ნაომი კემპბელი რასიზმზე მოდაში და მომავალ შავკანიან მოდელებზე

ჩატარებულ CNI Luxury Conference-ზე, რომელიც აფრიკის პოტენციალს მიეძღვნა, ერთ-ერთი მთავარი მოვლენა ნაომი კემპბელის გამოსვლა გახდა - Gucci-ის გენერალურ დირექტორთან, მარკო ბიცარისთან ერთად მან ისაუბრა, თუ როგორ ეხმარებიან მოდის სფეროს განვითარებას კეიპთაუნში, ნაირობში, ლაგოსსა და აკრაში.



სამხრეთ აფრიკის დიზაინერის, მარიანა ფასლერის კაბაში ჩაცმულმა მოდელმა ემოციურად ისაუბრა იმაზე, თუ რამდენად ბევრი რამის მიცემა შეუძლია აფრიკას სამყაროსთვის. Vogue-თან ინტერვიუში კი ნაომი საუბრობს - რატომ არის მისთვის ეს კონტინენტი ამდენად მნიშვნელოვანი.


ნელსონ მანდელაზე

ნაომი ლონდონში დაიბადა, მაგრამ მეორე სახლად აფრიკას მიიჩნევს, სამხრეთ აფრიკის რესპუბლიკის

ყოფილ პრეზიდენტს, ნელსონ მანდელას კი მოიხსენიებს, როგორც ბაბუას. „როცა ამ ქვეყანაზე ფიქრობთ, თავში პირველად მანდელას სახელი მოგდით და ყოველთვის ასე იქნება“ - სიამაყით საუბრობს ის. მათი მეგობრობა 1994 წელს დაიწყო, როცა მოდელი აფრიკაში კონკურსის „მის მსოფლიო“ ჟიურის წევრის ამპლუაში მიიწვიეს და მიღებული ჰონორარი მანდელას პარტიას გადასცა. „როცა სცენიდან ჩამოვედი, მითხრეს, რომ პრეზიდენტს ჩემთან შეხვედრა სურდა. აღფრთოვანებულმა შევყვირე, რადგან ჩემთვის ის იმედის, თავისუფლებისა და ერთიანობის სიმბოლო იყო - ისეთი ბრძენი, თავმდაბალი და გულწრფელი“ - იხსენებს მოდელი.

მანდელას ამ თვისებებში ნაომი მაშინ დარწმუნდა, როცა მეორე ვადით პრეზიდენტობაზე უარი თქვა. „მან მითხრა, რომ პოსტის დატოვება სურდა და მე მაშინვე ვკითხე, თუ რა იყო ამის მიზეზი. მან კი მიპასუხა, რომ ასე უკეთ შეძლებდა აფრიკელ ხალხზე ზრუნვას. ბაბუამ მასწავლა, რომ არ მეშინოდეს სიმართლის თქმის და ჩემი შესაძლებლობები სხვა ადამიანების დახმარებისთვის გამოვიყენო“ - ჰყვება კემპბელი. მოდელი ცდილობს მასთან შეთანხმებები შეასრულოს - კეიპტაუნში მოკლე დროით ვიზიტისას, მან გამონახა დრო ადგილობრივ საქველმოქმედო ორგანიზაციებში აფრიკელი ბავშვები მოენახულებინა და ხელოვნების სკოლის გოგონებთან ერთად ცეკვის გაკვეთილებში მონაწილეობაც მიიღო.

შავკანიანი მოდელების შეზღუდვებზე

ნაომი ამბობს, რომ აპრილს მისი კარიერისთვის მნიშვნელოვან თარიღს აღნიშნავს - ამ დღეს, 33 წლის წინ, ერთი თვით ადრე, ვიდრე 16 წლის გახდებოდა, მისი პირველი სამოდელო გადაღება შედგა. იმ დროის მოგონებები მძიმე თემასთანაა დაკავშირებული - ეს სამოდელო ინდუსტრიაში რასიზმის გამოვლენაა. „1980-იან წლებში ბრძოლა მიწევდა იმისათვის, რომ ჩემთვის იმდენივე გადაეხადათ, რამდენსაც თეთრკანიან მოდელებს უხდიდნენ. ბევრი დიზაინერი ვერც იფიქრებდა იმას, რომ მათი სამოსი შავკანიანი გოგონებისთვის ეჩვენებინათ“ - გამოტყდა კემპბელი.

ნაომი აღიარებს, რომ ის დღემდე ამჩნევს ძველ დამოკიდებულებებს. „საჭირო თანასწორობა დღემდე არ არსებობს. მაგ: ცოტა ხნის წინ, მე, ერთი ახალი სარეკლამო კამპანიის სახეს მითხრეს, რომ ჩემთან ერთად გადაღებულ ფოტოს ერთ ქვეყანაში მხოლოდ კანის ფერის გამო არ გამოიყენებდნენ. ჩემთვის ძალიან მნიშვნელოვანია ყველაფერი გავაკეთო იმისათვის, რომ შავკანიან და თეთრ მოდელებს თანაბარი შესაძლებლობები ჰქონდეთ“.
სწორედ ამიტომ, ნაომი აფრიკაში დამწყებ მოდელებს შეძლებისდაგვარად ეხმარება. „რამდენიმე სააგენტოს ვეწვიე და გასაოცარი გოგონები ვნახე. მათ საუცხოო გარეგნობა აქვთ და ვერც კი წარმოუდგენიათ რამდენად უნიკალურები და ლამაზები არიან. უნდა ვეცადოთ მათი საერთაშორისო დონეზე გამოყვანას, დავაკავშიროთ ლონდონის, მილანის, პარიზის, ნიუ-იორკის სააგენტოებთან. შავკანიანი მოდელი ტრენდი არ არის, ჩვენ მოდაში მოვედით სამუდამოდ“ - ამაყად აცხადებს მოდელი და Valentino გაზაფხული-ზაფხული 2019 წლის ჩვენებას იხსენებს, სადაც გოგონების ნახევარი პოდიუმზე აფრიკული წარმოშობის იყო.

აფრიკელ დიზაინერებზე

„მჯერა, რომ წელს LVMH-ის პრემიას რომელიმე აფრიკელი დიზაინერი მიიღებს. საჭიროა მხოლოდ შესაძლებლობა მივცეთ გამოიყენონ აფრიკული ტექსტილის საკუთარი ტრადიციები და ისინი ამას ნებისმიერ დასავლელ მოდელიორზე უკეთ გააკეთებენ“ - ამბობს ნაომი. სამხრეთ აფრიკელი დიზაინერის, მარიანა ფასლერის კაბაში გამოწყობილი მოდელი მისთვის საყვარელი კონტინენტის ბრენდებს ასახელებს: Tiffany Amber, Rich Mnisi, Thebe Magugu და Kenneth Ize.

აფრიკელი დიზაინერებისთვის ობიექტური სირთულეები, როგორიცაა განუვითარებელი წარმოება და საგანმანათლებლო სისტემის არარსებობის მიზეზად ნაომი შავი კონტინენტის მიმართ შიშს ასახელებს. მისი თქმით, ხალხს ძალიან დიდხანს ჰქონდა აქ ჩამოსვლის შიში, რადგან ამ ადგილის შესახებ ცოტა რამ იცოდნენ და ვერც წარმოედგინათ რა ელოდათ. „მიხარია, რომ ახლა აფრიკა დასასვენებელი და ტურისტული ადგილია. გასულ წელს ედვარდ ენინფულთან ერთად შობა განაში აღვნიშნე და ვნახეთ, თუ რამდენი ადამიანი ჩამოდის აქ. არ შეიძლება ადგილის განსჯა სხვისი ნათქვამით - ჩამოდით და ყველაფერს საკუთარი თვალით ნახავთ“.

ანა ვერძაძე

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.