სალომე კასრაძე - სილამაზის ინდუსტრია ერთ ვლოგში

განსაკუთრებით ინფორმაციულ ქაოსში, როცა არჩევანის გაკეთება გიჭირს და განსაკუთრებით სილამაზის სფეროში, როცა ამხელა არჩევანია...

თუ გეყოლებათ სანდო ადამიანი, ვის გამოცდილებას და რეკომენდაციებსაც ენდობით და იზიარებთ, ჩათვალეთ, რომ გაგიმართლათ. ასეთია ჩემთვის სალომე კასრაძე, რომელიც საზოგადოებამ სატელევიზიო ეთერიდან გაიცნო. მას ახლა სოციალურ ქსელში შეხვდებით, სილამაზის თემებზე პერსონალური ვლოგით და ყველაზე ეფექტური და საუკეთესო შემოთავაზებებით, რომელსაც აუცილებლად გაითვალიწინებთ.

VIDEO - LEVAN SHAVDIA

Starring – Salome Kasradze

PHOTO: Shotie Blackmore
APP: Atelier Makratelli, Eloshi


Necklace - Le Chic Radical
Accessories: Éthéré

Style – Data
Alekseev

Make Up – Teko Shenken

- სალომე, ტელევიზიაში საქმიანობის დიდი გამოცდილება გაქვთ. გაიხსენეთ ეს გზა?

- 19 წლის ვიყავი, როცა ტელევიზიაში სტაჟიორად დავიწყე მუშაობა. მაშინ ენთუზიაზმზე, ყოველგვარი ანაზღაურების გარეშე ვაკეთებდი საქმეს. თან იმავე წელს ჩავაბარე მაგისტრატურაზე ჯიპაში და ეს „მხოლოდ ენთუზიაზმზე’’ შრომა ნაკლებად გაუსაძლისი მეჩვენებოდა. ცოტა დიდხანს კი გაგრძელდა ის პერიოდი (თითქმის 2 წელი), მაგრამ ყოველთვის მჯეროდა, რომ მოთმინება და მონდომება დამიფასდებოდა. ასეც მოხდა, ტელევიზიაში თითქმის ყველა პოზიციაზე ვიმუშავე, სადაც კი ჟურნალისტი შეიძლება წარმოიდგინოთ - ვიყავი კორესპონდენტი, სხვადასხვა გადაცემის წამყვანი, მათ შორის ჩემი საავტორო გადაცემისაც, შემდეგ პროდიუსერიც. როცა მივხვდი, რომ ჩემი თავი ამ სფეროში ამოვწურე, პერსონალური ბლოგის შექმნა გადავწყვიტე. თუმცა, მაინც ვფიქრობ, რომ ჟურნალისტიკა ისეთი პროფესიაა, ვერასდროს ამოწურავ თავს, ამის საშუალებას უბრალოდ არ მოგცემს ქვეყანაში მიმდინარე მოვლენები. უბრალოდ, ჩემს შემთხვევაში დადგა დრო, რომ მინდოდა დაგროვილი გამოცდილებით მხოლოდ ჩემს თავზე მემუშავა და არა სხვებზე.

- როგორ გადაწყვიტეთ პერსონალური ვლოგის შექმნა, რომელიც სილამაზეს ემსახურება?

- დიდი ხანია თვალს ვადევნებ ჩემს საყვარელ ვლოგერებს იუთუბზე. უცხოეთში ეს მიმართულება ძალიან პოპულარულია და დღესაც ვითარდება. პირველად, როცა ვცადე მომეძებნა ქართველი ვლოგერები, ვისაც ცხოვრების სტილის ნიშა ეკავათ, ვერავინ ვიპოვე. მაშინ გადავწყვიტე, გამეკეთებინა ჩემი არხი და მომეყოლა მაყურებლისთვის ჩემზე: როგორი მაკიაჟი მომწონს, როგორ ვუვლი თავს, როგორ ვიკვებები, როგორია ჩემი უქმე დღეები, სად ვატარებ თავისუფალ დროს და ა.შ. ანუ თითქმის ყველაფერი ჩემ შესახებ. ვიცოდი, რომ ეს არ იქნებოდა ადვილი. ზოგადად, როცა რაღაცის წამომწყები ხარ, იოლი არ არის, მოკლე დროში თავის დამკვირდება. უფრო ადვილია უკვე გაკვალულ გზაზე სიარული. მაგრამ მე მიყვარს ახალი აღმოჩენები, სირთულეები. თან ერთია, როცა უცხოელ ვლოგერებს უყურებ და მეორე, როცა შენს ენაზე იმ პროდუქტებზე გესაუბრებიან, რაც შენს ქვეყანაში ხელმისაწვდომია. ამიტომ ვიფიქრე, საქართველოში მოეწონებოდათ ქართული ვლოგი და მგონი, ასეც მოხდა.

- როგორ ირჩევთ პროცედურებს, რომელსაც ქალბატონებს სთავაზობთ?

- პირველ რიგში ეს არის ის პროცედურები, რასაც თავად ვიკეთებ. ხანდახან მაყურებელს ისეთ პროცედურაზე უკითხავს აზრი, რაც არასდროს გამიკეთებია და არც ვაპირებ მომავალში, იმიტომ, რომ მჯერა, ეს არ არის თავის მოვლისსწორი გზა. თუმცა ხშირად სწორედ მათი მოთხოვნა განაპირობებს ჩემს მომდევნო ვიდეოს. თუ ჩემს გემოვნებაში ჯდება, აუცილებლად ვითვალისწინებ მაყურებლის აზრს. ზუსტად ეს არ მომწონდა ტელევიზიაში მუშაობისას. ყოველთვის ამბობდნენ - რასაც ითხოვს ხალხი, ჩვენც იმას ვაწვდით. და ეთერში გადიოდა იაფფასიანი, უგემოვნო სერიალები და გადაცემები. მე ყოველთვის მჯეროდა, რომ პირიქით, რასაც მიაწოდებ, ოღონდ სწორად, სწორ დროს და ხარისხიანად, იმას აუცილებლად კიდევ მოგთხოვს მაყურებელი. რადგან ადამიანი არ იბადება გემოვნებიანი ან უგემოვნო, ამ ყველაფერზე გარემო და მიწოდებული ინფორმაცია ახდენს გავლენას. ჩემი მაყურებელი კარგად ხვდება, რომ ჩემი მიზანი არ არის ნახვების გაზრდა და მაღალი რეიტინგი. ჩემი მიზანია, ჩემს არჩეულ ნიშაში და იმ სეგმენტში, სადაც თავს კარგად ვგრძნობ, მოვიპოვო ნდობა და ჩემი გამომწერებისთვის სოციალური ქსელის სქროლვა დროის უაზროდ ფლანგვა არ იყოს და ჩემგან მიიღონ საინტერესო და სასიამოვნო ინფორმაცია.

- ვფიქრობ, რომ ყველაზე თანამედროვე და ეფექტური გზა გაქვთ არჩეული, როცა სოციალური ქსელის დახმარებით, პირად გამოცდილებაზე დაყრდნობით, უზიარებთ გამოცდილებას ქალბატონებს. თავად როგორ მუშაობთ ეფექტური საშუალებების მოძიებაზე?

- შეიძლება მე ბევრი გამომწერი მყავს, მაგრამ მეც ბევრის გამომწერი ვარ. როგორც ზემოთ ვახსენე, არაერთი უცხოელი ვლოგერია ჩემი ფავორიტების სიაში, რომელთაც სულ ვუყურებ, მაინტერესებს, ისინი რას უწევენ რეკომენდაციას. დღეს მხოლოდ სარეკლამო ბანერს ან ვიდეო რგოლს აღარ ენდობიან. მათ შორის არც მე. ჩემთვის უფრო მნიშვნელოვანია, ჩემი საყვარელი ვლოგერების პირად გამოცდილებაზე დაყრდნობით მივიღო ინფორმაცია ამა თუ იმ პროცედურაზე. ზუსტად ვიცი, ხშირ შემთხვევაში ის ადამიანი რეკლამას უწევს კონკრეტულ ბრენდს, მაგრამ ამ შემთხვევაში ეს მე არ მაღიზიანებს, რადგან სხვა გზით ვერ გავიგებდი იმ პროდუქტის არსებობის შესახებ და რაც მთავარია, ვუსმენ და ვუყურებ ცოცხალ მიმოხილვას და არა მხოლოდ დაწერილ შეფასებას. გარდა ამისა, არსებობს ბევრი სანდო და ძალიან საინტერესო საიტი, თუნდაც ცნობილი ბრენდების შექმნილი, სადაც უამრავ ინფორმაციას ვიღებ თავის მოვლის ახალ და ეფექტურ საშუალებებზე.

- გამოცდილების გათვალიწინებით, ყველაზე ეფექტური რომელი პროცედურა აღმოჩნდა და რა რეკომენდაციას გაუწევდით „ბომონდის“ მკითხველს?

- „ბომონდის“ მკითხველსაც და ჩემს მაყურებელსაც პირველ რიგში ვეუბნები შემდეგს: რაც ჩემთვის არის ეფექტური, შეიძლება თქვენ არ მოგიხდეთ. თავის მოვლაში მთავარია გრძნობდე შენს ორგანიზმს და ზუსტად იცოდე, რა მოქმედებს კარგად და რა ცუდად. შეიძლება ზუსტად ერთნაირი ტიპის კანს ერთი და იგივე პროცედურა არ მოუხდეს, რადგან შეიცავდეს ისეთ ინგრედიენტს, რაც მას არ უხდება. ყველაფერი არის დაკვირვება და შემდეგ დასკვნების გამოტანა. მე ამ შემთხვევაში მაქვს სანდო წყაროს ფუნქცია, რომ მოგაწოდოთ სწორი ინფორმაცია. მაგალითად, ამ ბოლო დროს ალგინატის ნიღბით ვარ აღფრთოვანებული და სიამოვნებით გავუზიარებ თქვენს მკითხველს. ეს ძალიან საინტერესო პროცედურაა, რომელსაც „ლიფერენთის’’ სპაში ვიკეთებ. ყველაფერი იწყება მასაჟით. წარმოიდგინეთ, სხვეულზე პროფესიონალი მასაჟისტი გიკეთებთ მასაჟს და ასრულებს სახეზე ალგინატის ნიღბით, რაც ხელს უწყობს ფორების წმენდას, შევიწროებას და სახის კანის მოხვეწას. ეფექტი აქვს მომენტალური და მე ძალიან კმაყოფილი ვარ. ახლა სამოგზაუროდ წასვლის წინ კიდევ ერთხელ უნდა გავიკეთო - ჯერ ტანის სკრაბ-მასაჟი, რომელიც რუჯისთვის მომიმზადებს კანს და შემდეგ ალგინატის ნიღაბი სახეზე. ჩემი კანი იდეალურად იქნება შემზადებული საზღვაო დასვენებისთვის.

- ალბათ ზედმეტი იქნებოდა კითხვა, თუ როგორ უვლით თავს, მაგრამ მაინც... თავად როგორ იყენებთ სილამაზის საშუალებებს?

- მე ასეთი პრინციპი მაქვს: როდესაც ახალ პროდუქტს აღმოვაჩენ, იმაზე ვაკეთებ აქცენტს და თავის მოვლის დროს მეორე და მესამე ახალ პროდუქტს არ ვიყენებ. ჯერ ვაკვირდები, ის ერთი როგორ იმოქმედებს ჩემს კანზე. რადგან თუ ერთზე მეტი ახალი პროდუქტის დატესტვას ერთდროულად დავიწყებთ, ვერ მივხვდებით, რომელი მოქმედებს ჩვენზე კარგად. ამჯერად ჩემი სახის კანის მოვლის რუტინა ასეთია: დილით: Drunk Elephant-ის სახის დასაბანი გელი, Avene-ის თერმული წყალი, Caudalie-ს გლიკოლის ესენცია, რომელსაც გათეთრების ფუნქცია აქვს, The Ordinary-ს ნიაცინამიდი, რომელსაც მრავალჯერადი ფუნქცია აქვს და თითქმის ყველა ტიპის კანს უხდება, შემდეგ Shiseido-ს დღის კრემი SPF 20 -ით და ბოლოს, რა თქმა უნდა, მზის დამცავი. ამ ბოლო დროს Institute Esthederm-ის მზის დამცავზე ვარ შეყვარებული, რომელიც საერთოდ არ მიცხიმიანებს კანს, მსუბუქი და ეფექტურია. რაც შეეხება ღამის რუტინას - პირველ რიგში თუ მაკიაჟი მაქვს, ვიშორებ Avene-ის მიცერალური წყლით, მაგრამ ეს რა თქმა უნდა საკმარისი არაა და კიდევ ერთ დასაბან გელს ვიყენებ ამ შემთხვევაში ჩემს კანს ძალიან უხდება Murad-ის გელი A, E და C ვიტამინებით, რომელიც მომენტალურად ატენიანებს ჩემს კანს, შემდეგ კვლავ Caudalie ესენცია, შემდეგ Mizon-ის პეპტიდების შრატი, ბოლოს კი ამ ყველაფერს „ვბლოკავ’’ Caudalie-ს ღამის საცხით, რომელიც გლიკოლის მჟავას შეიცავს და სახის კანიდან პიგმენტური ლაქების აქერცვლას უზრუნველყოფს. გარდა ამისა კვირაში ორჯერ ან სამჯერ ვიკეთებ ნიღბებს, როგორც ნაჭრის, ისე ღამით დასატოვებლებს. და აუცილებლად უნდა შევახსენო „ბომონდის“ მკითხველს თავის მოვლის უფასო მეთოდი - ბევრი წყალი. დღეში 2 ლიტრი წყლის მიღება აუცილებლად მოუხდება თქვენს კანს.

- ალბათ აქტიურად ეცნობით მსოფლიოში ახლად გამოჩენილ ეფექტურ საშუალებებს. რა ითვლება ტრენდულად?

- საერთოდ, სანამ კონკრეტულად რაიმე პროდუქტს დავასახელებ, აუცილებლად უნდა ვახსენო, რომ დღეს მთელს მსოფლიოში ტრენდულია ჯანსაღი ცხოვრება - ჯანსაღი კვება, ვარჯიში და გარემოზე ზრუნვა. მაგალითად, ბიუთი ბლოგერების მექად წოდებულ კალიფორნიის მაგალითზე მოგიყვებით. ამ შტატში 2020 წლიდან საერთოდ დაუშვებელი ხდება ცხოველებზე გატესტილი სილამაზის პროდუქტების გაყიდვა. სიგარეტი უბრალოდ not cool არის და ვარჯიში - აუცილებელი. კალიფორნიაშივე, დილას ხალხი ყავის მაგივრად ნიახურის ახალდაწურული წვენით იწყებს, რომელიც ერთ-ერთ ყველაზე სასარგებლო სასმელად ითვლება. რა თქმა უნდა, არ ვამბობ, რომ ყველამ ასე ერთხმად უარყო ყავა და გადავიდნენ მწვანე სასმელზე. უბრალოდ ეს მიმართულებაა დღეს იქ ტრენდული და ინფლუენსერებიც აქტიურად მოუწოდებენ გამომწერებს, იცხოვრონ ჯანსაღად. რაც შეეხება მაკიაჟს. დღეს ძალიან მოდურია no makeup look ანუ უმაკიაჟო მაკიაჟი. აქცენტირებულია ჯანსაღი კანი ე.წ. Glass skin და ბუნებრიობა. საქართველოში დღემდე პოპულარული მეთოდი - თვალის ჩრდილების გარე კუთხეებში უფრო ჩამუქება და შიგნით ნათელი ფერები, დიდი ხანია წარსულს ჩაბარდა და თვალზე ერთი ტონის ჩრდილს ანიჭებენ უპირატესობას. მოდაშია წითელი, ნარინჯისფერი ჩრდილები. თავის მოვლაში კი მთავარ საფხეურებს - სახის დაბანას და დატენიანებას, ქიმიური აქერცვლა და მზისგან დაცვაც შეემატა. ქიმიური ამქერცლავებია ისეთი პროდუქტები, რომლებიც სხვადასხვა მჟავებს შეიცავენ და კანს აშორებენ მკვდარ უჯრედებს, წმენდენ ფორებს და ამცირებენ წვრილ ნაოჭებს. სიტყვა „ქიმიურმა“ არ უნდა შეგაშინოთ, ფიზიკურ ამქერცლავებს (სკრაბები, გრანულებიანი დასაბანი გელები) დღეს ბევრი ამჯობინებს ქიმიურებს, რაც კანს ნაკლებად აზიანებს. მზისგან დამცავი კი ალბათ ბოლო წლებში ერთ-ერთი ყველაზე ხშირად მოძიებადი პროდუქტია ინტერნეტსივრცეში, რადგან მთელი მსოფლიო თანხმდება, რომ კანის დაბერების ერთ-ერთი ძირითადი მიზეზი ულტრაიისფერი რადიაციაა. ამიტომ ამ პროდუქტის გამოყენება მხოლოდ გარუჯვისას კი არა, ყოველდღიურად არის აუცილებელი. ის შეამცირებს თქვენს კანზე პიგმენტური ლაქებისა და ნაოჭების გაჩენას.

- მოგზაურობა თუ გიყვართ და გეხმარებათ სიახლეების მოძიებაში?

- რა თქმა უნდა. მოგზაურობისას ხომ ახალ კულტურას ეცნობი, ახალ ხალხს, სამზარეულოს, ცხოვრების სტილს - უშრეტი შთაგონების წყაროა. ყოველი ახალი ქვეყნის მონახულება პატარა კვალს ტოვებს ჩემს სტილზე, გემოვნებაზე. წელს მეგობრებთან ერთად მივდივარ იტალიაში, ლიგურიაზე. ეს არის ჩრდილო-დასავლეთ სანაპირო. ჩამოსვლისას აუცილებლად ავტვირთავ ვიდეოს ჩვენი მოგზაურობის შესახებ და გაჩვენებთ, რა ადგილებმა დატოვა ჩემზე შთაბეჭდილება.

- როგორია თქვენი საქმიანი დღე?

- კვირაში სამი დღე, დილის 10 საათზე რიტუალურად დავდივარ იოგაზე და ვიღებ სპა პროცედურებს. ეს რეჟიმი მაქვს ბოლო 7 თვეა და სულ 3 თუ 4-ჯერ მაქვს გაცდენილი იოგას გაკვეთილი. ძალიან მსიამოვნებს ვარჯიშის ნელი და მშვიდი მეთოდი და გარდა სხეულის სიჯანსაღისა, სულიერადაც ვმშვიდდები და ბედნიერი ვაგრძელებ დღეს. თითქმის ყოველ მეორე დღეს იუთუბისთვის მაქვს გადაღება. ვიდეოებს მე თვითონ ვამონტაჟებ და შესაბამისად კვირაში 3-4 დღე მონტაჟს მიაქვს. უფრო ხშირად კვირაობით ვამონტაჟებ ხოლმე და თუ ამ დროს მეგობრები მირეკავენ და სადმე გასასვლელად მეპატიჟებიან, უარს ვეუბნები. მერე წუწუნებენ, რომ მათთვის დრო აღარ მრჩება. ტექნიკური დეტალების გარდა, ჩემს საქმიანობაში პირად შეტყობინებებზე პასუხიც აუცილებელია. როცა ამდენი ადამიანი მადევნებს თვალს, ჩემი მოვალეობაა, მათ კითხვებს ვუპასუხო იუთუბზეც და ინსტაგრამზეც. ამას არც თუ ისე ცოტა დრო მიაქვს, მაგრამ ჩემთვის ერთ-ერთი ყველაზე სასიამოვნო პროცესია ჩემს გამომწერებთან უშუალო კონტაქტი.

ბოლო დროს, ჩემი ვლოგის გარდა, ჩემს ყოველდღიურ საქმიანობას ოფისური სამსახურიც დაემატა. ეს ძალიან საინტერესო ისტორიაა. რამდენიმე თვის წინ ჩემს იუთუბზე ავტვირთე სამსახურის მაკიაჟის ვიდეო. მაშინ ვახსენე, რომ მე არ მაქვს ოფისური სამსახური და გადაღებაზე იმდენად მომეწონა გარემო, რომ მომინდა კიდევაც ოფისში მუშაობა. და ზუსტად ამ ვიდეოს ატვირთვიდან რამდენიმე დღეში საავტორო უფლებების ახალ ასოციაციაში GERA შემომთავაზეს PR და კომუნიკაციების გუნდში მუშაობა. შემოთავაზებები მანამდეც მქონია, მაგრამ მე არ დავთანხმებულვარ, რადგან ჩემთვის პრიორიტეტი მაინც ჩემი ვლოგია და პირობები არ მაკმაყოფილებდა. ახალ სამსახურში კი არავინ მიკრძალავს ვლოგერობას და პირიქით, ყველანაირად ხელს მიწყობენ ამ საქმიანობაში. GERA-ს გუნდი სულ რამდენიმე ადამიანისგან შედგება და მათთან ერთად საქმის კეთება ძალიან მსიამოვნებს. თან ჩემს საქმიანობაში ხელოვანებთან კომუნიკაციაც შედის, რასაც ტელევიზიაში მუშაობის დროსაც სიამოვნებით ვაკეთებდი, რადგან ძირითადად კულტურის სფეროში ვმუშაობდი. სწორედ მათ უფლებებს იცავს ჩვენი ასოციაცია თანამედროვე ტექნოლოგიებს დახმარებით.

- როგორია თქვენი საქმიანი სტილი?

- ამ თემატიკაზე უკვე ორი ვიდეო მაქვს ატვირთული. მალე ავტვირთავ მესამესაც. პირველი ორი შეეხებოდა წითელ ტუჩსაცხს და უმაკიაჟო მაკიაჟს. მესამე იქნება ლაინერის მაკიაჟი. ეს სამი ვერსია არის ჩემთვის იდეალური საქმიანი ლუქი ნებისმიერი ქალბატონისთვის. რაც შეეხება ჩაცმულობას, ძალიან მიყვარს სხვადასხვა ფერის პერანგები, რომლებსაც მუხლებამდე ქვედა კაბებს და ჯინსებს ვუხამებ.

- როგორ სტილს ანიჭებთ უპირატესობას?

- ჩემი სტილია ეგრეთ წოდებული smart casual ანუ ელეგანტურისა და კომფორტულის შერწყმა, როცა ჩაცმულობა არ არის ზედმეტად გაშალაშინებული და უფრო თავისუფალია. ზოგადად, ბუნებრიობას და თავისუფალ სტილს ვანიჭებ უპირატესობას, არ მიყვარს 2 საათის გატარება სარკის წინ და გადამეტებული მონდომება, რომ კარგად გამოვიყურებოდე.

- თქვენი საყვარელი ლუქი?

- ზაფხულში მიყვარს ბუნებრივად გამშრალი ტალღოვანი თმა, მინიმალური მაკიაჟი, რომლის ფონად ჯანსაღი კანის ბზინვარება გამოსჭვივის, ჩემი საყვარელი ოქროს ყელსაბამი მშვილდოსნის მედალიონით, თეთრი მაისური, ჯინსები, დაბალქუსლიანი სანდლები და კალათა-ჩანთა. ამ ყველაფერს კი უნდა მოჰყვებოდეს ჩემი საყვარელი ტანის ლოსიონის სურნელი ნაზი არომატით. ცხელ დღეებში სუნამოს სიმძაფრესთან არ ვგრძნობ თავს კომფორტულად.



- სამოსი, რომელსაც ვერ ელევით და გარდერობში ყოველთვის აქვს თავისი ადგილი?

- ტყავის ქვედა კაბა და ტყავის ქურთუკი. ასევე ე.წ. ბოტფორტები ანუ მუხლს ზემოთ ჩექმები. აი, ასეთ „ბაიკერულ“ სტილს ალბათ ვერასდროს შეველევი, ძალიან მიყვარს, ოღონდ რა თქმა უნდა, ყოველდღიურად არა.

- დიეტას თუ მიმართავთ?

- დიეტაზე არასდროს ვყოფილვარ. ფორმაში ყოფნის უმარტივესი ფორმულა მაქვს - არ უნდა ვჭამო 7-ის მერე და დავაბალანსო კვება. თუ ერთ დღეს შევჭამ პიცას, მომდევნო 2-3 კვირის განმავლობაში აღარ უნდა გავეკარო. იგივეს ვიტყოდი ტკბილეულზეც. ოღონდ ამ შემთხვევაში 2 კვირა ძალიან ბევრია, აქ დოზები უნდა ვაკონტროლო. ასევე არ ვსვამ ტკბილ გაზიან სასმელებს, არ დავდივარ სწრაფი კვების ობიექტებში და დიდი დოზებით ვიღებ ბოსტნეულსა და ხილს, თითქმის ყოველდღე. ასევე მჯერა, რომ ფორმაში ყოფნისთვის კვებასთან ერთად აუცილებელია ვარჯიში.

- თქვენი საყვარელი სამზარეულო?

- ჩემთვის ნებისმიერი ქვეყნის სამზარეულო არის საყვარელი თუ სასიამოვნო გარემოში, ლამაზად იქნება მორთმეული სუფრაზე. ესთეტიკურ მხარეს და გემოვნურ თვისებებს 50/50- ზე გავანაწილებდი.

- საყვარელი სუნამო...

- ცხოვრებაში არ მიყიდია ერთი და იგივე სუნამო ორჯერ. ადვილად მბეზრდება და მიყვარს ხშირად ცვლა. ამჯერად მომწონს Maison Francis Kurkjdian-ის Petit Matin. თუმცა, როგორც გითხარით, ზაფხულში სუნამოს იშვიათად ვიყენებ.

ბოლოს „ბომონდის“ მკითხველს და ჩემი არხის მაყურებელს გავახსენებდი ფერუმარილის დედოფლის, 30-იანების ყველაზე წარმატებული კოსმეტიკური იმპერიის შემქმნელის, ელენა რუბინშტეინის სიტყვებს - „არ არსებობენ მახინჯი ქალები, არსებობენ მხოლოდ ზარმაცები“. დავამატებდი... სხვათა შორის, ელენა ცოლად მოიყვანა ქართველმა თავადმა არჩილ გურიელი-ჭყონიამ, რომელიც მასზე 25 წლით უმცროსი იყო.


ქეთი დარჩია





like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.