სელინ დიონი - მოდა, როგორც თერაპია და იარაღი განხილვადობისთვის

დღეს ინტერნეტ სივრცე ბევრ რამეს წყვეტს, მათ შორის არტისტის წარმატებასა და განხილვადობასაც.

უნდა ვაღიაროთ, რომ მუსიკალურ ინდუსტრიაში საკმაოდ ძნელია, ასაკის მატებასთან ერთად, შეინარჩუნო ახალგაზრდების ყურადღება. ეს სიძნელე საერთოდ არ აღმოჩნდა სელინ დიონისთვის პრობლემა, რადგან მსოფლიოს გარშემო უამრავი ახალგაზრდა ეთაყვანება მას. ამის მიზეზი? - მომღერლის ჩაცმის სტილი.

ბაკა ალავიძის
ბლოგი

სელინ დიონი ერთ-ერთი ყველაზე ცნობილი სახელია მუსიკის ისტორიაში. მსოფლიომ იგი 1988 წლის ევროვიზიაზე გაიცნო, როდესაც კანადელმა მომღერალმა პირველი ადგილი დაიკავა კონკურსში. მას შემდეგ 31 წელი გავიდა და სელინი დღემდე წარმატებულად აგრძელებს
მუსიკალურ კარიერას, მაგრამ ბოლო ორი წელია მომღერალი პოპულარობის პიკიზეა. ამ სტატიაში გიამბობთ, თუ როგორ მოახდინა 50 წლის არტისტმა რადიკალური ცვლილება მის კარიერაში. 


2014 წელს დიონი შესვენებას იღებს. მის მეუღლეს, რენე ანჯელილს კიბო დაუდგინდა, რის გამოც სელინმა სცენა მიატოვა და რენეს მოვლა გადაწყვიტა. ისინი 1994 წელს დაქორწინდნენ (სელინი 26 წლის იყო,რენე 52-ის). „ყველაფერი მან მასწავლა. ერთადერთი კაცია, რომელიც მყვარებია. ერთადერთი კაცია, რომლისთვისაც მიკოცნია. ის ერთი ნახვით შემიყვარდა.“ - ამბობს სელინი ერთ-ერთ ინტერვიუში. 2016 წლის იანვარში რენე გარდაიცვალა. სამწუხაროდ, ყველაფერი არ დასრულებულა: მეუღლის გარდაცვალებიდან ორ დღეში, გარდაიცვალა სელინის ძმაც-დენიელ დიონი, რომელსაც სიმსივნე ჰქონდა. როგორც ცნობილია, მომღერალი და მისი შვილები დენიელის გასვენებას ვერ დაესწრნენ, რადგან სელინი ვერ გადაიტანდა სტრესს.


ძალიან დიდი მოლოდინი იყო იმისა, რომ კანადელი მომღერალი შოუბიზნესის დატოვებაზე გააკეთებდა განცხადებას, მაგრამ სელინი სცენას უბრუნდება და ბილბორდის მუსიკალურ დაჯილდოებაზე მღერის “Show Must Go On”-ს. ყველასთვის გასაოცარი იყო მსგავსი ტრაგედიის შემდეგ დაბრუნება, მაგრამ მომღერალს პუბლიკისთვის კიდევ ჰქონდა სიურპრიზები მომზადებული.

2017 წელს, ფილმ „ტიტანიკის“ საუნდტრეკის შემსრულებელმა, ხალხი ქუჩაში გასვლით აალაპარაკა. 48 წლის მომღერალი პაპარაცებმა ცისფერი ჯინსებითა და დემნა გვასალიას ზედატანით დააფიქსირეს, რომელზეც „ტიტანიკის“ პოსტერი იყო დაბეჭდილი. თითქოს ძალიან მარტივი, მაგრამ ამავდროულად ირონიული, მოულოდნელი და ნოსტალგიური ლუქით, სელინმა მოდის მოყვარულების ყურადღება მიიქცია. სწორედ ამის შემდეგ იწყება მომღერლის „მოდის კერპად“ ჩამოყალიბება: Givenchy, Balmain, Balenciaga, Off-White, Vetements-ეს მცირე ჩამონათვალია იმ დიდი ბრენდებისა, რომლებიც სელინის ლუქებში ვიხილეთ ბოლო ორი წლის განმავლობაში. მისი ყოველდღიური სამოსი მედიის განხილვის საგნად იქცა. იწერებოდა სტატიები VOGUE-სა და Harper’s Bazaar-ის საიტებზე.

2017 წელს VOGUE-ს YouTube გვერდზე ვიდეო დაიდო, რომელშიც დიონი პარიზის ოტ კუტიურის საუკეთესო ლუქებს ირგებს. ჟურნალებისგან ამხელა გამოხმაურების მიზეზი სწორედ მოულოდნელობის ეფექტია, რადგან არავინ ელოდა 50 წლის მომღერლის ასეთ გარდაქმნას. ისეთ „ჰაიფ ბისთ“ ბრენდებს, როგორიცაა Vetements და Off-White, ძირითადად ახალგაზრდა ვარსკვლავებზე ვხედავდით და სელინი ერთ-ერთი პირველი ასაკოვანი სელებრითია, რომელმაც თინეიჯერების საყვარელი ბრენდები არა მარტო მოირგო, არამედ პერსონასაც შეუხამა. კანადელი მომღერალი მალევე გამოჩნდა მოდის კვირეულებზეც- ვრცელდებოდა მისი ფოტოები პოდიუმის პირველი რიგებიდან, ხალხი თვალს ადდევნებდა მისი ლუქის დეტალებს, აკოპირებდა და ირგებდა მათ. სწორედ ამ გზით შემოიტანა სელინმა რამდენიმე ტრენდი გასულ წელს.

აუცილებლად უნდა გავუსვათ ხაზი სელინისა და მოდის ურთიერთობასაც. ინტერვიუებში ხშირად ამბობს, რომ იგი „შეპყრობილია“ მოდის სიყვარულით. მისი ყოველდღიური ლუქები ძალიან დრამატული და ექსტრავაგანტულია. Harper’s Bazaar-მა იგი ლედი გაგასა და რიანას შეადარა: “ისინი არ იცვამენ მოკვდავებივით. ისინი პოპ ვარსკვლავები არიან და შესაბამისადაც იმოსებიან.“ეს სელებრითები ქუჩაში გასასვლელადაც კი ისე იცვამენ, როგორც სხვები წითელიხალიჩისთვის. მათი ლუქების ნახვისას იგრძნობა საკუთარი პიროვნება, დამოკიდებულება, ხასიათი.

ორი წელია, რაც სელინ დიონი მოდის სამყაროს ერთ-ერთი საპატიო „ელჩია“ და ფაქტია, რომ მისი სტილის წყალობით, მომღელის „რელევანტურობა“ საოცრად გაიზარდა. დაარქვით ამ ყველაფერს პიარი, სიყალბე, დეპრესიისგან თავის დაღწევის გზა, ან რაიმე სხვა, რაც მოგაფიქრდებათ, მაგრამ ფაქტია, რომ სელინი ძალიან სწორად იყენებს სტილს, როგორც განხილვადობის იარაღს. 
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.