ტენდენციები

მოდური იტალიელი ბებოები ინსტაგრამზე
ინსტაგრამის საშუალებით პოპულარობის მოპოვება მარტივია, თუ ხარ მდიდარი, ლამაზი და კარგად იცვამ. ეს იტალიელი მოდური ბებოები ნამდვილად იქნებოდნენ პოპულარობის ზენიტში, მაგრამ სოც.ქსელში პირადი გვერდები არ აქვთ: მილანში ისინი ცხოვრებით ტკბებიან და სოც.ქსელებზე საერთოდაც არ ღელავენ. მათ ინსტაგრამი ერთმა იტალიელმა სტუდენტმა შეუქმნა - თავისუფალ დროს ის ქუჩაში მოდურ უფროს თაობას იღებს და მათ ფოტოებს სოც.ქსელში ათავსებს.

როცა ფოტოების ავტორი და გვერდის მფლობელი ანჯელო ნაპოლილო მილანში ჩავიდა, ის აღფრთოვანებული იყო იმით, თუ როგორ გამოიყურებოდნენ იტალიელი ბებოები - როგორც ანჯელო ბრიტანულ Vogue-ს მოუყვა, სხვა ქალაქებში ასეთებს არ შეხვედრია. „მე და ჩემს მეგობრებს მათი გვშურს. ისინი ისეთი ლამაზები არიან, სასიამოვნო და მსუბუქი ცხოვრებით ცხოვრობენ. ჩვენ უნივერსიტეტში გავრბივართ, ამ დროს კი ისინი Prada-სა და Gucci-ში გამოწყობილები მაღაზიაში პროდუქტების შესაძენად მიდიან. ისინი მდიდრები არიან და ქალაქის ცენტრში მათ ხშირად ნახავთ, კაფეში Bar Luce აუჩქარებლად სვამენ ყავას“ - ჰყვება ანჯელო. საკუთარ გვერდს მან @sciuraglam დაარქვა: მილანურ დიალექტზე სიტყვა sciura მდიდარ ქალს ნიშნავს.

თუმცა საქმე მხოლოდ ფულში არ არის. იტალიელ ქალებს აქვთ გემოვნება, სიყვარული ცხოვრების მიმართ და მისით ტკბობის უნარი. გამბედაობა ჰყოფნით გამოხატონ საკუთარი თავი: ზოგი თმას იასამნისფრად იღებავს და ქუჩაში წითელი პომადის გარეშე არ გადის, ზოგს კი მოსწონს ჭაღარა, არ იღებავს თმას და ბუნებრივად გამოიყურება. როგორც წესი, მათი ნებისმიერი სამოსი მცირე დეტალებამდეა გათვლილი: ატარებენ მოდურ პანამასა და დიდი ზომის სათვალეებს, ჩალის ფართო შლაპებს, ერთმანეთს უხამებენ განსხვავებულ პრინტებსა და ფაქტურებს. „ვერ აღვწერ, კონკრეტულად რა არის მათში განსაკუთრებული - რაღაც გასაოცარი სილამაზე. მე გმირებს იმ ბრენდების მიხედვით არ ვირჩევ, რომელსაც ისინი ატრებენ, არამედ ვაფასებ მთელ სამოსს. საკუთარ თავს ვეკითხები, ჩავიცვამდი თუ არა იგივეს ქალი რომ ვყოფილიყავი“ - ჰყვება ანჯელო თავის მუზებზე.

ანჯელო გამოტყდა, რომ თავდაპირველად ინსტაგრამზე ქალების ფოტოებს მათი თანხმობის გარეშე აქვეყნებდა: „არ ვიცოდი რა რეაქცია ექნებოდათ, არ მეგონა, რომ გვერდი პოპულარული გახდებოდა. შემდეგ ნათესავებმა მათი ბებიების ფოტოები ჩემს გვერდზე იპოვეს და ყველას მოეწონა, რასაც ვაკეთებ. ბევრ გმირთან უკვე ვმეგობრობ კიდეც“.

ანა ვერძაძე
მზის სათვალის იდეა და მისი შექმნა
მზის (ე.წ. ფერადი) სათვალე გამოიყენება სინათლის დიდი გამოსხივების დასაფარად, რადგან თვალს მეტი კომფორტი შეექმნას დღის შუქზე ხედვისას. რეალურად მას რამდენიმე საუკუნოვანი ისტორია აქვს. მზის სათვალის სამშობლო ჩინეთია, სადაც XII საუკუნეში სრულიად განსხვავებული დანიშნულებისთვის შეიქმნა. მუქ სათვალეს სასამართლოებზე იყენებდნენ, რადგან მსჯავრდებულს მოსამართლის მიერ დასმულ კითხვებზე ემოცია მარტივად არ შეტყობოდა.



დაბურულ მინიანი სათვალე ევროპაში დაახლოებით XVIII საუკუნის შუა პერიოდში გამოჩნდა, მაგრამ არც მაშინ ჰქონდა ამჟამინდელი დანიშნულება. ინგლისელ ოპტიკოსს ჯეიმს აისკოჰს სჯეროდა, რომ მწვანე, ლურჯი და ყვითელი მინები ხელს უწყობდა თვალის სხვადასხვა დაავადებების განკურნებას.



თანამედროვე მზის სათვალე გასული საუკუნის ოციან წლებში ჩნდება და ძირითადად კინო ვარსკვლავები იყენებდნენ. ისინი ფიქრობდნენ, რომ თვალების დაფარვით აირიდებდნენ ქუჩებში ფანების შემოტევას, მაგრამ ხშირ შემთხვევაში, ამაოდ. იმ დროინდელმა ცნობილმა გამოცემებმა ვარსკვლავების ეს თვისება სირაქლემის პოზასაც შეადარეს.



პირველი სათვალეები ძალიან მძიმე იყო სატარებლად, რადგან მინისგან მზადდებოდა. მოგვიანებით, 1929 წელს მასაზე გათვლილი იაფასიანი ცელულოიდის მზის სათვალეები სემ ფოსტერმა გამოუშვა ამერიკის შეერთებულ შტატებში. ფოსტერმა მარტივად იპოვა მარკეტინგულად მომგებიანი ლოკაცია და სათვალეები პირდაპირ ნიუ ჯერსის სანაპიროზე გაყიდა საკუთარი ბრენდის სახელწოდებით „ფოსტერ გრანტი“.



1937 წელს საზოგადოების დიდი ნაწილი მიხვდა, რომ მზის სათვალის გამოყენება არა მარტო სანაპიროზე, არამედ ქალაქის ქუჩებშიც შეიძლებოდა. ამავე წლის მონაცემებით, ამერიკის ტერიტორიაზე ოცი მილიონი მზის სათვალე გაიყიდა. ამ პერიოდში გამოჩნდა პირველი პოლარიზებული სათვალეებიც. გასულ საუკუნეში მზის სათვალეს ძირითადად მხოლოდ დანიშნულებისამებრ იყენებდნენ. დროთა განმავლობაში ეს ტენდენცია შეიცვალა და მზის სათვალე ერთ-ერთ მთავარ მოდურ აქსესუარად გადაიქცა, რომელიც უკვე აუცილებელი დეტალია ამა თუ იმ ლუქის მორგებისას. დღესდღეობით მზის სათვალეების ყველაზე დიდი მწარმოებელი ჩინეთის ქალაქი სიამინია, რომელიც წელიწადში 120 მილიონ სათვალეს აწარმოებს და ყიდის მსოფლიოს მასშტაბით.



ივანე ქეშიკაშვილი

ასევე დაგაინტერესებთ: 

სანაპიროს ეკოსტილი
2018 წლის მსოფლიო საკრუიზო კოლექციები - რა უნდა ვატაროთ ზაფხულში?
2018 წლის ზაფხულის ყველაზე ტენდენციური სათველეების TOP 5
TOP 7 საუკეთესოდ ჩაცმული ვარსკვლავი
ცნობილი ვარსკვლავები და არამარტო, ქუჩის სტილს ხშირად უფრო დიდ მნიშვნელობას ანიჭებენ ვიდრე წითელი ხალიჩისთვის შექმნილ „ლაქშერულ“ ლუქებს.
უამრავმა სელებრითმა წარმატებით აიტაცა ტენდენცია „დღეს მოდაშია ყველაფერი“ და საინტერესო ინტერპრეტაცით შექმნილი ლუქებიც შემოგვთავაზა.

თუ მათ დავუჯერებთ, მთავარი კრიტერიუმი იდეალური „სთრით-ლუქისთვის“ მინიმალიზმი და კომფორტია. შეიძლება სულაც არ გრძნობდეთ თავს კომფორტულად, მაგრამ სხვისთვის ასე გამოიყურებოდეთ. თქვენ მიერ ქუჩის სტილის სწორად შერჩეულ ლუქზე ისეთი შთაბეჭდილება უნდა შექმნათ საზოგადოებაში, რომ საერთოდ არ გიფიქრიათ იმაზე თუ რა, ან როგორ გაცვიათ. შესაბამისად მაკიაჟიც უფრო სადა და მინიმალური უნდა გაიკეთოთ

ბუნებრივობა და ორგანულობა ხომ წლის მთავარი ტენდენციაა!

გთავაზობთ TOP 7 სხვადასხვა სფეროში მოღვაწე სელებრითის საუკეთესო ქუჩის სტილს


ბელა ჰადიდი


რიანა


ბიონსე


მონიკა ბელუჩი


სარა ჯესიკა პარკერი


კარა დელევინი


ანდრეა ფეჯიქი
ჩაიცვით 2 ზომით დიდი შარვლები - სეზონის ყველაზე ცხელი ტრენდი
გოგონების სიყვარული მამაკაცისა და ორი ზომით დიდი სამოსის მიმართ შეიძლება იმით აიხსნას, რომ ასე ისინი თავს უფრო გამხდრებად გრძნობენ, ზოგს კი 90-იანი წლების ჰიპ-ჰოპ სტილი მოსწონს.

წლევანდელ ზაფხულს მინიატურული ქვედა ბოლოებისა და ყვავილებიანი კაბების ნაცვლად წინა პლანზეა ფართო ჯინსები, მინიმალისტური ქურთუკები განიერი მხრებით, ახლა კი გვსურს სეზონის კიდევ ერთი ტრენდი გაგაცნოთ. დადგა დრო მაღალწელიანი შარვლები ატაროთ, რომელიც დიდი გაქვთ, წელზე კი შავი ფერის ქამრით დაიმაგროთ.

მოდური ხრიკის გასათავისებლად, საშინაო დავალების შესრულება მოგიწევთ: იხილეთ Céline-სა და Isabel Marant-ის გაზაფხული-ზაფხულის ჩვენებები. ყურადღება მიაქციეთ - იდეალურ შემთხვევაში შარვლის ქსოვილი თავს უნდა იყრიდეს წელის მიდამოში, რასაც უბრალო წელის ქამრით დაამაგრებთ. შეგიძლიათ ჩაიტანოთ მაისურები, პერანგები, მის გარედან კი ატაროთ დიდი ზომის გრძელი პიჯაკები და ქურთუკები.


ანა ვერძაძე
MBFW Tbilisi, რას გვთავაზობენ ქართველი დიზაინერები შემდეგი სეზონისთვის?
TEYO

თეო გარდაფხაძის შემოდგომა-ზამთრის კოლექციის მთავარი ინსპირაცია გასული საუკუნის ხელოვნების მიმდინარეობა, კონსტრუქტივიზმი გახდა. კერძოდ კი საქართველოში მდებარე მონუმენტი „ანდროპოვის ყურები“. სილუეტები ზუსტად პასუხობდა კოლექციის მთავარ თემას. ხანმოკლე პაუზის შემდეგ თავისუფლად შეგვიძლია ვთქვათ, რომ ბრენდი TEYO ტრიუმფალურად დაბრუნდა მოდის კვირეულზე, რომელმაც უცხოური პრესის დიდი ყურადღება და მოწონება დაიმსახურა.



Ria Keburia Gallery

Ria Keburia Gallery წარმოგვიდგინა მორიგი პერფორმანსი „Firefly XV“. რიას ახალი იდეაა ადამიანის ფეტიშის შესწავლა გაზრდილ რეალობაში. „Firefly” არის ერთგვარი ლაბორატორია, რომელიც ადამიანს აცდუნებს და ამოგზაურებს მასში. სწორედ ამ იდეის წყალობით ვიხილეთ ჩაბნელებული ოთახი, რომელშიც უამრავ ნათურაში გახვეული ადამიანები, სხეულის პლასტიკით წარმოგვიდგნენ ციცინათელებად და გარემო კი - მაგიურ სამყაროდ. მისტიკური ყვითელი ნათება და ციცინათელების ცეკვა, ხაზს უსვამს ქალის ენერგიასა და სინაზეს.



Materiel by Lado Bokuchava

Materiel-ის სახლის ერთ-ერთი კრეატიული დირექტორის ლადო ბოკუჩავას ჩვენება, სეზონის მიუხედავად, ტრადიციულად ნაზი, ქალური და ჰაეროვანი გახლდათ. კოლექცია სრულად შავსა და პასტელურ ფერებში იყო წარმოდგენილი, რომელზეც ბრწყინავდა პატარა ბრჭყვიალა დეტალები. ასევე ძალიან საინტერესოდ გამოიყურებოდა გადასაკიდი ბეწვის ჩანთები, რომელიც კოლექციას დასრულებულსა და ამავდროულად ტენდენციურს ხდიდა.



Materiel by Aleksandre Akhalkatsishvili

ალექსანდრე ახალკაციშვილის ჩვენება ზუსტად პასუხობდა მსოფლიოს დღევანდელ ტენდენციებს. ალექსანდრეს კოლექციები ყოველთვის დიდი პოპულარობით სარგებლობს უცხოურ პრესასა თუ სხვადასხვა ბაიერებში. კოლექციაში წარმოდგენილი იყო კუბოკრული ლუქები, რომელიც როგორც აღვნიშნეთ წლის მთავარი ტენდენციაა. ასევე კოლექციაში ვნახავთ ვარდისფერ და იისფერ ფერებს, რომელიც კოლექციას მეტ ჰაეროვნებასა და ქალურობას სძენს.



George Keburia

ვარსკვლავურმა დიზაინერმა გიორგი ქებურიამ კვლავ გააოცა საზოგადოება თავისი ახალი კოლექციით. მას შემდეგ რაც დიზაინერის სამოსსა და სათვალეებს უამრავი ცნობილი ვარსკვლავი ატარებს, როგორებიც არიან: დები ჰადიდები, ლედი გაგა, რიანა და სხვა, ძალიან გაიზარდა მოლოდინი საზოგადოებაში, თუ რას შემოგვთავაზებს გიორგი ქებურია. მისი შემოდგომა-ზამთარი 2018-19-ის კოლექცია მართლაც ახალი სიტყვაა ქართული მოდის ბიზნესში. კოლექცია ტრადიციულად შედგებოდა ჭრელი და ხალებიანი ლუქებისგან, რაც უკვე დიზაინერის სავიზიტო ბარათი გახდა.


Dalood

ტრადიციულად ჭრელი და მხიარული იყო Dalood-ის კოლექცია. კოლექცია დატვირთული იყო სხვადასხვა ტიპის ქსოვილითა და ხელით შესრულებული დეტალებით. განსაკუთრებული ყურადღება დაიმსახურა ნაქსოვმა სვიტერებმა და ჯინსის ქურთუკებმა, რომელიც გაფორმებული იყო ხელით ნაქარგი ყვავილებით. Dalood-ის ქალი მხიარული და ამავდროულად საქმიანია.



ნახეთ სრულად ჟურნალი "ბომონდის" ივლისის ნომერში

ივანე ქეშიკაშვილი

ზაფხულის ფერი - კლასიკად ქცეული ტენდენცია
ფერს თითოეული ჩვენგანის ცხოვრებაში ძალიან დიდი მნიშვნელობა ენიჭება. იმასაც ადასტურებენ, რომ საძინებელში თეთრეულის სწორად შერჩეული ფერი მშვიდ ძილსაც კი განსაზღვრავს. სამოსის - ყოველდღიურ გუნება-განწყობილებას.

ყველა სეზონს თავისი ფერი აქვს, შემოდგომას ალბათ ხაკისფერი, ზამთარს უფრო მუქი და ცივი ტონალობები ახასიათებს, თუმცა ზაფხულის ფერი თეთრია!

გარუჯულ კანს, ზღვას, სოფლის მინდვრებსა და ქალაქის ღამის სიგრილეს თეთრი განსაკუთრებულად უხდება.

თეთრი მაქმანები, გრძელი სიფრიფანა შეხსნილი კაბა, მოკლე ქვედაბოლო...
სასურველი და ამასთანავე ტენდენციური იმიჯის შესაქმნელად დიდი არჩევანი გაქვთ. როგორ სტილს მიანიჭებთ უპირატესობას ეს მხოლოდ თქვენზეა დამოკიდებული: სექსუალური, მინიმალისტური თუ სადა...

ივლისის ცხელ და რომანტიკულ საღამოს ზაფხულის ფერის ნებისმიერი სტილის გადაწყვეტილება მოუხდება.

ნატალია ბერიანიძე
ცხელი სეზონის ყველაზე კომფორტული აქსესუარი - საზაფხულო შლაპა
წლევანდელმა ცხელმა ზაფხულმა ახალი საზრუნავი გაგვიჩინა ქალებს. როგორი ეფექტურიც არ უნდა იყოს ბიჟუტერია, ამ სიცხეში მათი ტარება ცოტა მძიმეა.
საუკეთესო ქუჩის სტილი 2019 წლის პარიზის მაღალი მოდის კვირეულიდან
სტილი ინდივიდუალიზმის სარკეა, ამ სარკეში ჩახედვისას კი უმნიშვნელოვანესი ქვეტექსტების ამოკითხვაა შესაძლებელი. თავდაპირველად, რამ შეიძლება გვითხრას იმაზე მეტი ქუჩაში შემხვედრ უცნობ ადამიანზე, ვიდრე სამოსი გვეუბნება? ქუჩის სტილი მოდის კვირეულის განმავლობაში საუკეთესო საშუალებაა, წარუდგინო საზოგადებას შენი შინაგანი სამყარო ვიზუალური კუთხითა და იმიჯის საშუალებით.

ფოტოგრაფებისთვის, ყოველთვის უფრო სინტერესო პარიზის ქუჩის მოდაა. პარიზული კლასიკა და ტენდენციური ელემენტები დაუვიწყარ სახასიათო მიქსს ქმნიან, რომელზეც დიდი ხნის განმავლობაში ლაპარაკობენ.









TOP ჰიტი - ზაფხულის პრინტი
ზაფხულს ნებისმიერი ფერისა და ფორმის პრინტი უხდება.
ზიგზაგი-ეს შეუცვლელი პრინტია, რომელიც მოდიდან არასოდეს გადადის და თითოეული ქალის გარდერობში უნდა იყოს, თუნდაც ერთი,იქნება ეს ბოჰემური სტილის ფაროთოტოტებიანი შარვლალი, ტუნიკა კაბა, ხალათი კაბა თუ საზღვაო მოსაცმელი, არჩევანი თქვენზეა.

მოდური პრინტით ტანსაცმელს კი MISSONI და Diane Von Furstenberg-ი გვთავაზობენ. ინსპირაციისთვის კი გიტოვებთ ფოტოებს.



2018 წლის საზაფხულო ლუქები, რომელსაც სპორტული ფეხსაცმელი ძალიან უხდება
ზაფხული თავისუფლებასთან და ბევრ თავგადასავალთან ასოცირდება, ამიტომ ამ სეზონზე სპორტული ფეხსაცმელი კიდევ უფრო აქტუალურია. მოიმარაგეთ თავისუფალი სტილის სპორტული კაბები, რადგან სპორტული ფეხსაცმელების მოყვარულთათვის ეს შესანიშნავი შეხამებაა.

ჩვენ შეგირჩიეთ ლუქები, რომელსაც თუ სპორტულ ფეხსაცმელს შეუხამებთ, იდეალურ შედეგს მიიღებთ.



სადა ფერის სარაფანს კონტრასტული ფერის სპორტული ფეხსაცმელი შეუხამეთ. შეარჩიეთ ფერები, რომლებიც ერთმანეთს უხდება და დისონანსს არ ქმნის.
ცხელ სეზონს პასტელის ფერები უხდება. ლიმონისფერს იდეალურად ეხამება ლურჯი, ცისფერი და იისფერი.

თუ შავ ფერს ვერ ღალატობთ, შეარჩიეთ კომბინიზონი ფერადი პრინტის დეტალებით. სპორტული ფეხსაცმელი პრინტის ფერებთან შეახამეთ.


თუ ნეიტრალური ფერები მოგწონთ, „nude” და „ტაუპი“ -თქვენი ფერებია. ლუქი მოსაწყენი რომ არ იყოს, ერთი-ორი ტონით განსხვავებული ფერის სპორტული ფეხსაცმელი ჩაიცვით.

კლასიკის მოყვარულების იდეალური ფერები - თეთრი და შავია. თეთრი წვრილ სალტეებიანი მაისური ყოველთვის მოდურია, შორტი კი ზაფხულისთვის განუყოფელი ტანსაცმელი. ასეთ ლუქს როგორც ჭრელი, ასევე კრემისფერი, თეთრში გარდამავალი ფერის სპორტული ფეხსაცმელი ძალიან მოუხდება.

თუ ჯერ ისევ მუშაობთ და საზაფხულო შვებულება თქვენთვის არ დაწყებულა საოფისედ იდეალურია ერთი ფერის კოსტიუმი და შარვალი (ან ქვედა კაბა). ძალიან რომ არ აჭრელდეთ, მსგავს ლუქს შავი ფერის სპორტული ფეხსაცმელი შეუხამეთ.

თეთრ კაბაზე ლურჯი სპორტული ფეხსაცმელი, თეთრი ელემენტებით - იდეალური ვარიანტია. ასე გრილადაც იქნებით და კომფორტულადაც.
ამ სეზონზე ჭრელი და თამამი ფერებიც საკმაოდ აქტუალურია. ასე რომ ნუ მოერიდებით ექსპერიმენტებს. ყვითელი, ფოსფორისფერი, ჟოლოსფერი, ცისფერი, სალათისფერი - ნებისმიერი მკაფიო და ნათელი ფერის სპორტული ფეხსაცმელი გამოგადგებათ. ნებისმიერი ლუქისთვის იდეალურ ვარიანტს პირდაპირ ონლაინ შეარჩევთ, მაგრამ თუ რეალური შოპინგი გიყვართ, ვაჟა-ფშაველას 20 ნომერსა და სავაჭრო ცენტრ - „ისთ ფოინთში“ new balance-ის სპორტული ფეხსაცმელების მაღაზია გელით, ფართო ასორტიმენტით.

ბედნიერ დასვენებას გისურვებთ!


TOP 7 ყველაზე სექსუალური საცურაო კოსტიუმი, რომელიც მოდიდან არასდროს გადავა
წლის ყველაზე ცხელ სეზონზე ლამაზი და კომფორტული საცურაო კოსტიუმი ყველა ქალბატონის მთავარი საფიქრალია. უამრავი ბრენდი გვთავაზობს განსხვავებული ფორმის, სტილისა და დიზაინის საცურაო კოსტიუმების ხაზს, თუმცა ყველა მათგანი ვერ უძლებს მოდის ტენდენციურ ცვლილებებს. ხშირ შემთხვევაში გვბეზრდება კიდევაც და სეზონზე ორი თუ არა, რამდენიმე მათგანის შეძენის სურვილი მაინც გვაქვს. ამბობენ, რომ წონასთან და ვიზუალთან დაკავშირებით სანაპიროზე ყველა პრობლემა მოგვარებული იქნება თუ სწორად შეარჩევთ სასურველ საცურაო კოსტიუმს.

წარმოგიდგენთ ყველაზე პრაქტიკული და სექსუალური საცურაო კოსტიუმების შვიდეულს, რომლის ანალოგსაც მარტივად ნახავთ სხვადასხვა ბრენდის მაღაზიებში.


მოდური და პრაქტიკული  უნივერსალური სამოსი
ბოლო რამდენიმე სეზონია შორტი აქტუალურობას არ კარგავს და წამყვანი დიზაინერებიც მრავალფეროვან არჩევანს გვთავაზობენ: ტრუსი-შორტი, ბერმუდები, კაპრი…
ის შეგიძლიათ ატაროთ ყველგან: ოფისში, საქმიან შეხვედრაზე, დისკოთეკაზე, მოდის კვირეულზე, პაემანზე…

უნივერსალური დანიშნულების სამოსი ორივე სქესის წარმომადგენლებმა აიტაცეს და საინტერესო ლუქები შემოგვთავაზეს, რაც street style-ის ფოტოგრაფებს შეუმჩნეველი არ დარჩენიათ.

ეს არის მოდა კომფორტთან ასოცირებული და ცხელი ზაფხულის გრილი არჩევანი.



ნატალია ბერიანიძე