მაკა ცინცაძე - საეთერო სამოსიდან რეტრომდე (ინტერვიუ)

ესანიშნავად ირგებს სხვადასხვა იმიჯს და მისი წარმოდგენა შეგიძლიათ Fashion ინდუსტრიაში, თუმცა იგი პირველი არხის პოლიტიკური ტოქშოუს წამყვანია.

მშვენიერი და მიმზიდველი გარეგნობის მიუხედავად ყველაზე ცხელი მოვლენების ეპიცენტრშია. მისი პროფესიონალიზმი და წონასწორობის უნარი კი სტუდიაში ტემპერატურას აბალანსებს. წარმოგიდგენთ მაკა ცინცაძეს  მოდური იმიჯით, შიშის მომგვრელი მოგზაურობითა და აფრიკული კულინარიული შთაბეჭდილებებით. 



- მაკა, როგორ გაიხსენებთ ბავშვობას?

- საბედნიეროდ, მყუდრო და თბილ გარემოში გავიზარდე. შენახული მაქვს პატარ-პატარა ნივთები, რომელიც ემოციურად მმუხტავს და კონკრეტულ დროს მახსენებს. თბილი, ნათელი სახლი და მზრუნველი მშობლები - ასეთია ჩემი ბავშვობის
წლები. გარეგნობით მგონი დედას ვგავარ - ასე ამბობენ, ხასიათით მამას და მადლობა მათ იმისთვის, რაც მაქვს.

- ჟურნალისტიკასა და ტელევიზიაში მუშაობაზე თავიდანვე ფიქრობდით თუ მოულოდნელად აღმოჩნდით ამ სფეროში?

- უნივერსიტეტში სწავლისას, 2000 წელს, პირველ რადიოში დავიწყე მუშაობა და სწორედ მაშინ გადავწყვიტე, რომ ეს იყო საქმე, რისი კეთებაც მსურდა. მას შემდეგ ამ სფეროს აღარ დავშორებივარ. შემდეგ იყო რადიო "უცნობი", "ნაცნობი", პირველი არხი და გადაცემა "მე მიყვარს საქართველო". შემდეგ უკვე "მაესტრო", "ჯიდიესი". ამჟამად დავუბრუნდი პირველ არხს და საზოგადოებრივ-პოლიტიკური გადაცემა "აქტუალური თემა" მიმყავს. შეიძლება ითქვას, რომ 2000 წლიდან ზუსტად ვიცოდი, რა მინდოდა და ეს ნამდვილად ჟურნალისტიკა იყო. 

- სატელევიზიო გზა, სანამ "პირველ არხზე" აღმოჩნდებოდით...

- სატელევიზიო გზა დაიწყო 2008 წელს. სხვათა შორის, პირველი არხიდან, მაშინ შემეცნებით-გასართობი გადაცემა "მე მიყვარს საქართველო" მიმყავდა, თუმცა პარალელურად და მანამდეც ვმუშაობდი რადიო "უცნობის" საინფორმაციო სამსახურში. პოლიტიკა და პოლიტიკაში მიმდინარე პროცესები მაინტერესებდა. ერთი წლის შემდეგ გადავედი "მაესტროში" და მას შემდეგ პოლიტიკას აღარ დავშორებივარ.

Spring pastels with a Retro

Apparel: Janashia, George Keburia
Bag: Redicule
Photo: Shotie Blackmore
Style: Data Alekseev, Teko Shenken

Mua: Teko Shenken
Hair: George Eliadze
Assistants: Baka Alavidze, Levan Shavdia

- როგორ ფიქრობთ, პროფესიული ზრდისთვის რა არის მნიშვნელოვანი?

- ახალს ვერაფერს გეტყვით... საკუთარ თავზე მუშაობა, საქმის ინტერესი და ჯანსაღი ამბიციის არსებობა, რომელიც ისევ საკუთარი თავის და შესაძლებლობების ზრდისკენ უნდა იყოს მიმართული. სავარაუდოდ, ეს არის ის მცირე ჩამონათვალი, რაც განვითარებაში გეხმარება.

- გაიხსენეთ ტელევიზიაში მუშაობის ყველაზე რთული და სარისკო პერიოდი.

- არ მინდა თქვენთან პოლიტიკასა და პოლიტიკურ პროცესებზე საუბარი, თუმცა ეს ის შეკითხვაა, სადაც გვერდს ვერ ავუვლი რადიო "უცნობსა" და "მაესტროში" მუშაობის წლებს - 2005-2012 წლები ნამდვილად რისკს უკავშირდებოდა.

- თვისება, რომელიც პოლიტიკური შოუს ჟურნალისტს უნდა ჰქონდეს?

- პირველ რიგში, უნდა გქონდეს იმ თემის ინტერესი, რომელზეც მუშაობ. უნდა იყო შედეგზე ორიენტირებული. აღარაფერს ვამბობ ინფორმაციის გადამოწმებისა და სიზუსტის დადგენის აუცილებლობაზე. ამავდროულად, უნდა გქონდეს ყველა მხარის პოზიციის წარმოჩენის სურვილი და თუ ატყობ, რომ რესპონდენტი ცრუობს და ცდილობს, სათავისოდ გამოიყენოს საეთერო დრო, არ უნდა მისცე ამის საშუალება. ხალხი იმსახურებს, იცოდეს სიმართლე და ჩვენი ფუნქციაც სწორედ ამ სიმართლის მიტანაა.

- თქვენი სამუშაო დღე როგორ იწყება და მთავრდება?

- იწყება სტანდარტულად, მასალის მოძიებით, თემასა და სტუმრებზე ფიქრით; ვინ უფრო საინტერესო და ინფორმაციული იქნება, ვისი დასმა ვისთან სჯობს და ა.შ. სრულდება გადაცემით და შემდეგ აანალიზებ, რა შეცდომა დაუშვი, როგორ იქნებოდა უკეთესი, რას შეცვლიდი, ანუ, ცოცხალი პროცესია და გრძელდება გადაცემის დასრულების შემდეგაც. ფაქტობრივად, ამით ცოცხლობ და ის შენი ყოველდღიურობის ნაწილია. სამუშაო საათების დასრულების შემდეგ გონება პროცესზე ფიქრს და მუშაობას არ ასრულებს.

- დასვენებას თუ ახერხებთ და როგორ გარემოში ისვენებთ?

- ხშირად ვერც ვახერხებ... როცა ვახერხებ, ვცდილობ, ოჯახურ გარემოში დავისვენო, კესოსთან (შვილთან) ერთად. ეს არის სრული მოწყვეტა პროცესებისგან. ვცდილობ, გამოვრთო საკომუნიკაციო საშუალებები და მთელი დრო დავუთმო საკუთარ თავს და შვილს. ამაზე უკეთესი დასვენება არ არსებობს.

- ვიცი, რომ ხშირად მოგზაურობთ... ქვეყნები, რომლებიც მოინახულეთ და წარუშლელი შთაბეჭდილება დატოვა თქვენზე.

- რა თქმა უნდა, ევროპის ქვეყნებმა, თუმცა ჩემი ფავორიტი ამ დრომდე მაინც ამერიკის შეერთებული შტატებია. ეს არის განუსაზღვრელი შესაძლებლობების ქვეყანა, რომელიც საწყის ეტაპზე თავისი მასშტაბებით და გრანდიოზულობით ძალიან გაშინებს და გაფიქრებინებს, რომ ან შენც ამ აწყობილი მექანიზმის უმნიშვნელო ნაწილად უნდა იქცე, ან დაიკარგები. შემდეგ კი თავისივე სიმარტივითა და პერსპექტივებით გაოცებს.

- ყველაზე სასიამოვნო გასტრონომიული შთაბეჭდილება...

- ზოგადად, გურმანი ვარ. არაერთი ქვეყნის სამზარეულო მომწონს, თუმცა სასიამოვნო და ამავდროულად მოულოდნელი აღმოჩნდა სამხრეთაფრიკული კერძები. ძალზე გამაოცა თავისი საოცარი არომატებითა და განუმეორებელი გემოებით. მას შემდეგ ყველას ვთხოვ, რომ საშუალების არსებობის შემთხვევაში ამ სიამოვნებაზე უარი არ თქვან.

- წონის პრობლემა თუ გაქვთ და დიეტას თუ იცავთ?

- ბოლო რამდენიმე წლის განმავლობაში წონის პრობლემა, არ დავმალავ და, მაქვს. სხვადასხვა მიზეზის გარდა, ჩემი გურმანობაც წონის მატებისთვის ხელშემწყობი ფაქტორია და მოვიმატე. თავიდან ძალიან ვინერვიულე, შემდეგ შევეგუე და ამჯერად ახალი ეტაპი დადგა - მასთან ბრძოლის დროა. მივმართე ენდოკრინოლოგის დიეტას და შედეგს, იმედია, უმოკლეს დროში დავინახავ.

- თქვენი საყვარელი ჩაცმის სტილი... შეგიცვალათ თუ არა გემოვნება ტელევიზიაში საქმიანობამ?

- ყოველდღიურად მოსახერხებელი და კომფორტული. ტელევიზიამ გავლენა მოახდინა და საეთერო სამოსი ყოველდღიურისგან განსხვავდება. კედები მაინც განსაკუთრებით მიყვარს და მეკომფორტულება. ამავდროულად ჩემს მანქანაში ყოველთვის იპოვით ყველა მოცემულობისთვის გამოსადეგ სამოსს და საჭიროების შემთხვევაში, ასე ვახერხებ უხერხულობისთვის თავის არიდებას.

- სად გიყვართ შოპინგი?

- შოპინგი მიყვარს და მსიამოვნებს ყველგან, არ აქვს მნიშვნელობა, ევროპა იქნება თუ აზია, რაღაცას ყველგან ვახერხებ. თუმცა, შოპოჰოლიკების საყვარელი ადგილი მაინც საფრანგეთი და იტალიაა. არც მე ვარ გამონაკლისი.

- საყვარელი სამოსი, რომელსაც არასდროს დაემშვიდობებით?

- სამოსსაც ადამიანებივით ვეჩვევი და მიჭირს განშორება. ასეთი არც ისე ბევრია... არის რამდენიმე, რომელიც ძალიან მიყვარს. მათთან დამშვიდობებას არ ვაპირებ და საპატიო ადგილიც უკავიათ გარდერობში. მაქვს ერთი შარვალი, რომლის დაჭრითაც მეგობრები მემუქრებიან.

- საყვარელი აქსესუარი?

- აქსესუარებს იშვიათად ვატარებ. მაქვს ბეჭედი, რომელიც მეგობარმა მაჩუქა და ძალიან მიყვარს. განსაკუთრებულ დღეებში სწორედ მას ვიკეთებ. არ მიყვარს ბიჟუტერია და მგონია, რომ აქსესუარი უნდა იყოს ძალიან ძვირფასი. შესაძლოა მინიმალისტური, მაგრამ ძვირფასი...

- როგორ უვლით თავს?

- განსაკუთრებულს არაფერს ვაკეთებ, ვიყენებ მხოლოდ იმას, რაც აუცილებელი და ყოველდღიურობისთვის საჭიროა.

- საყვარელი სუნამო...
- რამდენიმე ნიშ-სუნამო. ახლა ამოვიჩემე Tiziana Terenzi-ს Casanova Andromeda.

- არაჩვეულებრივი ელეგანტურობით გამოირჩეოდით "ბომონდის" გადაღებაზე. როგორ გაიხსენებთ ამ დღეს?

- პირველ რიგში, დიდი მადლობა "ბომონდს" და თეკო შენკენს ამ გადაღებისთვის. ძალიან გამიადვილდა, რადგან პროფესიონალი, მაღალკვალიფიციური კადრები იღებდნენ. შესაბამისად, რამდენიმე საათის გარბენა ვერც ვიგრძენი და საჭიროების შემთხვევაში გადაღების გაგრძელებასაც შევძლებდით - ეს მხოლოდ მათი დამსახურებაა. როგორ გავიხსენებ? რა თქმა უნდა, განსაკუთრებულად და ძალიან სასიამოვნოდ. მიყვარხართ.

ქეთი დარჩია

იხილეთ ვიდეო - Spring Pastels with a Retro

like
0

კომენტარები

saba
სასწაული ქალია. ინტელექტი არ გადმოდის ყურებიდან მარა ვაბშე არაუშავს მაგას:) ზატოეჭვი მაქვს რძეს ფსავს დასმეტანას ჯვავს
2019-03-24 17:12
ალექსანდრე
მაკა არის ყველაზე ლამაზი
2019-03-24 15:40
სტუმარიnatia, gamarjoba
uuulamazesiiiiiiii, gogoc fotkac
2019-03-21 12:21
სტუმარიnatia, gamarjoba
au saocari uuuulamazesiii
2019-03-21 12:20

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.