ზაფხულის ლიტერატურა

ხატვრული ლიტერატურის კითხვის დროს შექმნილი განწყობა და შთაბეჭდილებები ახალი სამყაროს კარის გასაღებს ჰგავს, რომლის ზღურბლს იქით უამრავი თავგადასავალი და თითქოს ჩვენს თავზე მოთხრობილი ამბები და შეგრძნებები იმალება.

ხშირად მიფიქრია იმაზე, თუ ვინ ვარ? რა მინდა? საკუთარი თავის ძიებაში ზოგჯერ თავიც კი დამიკარგავს. რთულია, "მე"-ს იდენტიფიცირება იმ ქაოსურ რიტმში მოახდინო, რომელსაც ყოველდღიურობა ჰქვია.

ეგოს მართვა და მასთან კომუნიაცია ხომ ძალზე რთული და თითქმის შეუძლებელიცაა, ზუსტად ეს არის ადამიანის მისია სამყაროში, გააზრებულად თუ გაუაზრებლად ეგოს სტიმულირება, მართვა და დაკმაყოფილება. ამ სამ ეტაპში
კი უამრავი ტკივილი, გაურკვევლობა, სენტიმენტები და მარტოსულობა იმალება.
ძილის წინ, როდესაც ცხელ შხაპს მივიღებთ და დავასრულებთ ხვალინდელ გეგმებზე ფიქრს, საკუთარ თავთან მარტონი ვრჩებით. ამ დროს თითქოს საკუთარი "სიშიშვლისაც" კი გვეუხერხულება.



დათა ალექსეევი

ვფიქრობ, ამაზე ინტიმური და მისტიკური მსოფლიოში არაფერი არ არსებობს. რა საინტერესოა კომუნიკაცია საკუთარ თავთან, როდესაც ბოლომდე გულწრფელი ხარ და ამაო რჩება შენი ყოველდღური რუტინის თუნდაც საჭირო მოჩვენებითობა, რომელიც მხოლოდ ძილის წინ გტოვებს. სპექტაკლის პრემიერაზე პომპეზურად გაშლილ ფარდას ჰგავს ეს ყველაფერი, ახალი შეგრძნებების ყოველდღიური პრემიერა, რომელიც დაძინებამდე ნახევარი საათით ადრე ზოგჯერ სასიამოვნო და ზოგჯერაც უსიამოვნო სცენათა დუბლებს ემსგავსება... ფაქტი კი ფაქტად რჩება, შენ მარტო ხარ საკუთარ თავთან, საკუთარ შეგრძნებებთან და საკუთარ მესთან, მაგრამ "პრემიერის" სისტემატურმა ხასიათმა მარტოობიდან მარტოსულობაში თუ გადაინაცვლა, ამას უკვე სხვა რამ ჰქვია. ძილის წინ გადაშლილი ფურცლები საკმარისია იმისთვის, რომ სამყარო და საკუთარი თავი უკეთესობისკენ შეცვალო. ემპათია სწორედ ის არის, რაც ყველას გვჭირდება. ნაცნობი შეგრძნებები, უცნობი ისტორიები, ვნება და ღელვა, ვნებათაღელვაც, რომელიც აერთიანებს კაცობრიობას, აერთიანებს ლიტერატურას და ხსნის მთავარ კვანძს არა მარტო ლიტერატურაში, არამედ ჩვენს ყოველდღიურ ცხოვრებაშიც. რატომ? პასუხი მარტივია, ჩვენთვის საყვარელი გმირები და პერსონაჟები ხომ ჩვენ გარშემო ნანახი, აღქმული და გააზრებული ადამიანები არიან, რომლებიც ჩვენთან ძალიან, ძალიან ახლოს ცხოვრობენ...

„შურისძიებას აცვია პრადა“


„ეშმაკს აცვია პრადა“ - ლორენ ვაისბერგის წიგნი, რომელმაც ეპოქა შექმნა. ფურცლებიდან ეკრანზე გადანაცვლებისთანავე ფილმი ისეთი მსახიობებისთვის გახდა წარმატებული, როგორებიც მერილ სტრიპი და ენ ჰეთეუეი არიან.

ყველას გვახსოვს ნიუ-იორკში ჩასული გოგონა, რომელიც წარმატებულ კარიერაზე ოცნებობს. მოხვდება ყველაზე მოდურ ჟურნალში და აუწყობს ფეხს ახალი ცხოვრების უცნაურ, მაგრამ საინტერესო რიტმს. ძლევამოსილი მირანდა პრისტლის როლი ფენომენალურად გენიალურია. ყველასთვის ნაცნობი სცენა ფილმის ფინალიდან ნებისმიერისთვის ერთნაირად ემოციურია, - როგორ ტოვებს ენდი მირანდას მარტო. ნუთუ ეს დასასრულია?

„არა რადგან, მირანდა პრისტლი ისევ იცვამს "პრადას", ისევ ატარებს "ჰერმესის" აქსესუარებს, მოდის ინდუსტრიაში კვლავ სუპერგავლენიანი, ძველებურად ჭირვეული, მედიდური და დაუნდობელია. ანდრეა საქსის ცხოვრებაში კი ბევრი რამ შეიცვალა - გათხოვდა საყვარელ მამაკაცზე, დედობისთვის ემზადება, საქმეშიც წარმატებულია, საკუთარი მაღალრეიტინგიანი ჟურნალი აქვს, ფინანსურად უზრუნველყოფილი და თავდაჯერებულია. და როცა ჰგონია, რომ მირანდა პრისტლის შემზარავი აჩრდილი მივიწყებას მიეცა, სწორედ ამ დროს გამოჩნდება იგი! ეშმაკი შურის საძიებლად ბრუნდება!“


„ცდუნება“


არსებობს თუ არა წარმატებული კარიერა და უანგარო სიყვარული ერთდროულად? ხშირია, როდესაც ადამიანს ვნებები მართავს და ავიწყებს ღირებულებებს. "ცდუნება" - ეს არის წიგნი სიყვარულზე, ურთიერთობებზე, ღალატსა და ყველასთვის ნაცნობ შეგრძნებებზე (ავტორი ნათია ჯადოგნიშვილი).

„ხელოვანი გოგონასა და წარმატებული საქმიანი კაცის სასიყვარულო ურთიერთობა ძლიერ ვნებაზეა დამყარებული. ამ ორი ადამიანიდან ერთისთვის მთავარია თავისუფლება და ძლიერი, რომანტიკული გრძნობა, ხოლო მეორისთვის - საკუთარი ბიზნესინტერესები. როგორი გაგრძელება შეიძლება ჰქონდეს ასეთ სიყვარულს? სასწორის მეორე მხარეს კი არის ურთიერთობა, დამყარებული სულიერ სიახლოვეზე, მზრუნველობასა და უანგარო სიყვარულზე. ძალიან რთულია, გააკეთო სწორი არჩევანი, ძნელია, გაუძლო ცდუნებას... ეს არის წიგნი სიყვარულზე, ღალატზე, ურთიერთობებზე, ვნებასა და საკუთარი თავის ძიებაზე... წიგნში სადავო და რთული საკითხებია წამოჭრილი - როგორ უნდა მოიქცე, როცა საყვარელ ადამიანთან ბედნიერად ცხოვრობ, მაგრამ მოულოდნელად ძველ სიყვარულს შეხვდები? შეძლებ, გაუძლო ცდუნებას? რა უფრო ძლიერია - ვნება თუ სიყვარული?"


„სიყვარულით, როზი“



რთული გასააზრებელია, ხედავდე ადამიანს და ვერ ამჩნევდე, რომ ერთმანეთისთვის ხართ შექმნილი. თითქოს სრული ნიჰილიზმი უნდა იყოს მისი გაუჩინარება შენი ცხოვრებიდან, მაგრამ ამას ვერ იაზრებდე ისე, როგორც საჭიროა („სიყვარულით, როზი“,ავტორი: სესილია აჰერნი).

"როზი და ალექსი ერთმანეთისთვის არიან შექმნილი. ეს ყველამ იცის, მათ გარდა... ბავშვობიდან განუყრელი მეგობრები იყვნენ, მაგრამ დრო გავიდა, გაიზარდნენ და დამოუკიდებელი ცხოვრების გზას დაადგნენ. ალექსი დუბლინიდან ბოსტონში გადადის და ჰარვარდის უნივერსიტეტის სტუდენტი ხდება. როზისაც დიდი გეგმები აქვს – ისიც ბოსტონში ისწავლის, ბავშვობის მეგობრები ისევ ერთად იქნებიან, მაგრამ... ერთი მცდარი ნაბიჯი და, ორივეს ცხოვრება იცვლება... როზი უკვე მარტოხელა დედაა, მარტოს უწევს უამრავი დაბრკოლების გადალახვა. წლების განმავლობაში მათ სატელეფონო, საფოსტო და უფრო ხშირად კი ონლაინკავშირი აქვთ, ერთმანეთს უზიარებენ თავიანთ დარდსა თუ სიხარულს, ანუგეშებენ, დროდადრო ჩხუბობენ კიდეც, ხანდახან ერთმანეთსაც სტუმრობენ. და თითქოს რაღა შეიძლება მოხდეს იმ ადამიანების ცხოვრებაში, რომლებმაც უკვე გამოცადეს უიღბლო ქორწინება და განშორება, იმედგაცრუება და ღალატი... მაგრამ ეს მხოლოდ – თითქოს..."



like
2

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.