მატილდა გვარლიანი : როცა ჩვენებებს ტელევიზიით ვადევნებდი თვალს, ვიძახდი, მოდელი უნდა გამოვიდე-მეთქი, დედას კი ეცინებოდა...

მოდის ინდუსტრიაში, ქართველ დიზაინერებთან ერთად, კიდევ უფრო გაიზარდა ქართველ მოდელ გოგონებზე მოთხოვნა, ისინი სულ უფრო ხშირად ჩნდებიან ცნობილი ბრენდებისა და დიზაინერების შოუებში. საოცრად მომხიბვლელი მატილდა გვარლიანი ჯერ მხოლოდ 16 წლისაა.

Christmas Sale Price Nike Shoes

 

მატილდა გვარლიანი

- მაღალი მოდის პოდიუმიდან

 

ერთ დროს ტელევიზიით ნანახი ჩვენებები, რომელში მონაწილეობაზეც ოცნებობდა, მის საქმიანობად იქცა -მილანის მოდის კვირეულზე D&G კოლექცია წარმოადგინა, მონაწილეობა მიიღო ცნობილი ბრენდების ფოტოსესიებში.



მატილდა:


-14 წლის ვიყავი, როცა სააგენტო Look Models-ში მივედი. მოდელობაზე

ბავშვობიდან ვოცნებობდი. როცა ჩვენებებს ტელევიზიით ვადევნებდი თვალს, ვიძახდი, მოდელი უნდა გამოვიდე-მეთქი, დედას კი ეცინებოდა: მოდელობა თუ გინდა, ბევრი უნდა იშრომოო. მეც მზად ვიყავი შრომისთვის, მაგრამ მაშინ ვერ წარმომედგინა, რამხელა ძალისმევას უკავშირდებოდა ეს პროფესია. ამ სფეროში ყველაზე დიდი სირთულე თავდაჯერებულობას უკავშირდება. ეს ფსიქოლოგიური ტრენინგია -საკუთარი თავი უნდა დაარწმუნო, რომ გადაულახავი არაფერია. მერე რა, რომ შენი კონკურენტები ულამაზესი გოგონები არიან. თუ ამას ვერ დაძლევ, ქასთინგზე გასვლას აზრი არ აქვს. მე კი ქასთინგებზე ყოველთვის გავდიოდი და ეს შიში არასდროს მიგრძნია. ქასთინგამდე უფრო მახასიათებდა ღელვა, რომელიც მაშინვე ქრებოდა, როცა ფაქტის წინაშე ვდგებოდი. ვხდებოდი გაცილებით მობილიზებული და თავდაჯერებული.


-გაქვს საზღვარგარეთ მუშაობის გამოცდილება, როგორ გახსენდება ეს პერიოდი?


-ეს გამოცდილება სულ ახლახანს მივიღე, როცა მილანის მოდის კვირეულზე გამოვედი. ყოველდღიურად დაძაბულ გრაფიკში მიწევდა მუშაობა, თან ზაფხული იყო, ცხელოდა და საზოგადოებრივი ტრანსპორტით გადაადგილება დამქანცველი აღმოჩნდა ჩემთვის. მილანში ჩემი მეორე ვიზიტი იყო, მოდის კვირეულისთვის ჩავედი. სრულიად მარტო ვიყავი უცხო ქალაქში, ნაცნობი არავინ მყავდა. უცხო გარემოსთან შეგუება მაინც რთულია, თან შეიძლება დღეში ხუთჯერ გამოეცვალათ ლოკაცია. ყოველდღიურად უცხო ადამიანებთან მიწევდა კონტაქტი. ამ პირობებში თავის დამკვიდრებასაც ვცდილობდი. ძალიან დამეხმარა ჩემი სააგენტო თბილისიდან და ნინო ცქიტიშვილი. მილანის სააგენტომაც ოჯახის წევრივით მიმიღო. ითვალისწინებდნენ ჩემს ასაკს და ხშირად რჩევებს მაძლევდნენ. მოკლედ, ყველაფერმა კარგად ჩაიარა და მიზანს ყველამ ერთობლივად მივაღწიეთ.


-მილანში, ქასთინგზე რა მოთხოვნები აქვთ გოგოების მიმართ, როგორ ირჩევენ მოდელებს?


-ყველაზე საინტერესო მომენტია. საკუთარი თავის წარმოსაჩენად მოდელს დაახლოებით 14 წამი აქვს. შედიხარ ქასთინგზე, ესალმები სააგენტოს წარმომადგენლებს, ეუბნები ასაკს, სახელს და ამ მცირე მონაკვეთში უნდა მოახერხო, რომ საკუთარი შინაგანი სამყარო აჩვენო მათ. საკმაოდ რთულია, მაგრამ მე მესმის მათი... უნახავთ სხვადასხვა ქვეყნიდან ჩასული ულამაზესი გოგონები, მათ შორის იდეალური გარეგნობის და ეძებენ რაღაც სხვას -განსაკუთრებულს, გემორჩეულს. ალბათ უფრო ინდივიდუალიზმს. ვერ აგიხსნით, როგორ წარმოვაჩინე თავი, ან განსაკუთრებული რა დაინახეს ჩემში, რომ ამიყვანეს. ჩემმა სააგენტომ თავიდანვე გამაფრთხილა, რომ ვყოფილიყავი ბუნებრივი და არავისთვის მიმებაძა. მეც შევეცადე მაქსიმალურად შემენარჩუნებინა ინდივიდუალიზმი.

 

 

 


-მატილდა, როგორ ფიქრობთ, როგორ განვითარდა სამოდელო ბიზნესი, როგორი გოგონები გახდნენ ტრენდული?


-ამ მხრივ მოდის ინდუსტრია შეიცვალა. გაცილებით დიდ როლს თამაშობს ინდივიდუალიზმი. პარამეტრებსაც არ აქცევენ გადამწყვეტ ყურადღებას, სტანდარტები შეიცვალა. არიან დიზაინერები, რომლებსაც ძალიან მაღალი და გამხდარი გოგონები აღარ აჰყავთ და ცოტა სხვა ღირებულებებს აქცევენ ყურადღებას. ამ მხრივ საინტერესო არჩევანი ჰქონდა "გუჩის" მოდის სახლს, სომხური წარმოშობის გოგონა რომ წამოწია წინა პლანზე. ამ შემთხვევაში ყურადღება მიექცა როგორც შინაგან სამყაროს, ისე მის ინდივიდუალურ გარეგნობას. ამ მოდელს მარტივად დასამახსოვრებელი გარეგნობა აქვს. "გუჩის" და "დიორის" ჩვენებებზე უამრავი მოდელი გამოდის, ხშირად მათ სახეებსაც ვერავინ იმახსოვრებს, არც სახელები იცის ვინმემ. ამ მოდელის სახე კი ყველამ შეამჩნია და დაიმახსოვრა, საზოგადოების მსჯელობის საგნადაც კი იქცა. "გუჩის" მოდის სახლს ახასიათებს ასეთი მიდგომა ირჩევს არაორდინარული გარეგნობის გოგონებს. თუ დაკვირვებიხართ, არც "მარჯიელა" და "ბალენსიაგა" ირჩევს ლამაზი გარეგნობის, თოჯინებივით გოგონებს. ეს მიგდომა ძალიან მომწონს.

 


-ეს დამოკიდებულება ხომ არ არის მცდელობა, რომ შეიცვალოს საზოგადოებრივი აზრი -უხეშად რომ ვთქვათ, მოდელები ტანსაცმლის "საკიდები" არ არიან?


-ნამდვილად ასეა. თავად არასდროს მიგრძნია მსგავსი დამოკიდებულება, მაგრამ შემხვედრიან მოდელები, რომლებსაც გადაღებაზეც კი სწორედ "საკიდებად" აღიქვამდნენ, უხეშად ექცეოდნენ. ხშირად არა, მაგრამ ეს ერთეული შემთხვევებიც ცუდად აისახება მოდელ გოგონებზე.


-თავად რომელ გადაღებას გაიხსენებდით, რომელი იყო გამორჩეული?


-რომელიმეს ვერ გამოვარჩევ, რადგან ყველა გადაღება განსხვავებულია და ჩემთვის საინტერესო. როცა გადაღებაზე მივდივარ, ლოკაციაზე დაახლოებით 10 წუთი ერთ ადგილას ვჯდები და სიტუაციას ვსწავლობ. იმ პერსონალსაც ვაკვირდები, ვინც გადაღებებზეა. მათი ერთმანეთის მიმართ დამოკიდებულებაც მაინტერესებს. ამის შემდეგ უფრო მიადვილდება ადაპტაცია. მეხმარება ისიც, რომ ფსიქოლოგიურზე ვსწავლობ და ადამიანებთან ურთიერთობა ჩემთვის საინტერესოა.


-ფსიქოლოგიით როდის დაინტერესდით?


-ვფიქრობ, რომ ფსიქოლოგიაზე და ადამიანის გონებაზე საინტერესო არაფერია. გასნაკუთრებით ჩემს შემთხვევაში, როცა ყოველდღიურად სხვადასხვა უცხო ადამიანთან მიწევს კონტაქტი. დავიწყე ასევე ბოდილენგვიჯის შესწავლაც, ესეც ადამიანების ამოცნობაში მეხმარება. არ ვიცი, ეს სფერო როდის აღმოვაჩინე. ალბათ ადრეულ ასაკში, როცა შემიყვარდა ადამიანებზე დაკვირვება, მათი რეაქციების შესწავლა. სიტუაციების პროვოცირებასაც კი მივმართავდი და რეაქციებს ვაკვირდებოდი, ჩანაწერებიც მქონდა. ბოდილენგვიჯი საინტერესო მიმართულებაა. შეიძლება ერთს გეუბნებოდეს ადამიანი, მაგრამ მისი მიმიკა, სხეული სულ სხვა რამეს გამოხატავდეს.

-რაც დაგეხმარება თუ ხელს შეგიშლის?


-ხანდახან ვცდილობ, "გამოვრთო" ის ხედვა, რომელიც სხეულის ენას აღიქვამს, მაგრამ მარტივი არ არის. შეიძლება იმიტომ, რომ დიდ დროს ვუთმობ ამ სფეროს. იყო პერიოდი, როცა მხოლოდ ეს მაინტერესებდა და ამაზე ვიყავი კონცენტრირებული. რასაკვირველია, არის მომენტები, როცა ხელს მიშლის. განსაკუთრებით მაშინ, როცა ადამიანის გულწრფელობაში ეჭვი მეპარება. ხომ შეიძლება ვცდებოდე? ბოდილენგვიჯი ხომ არ არის ზუსტი მეცნიერება? მაგრამ 90%-ით არასდროს შევმცდარვარ.


-ისევ სამოდელო სფეროს დავუბრუნდეთ. როგორ წარიმართა მილანის მოდის კვირეული, რა ხდებოდა მის ბექსთეიჯში?


-მილანში თვეზე მეტი გავატარე. პირველი ვიზიტიც საინტერესო აღმოჩნდა, რომელსაც უფრო გაცნობის ხასიათი ჰქონდა, ვითანამშრომლე რამდენიმე ბრენდთან. ბოლო ვიზიტი გაცილებით ნაყოფიერი აღმოჩნდა. გადამიღო "DIESEL",  გამოვედი "DOLCE & GABANNA"-ს ჩვენებაზე. მილანის მოდის კვირეულმა შესანიშნავად ჩაიარა. რაც შეეხება ბექსთეიჯს -იქ საოცრება ხდება, შოკში ვიყავი. საქართველოშიც ვარ შეჩვეული ბექსთეიჯს, მაგრამ მილანის მოდის კვირეული განსაკუთრებული აღმოჩნდა. საოცრად მობილიზებულია ყველა. მაგალითად, D&G-ზე მხოლოდ 10 მოდელს ჰქონდა თმაში ჩამაგრებული ყვავილი. მე არა და რაღაც რომ არ გამორჩენოდათ, ჩვენებამდე 10-ჯერ მაინც მკითხეს, მქონდა თუ არა ჩამაგრებული.

 

 


-თავად რომელი კოლექცია მოგეწონა?


-ყველაფერი მომწონს, რასაც ვირგებ ხოლმე. რაც უნდა სხვადასხვა სტილი იყოს, ვცდილობ, თავი კომფორტულად ვიგრძნო. ჩვენებაზე არ უნდა მეტყობოდეს, რომ სამოსის ტარების დროს დისკომფორტს განვიცდი.


-გარდამტეხი ეტაპი რომელი აღმოჩნდა თქვენს საქმიანობაში?


-გარდამტეხი იყო ალბათ მილანში ბოლო ვიზიტი -გამოვედი მოდის კვირეულზე, შევხვდი ბევრ ტოპ-მოდელს, თვალი ვადევნე მათ მუშაობას, ვნახე ნატალია სუპრიანოვა.


-სხვა მოდელებისგან განსხვავებით, ტოპ-მოდელები მხოლოდ იდეალური გარეგნობითა და პროფესიონალიზმით იქცევენ ყურადღებას?


-განსხვავდებიან იმით, რომ ძალიან ლამაზები არიან, რაც მათ ფიზიკურ მონაცემებს არ გულისხმობს. მათი თვალებიდან მოდის რაღაც სხვა სხივი, ენერგია, ყველაფერი განსაკუთრებული აქვთ. შეუძლებელია, არ მოიხიბლო ამ გოგონებით.


-მილანის შემდეგ პარიზში გამგზავრებას ხომ არ გეგმავთ?


-პარიზში მუშაობაზეც ვფიქრობ, თუმცა ჯერ არასრულწლოვანი ვარ, რაც ხელს მიშლის. ახლო მომავალში აუცილებლად ვეწვევი ამ ქალაქს. ამ ეტაპზე მილანშიც საინტერესო შემოთავაზებები მაქვს.



-როცა წვეულებაზე მიდიხართ, როგორ სტილს ირჩევთ?


-ეს ის შემთხვევაა, როცა გარეგნობას დიდ ყურადღებას ვუთმობ, კარგად უნდა გამოვიყურებოდე. არ მომწონს დიდი ყვავილებით დაპრინტული და ზედმეტად დატვირთული კაბების ტარება. მიყვარს ატლასის ქსოვილი და სადა კაბები. უპირატესობას კი მკვეთრ ფერებს ვანიჭებ. ტანსაცმელზე ფიქრი ახლა დამაწყებინეთ. ახლა ჩავუფიქრდი თურმე რას ვიცვამ.


-სპორტი... დიეტა...


-დიეტას იშვიათად ვიცავ. დიეტას არა, უფრო ბალანსირებულ კვებას დავარქმევდი. უარს ვამბობ ცომეულზე, შემწვარსა და ტკბილეულზე. კარდიოსპორტს მივდევ -დავრბივარ. ამასაც ინტენსიური სახე არ აქვს, რადგან საზღვარგარეთ გამგზავრება ხშირად მიწევს.


-როგორ უვლით სახის კანს, განსაკუთრებით მოდის კვირეულების შემდეგ?


-განსაკუთრებულს არაფერს ვაკეთებ. ყოველდღიურ რუტინას მივმართავ, რომ სახე დატენიანებული მქონდეს. ვიყენებ, ძირითადად, ბავშვის კრემებს. მშრალი კანი მაქვს და მოდის კვირეულების შემდეგ უფრო მიშრება, რადგან თითქმის ყველა ტონალური თუ მაკიაჟის მოსაცილებელი საშუალება სპირტს შეიცავს.


-და ბოლოს, მატილდა, რა მიღწევით იამაყებთ მოდის ინდუსტრიაში?


-ადრე ძალიან მინდოდა, VICTORIA'S SECRET-ის გოგონა ვყოფილიყავი. ამ ბრენდის ბოლო ჩვენებებმა ეს სურვილი გამინელა, წელს განსაკუთრებით ამიცრუვდა გული. რაღაც კონკრეტული ოცნებები და გეგმები არ მაქვს, ჩემთვის მთავარი მაღალ მოდაში თავის დამკვიდრებაა.

like
3

კომენტარები

ნათია
ულამაზესია
2020-01-17 05:38
გივი-ს 2
დავი გივის. ძაან ლამაზი ბავშვია, იშვიათი
2020-01-16 09:45
გივი-ს
შე .ლეო შენა!
2020-01-15 08:07
გივი
კბილები დაუნის სინდრომისა
2020-01-14 19:46
ლამურენდ
წარმატებები, მშვენიერი გოგონაა
2020-01-14 16:13

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.