბებიასთან დავტოვე. ასეთია ჩემი ყოველდღიური ცხოვრება.



- ამასობაში, თავისუფლების სიყვარული, რაც თქვენში იგრძნობოდა, ხომ არ დაკარგეთ?

- სილაღეს არ ვიზღუდავ. საკუთარ პოზიციასაც ყოველთვის ვაფიქსირებ საზოგადოებაში. შეიძლება გავიზარდე. თქვენ თუ ჩაცმის გამომწვევ სტილს გულისხმობთ, ასე არასდროს მცმია. განა იმიტომ, რომ ვიღაცის აზრს ვითვალისწინებ, ასეთ სამოსში თავს კომფორტულად ვერ ვიგრძნობ. საცურაო კოსტიუმში გადაღებულ ფოტოებს დღემდე ვაზიარებ სოციალურ ქსელში. თუ ამას გულისხმობთ თავისუფლებაში...

- ტატუებს, რომელსაც ატარებთ, თავისი ისტორია აქვს?

- თითქმის ყველა ტატუ ორი წლის განმავლობაში გავიკეთე. ვფიქრობ, ტატუმ გამიტაცა და შევყევი... სიამოვნებით მოვიცილებდი ამ ჯვარს... თუნდაც იმიტომ, რომ ვერ ვხსნი, რატომ უნდა ვატარო. მეგობრებმა ერთნაირად გავიკეთეთ. მერე, იმან მოიცილა, მაგრამ მე დავიტოვე. ტატუს მოცილება ნაიარევს ტოვებსო და თავი შევიკავე. სხვა ტატუები ჩემი საყვარელი მულტფილმების გმირებია, რომლებიც მიყვარს. `არნოლდიდან~ მაქვს ჰელგა, რომელიც ჩემი საყვარელი პერსონაჟია. მაქვს მიკი მაუსებიც. მეორე ხელზე მამას ხელმოწერა გავიკეთე. რომელიც ყოველთვის მომწონდა. ერთხელაც მივედი მასთან და ხელი მოვაწერინე ისე, რომ არ იცოდა ჩემი ჩანაფიქრი. მეორე დღეს ტატუთი გამოვეცხადე.

- როგორი რეაქცია ჰქონდა?

- გაეცინა. ასეთ გადაწყვეტილებებში ჩემთვის წინააღმდეგობა არასდროს გაუწევია.

- ყოველთვის თავისუფლად გზრდიდათ?

- ყოველთვის მქონდა შეგრძნება, რომ ზრდასრული ვიყავი და ჩემი აზრი უნდა მქონოდა. თავად უნდა მიმეღო გადაწყვეტილებები.



- ასეთი მიდგომა დაგეხმარათ თუ ხელის შემშლელი აღმოჩნდა ცხოვრებაში?

- უფრო დამეხმარა, ასე გავიზარდე. მიჩვეული ვარ დამოუკიდებლობას. არც კი ვიცი, სხვანაირად რა უნდა ყოფილიყო. არასდროს გავუკონტროლებივარ ზედმეტი სატელეფონო ზარებით. მხოლოდ ერთი ამბავი მახსენდება... გარდატეხის ასაკში გამიბრაზდა და დამინიშნა დრო, რომლისთვისაც არ უნდა გადამეცილებინა. ეს იყო ღამის 11 საათი და ამ შეთანხმებას ყოველთვის ვიცავდი.

- საპრეზიდენტო ვადა იწურება... როგორ ხვდებით ახალ რეალობას?

- დაძაბული არაფერში ვარ, ვერ ვიტყვი, რომ რამე შეიცვლება. საპრეზიდენტო ვადა რომ იწურება, ძალიან მიხარია. პოლიტიკა მაინც პირადი ანგარიშსწორებისა და ინტრიგების სარბიელი მგონია. ეს განსაკუთრებით აშკარა ხდება, როცა საინფორმაციო საშუალებებს ისმენ. მამას მიმართ გამოთქმულ არასასურველ აზრს ყოველთვის ემოციურად აღვიქვამ, როგორც ყოველთვის, უსამართლოა. ისიც ვიცი, რატომ. აბსოლუტურად ყველა, ნებისმიერი მხარე პირადი ინტერესებიდან გამომდინარე მოქმედებს. ამ დროს ისეთი აგრესია მიჩნდება... ცუდად ვხდები. ეს რომ დასრულდება, მიხარია. დავისვენებ. მისი პოზიცია ნაკლებად ვიცი, არ მიკითხავს, რა ემოციით ტოვებს პრეზიდენტის სავარძელს. ეს მისი საზოგადოებრივი ცხოვრებაა და მისი გადასაწყვეტია. პოლიტიკაზე ჩვენ არასდროს გვისაუბრია. პოლიტიკით თავადაც არ ვარ დიდად დაინტერესებული. ისიც არ ვიცი, შემდგომ რას აპირებს, რისი გაკეთება სურს. მის გადაწყვეტილებას, ნებისმიერ შემთხვევაში, პატივს ვცემ. მე ვიქნები მისი პოზიციის გამტარებელი და ყოველთვის გვერდში ვეყოლები.

- რით იყო თქვენთვის მომხიბვლელი პრეზიდენტის ქალიშვილობა? როგორც ჩანს, არასდროს გამოგიყენებიათ ეს სტატუსი, რადგან არ დატოვებდა საზოგადოება უყურადღებოდ...

- ისევ მამას პიროვნებიდან გამომდინარე, მისი სტატუსი როგორ უნდა გამომეყენებინა, ვერც კი წარმომიდგენია. მის ირგვლივ, მგონი, არავის გამოუყენებია. არც არავის მოსვლია აზრად და არც თავად მისცემდა ამის უფლებას, არავის.



- როგორი სტილის სამოსი მოგწონთ, რაშიც თავს კომფორტულად გრძნობთ?

- მომწონს თავისუფალი სტილის სამოსი. უნდა იყოს აუცილებლად კომფორტული. ვერ ვიტყვი, რომ ეს ბოლომდე სპორტული სტილია... სამსახურისა და მამას ოფიციალური შეხვედრების გამო მიწევს კლასიკური სტილის სამოსის ტარებაც. ვფიქრობ, ეს სტილიც მოვიხდინე. კაბებს იშვიათად ვატარებ. რატომღაც, ვერ შევარჩიე. კლასიკური სტილიდან პიჯაკები, პერანგები და შარვლები მომწონს.

- როგორ ისვენებთ?

- ვისვენებ, ძირითადად, მეგობრებთან ერთად. ხშირად ერთად ვსეირნობთ, ხშირად ძაღლთან და ბავშვთან ერთად ვსეირნობ. უკან ჩამოვიტოვე აქტიური, კლუბური გართობა. აღარ მიზიდავს.

- არაჩვეულებრივი ხარისხის თმა გაქვთ. როგორ უვლით?

- არ ვიღებავ. ვცდილობ, არ მივიკარო უთოც. იყო პერიოდი, როცა სალონის ხშირი სტუმარი ვიყავი და სულ ვივარცხნიდი. შესაბამისად, ძალიან დავიზიანე. ახლა პირიქით, ბუნებრივად ვიშრობ და ზედმეტად არ ვეხები.

- სახის კანს როგორ უვლით?

- რა გითხრათ... საშინელებები მაქვს გადატანილი. მკურნალობის სპეციალური კურსის მერე მომიწესრიგდა. ახლა განსაკუთრებულად აღარც ვუვლი.

- თავს როგორ უვლით, სპორტით თუ ხართ დაკავებული? ფორმას როგორ ინარჩუნებთ?

- სპორტულ დარბაზებში სიარულის დრო არ მაქვს. მგონია, რომ დადგება ის ეტაპი, როცა სპორტული ცხოვრება დამაინტერესებს. რამდენიმე წელია, სწორი კვების რეჟიმს ვიცავ. როცა ასე ვიკვებები, ფიზიკურადაც თავს კარგად ვგრძნობ. ამოღებული მაქვს რაციონიდან ტკბილეული, ცომეული და გაზიანი სასმელები. როცა ამ რეჟიმს ვარღვევ, ძალიან ცუდად ვგრძნობ თავს, ორგანიზმი ვეღარ ეგუება.


ტექსტი: ქეთი დარჩია

Photo: Ika Khargelia
Mua/Style: Teko Shenken
Hair: Georege Eliadze
Apparel: Eloshi, Bessarion.



ოთო ბენდელიანის შოკისმომგვრელი ტრანსფორმაცია -32 კგ სამოდელო ბიზნესამდე

ყოველი ადამიანი რომ ინდივიდუალურია საყოველთაოდ ცნობილი აქსიომაა, თუმცა მათგან ორ ძირითად ტიპს გამოვყოფდი. ადამიანთა ნაწილი, ვინც ცხოვრებისეულ სიახლეებს იღებს და ამას წარმატებულ შედეგად აქცევს და ადამიანთა მეორე კატეგორია, ვისაც უბრალოდ არ აქვს სიახლის პრეტენზია და შესაბამისად, ვერ ვითარდება. ხოლო თუ ახალს ვერაფერს ვქმნით, ვერ ვახდენთ სასარგებლო გარდაქმნას, მაშინ დროში არსებობა უბრალოდ რთულდება, რადგან ჩვენ ხომ დიდი ტრანსფორმაციების საუკუნეში ვცხოვრობთ. ჩვენს რეალობაში კი, ყოველთვის სასიამოვნოდ აღსაღნიშნი ფაქტია ახალი თაობის სწრაფვა წინსვლისკენ, რაც ახალ საუკუნეს ქმნის

- ეს თითქოს ახალი სიცოცლის დასაწყისია, ახალი ამოსუნთქა, რადგან ძველმა ცოტა არ იყოს, დაგვღალა. მნიშვნელოვანია მათი დანახვა და თითოეული მათგანის ახლოს გაცნობა.

ტრანსფორამციების სამყაროდან ჩვენი კიდევ ერთი გმირი ამჯერად 18 წლის ოთო ბენდელიანია, რომლის ცხოვრებაში გარდაქმნები ფიზიკური ცვლილებებით დაიწყო

-„ტრანსფორმაცია - ეს სიტყვა განსაკუთრებით მომწონს ჩემი ფიზიკური სახეცვლილებისთვის. ყველაფერი კი იმით დაიწყო, რომ პატარა ოთიკო ძალიან გამხდარი იყო და მარტივად რომ ვთქვათ მშობლებმა გადაწყვიტეს, "მოეყვანათ ფერზე" - გავსუქდი. წონაში ზრდის შეჩერება, არც მიცდია და ამასობაში სასწორის ციფერბლატმა უნამუსოდ გამოსახა 112 კგ. ძალიან აქტიური მოსწავლე ვიყავი, მიხდებოდა უამრავი კომუნიკაციის დამყარება, ხალხთან ურთიერთობა, გარდა ამისა საკმაოდ კრიტიკოსი ადამიანების გარემოცვაში ვიყავი, თუმცა ჩემი ფიზიკური "გაბარიტების" გამო არასდროს გამჩენია კომპლექსი ან მოვრიდებულვარ ურთიერთობას, პირიქით, ჩემს სიფუმფულეს ხეირიანადაც ვიყენებდი.

ამასობაში გაჩნდა გარდასახვის იდეა, თუმცა რატომ? ნამდვილად არ ვიცი, არ მახსოვს. შეიძლება ეს იყო ასაკობრივი სურვილი, მაგრამ მე უფრო ვფიქრობ, რომ ჩემს ქვეცნობიერს გიჟივით აინტერესებდა ოთიკო სხვა ვიზუალური მონაცემებით. დავიწყე აქტიური ვარჯიში სპორტ-დარბაზში, ვარჯიშს შევუთავსე სწორი კვება, ამათ დაემატა ძალიან დატვირთული სასწავლო გრაფიკი, პროექტების სიმრავლე და სასწორმაც ნელ-ნელა ამოისუნთქა. 5 თვეში 32 კგ, აბსოლუტურად სახეცვლილი ოთიკო, უკვე ოთო და ბედნიერების უზარმაზარი შეგრძნება, რომ მე შევძელი ტრანსფორმაცია. მაგრამ უნდა აღვნიშნო რომ ფიზიკური გარდასახვა არ იქცა ისეთ მნიშვნელოვან მოვლენად, როგორც ჩემივე გამოცდილებით შექმნილი დამოკიდებულება, რომ შეუძლებელი არაფერია, მთავარია მოინდომო! ეს "შეგონება" მექცა მთავარ მოტივაციად შემდეგი გამარჯვებებისთვის. ფიზიკურმა ტრანსფორმაციამ ამიმაღლა თვითშეფასება, უფრო თავდაჯერებული გამხადა და კიდევ უფრო ამბიციური, ფაქტობრივად, ფიზიკურმა გარდასახვამ ძლიერი ზეგავლენა მოახდინა ჩემს შინაგან სამყაროზეც. ზემოთაც აღვნიშნე "ოთიკო, უკვე ოთო" მეთქი, სახელის ცვლილებით ვეცადე, ჩემი ახალი "მეს" პრეზენტაციას, "ოთიკო" კი იმ საყვარელ, ფუმფულა ბიჭს დავუტოვე, რომელიც ძალიან საინტერესო, გემრიელ და სავსე ეპიზოდად ჩაიწერა ჩემს ცხოვრებაში“.

ფორმაში ჩადგომა იმდენად ეფექტური აღმოჩნდა, რომ ოთო სამოდელო სააგენტომდეც მიიყვანა და ამჟამად მოდის სფეროში მოღვაწეობს. გარდა კარგი ფიზიკური მონაცემებისა, ოთო საინტერესო მოსაუბრეცაა და მოდის ჯადოსნურ სამყაროში, ასევე საინტერესოდ შეგვახედა: „მე და მოდა დიდი ხნის მეგობრები ვართ. ინტერესი მოდის, დიზაინერების, მოდელების მიმართ ბავშვობიდან მქონდა. ეს იყო ჩემთვის სილამაზის, მშვენიერებისა და კრეატივის ფოიერვერკი. და მაშინ, როცა ჩემი ფიზიკური ტრანსფორმაციის შემყურე მეგობრებმა პოდიუმზე იდეურად გამამწესეს, გულის სიღრმეში ძალიან, ძალიან პატარა იმედი გამიჩნდა, რომ იქნებ, მეც შევერთებოდი ამ ფოიერვერკს.

ასეც მოხდა. წინა წლის დეკემბერში, მეგობრის დაჟინებული მოთხოვნით მივედი საუკეთესო, ბაზარზე წამყვან, თითქმის უკონკურენტო ქართულ სამოდელო სააგენტოში "Look Modéls"-ში და ბინგო! მყისიერად გამიფორმეს კონტრაქტი. ეს არის უნიკალური შანსი და საკმაოდ საინტერესო გამოწვევა ჩემთვის, რისთვისაც უღრმესი მადლობა მინდა გადავუხადო ულამაზეს ქალბატონს, ნინო ცქიტიშვილს. უნიკალური და საინტერესოა იმდენად რამდენადაც მოდელის ცხოვრება საკმაოდ რთული და ამავდროულად მრავალფეროვანია, მუდმივად გიხდება საკუთარ თავთან მუშაობა, როგორც ფიზიკური დახვეწის, ასევე შინაგანი სამყაროს გამდიდრების თვალსაზრისით, რადგან შეუძლებელია მხოლოდ ვიზუალით გახვიდე ფონს, მოდის სამყარო შემოქმედებითობის ზენიტია, გამომდინარე აქედან ამ სფეროში მოღვაწე უნდა იყოს ყოველმხრივ ღირსეული.

ჩემი აწ უკვე 7 თვიანი სამოდელო კარიერა მოიცავს რამდენიმე პერსონალურ ფოტოგადაღებას, კომერციულ გადაღებებსა და Mercedes-benz-ის თბილისის მოდის კვირეულის 2018 წლის შემოდგომა-ზამთრის სეზონზე დიზაინერების ჩვენებებში მონაწილეობას.
ეს ყველაფერი კი დასაწყისია! თავდაუზოგავად ვშრომობ ძალიან დიდი წარმატებებისთვის, რომელსაც ჩემი დედა-სააგენტოს "Look Modéls"-ის მნიშვნელოვანი დახმარებითა და მასთან სასიამოვნო თანამშრომლობით აუცილებლად მივაღწევ!

შეუძლებელი ხომ არაფერია, მთავარია მონდომება და "ცხოველური" სურვილი მიზნის მიღწევისა

18 წლის დამწყები მოდელი, როგორც თავად აღნიშნავს, გარდა ფიზიკური დახვეწილობისა, გონიერებაზეც ზრუნავს. ალბათ, სწორედ ესაა ყველაზე დიდი დაინტერესების საფუძველი, რადგან გარეგნობა არასდროს კმარა. მოდელობას ოთო სწავლასაც უთავსებს, თანაც წარმატებით და ამით მის შრომისმოყვარეობასა და მოწოდებას, რომ შეუძლებელი არაფერია, მთავარი მხოლოდ მონდომება, მხოლოდ ამყარებს. ოთოს საოცრად დადებითი მუხტი, შემართება და მომავლის სიყვარული ბევრი ახალგიზრდისთვის, შესაძლოა, გადამდები აღმოჩნდეს. ამ ყველაფერთან ერთად, ის ივ. ჯავახიშვილის სახელობის თბილისის სახელმწიფო უნივერსიტეტის სტუდენტია. სწავლობს იურიდიულ ფაქულტეტზე, სამართლის სპეციალობით. სკოლა ოქროს მედალზე დაასრულა და უნივერსიტეტში 100%-იანი სახელმწიფო გრანტით ჩაირიცხა - „ეს იმისთვის, რომ მოდელები განათლებას არ უკუაგდებენ, პირიქით“ - ამბობს ოთო.

ფიქრები მომავალზე კი ოთოს თვალთახედვით ასეთია: „არ ვიცი მომავალში ვინ ვიქნები, არ მიფიქრია. შეიძლება ვინმესთვის ეს უმიზნო, დაბნეული ადამიანის ნათქვამი იყოს, მაგრამ მე პირიქით ვფიქრობ, 18 წლის საკუთარი თავის ძალიან ბევრი ვერსია აღმოვაჩინე - წერის ნიჭიც მაქვს, ალბათ ფილოლოგი დედის დამსახურებაა, მათემატიკა ჩემი ჰობია, სამართალი - ინტერესის სფერო, მოდა - შემოქმედებითობასთან, ხელოვნებასთან დაახლოების შინაგანი სურვილის დაკმაყოფილების საშუალება, ბევრი სხვა რამეც - პროექტების წერა-შედგენა, მარკეტინგი, კომუნიკაციები. მარტივად რომ ვთქვა საკუთარი თავის მეშინია, არ მინდა რომ ჩემი შესაძლებლობებიდან რამე აუთვისებელი დამრჩეს, ასაკიც ხელს მიწყობს, მაქვს ძიების დრო. ამ კითხვაზე პასუხს კი, ალბათ, 2-3 წელში გაგცემთ, თუმცა გეტყვით რა პროფესიისაც არ უნდა ვიყო - იურისტი, მოდელი, მარკეტოლოგი თუ პროექტ-მენეჯერი, ძალიან ძლიერი პროფესიონალი და ჩემი საქმის ერთგული ვიქნები“.

ახალგაზრდებში ინტერესები ყოველთვის ჭარბად იჩენს თავს, თუმცა ხშირად ისინი ქრებიან, რადგან ჩნდება შიში, რომ საქართველოში ვერ რეალიზდებიან. ალბათ, მსგავსი დამოკიდებულება გარშემო მყოფებისგან არაერთხელ მოგისმენიათ, თუმცა ამასთან დაკავშირებით ახალგაზრდა მოდელს სხვაგვარი დამოკიდებულება აღმოაჩნდა:

„ვინ ქმნის საქართველოს? ჩვენ, ქართველები, ქართველი ახალგაზრდები, ასე რომ ვფიქრობ, მოვახერხებ სრულად რეალიზებას. თუ შესაბამისი გარემო უკვე შექმნილი არ არის, მე შევეცდები თანამოაზრეებთან ერთად შევქმნა ის, რაც გვჭირდება სრული რეალიზებისთვის. თუმცა იმასაც ვფიქრობ, რომ საქართველოს ფარგლებს გარეთ გასვლა აუცილებელია, იმავე უფრო მაღალი განათლების, გამოცდილების მისაღებად, უფრო განვითარებულ ქვეყნებში არსებული ინსტიტუციების მუშაობის სპეციფიკისა და პრაქტიკის გასაცნობად.

ჩემი ოცნება კი ერთია - მივაღწიო მაქსიმალურ წარმატებას.
ძალიან დიდი სურვილი მაქვს, შეიძლება უტოპიური, მაგრამ TOM FORD-თან თანამშრომლობა. ეს ჩემთვის ძალიან მნიშვნელოვანი მოვლენა იქნებოდა. საყვარელი მოდელი?! ჰმ, საკმაოდ ბევრი მოდელია, რომლებიც ჩემს ყოველდღიურობას ქმნიან, თავისთავად, სოციალურ ქსელში მათზე თვალის დევნებით, თუმცა გამოვყოფდი Francisco Lachowski-სა და Gisele Bündchen-ს, ძალიან ბევრი მიზეზი არსებობს რატომაც, მაგრამ მოკლედ რომ ვთქვა, ისინი მიყვარს!“
რაც შეეხება მათ, ვინც ჭარბ წონას აი, ახლა, ამ სტატიის კითხვის პროცესშიც ებრძვის, ოთო ბენდელიანი ერთ კეთილ რჩევას მოგცემთ:

„შეიყვარეთ საკუთარი თავი ისეთი, როგორიც ხართ! ზოგადი სტანდარტი არ არსებობს. სტანდარტია ის, რაც მოგწონთ. სხვათა დამოკიდებულების გამო ნუ გადაწყვეტთ გარდასახვას, თავს ნუ დაისტრესავთ. მხოლოდ მაშინ იბრძოლეთ ამისთვის, თუ თქვენი შინაგანი ხმა გიკარნახებთ“.

ჩვენ კი ისღა დაგვრჩენია, მოდის უსასრულო სამყაროში და არა მარტო, ოთოს დიდი წარმატებები ვუსურვოთ.


 

ანა ვერძაძე 
ჟურნალისტი

ბელა ჰადიდი: „ინსტაგრამში ვყვები, თუ როგორ უნდა გაუმკლავდეთ მენტალურ პრობლემებს“
მას ყველა აღმერთებს: ცნობილი დიზაინერებისა და ფოტოგრაფებიდან დაწყებული ინსტაგრამის რიგითი გამომწერებით დამთავრებული. ბელა ჰადიდს შეუძლია მოდუნდეს, ისაუბროს ღიად და იცინოს გულიანად. ამაში დარწმუნდებით, როცა გამომცემლობა ELLE-თან მის ინტერვიუს გაეცნობით, რომელიც Dior -თან კონტრაქტს მიეძღვნა.



წამყვანი ჟურნალების გარეკნები, ასობით გადაღებები და პოდიუმზე გამოსვლები, ამ მოვლენების შემდეგ განსაკუთრებით რა დაგამახსოვრდათ Dior -ის გადასაღებ მოედანზე მუშაობისას?

ბელა ჰადიდი: რეკლამის გადაღება ურთულესი პროცესია. თქვენ ვერც კი წარმოიდგენთ მასში რამდენი ნიუანსია. მთელი ჯგუფი ბოლომდე იხარჯება. თუმცა ჩემთვის ყველაზე რთული იყო სამი გადასაღები დღის განმავლობაში მაკიაჟის სრულყოფილად შენარჩუნება 14 საათის განმავლობაში. ამ დროის მანძილზე Dior-ის ლაქის ტონებზე უამრავი რამ შევიტყვე.

კოსმეტიკურ ჩანთაში რის ჩადების უფლება გაქვთ?

ყოველთვის თან ვატარებ Dior Lip Glow-ის ტუჩის ბალზამსა და Dior Addict Lip Maximizer-ის თხევად პომადას. თხევადი პომადის სიყვარული ჯერ კიდევ სკოლაში გამიჩნდა. მას საუკეთესო მეგობარს ვართმევდი. მე კი კოსმეტიკას იშვიათად ვყიდულობდი.
ყოველთვის თავდაჯერებული იყავით, თუ ამაზე მუშაობა მოგიხდათ?
არა, რა თქმა უნდა. სამოდელო კარიერის დაწყებასთან ერთად თავდაჯერებულობა ნელ-ნელა იზრდებოდა. მე ამ ბიზნესში ძალიან ადრე აღმოვჩნდი და მაშინვე მუშაობა დავიწყე. უკან დახევისა და გაჩერების შანსი არ მომცეს - მაშინვე ჩემს დას მადარებდნენ.



ამ შედარებებმა არ დაგღალეს?

მსიამოვნებს, როცა ამბობენ: „ნახეთ, ჰო, ეს ხომ ჯიჯია“, მე კი ვპასუხობ: „აჰა, დიდი მადლობა“. ჩვენ ერთმანეთისგან ძალიან განვსხვავდებით. მე შავგრემანი ვარ, ის ქერა. ეს ხომ უკვე დიდი სხვაობაა, ასე არ არის?! ამიტომ ძალიან ვერთობი ისეთ სიტუაციებზე, როცა ერთმანეთში ვეშლებით. დიახ, მე ამ პროფესიაში 3 წლის დაგვიანებით მოვედი, ვიდრე ის, მაგრამ ჩვენ ორივე შემდგარი მოდელები ვართ.

ოჯახის გარემოცვაში სამოდელო სამყაროს განიხილავთ?

შემიძლია ჩემს დავს აზრი ვკითხო ჯგუფზე, რომელთანაც მუშაობა მომიწევს. ჩემთვის აუცილებელია თითოეულს სახეზე ვცნობდე. ხოლო როცა შოუში ერთად ვიღებთ მონაწილეობას, სასაუბრო ბევრი გვაქვს, პირად საგნებზე ვსაუბრობთ და ბევრს ვიცინით. არ მინდა, რომ სამსახურის გამო ურთიერთობა გაგვიფუჭდეს. ამიტომ ოჯახსა და კარიერას ერთმანეთისგან ვაცალკევებ.

ინსტაგრამზე თქვენი გამომწერების რაოდენობა სულ უფრო მეტად იზრდება: როგორ იზიდავთ მათ?

მე კიდევ ბევრ რამეს ვსწავლობ, მაგრამ განსაკუთრებით დიდი სურვილი მაქვს ჩვენთვის, ყველასთვის ღირებული რამ გავაკეთო. აქ შემიძლია ჩემი ფიქრები გავაზიარო და მაგ: მოვყვე, როგორ უნდა გაუმკლავდეთ მენტალურ პრობლემებს - ეს ხომ ახალი თაობის უბედურებაა. გოგონები ინსტაგრამზე აჩვენებენ როგორი ლამაზი და წარმატებული ცხოვრება აქვთ, სინამდვილეში კი ძალისხმევას უსარგებლოდ ხარჯავენ. ეს მეც გავიარე. ახლა მსურს სხვებს დავეხმარო. ჩემს გამომწერებს ღიად ვეკონტაქტები და მათ რჩევებს ვაძლევ.



ადრეულ ასაკში მითითებები არ გაღიზიანებდათ?

არა, დედის რჩევები გამომადგა. ის მასწავლიდა ჩემი ძალების მერწმუნა, ვყოფილიყავი კეთილი და შრომისმოყვარე. ამბობდა: თუ შენს სამუშაოს არ შეასრულებ, ვიღაც მას შენს ნაცვლად გააკეთებს და შენს ადგილს დაიკავებს. ჩემი მშობლები ჩემი კეთილდღეობისთვის ბევრს შრომობდნენ და მინდა მეც ასევე გადავუხადო.

როგორ ახერხებთ ყველაფრის მოსწრებას და არ კარგავთ ოპტიმიზმს?

არის მომენტები, როცა ვიღლები, საკუთარ თავზე დიდ ზეწოლას ვგრძნობ. როცა დედა ამჩნევს, რომ გამოვიფიტე, წამოიძახებს: „კარგი, გინდა - წადი!“, მე მაშინვე ვპასუხობ: „არა! იყო მოდელი - მხიარულებაა“. და შემდეგი მოგზაურობისთვის ვიწყებ მზადებას. მივხვდი, რომ საჭიროა საკუთარ თავს თვითონვე უბიძგო წინ. მხოლოდ ერთი პირობით, რომ სამსახურისგან სიამოვნებას მიიღებ.


ანა ვერძაძე
კოსმეტიკა აბედნიერებს ადამიანებს - კრისტიან ბრეტონი
როცა ვსაუბრობთ კოსმეტიკურ ბრენდებზე, აუცილებელია ვახსენოთ ფრანგული ხაზი „კრისტიან ბრეტონი“.
M.G. – ახალი მარკის ისტორია
პირველი კოლექცია თბილისის მოდის კვირეულისთვის შეიქმნა, დიდი შრომისა და გამოცდილების შედეგად.
"წერტილების ერთიანობა ხაზებს ქმნის, ხაზები სივრეებს..." - გერმანიაში მოღვაწე წარმატებული ქართველი მხატვრის, ემზარ ბაზერაშვილის ცოცხალი ვიზუალიზაცია
ერთი შეხედვით ალბათ ჩვეულებრივი ბავშვი იყო, თუმცა, ხატვას რაც შეეხება, მის გარშემო მყოფებზე უკეთესად გამოსდიოდა.
ჯასტინ და ჰეილი ბიბერები ამერიკული VOGUE-ს გარეკანზე
ამერიკულმა VOGUE-მ გუშინ მარტის გამოცემის გარეკანი გამოაქვეყნა, რომელზეც ცნობილი მომღერალი, ჯასტინ ბიბერი და მისი მეუღლე, მოდელი ჰეილი ბიბერი არიან წარმოდგენილი.
H&M-ის მოდური სამყაროდან -" ბომონდის" ექსკლუზიური სტუმრები დანილო დრობნიაკი და კლაუდია ოსვალდი არიან
შეუძლებელია, H&M-ის მოდურ სამყაროში აღმოჩნდე და არ დარჩე შეყვარებული. იშვიათია მსოფლიოში მაღაზიები, რომელიც ნებისმიერი სოციალური ფენის საზოგადოების გემოვნებასა და ბიუჯეტს ეფექტურად ერგება.