ევროპაში მამაკაცების მოდის კვირეული დასრულდა

გუშინ მამაკაცების მოდის კვირეული ევროპაში ედი სლიმანის „სელინით“ დაიხურა, ამიტომ უკვე თამამად შეგვიძლია განვიხილოთ, რა იქნება მოდაში ამ წლის დასასრულს, რას ვიხილავთ ქუჩებში მომავალ შემოდგომასა და ზამთარში, რა არის ახალი და რა უბრუნდება მოდას.

Dior Men
კიმ ჯონსი დიორისთვის მორიგ კოლექციას ქმნის, რომელმაც საზოგადოებისგან დიდი მოწონება დაიმსახურა. მიმზიდველი ფერები, ელეგანტური ფორმები, კლასიკურისა და სპორტულის შერწყმა, სხვადასხვა პრინტები და საოცარი დეტალები - ეს მცირე ჩამონათვალია იმისა, რასაც 18 იანვარს დიორის პოდიუმზე დაინახავდით. 2019 წლის დიორის მამაკაცი გაერთიანებაა წარსულისა და თანამედროვეობის. კოლექციაში
შეხვდებით დეტალებს, რომლებიც ძველ დიორს მოგაგონებთ, რადგან კიმ ჯონსმა ინსპირაციისთვის სწორედ წარსულში დაბრუნება გადაწყვიტა. პიჯაკებსა და მანტოებზე მიკერებული შარფები საოცრად მიმზიდველსა და თანამედროვეს ხდის საკმაოდ ოფიციალურ სამოსს. რაც შეეხება პრინტებს, კიმმა ზებრისა და პანტერის პრინტები ძალიან გემოვნებიანად გამოიყენა და მათგან შექმნა ქურთუკები, შარფები და ჩანთები. მოკლედ, თუ კლასიკურისა და მოდერნისტული დეტალების ნარევი თქვენთვის საინტერესო და მიმზიდველია, მაშინ აუცილებლად მოგეწონებათ დიორის ბოლო კოლექცია.


Stella McCartney
ბრიტანელი დიზაინერი ამ სეზონის ერთ-ერთი ჰაილაითია. სტელას შემოქმედება უკვე მამაკაცების კოლექციასაც მოიცავს, რომლის შთაგონებაც სამშობლო და ლეგენდარული ჯგუფი, ბითლზებია. ალბათ უკვე ბევრს ეცოდინება იმის შესახებ, რომ დიზაინერის მამა ამ ჯგუფის ერთ-ერთი წევრი - პოლ მაკარტნია. სტელას 2019 წლის მამაკაცი კლასიკური, ბრიტანეთისთვის დამახასიათებელი სტილისაა, რომელსაც ასევე იტაცებს ამერიკული კულტურის ელემენტები. ზოლიან პერანგებზე ბითლზების წევრები არიან გამოსახულნი პოპ არტის სტილში. მსგავს პრინტებს შეხვდებით მანტოებსა და სვიტრებზეც. აქვე უნდა აღინიშნოს ნაცრისფერი მოსასხამიც, რომელსაც წითელი და ყვითელი დეტალები ახლავს თან. უნდა ითქვას, რომ გასული წლის ბოლოს მსგავს მოსასხამებს ხშირად ვხედავდით, რაც შესაძლოა ლაბადების მოდაში დაბრუნებისკენ მიგვანიშნებდეს.


Loius Vuitton
ახალგაზრდების საყვარელი, დღესდღეობით ერთ-ერთი ყველაზე გაყიდვადი დიზაინერი, ვირჯილა აბლო, თანამედროვე და სხვებისგან განსხვავებულ კოლექციას სთავაზობს მამაკაცებს. დიზაინერისთვის მთავარი შთაგონების წყარო პოპ ლეგენდა, მაიკლ ჯექსონი გახდა. სწორედ ამიტომ, კოლექციაში შესულ სამოსზე ჯექსონის ცნობილი ფეხსაცმელები და სხვადასხვა ქვეყნის დროშებია გამოსახული. ვირჯილი ტანსაცმლი სფენებით ინტერესდება, რასაც პოდიუმზე ნათლად დაინახავთ. გრძელ პიჯაკებზე შემოცმული მოკლე ჟაკეტები კოლექციას მრავალფეროვნებასა დამიმზიდველობას სძენს. მანტოების ზომა საკმაოდ დიდია, ისევე როგორც შარფების.


Givenchy
კლერ ვეით კელერი წარსულში გვამოგზაურებს. მისი მამაკაცის სამოსის ახალი კოლექცია აუცილებლად მოგაგონებთ 90-იან წლებს. როგორც დიზაინერმა თქვა, იგი დაბრუნა წარსულში შთაგონების საპოვნელად და ამ მოგზაურობის შედეგიც სახეზეა. დახვეწილი, გემოვნებიანი, ფერადი პიჯაკები და პალტოები იდეალური შერწყმაა თანამედროვეობისა და წარსულის. ჟივანშის 2019 წლის მამაკაცის სამოსი არ არის მასკულინური, არამედ მას საკმაოდ ნაზი დეტალები ახლავს თან. კლერის სამოსს აუცილებლად გააჩნია პიროვნულობა, თითქოს ისტორიას გიყვებიან, გიხასიათებენ ბუნებას, ხასიათს. ასე რომ, თუ გიყვართ 90-იანების სტილი და კულტურა, ჟივანშის 2019 წლის კოლექცია ნამდვილად მოგხიბლავთ.

ბაკა ალავიძე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.