„ნატალი“ 25 წლისაა - ქართველი მოდელები პოპულარული სამოდელო სააგენტოს შესახებ

საქართველოში სამოდელო ბიზნესის განვითარება 90-იანი წლებიდან დაიწყო. ქალბატონი ნატა სამადალაშვილი ერთ-ერთი პირველი იყო, რომელმაც შექმნა ქართველი სუპერმოდელების მთელი ვარსკვლავედი. სამოდელო სააგენტო "ნატალი" 25 წლის გახდა! როდესაც `ბომონდისთვის~ საერთო ფოტოს ვიღებდით, ცხადია, ყველა ვერ შევკრიბეთ. ძველი თაობა გაიზარდა, ახლა უკვე ზოგს საკუთარი სამოდელო სააგენტო აქვს, ზოგი ტელეწამყვანია, ზოგი საზღვარგარეთ მოღვაწეობს, ზოგი კი უბრალოდ დედაა. დედა, რომელიც "ნატალიში" გაიზარდა. თითოეულის წარმატებაში ქ-ნ ნატას უდიდესი წვლილი მიუძღვის. ნატა მათთვის დედაც იყო, მასწავლებელიც და მესაიდუმლეც.

ეს თარიღი კი განურჩევლად ყველას ეკუთვნის, ვისაც 25 წლის

მანძილზე `ნატალისთან~ თუნდაც მცირე დრო აკავშირებს. გოგონები ძალიან ლამაზები არიან, ნატა კი თითქმის არ შეცვლილა, თავისი ენთუზიაზმით ახალგაზრდებს არ ჩამოუვარდება. ამაღელვებელი იყო მათი შეხვედრაც. ყველამ ერთად გაიხსენა და შეეცადნენ, მცირე კომენტარში თავი მოეყარათ საკუთარი ემოციებისათვის.

ნატა სამადალაშვილი: - "ნატალის" შექმნის იდეა დამებადა 90 -იან წლებში, როდესაც ქვეყანაში რესტრუქტურიზაცია დაიწყო. ამ დროისათვის ჩვენს ბაზარზე აქტიურად მუშაობდა `მოდელების~ სახლი, სადაც მე დამდგმელ ქორეოგრაფად ვმუშაობდი. გადავწყვიტე, გამეხსნა სამოდელო სააგენტო ჩემს მეგობრებთან ერთად და გოგონებისთვის მიმეცა საშუალება, იმ რთულ პერიოდში დაემკვიდრებინათ თავი, როგორც მოდელებს. ჩვენ ერთიანი ძალებით შევძელით სტერეოტიპის დამსხვრევა, რაც იმ პერიოდში არსებობდა მოდელის პროფესიასთან მიმართებაში. ჩემ გვერდით იდგნენ და მეხმარებოდნენ ჩემი მეგობრები: მაკა ბახტაძე, მაკა ბასილაია, ნუკა კაციტაძე, ნანა გერასიმოვა.

დღეს, როგორც ყოველთვის, ვცდილობ სააგენტო იყოს სტაბილური და დაეხმაროს ახალგაზრდებს საკუთარი შესაძლებლობისა და ოცნების რეალიზებაში. გვყავს ძალიან ბევრი ახალი სახე. "ნატალიმ" 25 წლის განმავლობაში შექმნა საკუთარი მეთოდი, რომლითაც გოგონებს ვეხმარებით ისწავლონ არა მარტო სიარული, არამედ ყველაფერი, რაც სრულყოფილი ქალისთვის არის საჭირო. ჩემი დევიზია, მოდელებმა არა მარტო საკუთარი სილამაზე აჩვენონ, არამედ ინტელექტიც! უახლოეს მომავალში ვგეგმავ ჩავატაროთ სააგენტო "ნატალის" 25 წლის იუბილე. ვფიქრობ, გამოგვივა მასშტაბური ივენთი, რადგან "ნატალი" მართლაც დიდი ისტორიაა, რომელიც ბევრ ადამიანს აერთიანებს. დღემდე ვცდილობ შევუწყო ხელი სამოდელო სფეროს განვითარებას ჩვენს ქვეყანაში.

თიკო ნატროშვილი: - "ნატალიში" მოვხვდი 15 წლის წინ და ჩემი, როგორც მოდელის რეალიზება მალევე მოხდა. მოხდა ის, რაზეც ადრე არასოდეს მიოცნებია და მიფიქრია. "ნატალიმ" შეცვალა ჩემი ცხოვრება, მომცა უდიდესი გამოცდილება. ნატა დღემდე ჩემი მესაიდუმლეა. მიხარია, რომ სააგენტო "ნატალის" სახელს ვატარებ!

სოფო ხუბერაშვილი: - ჩემი "ნატალისთან" თანამშრომლობა დაახლოებით 16 წლის წინ დაიწყო. პირველი ჩვენება გუშინდელივით მახსოვს, ეს იყო მაკა ასათიანის ჩვენება. რეალურად მაკამ აღმომაჩინა და მირჩია, ნატასთან მივსულიყავი. `ნატალი" ჩემი ოჯახი გახდა! ჩემი გოგონა რომ წამოიზრდება, აუცილებლად მივიყვან `ნატალიში~, სადაც პროფესიული ჩვევების გარდა ადამიანურ ურთიერთობებსაც ასწავლიან!

კრისტი ყიფშიძე: - "ნატალი" არის პირველი სააგენტო საქართველოში და თამამად შეიძლება ითქვას - ამიერკავკასიაშიც. 1995 წელს "ავანგარდული მოდის ასამბლეაზე" შევხვდით მე და ნატა ერთმანეთს, შესარჩევ ტურზე და მას მერე ერთად ვართ. ჩვენთვის ეს მეორე ოჯახი იყო. მაშინ ხშირად იმართებოდა პერსონალური ჩვენებები, მე თითქმის ყველა დიზაინერის ვარ გამოსული და დღემდე აქტიური მოდელი ვარ. შეიძლება ითქვას, ვარ ქართული მოდის მემატიანე.



თიკა ფაცაცია: - რომ არ ყოფილიყო "ნატალი", ჩვენი ცხოვრება საკმაოდ შავ-თეთრი იქნებოდა. იმ დროს თბილისში არაფერი არ ხდებოდა, მაგრამ რაოდენ უცნაურიც უნდა იყოს, `ყველაფერი~ ხდებოდა მოდის სფეროში. ეს იყო ჩვენი საქმიანობაც, შემოსავილიცა და გართობაც. "ნატალის" პირველი ნაკადი ვიყავი და ვულოცავ ჩემს საყვარელ სააგენტოს იუბილეს!


ლიკა კვარაცხელია: - 13 წლის ვიყავი, როდესაც "ნატალიში" მოვხვდი კალათბურთიდან. დავდიოდი ძალიან ცუდად და ნატამ მასწავლა სიარული. მიუხედავად იმისა, რომ იყო ცუდი პერიოდი, ჩვენ ვატარებდით ფერად ბავშვობასა და თინეიჯერობას. შემოსავალიც საკმაოდ სოლიდური გვქონდა. ვცხოვრობდით ერთ ოჯახად. შემდეგ გავიზარდეთ, ერთმანეთს შვილები მოვუნათლეთ და დავნათესავდით. ვულოცავ "ნატალის" იუბილეს!

ნანუკა მიქაძე: - "ნატალი" ჩემთვის არის ჩემი ცხოვრების ყველაზე ლამაზი პერიოდი. 12 წლის ვიყავი, როდესაც სააგენტოში მოვხვდი. ნატამ გაგვილამაზა ის რთული პერიოდი, რაც მაშინ საქართველოში იყო. დღეს უკვე "ნატალის" 25 წლის იუბილეა და ბევრ წარმატებას ვუსურვებ!

თამუნა გაბრიელაშვილი: - სააგენტოში მოვედი 14 წლის და მალევე დავიწყე აქტიური მოღვაწეობა. ყველაზე კარგად მახსოვს ის პერიოდი, რაც ნატაშას დამსახურებაა. ყველაფერს აკეთებდა იმისთვის, რომ ჩვენ წარმატებებისთვის მიგვეღწია. ბედნიერი ვარ, რომ ვარ და ვიყავი "ნატალის" ოჯახის წევრი!

მარიამ გიორგობიანი: - მიუხედავად იმისა, რომ "ნატალიში" 9 წელია ვარ, უამრავი გამოცდილება შევიძინე. ყოველდღიური ქასტინგები, გადაღებები და ჩვენებები მრავალფეროვანს ხდიდა ჩვენს ცხოვრებას. დღეს მე სააგენტო `ნატალის~ მენეჯერი ვარ. გვყავს ბევრი ახალი სახე და გვაქვს უამრავი გეგმა.

ლიკა ქორქია: - 14 წლის ვიყავი, როდესაც დედამ "ნატალიში" მიმიყვანა. რაც კი ჩემს ცხოვრებაში კარგი მოხდა, ყველაფერი ნატას დამსახურებაა. მისი თავდაუზოგავი შრომის შედეგია ჩემი და ჩემი დის სატელევიზიო კარიერაც. მიხარია `ნატალის" იუბილე და ვუსურვებ წინსვლას, ვამაყობ ჩემი სააგენტოთი!

თაკო ჩხეიძე: - როგორც მოდელმა, "ნატალიში" ავიდგი ფეხი. ძალიან კარგად მახსენდება ის დრო. არაჩვეულებრივი თაობა ვიყავით. მიუხედავად იმისა, რომ ჩემი სააგენტო მაქვს, ყოველთვის ვარ ნატას დიდი გულშემატკივარი. როდესაც სააგენტოს ვხსნიდი, პირველი ნატას მოვუყევი ჩემი გეგმების შესახებ. ვულოცავ ჩემს საყვარელ სააგენტოს იუბილეს!

ავტორი თეა აგლაძე

ჟურნალი "ბომონდი"

ივნისის ნომერი

like
0

კომენტარები

nana 2018-05-14 10:40
yvela susts tavi rato gonia magari da ro unda gashishvldes?ai am kalis arc tani momcons,arc saxe da shurianobashi ar chmomartvat axla,martlac imdeni lamazi kali dadis da am kals,tan gaxdils rato unda vuyuroot?
HM 2018-05-13 18:07
KRISTIM ROGOR UNDA GAIXADOS RAS MGVANEBULA. UII
lana 2017-11-19 12:11
ყიფშიძე დაბერდი არც ტანი გივარგა არც სახე წადი დაგვანებე თავი რაააა,,,,, ათასი ლამაზი გოგოა ქალაქში შენ რატომ გადაიჭირე ყველაფერიიიი

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.