ბლიცი: ზურა მგალობლიშვილი მოდის სახლ AVTANDIL-ის აღმასრულებელი დირექტორი

- როგორ იწყება თქვენთვის საქმიანი დღე?


- ყოველი დღე საქმიანი და დატვირთულია, ამდენად, განსაკუთრებული არაფერია. დილა ცხელი შხაპით იწყება.

- რა გიქმნით დილით სიმყუდროვეს?


- შინ სამზარეულოში ფინჯანი ყავის დალევა.


- თქვენი იდეალური სამოსი?


- ყოველთვის იმ სამოსს ვანიჭებ უპირატესობას, რაშიც კომფორტულად ვგრძნობ თავს.


- რომელი სტილი გამოხატავს თქვენს ხასიათს?


- ძირითადად, სპორტული სტილის სამოსის მომხმარებელი ვარ. თუმცა, ვფიქრობ, რომ ჩემს ხასიათს ყველაზე უკეთ მაინც კლასიკურისა და სპორტულის კომბინაცია გადმოსცემს.


- სამოსი, რომელსაც ვერ იხდენთ?


- მიუხედავად წინა სამსახურის ეტიკეტისა,

ვერ მოვიხდინე და შევეგუე ჰალსტუხს. ასევე, არსებობს ბრენდები, რომელთა სამოსს ვერასდროს ვატარებ.


- სად გიყვართ შოპინგი?


- შოპინგს ყველგან ვახერხებ. ყველაზე მეტი ნივთი ალბათ მაინც პარიზსა და მილანში მაქვს შეძენილი.


- საყვარელი ბრენდი?


- მიჭირს რომელიმე კონკრეტული ბრენდის გამოყოფა. თანამედროვე მოდა, განსაკუთრებით ბოლო პერიოდისათვის დამახასიათებელი ელვისებური სიახლეებით ამის საშუალებას არ გვაძლევს. არ მიყვარს მარტივად ამოსაცნობი "ბრენდული ტანსაცმელი". ვფიქრობ, ადამიანის ჩაცმულობაში მისი გემოვნება უნდა იგრძნობოდეს და არა "ბრენდების" ცოდნა. ასევე არ მიყვარს, როდესაც ადამიანის ჩაცმულობაში მისი სოციალური სტატუსი მკვეთრად იკვეთება. ხშირ შემთხვევაში დამწყებ დიზაინერებს ვანიჭებ უპირატესობას, რომელთა ნამუშევარში ვხედავ დიზაინერის ნაფიქრს და ნააზრევს.


- სად გიყვართ თავისუფალი დროის გატარება. სად ისვენებთ კომფორტულად?


- თავისუფალი დროის გატარება, ძირითადად, ოჯახის წევრების ან მეგობრების გარემოცვაში მიყვარს. დასვენებას რაც შეეხება, ჩემთვის ყველაზე კომფორტული - მარტო, უცხო გარემოში და აუცილებლად, ზღვის სანაპიროზე დასვენებაა. ყოველ წელს, ასეთი ტიპის დასვენებისთვის ძირითადად საბერძნეთის კუნძულებზე დავდივარ.


- გაიხსენეთ დაუვიწყარი მოგზაურობა...


- მძაფრი შეგრძნებების მიხედვით, შემიძლია, ჩინეთსა და შრი-ლანკაში მოგზაურობები გამოვყო, რადგან ჩემთვის ორივე რადიკალურად უცხო სამყარო აღმოჩნდა. სასიამოვნო მოგზაურობები კი ბევრი შემიძლია გავიხსენო.


- სად წახვიდოდით სამოგზაუროდ?


- ადგილი, სადაც ყოველთვის მინდა დაბრუნება ყაზბეგია. სიამოვნებით ვიმოგზაურებდი სვანეთშიც, რომლის დათვალიერებაც, სამწუხაროდ, აქამდე ვერ მოვახერხე და ცოტა მრცხვენია კიდეც. რაც შეეხება საზღვარგარეთ მოგზაურობას, იმდენი ადგილია საინტერესო და მიმზიდველი, რომელიმეს გამოყოფა მიჭირს.


- თქვენი საყვარელი წიგნი?


- ამ ეტაპზე მიშელ უელბეკისა და ჰარუკი მურაკამას შემოქმედებით ვარ გატაცებული. ხოლო საყვარელი ნაწარმოები, რომელმაც დიდი ხნის წინ წარუშლელი შთაბეჭდილება დატოვა და დღემდე მაღელვებს, ანდრე მორუას ნოველა "სასტუმრო თანატოსია".


- საყვარელი მუსიკალური ჯგუფი ან შემსრულებელი?


- ახლა ყველაზე ხშირად ფლორიან კრუსს ვუსმენ, ასევე ემი ვაინჰაუსს.

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.