წარმოსახვისა და რეალობის ზღვარზე - ნინო გაჩეჩილაძე

არაჩვეულებრივი მსახიობია, თუნდაც იმიტომ, რომ თაყვანისმცემელთა უმრავლესობა სერიალის "ჩემი ცოლის დაქალები" პერსონაჟ კატოსთან აიგივებს.

სერიალის ესთეტიკა საკმაოდ რთულია და დიდი გამოწვევაა მსახიობისთვის. მაქსიმალურად რეალური და კინემატოგრაფიული უნდა იყოს თამაში, რომ მაყურებელი დააჯეროს, რაც ურთულესი ამოცანაა თეატრის მსახიობისთვის.

არმოგიდგენთ მსახიობ ნინო გაჩეჩილაძეს - დახვეწილი სისადავითა და ელეგანტურობით.


- შთაბეჭდილება თეატრსა და სამსახიობო ხელოვნებაზე, რომელმაც გავლენა მოახდინა პროფესიის არჩევაზე...

- ჩემი პირველი შთაბეჭდილება თეატრსა და ზოგადად, სამსახიობო ხელოვნებაზე დაკავშირებულია მარჯანიშვილის თეატრთან, სადაც 4 წლის ასაკში
პირველად წამიყვანეს სპექტაკლზე. ეს იყო `ლურჯი ურჩხული,
რომელიც მედეა კუჭუხიძემ კარლო გოცის ამავე სახელწოდების ზღაპრის მიხედვით დადგა. მახსოვს, სპექტაკლში ბევრი ეფექტური სცენა იყო, ლამაზი კოსტიუმებით და ბავშვისთვის მომხიბლავი მუსიკალური თუ საცეკვაო ნომრებით, რამაც მართლაც საოცარი შთაბეჭდილება დამიტოვა. თუმცა პროფესიის არჩევაში ამ ფაქტს არანაირი როლი არ უთამაშია. ეს გაცილებით გვიან მოხდა, დაახლოებით 15-16 წლის ასაკში. გადაწყვეტილება სპონტანურად მივიღე. გარდატეხის ასაკში ბალერინობა მომინდა, მაგრამ რადგან დაგვიანებული იყო და საბალეტო სკოლაში არ მიმიღეს, გადავწყვიტე, ისეთი პროფესია ამერჩია, რომელიც სცენასთან ახლოს იქნებოდა. ასე აღმოვჩნდი თეატრალურში.



- პროფესიონალიზმი და პროფესიული უნარები გამოცდილებით მოდის. როდის იგრძენით, რომ მსახიობი ხართ?

- მართალია, პროფესიონალიზმი გამოცდილებით მოდის, ჩვენი პროფესია კი ძალიან დიდ დროს და ენერგიას მოითხოვს, ოდნავ შეცდომასაც კი არ გაპატიებს მაყურებელი. შესაბამისად, გარკვეული დრო გჭირდება იმისთვის, რომ პროფესიონალად ჩამოყალიბდე. არ ვიცი, როდის უფრო ვიგრძენი თავი პროფესიონალ მსახიობად - თეატრის სცენაზე თუ კამერის წინ, თუმცა, მაყურებლის რეაქციიდან გამომდინარე, ამას სულ ვგრძნობ და მიხარია, თუ ჩემს საქმეს კარგად ვაკეთებ.- სხვადასხვა პერსონაჟი, სხვადასხვა ეპოქა და თეატრალური პირობითობა რა გავლენას ახდენს თქვენზე.

- რამდენად რთულია რეალური და წარმოსახვითი სამყაროების ზღვარზე ყოფნა?

- თეატრალური პირობითობა და სხვადასხვა ეპოქის პერსონაჟების თამაში ჩემი საქმის განუყოფელი ნაწილია, სწორედ ამითაა საინტერესო მსახიობის პროფესია, - წარმოსახვის მეშვეობით შეგიძლია ნებისმიერი გარეგნობის, ხასიათისა თუ ეპოქის როლი მოირგო. რეალობისა და წარმოსახვითი სამყაროს ზღვარზე ყოფნა უფრო რთული ეკრანზე მგონია (ვგულისხმობ სერიალს), რადგან ის რეალობა, რომელსაც სცენარისტი ქმნის, მაქსიმალურად მიახლოებულია სინამდვილესთან, თუმცა მაინც წარმოსახვითი სამყაროა, რომელშიც დროებით გიწევს ყოფნა...

- როგორ მუშაობთ როლზე, პერსონაჟის გასახსნელად საკუთარ მეთოდებს თუ იყენებთ?

- ყველა მსახიობს როლზე მუშაობის თავისებური მეთოდი აქვს, მე პიესის თუ სცენარის წაკითხვისთანავე ინტუიციით ვგრძნობ, არის თუ არა ეს როლი ჩემი. თუ ვხვდები, რომ ჩემია, ვთანხმდები და მიმყავს ბოლომდე, თუ არადა, უარს ვამბობ. ვმუშაობ სტანისლავსკისა და მიხეილ ჩეხოვის სისტემის მიხედვით. როლზე მუშაობის კიდევ სხვა ხერხებიც არსებობს, თუმცა ჩვენ სხვა სკოლა, სამწუხაროდ, არ გაგვივლია. სტანისლავსკის სისტემა ყველაზე გავრცელებული და აპრობირებულია ჩვენს სფეროში.

- როლები, რომელიც ძალიან გიყვართ...

- ყველა როლი მიყვარს, რომელიც მითამაშია სცენაზეც (20-მდე როლი) და ეკრანზეც, თუმცა რამდენიმეს მაინც გამოვყოფდი. ეს არის ვინი - სემუელ ბეკეტის "ბედნიერ დღეებში", ხათუნა - ლაშა თაბუკაშვილის პიესაში "თოვლივით თეთრი თოვლი", მარგო - მიხეილ ჯავახიშვილის 'ჯაყოს ხიზნებში" და სატრფიალო არსება არტურ შნიცლერის "ფერხულში". ეკრანზე ნათამაშებ როლებს შორის (რომელთა რიცხვიც ბევრად ნაკლებია, ვიდრე თეატრალური როლები), რა თქმა უნდა, კატოს როლს გამოვარჩევდი ტელესერიალში "ჩემი ცოლის დაქალები". უკვე მერვე წელია ვთამაშობ და ძალიან მიყვარს. ის უკვე ცალკე პერსონაა, რომელიც პარალელურ რეალობაში არსებობს და ხალხს უფრო ნამდვილი ჰგონია, ვიდრე ნინო.



- როგორ იქცევით, როცა რაღაც არ გამოგდით?

- როცა რაღაც არ გამომდის, ან თავიდანვე ვატყობ და თავს ვანებებ, ან, თუ ძალიან მინდა, გამომივიდეს, ყველაფერს ვაკეთებ, რომ ბოლომდე მივიყვანო. არა აქვს მნიშვნელობა, ეს რას ეხება, ყველაფერში ასე ვარ.

- კინო და თეატრი... რა სპეციფიკა აქვს სერიალს და ადვილი თუ იყო თეატრის შემდეგ მასში მონაწილეობა?

- კინო და თეატრი სხვადასხვა რამაა, სერიალი - კიდევ სხვა. აქ გრძელვადიანი რეპეტიციების დრო არ გაქვს და მაქსიმუმი, რაც შეგიძლია გააკეთო, ის არის, რომ სახლში იმუშაო როლზე გადაღებაზე წასვლამდე. თეატრის შემდეგ (სადაც ძირითადი დრო მაინც რეპეტიციას ეთმობა) სერიალზე მორგება არც რთული იყო და არც ადვილი, ეს იყო ახალი გამოწვევა, რომელიც საინტერესო და სახალისო აღმოჩნდა ჩემთვის, როგორც თეატრის მსახიობისთვის.

- საქართველოში ყველაზე რეიტინგული სერიალის ერთ-ერთი მთავარი გმირი ხართ. იფიქრებდით, რომ ეს სერიალი ასეთი წარმატებული იქნებოდა და რით არის საინტერესო თქვენთვის სერიალის გარემო?

- სერიალის წარმატებაში თავიდანვე დარწმუნებული ვიყავი, რადგან პროფესიონალთა გუნდი ქმნიდა და ქმნის. როდესაც პირველი სეზონის პირველი სერია წავიკითხე, მახსოვს, იმდენი ვიცინე, მივხვდი, ამ სერიალს ხალხი ისე აიტაცებდა, რომ დიდხანს დარჩებოდა ტელეეკრანზე. ასეც მოხდა - საქართველოში ამ სერიალს კონკურენტი არ ჰყავს. ვისურვებდი, "ფორმულა კრეატივმა" კიდევ ბევრი სხვა ახალი პროექტი გააკეთოს, რომელიც "ჩცდ"-ს წარმატებას და პოპულარობას გაიმეორებს.

- რა ცვლილება განიცადა კატომ სერიალის გამოსვლიდან დღემდე? იმდენად ბუნებრივად თამაშობთ, მაყურებელს მართლა კატო ჰგონიხართ... რამდენად ჰგავხართ, ან თუ დაემსგავსეთ ამასობაში თქვენს პერსონაჟს?

- კატო ძალიან შეიცვალა პირველი სეზონიდან დღემდე - უფრო გულჩათხრობილი და ნაკლებად ლაღია, ვიდრე ადრე იყო, ცოტა ცხოვრებაზე გაბრაზებულიც, რაც მისი არანორმალური და ზედმეტად მრავალფეროვანი პირადი ცხოვრების შედეგია. ეს ბუნებრივიცაა, თუ პერსონაჟი არ განვითარდა, უინტერესო ხდება მაყურებლისთვის. მიუხედავად იმისა, რომ ხასიათი არ ეცვლება (და სწორედ ამიტომაა ასეთი სასაცილო), ვფიქრობ, უკვე იმდენი ცხოვრებისეული გამოცდილება დააგროვა, იმავე შეცდომებს არ დაუშვებს. კატოს მთავარი თვისება სწორედ ისაა, რომ საკუთარ შეცდომებზეც კი ვერ სწავლობს ჭკუას, არამცთუ სხვების მაგალითებზე. რაც შეეხება მსგავსებას, გარეგნობისა და ხმის ტემბრის გარდა არაფრით ვგავარ, ცხოვრებაში ზედმეტად სერიოზულიც კი ვარ, ვიდრე სხვებს ჰგონიათ. მსახიობი თუ ყველა იმ პერსონაჟს დაემსგავსა, ვისაც თამაშობს, მაშინ საბოლოოდ ფსიქიატრიულში ამოყოფს თავს.



- ვიცი, დაძაბული სამუშაო გრაფიკი გაქვთ... რას აკეთებთ თავისუფალ დროს?

- თავისუფალ დროს ვცდილობ, წიგნი წავიკითხო ან ის ფილმები ვნახო, რომლებიც თავის დროზე ვერ ვნახე, წავიდე მეგობრებთან სტუმრად, მოვაწყო კულინარიული საღამოები, წავიდე სხვა თეატრებში პრემიერების სანახავად, ან უბრალოდ, ვიმოგზაურო...

- გაიხსენეთ თქვენთვის დაუვიწყარი ქვეყანა და მოგზაურობა...

- მოგზაურობა მართლა ძალიან მიყვარს, მთელი წელი ველოდები ზაფხულს, რადგან ვიცი, რომ ზაფხულში კიდევ ერთ ახალ ქვეყანას ვნახავ... არაერთ ქვეყანაში ვარ ნამყოფი, თუმცა ყველაზე მეტად მომეწონა ინდოეთი, რომელმაც თავი დამამახსოვრა მყვირალა ფერებით, ჯადოსნური, მაჰარაჯას სასახლეებით და ულამაზესი სამკაულებით, საოცარი ბუნებით და რაღა თქმა უნდა, ტაჯ-მაჰალით, რომელიც ნამდვილი საოცრებაა! ინდოეთს კიდევ არაერთხელ ვნახავდი, რადგან იქ ყოფნისას ნამდვილი ბედნიერება განვიცადე, სიამოვნებით მოგვრილი ბედნიერება...

- ბოლო სეზონისთვის იმიჯი შეიცვალეთ... თქვენს იმიჯს ალბათ აკონტროლებენ კიდეც და თამამი გადაწყვეტილებების საშუალება ნაკლებად გაქვთ. რამდენად ხშირად მიმართავთ ექსპერიმენტებს გარეგნობაზე?

- მართალი ხართ, ხშირი სწორების გამო თმა იმდენად დამეწვა, რომ იძულებული გავხდი, მოკლედ შემეჭრა. ზოგადად, თამამი გადაწყვეტილებების მიღების საშუალება ნაკლებად გვაქვს, თუმცა ექსპერიმენტები საჭიროა მრავალფეროვნების მიზნით!

- როგორ ირჩევთ ჩაცმის სტილს. რომელია თქვენი საყვარელი ლუქი ან კოსტიუმი გარდერობში?

- ჩაცმის სტილს იქიდან გამომდინარე ვარჩევ, თუ იმ დღეს სად მივდივარ - წვეულებაზე, თეატრში, ინტერვიუზე თუ პაემანზე. თავისუფალი და კომფორტული სამოსი მიყვარს, თუმცა ეტიკეტი თავისას მოითხოვს და საჭიროა დავიცვათ. ჩემი საყვარელი ლუქი ალბათ არის საშუალო სიგრძის მოტკეცილი შავი კაბა და ჩვეულებრივი შავი როლინგი მოტკეცილ ჯინსზე და მაღალ ქუსლებზე. ასევე მიყვარს ფართო პიჯაკები გრძელ, ფართო შარვლებზე...

- რა არის თქვენთვის სტილი?

- სტილი განსაზღვრავს შენს დამოკიდებულებას როგორც საკუთარი თავის, ასევე სამყაროს მიმართ. ის შეიძლება ხშირად ცვალო, მაგრამ ვფიქრობ, ყველას აქვს საყვარელი სტილი, ის, რაც სხვებისგან გამოარჩევს. ჩემთვის ეს მონოგამიური დიზაინია, ანუ ყველაფრის შეხამება, რომელიც ერთ დროს შანელმა შესთავაზა თავის მომხმარებელს. 

- თავს როგორ უვლით - დიეტა, ფიტნესი...

- ფიტნესისთვის, სამწუხაროდ, ვერ ვიცლი, არ ვდიეტობ, უბრალოდ, ვცდილობ საღამოს 7 საათის მერე არ ვჭამო და 1,5 ლიტრი წყალი მაინც დავლიო დღეში. ცხიმიანი საკვებისგან თავის ვიკავებ, ძირითადად სალათებს და თევზს მივირთმევ. თავის მოვლის განსაკუთრებული მეთოდები არ მაქვს, ჩემი ერთადერთი მეთოდია ძილი!


ქეთი დარჩია

ლოკაცია: KING DAVID
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.