Erdem-ი მოდური ტანსაცმლის ბრიტანული ბრენდია. სახელი მარკას დამაარსებლის პატივსაცემად ეწოდა.



ბრენდი ერდემ მორალიოღლუმ 2005 წელს დააფუძნა და პირველივე ჩვენებიდან მიიპყრო პუბლიკის ყურადღება, დიდი მოწონება და კრიტიკოსების ქება დაიმსახურა. დიზაინერის პირველი კოლექცია ქალებს მიეძღვნა. მოდელები პოდიუმზე უზადოდ და რომანტიკულად გამოიყურებოდნენ, რამაც მაყურებელში დადებითი ემოციები გამოიწვია. გოგონები, რომლებიც ერდემის ტანსაცმლის დემონსტრირებას ახდენდნენ, განსაკუთრებულად ქალურები იყვნენ.

ერდემ მორალიოღლუ დაიბადა კანადაში, მონრეალთან ახლოს, სადაც ბავშვობა გაატარა. დედამისი ინგლისელია, მამა კი - თურქი. ერდემი მოდას, როგორც ხელოვნებას, კანადასა და დიდ ბრიტანეთში, სამეფო აკადემიის კოლეჯში სწავლობდა.



სკოლის დამთავრების შემდეგ, ტორონტოში რეიერსონის უნივერსიტეტში ჩააბარა, 2000 წელს კი ლონდონში გადასახლდა, რათა ვივიენ ვესტვუდის სახელოსნოში სტაჟირება გაევლო.
სამი წლის შემდეგ ერდემმა მაგისტრის ხარისხი მიიღო ქალის სამოსის პროექტირებისა და კერვის სფეროში.

ნიუ-იორკშიც გაემგზავრა, სადაც დიანა ფონ ფიურსტენბერგის ასისტენტად მუშაობდა. დაბრუნდა თუ არა ლონდონში, აქტიურად შეუდგა საკუთარი სავაჭრო მარკის ჩამოყალიბებას.
პირველი დამსახურებული ჯილდოს მიღების შემდეგ ლონდონის ოთხ მოდის კვირეულში მიიღო მონაწილეობა, 2007 წელს კი სვაროვსკის ბრიტანული მოდის პრემიით დაჯილდოვდა. 2009 წელს, ბრიტანული პორტალის გამოკითხვით, საუკეთესო ჩვენებების ათეულში ღირსეულად შევიდა.



როგორც მოდელიერი ამბობს, მისი შთაგონების წყარო სამი ცნობილი დიზაინერია - ივ სენ-ლორანი, მეინ ბოკერი და ჩარლს ჯეიმსი.
პირველი, რასაც ერდემის კოლექციებში ადამიანი ყურადღებას აქცევს, ქსოვილების ფერთა გამაა. ყვავილებით დახატული მოკრძალებული სილუეტი მარკის სავიზიტო ბარათია.

ერდემმა შემოიტანა მოდაში მაქმანები, ვიქტორიანული რუშები, ბრწყინვალე ფრანგული შიფონი და აბრეშუმი. მის კლიენტებს შორის არიან საყოველთაოდ ცნობილი პერსონები: კირა ნაიტლი, სიენა მილერი, მიშელ ობამა, კირსტენ დანსტი, ელ მაკფერსონი, კლაუდია შიფერი, კეიტ მიდლტონი და სხვები.



უნიკალური ქსოვილები - ეს არის ის, რაც ბრენდს სხვა მარკებისგან გამოარჩევს. ერდემ მორალიოღლუ თავად მოიაზრებს და ქმნის ქსოვილებს, ხატავს პრინტებს და ყოველ ფაქტურაში ფანტაზიას აქსოვს. ნაქარგები, ნახატები თუ ნაყშები, რომლებიც მის ქსოვილებზეა გამოყვანილი, ძველებურ ვიტრაჟებსა და ექსპრესიონისტთა ნამუშევრებს მოგაგონებთ. ამიტომ მის კოლექციებში წააწყდებით არ-დეკოსაც, ვინტაჟსაც, რომანტიკულ კლასიკასაც და ფუტურიზმსაც. უყურებ მის კაბებს და თვალწინ კლოდ მონე წარმოგიდგება... მისი ლარნაკები და კიდევ... ვანილის ცა. გეგონება ამ უზომო ფანტაზიის მქონე ადამიანის გონებაში ყველაზე გრძელი ზღაპრის იდეა მომწიფდა, რომელიც არა და არ მთავრდება.

ფერთა მკვეთრი პალიტრა ერდემის ძირითადი სტილია, ასევე - უზადო სილუეტები და ქსოვილთა ხარისხი. ყვავილების სამყარო მისთვის ამოუწურავი შთაგონების წყაროდ იქცა. ბრენდის მთავარ გმირ ქალს იგი მხოლოდ და მხოლოდ ორი სიტყვით ახასიათებს: "უნებლიეთ ლამაზი"და იქვე ამატებს, რომ ასეთი ქალები ჩვეულებრივ, ყვავილებით არ დადიან, გარდა ერდემის ყვავილებისა.



- ჩემი ყვავილები ზედმეტად ტკბილი და დაშაქრული არ არის, მასში წარმოჩნდება გრაფიკულობა და ძალაც კი! - ამბობს მორალიოღლუ.
იგი ინტერნაციონალურ ოჯახში დაიბადა, რამაც ბიძგი მისცა, თავის ნამუშევრებში შეეტანა როგორც აღმოსავლური, ისე დასავლური სამყაროს მოტივები.

- ყოველთვის მაინტერესებდა, როგორ გამოიყურება ქალი სხვადასხვა ქვეყანაში და რას აკეთებს იგი იმისთვის, რომ თავის სილამაზეს ხაზი გაუსვას. მაგალითად, დედაჩემი სენ ლორანის გარდა სხვა პომადას არ იკარებდა, სუნამოს კი მხოლოდ გერლენისას იპკურებდა. ამიტომაცაა, რომ ჩემთვის დღემდე ორივე მარკა ქალურობის კვინტესტენციად რჩება.



კლასიკური ხელოვნება კიდევ ერთი შთაგონების წყაროა მოდელიერისთვის. მის კოლექციებში არცთუ იშვიათად შეგხვდებათ პრერაფაელიტების და იმპრესიონისტების რეფერენსები. აკვარელის მოტივები ყველაზე ხშირად მისი გაზაფხული-ზაფხულის კოლექციებში ჩნდება, ხოლო პირქუში რომანტიკა შემოდგომა-ზამთრის კოლექციებისთვისაა დამახასიათებელი. თუმცა ერდემ მორალიოღლუ ბრმად როდი ციტირებს და მისი სამოსის ცალკეული დეტალები კონტექსტიდან ამოვარდნილი არასდროს არის. ყოველი მისი კოლექცია - ეს არის ცალკე ისტორია, რომელსაც თვითონ თავებად დაყოფილ რომანს უწოდებს, თითოეულ თავს კი Erdem-ი ჰქვია.

ერდემის სიყვარული ყვავილებისადმი მხოლოდ იმით არ შემოიფარგლება, რომ იგი ყვავილებიან ქსოვილებს ქმნის. პრინტის სახით იგი ხელით ნაქარგებს ანიჭებს უპირატესობას, ასევე მაქმანებს და ზემოდან დაკერებულ აპლიკაციებს.



სამშობლოდ ერდემ მორალიოღლუ ბრიტანეთს მიიჩნევს, მიუხედავად იმისა, რომ კანადაში დაიბადა და ნახევრად თურქია. ბრიტანეთსაც არანაკლებ უყვარს ერდემი, ამიტომაც დაიმსახურა მან უამრავი პრემია და ჯილდო. გარდა ამისა, 2014 წელს იგი წლის საუკეთესო დიზაინერადაც დაასახელეს. მანამ კი, 2010 წელს, როგორც ახალგაზრდა წარმატებულ დიზაინერს, `ვოგის~ მოდის ფონდმა ფულადი პრიზი - 200.000 გირვანქა სტერლინგი გადასცა.

ბრენდი გათვლილია ახალგაზრდა, მაგრამ ექსტრავაგანტური გოგონასთვის, რომელიც ცდილობს, ყოველთვის ნაზად და საყვარლად გამოიყურებოდეს. მაგრამ ნიჭიერი დიზაინერის მოდელების უნივერსალურობა იმაში მდგომარეობს, რომ მისი სამოსის ტარება მოწიფულ ქალსაც შეუძლია, მით უფრო, თუ იგი სულის სიღრმეში თავს ახალგაზრდად გრძნობს და ძლიერი სულისკვეთებით გამოირჩევა.



ერდემი - ეს არის ბრენდი, რომელიც ნებისმიერ ქალს დაეხმარება, ყოველთვის უზადოდ გამოიყურებოდეს.

ამჟამად ერდემ მორალიოღლუ ცხოვრობს და მუშაობს ბეტნალ-გრინში, ლონდონის ერთ-ერთ აღმოსავლეთ რაიონში. მკვეთრად გამოყვანილი სილუეტების, სამოსის ნოვატორული ფორმისა და ქსოვილების განსაკუთრებული შეფერილობის ერთობლიობა ბრენდის საოცრად რომანტიკულ და მგრძნობიარე სახეს აჩენს.

სვეტა კვარაცხელია

1993 წელს ოპრა უინფრიმ საკუთარ ინტერვიუში აფროამერიკული წარმოშობის ვარსკვლავს ჰკითხა ითეთრებდა თუ არა კანს. მაიკლ ჯექსონმა უარით უპასუხა: „რატომ არის ეს ასეთი მნიშვნელოვანი. მე ხელოვნების დიდი თაყვანისმცემელი ვარ, ვაღმერთებ მიქელანჯელოს. მასთან საუბრის შანსი რომ მქონოდა, გავესაუბრებოდი იმაზე, თუ რა იყო მისი შთაგონების წყარო და როგორ გახდა ის, ვინც იყო. და არა იმაზე, თუ რატომ გაატარა მზეზე გუშინ ამდენი დრო“. ამ ციტატას იხსენებს Vogue-თან საუბრისას ლონდონის პორტრეტების ეროვნული გალერეის დირექტორი, ნიკოლას კალინენი. მან გასული კვირის ბოლოს Michael Jackson-ის გამოფენა გახსნა: On the Wall , სწორედ ასეთია მისი მიზანიც: „ეს მისი ცხოვრების წესზე წარმოდგენის შეცვლის მცდელობა არ არის. ეს ექსპოზიცია გვაჩვენებს მხატვარ მაიკლ ჯექსონს“.



არ შეიძლება დავივიწყოთ, რომ ჯექსონი მხოლოდ კლდის კრისტალებით ნაქარგ ხელთათმანებს არ ატარებდა და მხოლოდ კალიფორნიაში სკანდალურ რანჩო ნევერლენდს არ ფლობდა. ის შავკანიანი ბიჭი იყო, რომელიც გაიზარდა და საკუთარ რასას გამოეყო, სტანჯავდა კომპლექსები და მარტოობა. „პირადი იდენტურობის ყველა პრობლემა, რაც დღესდღეობით საზოგადოებაში ფართოდ განიხილება, შეიძლება ყველაფერი შევისწავლოთ ამ ადამიანის მაგალითზე“.



მისი თითქმის ნახევარ საუკუნოვანი კარიერის მანძილზე მოპოვებული კოლოსალური გავლენა, გამოფენაზე 100-ზე მეტი ნივთითაა წარმოდგენილი - 40-ზე მეტმა თანამედროვე მხატვარმა სხვადასხვა დროს შექმნეს ხელოვნების ნიმუშები მაიკლ ჯექსონის შემოქმედების შთაბეჭდილებით. აქ იხილავთ „მეფე ფილიპ II-ის ცხენის პორტრეტს“, რომელიც მომღერალმა ამერიკელ მხატვარს, კიანდე უაილის ჯერ კიდევ სიცოცხლეში შეუკვეთა, ასევე ენდი იორჰოლის, Kaws-ის, გრემა დოლფინას ნამუშევრებს. ამ და სხვა ნამუშევრების ნახვას პორტრეტების ეროვნულ გალერეაში 21 ოქტომბრამდე შეძლებთ.


ანა ვერძაძე