ვარსკვლავები, რომლებიც ერთმანეთს ვერ იტანენ

1. მერაია ქერი და ჯენიფერ ლოპესი.

მათი დაპირისპირება დიდი ხნის წინ დაიწყო. 2000-იანი წლების დასაწყისში ჟურნალისტმა მერაიას ჰკითხა, თუ რას ფიქრობდა იგი ჯენიფერზე, რაზეც მერაიამ „არ ვიცი ვინ არის“ უპასუხა. ამის შემდეგ მომღერლებს ხშირად ეკითხებიან ერთმანეთზე, მაგრამ პასუხისგან ორივე თავს იკავებს.


2. ქანიე ვესტი და ტეილორ სვიფტი.

ეს შუღლი ალბათ ბოლო წლების ყველაზე განხილვადია მედიაში. ყველაფერი დაიწყო 2009 წელს, როდესაც 19 წლის ტეილორმა MTV-ის დაჯილდოებაზე საუკეთესო ვიდეოს კატეგორია მოიგო. საზოგადოების დიდი ნაწილი უკმაყოფილო იყო მისი გამარჯვებით, რადგან ამავე კატეგორიაში ბიონსეს
„Single Ladies” იყო წარდგენილი. სწორედ ამ ნაწილს წარმოადგენდა ქანიე ვესტიც. სამადლობელი სიტყვის თქმისას, ტეილორს ვესტი აუვარდა სცენაზე, მიკროფონი წაართვა და განაცხადა, რომ ამ გამარჯვებას არა ტეილორი, არამედ ბიონსე იმსახურებდა, რის შემდეგაც სვიფტმა სცენა დატოვა. დაჯილდოების მომდევნო დღეს მთელი მედია ამ ფაქტზე საუბრობდა. ტეილორმა მალევე გამოუშვა სიმღერა, რომელშიც ამბობს, რომ საერთოდ არ არის ნაწყენი ჰიპ-ჰოპ არტისტზე. ამის შემდეგ მათი ურთიერთობა დადებითად განვითარდა: ისინი სხვადასხვა ღონისძიებებზე ხვდებოდნენ ერთმანეთს, ეხუტებოდნენ და ა.შ. ტეილორმა ქანიეს MTV ჯილდოც კი გადასცა 2015 წელს, მაგრამ ყველაფერი მალევე დაიძაბა, როდესაც ქანიემ სიმღერა „Famous” გამოუშვა. მასში ვესტს ტეილორი ჰყავს ნახსენები: „მე და ტეილორს შეიძლება სექსი გვქონდეს, რადგან ის ბო*ი მე გავხადე ცნობილი“. სიმღერის გამოსვლიდან რამდენიმე დღეში ტეილორმა განაცხადა, რომ ქანიეს არ ჰქონდა უფლება, მისი სახელი სიმღერაში გამოეყენებინა. ამის შემდეგ სვიფტსა და ქანიეს მთელს ოჯახს შორის უწყვეტი დაპირისპირებაა.


3. მერაია ქერი და ნიკი მინაჟი.

მგონი შეგვიძლია მერაია ერთ-ერთ ყველაზე პრობლემატურ სელებრითად დავასახელოთ. ჯენიფერის შემდეგ, მომღერალს დრამატული ურთიერთობა ნიკი მინაჟთან ჰქონდა. ისინი ჟიურის წევრები იყვნენ American Idol-ში და მათ შორის აშკარა დაძაბულობა იგრძნობოდა. კონკურსის შესარჩევი ეტაპიდან მოყოლებული, ვარსკვლავები ერთმანეთს „კბენდნენ“ და საქმე იმდენად გართულდა, რომ ნიკიმ პროექტი დატოვა.


4. ჯასთინ ბიბერი და ორლანდო ბლუმი.

ამ ორს შორის ურთიერთობა 2012 წელს დაიძაბა. ამის მიზეზი ცნობილი მოდელი, მირანდა ქერი იყო. როგორც ცნობილი გახდა, მოდელი და ჯასტინი ერთმანეთს მესიჯებით ეფლირტავებოდნენ. პრობლემა იმაშია, რომ ამ დროს მირანდა ორლანდოს მეუღლე იყო. ორლანდოსა და ბიბერს შორის დაპირისპირებამ ფიზიკური სახე მიიღო 2014 წელს, როდესაც ისინი იბიცაზე გადაეყარნენ შემთხვევით. როგორც ცნობილია, ბლუმმა პოპ-ვარსკვლავს ხელი დაარტყა.


5. ნიკი მინაჟი და ქარდი ბი.

გასული წლის ერთ-ერთი ყველაზე გახმაური დაპირისპირება. ქარდის, ინდუსტრიაში გამოჩენის დღიდანვე ადარებდნენ ნიკის, მაგრამ ისინი წერდნენ, რომ კარგი ურთიერთობა ჰქონდათ ერთმანეთთან. ყველაფერი შეიცვალა Harper’s Bazaar-ის წვეულებაზე, სადაც რეპერებმა ერთმანეთს შეურაწმყოფა მიაყენეს. ჩვენთვის დღემდე არ არის ამის ზუსტი მიზეზი ცნობილი, მაგრამ როგორც ამბობენ, ნიკიმ ქარდის შვილი ცუდად მოიხსენია, ქარდიმ კი მას ფეხსაცმელი ესროლა.


6. სარა ჯესიკა პარკერი და კიმ კეტრელი.

„სექსი დიდ ქალაქში“-ს პერსონაჟები ლეგენდარული მეგობრების ისტორიებთან ასოცირდებიან, მაგრამ ყველაფერი ისე არ არის, როგორც ეკრანებზე ვხედავთ. ძნელი წარმოსადგენია, მაგრამ სამანტასა და ქერის შემსრულებლები ერთმანეთს ვერ იტანენ. როგორც ცნობილია, მათ შორიც ურთიერთობა სერიალის გადასაღებ მოედანზე დაიძაბა, როდესაც სარა პროდიუსერად დააწინაურეს და კიმმაც მოითხოვა დაწინაურება. მათ დავას სერიალისა და 2 ფილმის გადაღებაში ხელი არ შეუშლია, მაგრამ როდესაც საუბარი მესამე ფილმის გადაღებაზე დაიწყო, კიმმა მონაწილეობაზე უარი განაცხადა. კეტრელმა გასულ წელს ინსაგრამზე ფოტო დადო, წარწერით- „მე არ მჭირდება შენი სიყვარული და დახმარება ამ ტრაგიკულ პერიოდში“ და მასზე სარა მონიშნა.


ბაკა ალავიძე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.