რა ჩავიცვათ ზაფხულში? 10 საუკეთესო ტრენდი

ძალიან ცოტა დრო დარჩა ზაფხულის დადგომამდე, რაც იმას ნიშნავს, რომ ძალიან მალე გარდერობის განახლება მოგიწევთ.

საკმაოდ რთულია ცხელ ამინდს სასურველი სამოსი შეუხამო, ამიტომ ამ სირთულის დაძლევაში ჩვენ დაგეხმარებით. ამ სტატიაში გაეცნობით 10 საუკეთესო ტრენდს, რომელიც 2019 წლის ზაფხულს გაგილამაზებთ.

1. ცხოველების პრინტები.

ზაფხული მთლიანად ბუნების სიყვარულს ეძღვნება, ამიტომ ბუნებისთვის დამახასიათებელი დეტალების სამოსში გადატანა ძალიან მიმზდიველ და სეზონისთვის შესაფერის ლუქებს შეგიქმნით. 2019 წელს ცხოველების პრინტები ნელ-ნელა მოდას უბრუნდებოდნენ, ზაფხულში კი მათი ტრენდულობის პიკი იქნება.


2. პიჯაკები

ზაფხულის დადგომა საერთოდ არ ნიშნავს
იმას, რომ ჟაკეტებსა და მოსაცმელებს უნდა დავემშვიდობოთ. თუ გსურთ, რომ ზაფხულის ცხელ დღეებში შეინარჩუნოთ სოლიდური და ამავდროულად გრილი ლუქი, მაშინ თხელი პიჯაკები და ტოპები მოსინჯეთ, ეს ორი სამოსი ძალიან უხდება. ამას დამატებული, პიჯაკებისა და შორტების კომბინაცია წელს განსაკუთრებულად ტრენდული იქნება, ამიტომ გახსოვდეთ, რომ არჩევანი დიდი გაქვთ.


3. მყვირალა ფერები

ცნობილი ფაქტია, რომ ბუნების ყვავილობა ჩვენს ხასიათზე საკმაოდ დადებითად მოქმედებს, ამიტომ ეს ხასიათი საკუთარ სტილზეც ასახეთ. თბილისის ბაზარზე ხშირად შეხვდებით ნეონურ ფერებში გადაწყვეტილ შარვლებსა და მაისურებს, ამიტომ ლუქის გაფერადება ნამდვილად არ გაგიჭირდებათ.


4. ჯინსის შორტები და ტოპები

რა თქმა უნდა, ისინი ისევ მოდაში არიან და დამდეგ ზაფხულსაც ხშირად შეხვდებით. ტოპითა და ჯინსის შორტებით შექმნილი ლუქი ყოველთვის მოდური იქნება, რადგან ისინი შესახამებლად მარტივია, ასევე კომფორტულობითა და სიგრილით გამოირჩევა.


5. სადა

თუ მყვირალა ფერები და პრინტები თქვენი სტილი არაა, მაშინ შავ-თეთრის კომბინაციას გირჩევთ. ამ ფერების შეხამება უმარტივესია და მათგან ყველანაირი ხასიათის მქონე ლუქის შექმნა შეიძლება.


6. ჯინსი, ჯინსი და ჯინსი

ამ ტიპის ლუქზე მთლიანი სტატიაც კი შეგიძლიათ იხილოთ ბომონდის საიტზე. ჯინსები არასდროს არ გადადის მოდიდან და ის არც 2019 წლის ზაფხულში არ დაგვტოვებს. ჯინსის მთავარი დადებითი მხარე ისაა, რომ იგი ლუქების უდიდეს არჩევანს გაძლევთ, შეგიძლიათ უბრალო მაისურსა და კეტებზე მოიხდინოთ. ამ ზაფხულს მოდაში მთლიანად ჯინსის ლუქები იქნება, ამიტომ შეგიძლიათ ჯინსის ქურთუკები არ გადაინახოთ.


7. კომბინიზონები

თუ კითხვა „რა ჩავიცვა?“ არ გიყვართ და უბრალოდ მარტივ ლუქს ეძებთ, მაშინ აუცილებლად უნდა შეიძინოთ კომბინიზონი. მისი მოხდენა უმარტივესია და იდეალური ლუქისთვის მხოლოდ რამდენიმე აქსესუარი დაგჭირდებათ.


8. აქსესუარები

აქსესუარი სრულყოფილების გასაღებია, ზაფხულში კი განსაკუთრებით ეფექტურად შეგიძლიათ გამოიყენოთ ისინი. გირჩევთ დიდი ზომის მზის სათვალეები შეიძინოთ, ისინი საკმაოდ ტრენდულია. რაც შეეხება ჩანთებს, ახლა მინი-ჩანთების ერაში ვართ, ამიტომ მცირე ზომის, ფერადი ხელჩანთა საინტერესო დეტალს შესძენს თქვენს ლუქს. ამ ზაფხულს მოდაში ბენდენები ბრუნდება, ასე რომ, რამდენიმე ფერადი ბენდენაც გაამზადეთ.


9. სამოსის ფენები

თუ მარტივი ლუქები არ გიზიდავთ, მაშინ სამოსის ფენები, ანუ მოსაცმელები თქვენთვის არის განკუთვნილი. თუ გსურთ თქვენი შორტები და ტოპი უფრო საინტერესო გახადოთ, შეუხამეთ მას ჟაკეტი ან დიდი ზომის პერანგი.


10. ყვავილები

ყვავილების პრინტებით გაწყობილი ზედები ყოველ სეზონზეა ტრენდული, მაგრამ ზაფხულში მათი რელევანტურობის ზენიტია. გაახალისეთ ლუქი ფლორალ პერანგებითა და მაისურებით.

like
6