მამაკაცი სვაროვსკის კორსეტით - ვინ არის ეზრა მილერი?

მეთ გალას წითელი ხალიჩის შემდეგ უკვე ერთი კვირა გავიდა, მაგრამ მედია ჯერ კიდევ განიხილავს „შვიდთვალა“ ბიჭის გამოჩენას, რომელმაც საკმაოდ დიდი შთაბეჭდილება მოახდინა ყველა ჩვენგანზე.

ქართველი საზოგადოება მას კარგად არ იცნობს, მაგრამ გარწმუნებთ, რომ მისი უამრავი ნიჭის წყალობით, მალე მის სახეს საკმაოდ ხშირად დაინახავთ ეკრანებზე. დროა დავსვათ კითხვა-ვინ არის ეზრა მილერი?

დაიბადა 1992 წელს, ნიუ-ჯერსიში მცხოვრებ მარტასა და რობერტ მილერების ოჯახში. 6 წლის ასაკში მშობლებმა მუსიკის სკოლაში მიიყვანეს და ეზრამ ოპერის შესწავლა დაიწყო. 9 წლის ასაკში მას უკვე რამდენიმე საოპერო ნომერი
ჰქონდა დასწავლილი, მაგრამ ყველაფერი ისე არ აეწყო, როგორც მის ოჯახს სურდა.
თინეიჯერობისას მილერი სკოლიდან წამოვიდა და სამსახიობო ინდუსტრიაში სცადა ბედი და მალევე შედგა მისი კინოდებიუტიც. „სკოლის შემდეგ“-ასე ჰქვია ფილმს, რომელშიც ეზრამ მისი პირველი როლი მოირგო- ვლოგერი ბიჭის, რომელიც შემთხვევით ორი კლასელის სიკვდილს გადაიღებსდა ცხოვრების საკმაოდ დაძაბულ ეპიზოდში შეაბიჯებს. ფილმს დიდი გამოხმაურება არ მოჰყოლია, სამაგიეროდ ეზრას შესრულებამ რეჟისორები დააინტერესა. „სკოლის შემდეგს“ მოჰყვა „სითი აილენდიც“, მაგრამ 2011 წელს გამოვიდა ფილმი, სახელად „ჩვენ უნდა ვისაუბროთ კევინზე“, რომელშიც მილერი ტილდა სუინტონთან ერთად მონაწილეობს.



სწორედ ამ ეკრანიზაციის შემდეგ იწყება 18 წლის მსახიობის პოპულარობა: უამრავი ფილმი, ინტერვიუები, ჟურნალის გვერდები. ნელ-ნელა ეზრა ფართო საზოგადოებას ეცნობა თავისი როლებით- პატრიკი, ფილმში „მარტოსულობის უპირატესობანი“, დენიელ კალპი, ფილმში „სტანფორდის ციხის ექსპერიმენტი“, ფლეში „სამართლიანობის ლიგიდან“, კრედენს ბერბოუნი, ფილმში „ჯადოსნური ცხოველები და სად ვიპოვოთ ისინი“ და კიდევ სხვა მრავალი. პარალელურად, მილერი მუსიკალურ კარიერას იწყებს და უერთდება ჯგუფს, სახელად „sons of the illustrious father”.

მართალია ეზრას ნიჭმა მას დიდი პოპულარობა მოუტანა, მაგრამ მთავარი აფეთქება 2018 წელს მოხდა, როდესაც იგი კომიქ ქონზე „სუპერ მარიოს“ პერსონაჟის სამოსით გამოჩნდა. მისმა ვარდისფერმა ლუქმა, რომელიც უზარმაზარ ქუდსა და აბრეშუმის კაბას მოიცავდა, ინტერნეტ სივრცეში საოცარი გამოხმაურება მოიპოვა. 25 წლის არტისტმა სწორედ მას შემდეგ დაიწყო მოდის სამყაროში დამკვირდება. არანაკლებ დიდი სიურპრიზი იყო მისი გამოჩენა დუტის კაბითაც, რომელიც პიერპალო პიჩოლის მიერ არის შექმნილი. და ჟივანშის მთილიანად თეთრი ლუქი და ხელებზე დაწერილი „ავადა კედავრა“?-იდეალური. ეზრას უნიკალური და საკმაოდ „
„ფემინური“ ჩაცმის სტილი გვარწმუნებდა, რომ მსახიობის წითელ ხალიებზე გამოჩენა სიურპრიზებით იქნებოდა სავსე. 2018 წლის ნოემბერში ინტერნეტ სივრცეში მილერის ახალი ფოტოსესიის კადრები გავრცელდა, რომლებიც არც მეტი, არც ნაკლები ჟურნალ „ფლეიბოისთვის“ იყო გადაღებული. მაღალქუსლიანი ფეხსაცმლითა და კურდღლის ყურებით წარმოდგენილ ეზრაზე მედია რამდენიმე დღე გაუჩერებლად საუბრობდა.



წლევანდელი მეთ გალა მისთვის პირველი იყო, მაგრამ მისიწითელ ხალიჩაზე გამოჩენა საერთოდ არ იყო ჩვენთვის მოულოდნელი, რადგან ჟურნალმა „VOGUE“-მა ქემფის ფოტოსესიაზე სწორედ მილერი წარმოადგინა მოდელად. შესაძლოა მის მეთ გალას დებიუტს ველოდით, მაგრამ მისი ლუქი ნამდვილი სიურპრიზი იყო. სახეზე დამატებული ხუთი თვალი, ბარბერის შარვალ-კოსტუმი, სვაროვსკის კორსეტი და საკუთარი სახის ნიღაბი- როგორც ინტერვიუში თქვა, ყველაფერი თავისი მოფიქრებული იყო და საკმაოდ გაუჭირდა დიზაინერების დაყოლიება, მაგრამ რიკარდო ტიშიმ მისი იდეები გაიზიარა და სამოსიც შეუკერა. ჟურნალების მიერ გამოქვეყნებულ საუკეთესოდ ჩაცმულთა სიებში მილერი ისეთ ვარსკვლავებთან ერთად ლიდერობს, როგორებიც არიან ლედი გაგა, ქეითი პერი, ჯარედ ლეტო და სხვა მრავალი.



შესაძლოა ცოტა დროა გასული მას შემდეგ, რაც ეზრა მილერმა მოდის სამყაროში გაითქვა სახელი, მაგრამ შეგვიძლია დანამდვილებით ვთქვათ, რომ მისი სახით საკმაოდ საინტერესო პერსონა გამოჩნდა ინდუსტრიაში, რომლისგანაც ბევრ სიურპრიზებს უნდა ველოდოთ. პარალელურად, მის ნახვას კინოთეატრებშიც შეძლებთ, რადგან მსახიობი ამჟამად რამდენიმე პროექტზე მუშაობს.

ბაკა ალავიძე

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.