პანკი და გლამური

ამერიკა მისთვის ახალი და საინტერესო ცხოვრებით დაიწყო. ჯერ კიდევ მოზარდი გოგონა უდიდეს მეგაპოლისში, ნიუ-იორკში ჩავიდა, სადაც ერთ-ერთ პრესტიჟულ სკოლაში გაკვეთილებთან ერთად ენის ათვისებაზეც უწევდა მუშაობა.

მიზანდასახული და შრომისმოყვარეა, რაც გადამწყვეტი ფაქტორი აღმოჩნდა მის წარმატებულ კარიერაში. პროფესიით მეიქაპ არტისტი მარი გევორქოვა საუკეთესო კოსმეტიკის პროფესიონალური ხაზის, Mac-ის წარმომადგენელია, - ნიუ-იორკის Mac-ის მაღაზიათა ქსელის მენეჯერი.

მარი:
- 16 წლის ვიყავი, როცა ამერიკაში გადავედი საცხოვრებლად. სწავლა High School -ში დავიწყე. თბილისში ფრანგულ ენას ვეუფლებოდი. ისე გამოვიდა, რომ ენის შესწავლაც კი ნულიდან დავიწყე. ამის გამო სწავლის პერიოდი

გამიხანგრძლივდა. მეგობრებთან პრაქტიკული ურთიერთობით ენას კარგად დავეუფლე. სკოლა დავამთავრე თუ არა `კინო-ტელევიზიის მაცკე უპ~ სკოლაში ჩავაბარე, სადაც სპეცეფექტებს მასწავლიდნენ.

- საინტერესო სფეროა. ამერიკულ კინოინდუსტრიას ამ მიმართულებით დიდი გამოცდილება აქვს. სკოლაში რას გასწავლიდნენ?
- ეს სფერო თავად მაინტერესებდა. ოთხი დიპლომი მაქვს, რომელიც სხვადასხვა დონის სპეცეფექტებში, ნიღბებსა თუ კლონებზე მუშაობაში ავიღე. ყველაზე დაბალ საფეხურზე პატარ-პატარა ჭრილობას და დაჟეჟილობას ვეცნობოდით. მეოთხე საფეხურზე უფრო რთულ გრიმზე ვმუშაობდით. ცალკე ვძერწავდით ნიღბებს, ვამუშავებდით ლატექსზე, შემდეგ სპეციალურ ღუმელში ცხვებოდა მონსტრების, ზომბების ნიღბები. ლაბორატორიაში საათობით ვმუშაობდით თითოეულ ნიუანსზე. პარალელურად ბიუტის და ფეშენსაც გავდიოდით, თუმცა ეს სფერო ნაკლებად მაინტერესებდა. სკოლის დამთავრებამდე, ერთი თვით ადრე Mac-ის მაღაზიათა ქსელში დავიწყე მუშაობა. 9 წელია ამ კომპანიის თანამშრომელი ვარ. ახლა Mac-ის ერთ-ერთი მაღაზიის მენეჯერის პოზიცია მიკავია.

-ადვილი იყო მსოფლიოში ცნობილი მარკის მაღაზიათა ქსელში მუშაობის დაწყება?
-ამ კომპანიაში შემთხვევით მოვხვდი. პროდუქციის შესაძენად შევედი და ვაკანსიის შესახებ ვიკითხე. გამიმართლა, მაშინვე ინტერვიუ ჩამომართვეს. ამდენი წელია ამ კომპანიაში ვმუშაობ და შემიძლია ვივარაუდო რატომ დაინტერესდნენ ჩემით. ამ კომპანიაში დიდ მნიშვნელობას ანიჭებენ თანამშრომლის იმიჯს, მის ინდივიდუალურობას. კარგად უნდა გესმოდეს ფეშენი, ამავდროულად, გამორჩეული, მკვეთრი სტილი უნდა გქონდეს. ნიუ-იორკის Mაც-ის სტაფს რომ გადახედოთ, ყველას ინდივიდუალური სტილი და ხასიათი აქვს.

-გარდა იმისა, რომ Mac -სილამაზის სფეროში ლიდერი კომპანიაა, კიდევ რა ფაქტორმა განსაზღვრა თქვენი ამ კომპანიით დაინტერესება?
-მუდმივად სწავლის და განვითარების პროცესში ხარ. Mაცკე უპ არტისტებს ტრენინგები და სემინარები გვიტარდება, რომ სიახლეების კურსში ვიყოთ. რა პროდუქციაც უნდა გამოვიდეს ბაზარზე, ექვსი თვით ადრე ვიცით და შესწავლილი გვაქვს. ტრენდებშიც სულ სიახლეებია, ამდენად არასდროს სრულდება ეს პროცესი. ვერასდროს იტყვი, რომ ყველაფერი იცი.

-როგორც ჩანს, თანამშრომლების სტილს განსაკუთრებულ ყურადღებას უთმობენ. როგორი იყავით მაშინ?
-ყოველთვის ინდივიდუალურ სტილზე ვიცვამდი. ჩემი ძმა მოდის სფეროში საქმიანობს, დიზაინერია და ამ გარემოში ვარ გაზრდილი. უკომპლექსო ადამიანი ვარ, სიახლეები მაინტერესებს. ინტერვიუდან მეორე კვირას სამუშაოდ დამიბარეს. იმ გარემოებამ მომხიბლა, რომ კომპანია ინდივიდუალურობის გამოხატვის საშუალებას მაძლევს. საკუთარ შესაძლებლობებს მაქსიმალურად ვავლენ. ჩვენი კლიენტები შაბლონურად არ გამოიყურებიან, ინდივიდუალურობით გამოირჩევიან. ამასთან, ბევრი საინტერესო მიმართულება გვაქვს, რაც საზოგადოებამ არ იცის. მაგალითად, გვაქვს ერთი ხაზი, რომლის რეალიზაციიდან შემოსული თანხის 100 პროცენტს შიდსით დაავადებულ ქალთა ფონდში ვრიცხავთ. ამიტომ ბევრი ვარსკვლავი სიამოვნებით თანამშრომლობს ჩვენს კომპანიასთან. თან ნიუ-იორკში ვცხოვრობ, აქ ვმუშაობ და ჩვენს მაღაზიაში ხშირად შემოდიან ცნობილი არტისტები. იქ ძალიან ბუნებრივი და ჩვეულებრივი თემაა, მაკიაჟის გარეშე, ბუნებრივად, ჯინსსში ან სპორტულ სამოსში გამოწყობილები რომ შემოგვივლიან, აზრს გვეკითხებიან პომადასა თუ სხვა პროდუქციაზე. ისინი ხშირად ვერც მიცნია. ამ მხრივ, ყოველი დღე სიურპრიზებით სავსეა. გვყავს მეიქაპ არტისტები, რომლებიც სელებრითებთან პროფესიონალურ მაკიაჟზე მუშაობენ.

სელებრითები კარგად გამოიყურებიან, რაც macke up არტისტების დამსახურებაც მგონია. საზოგადოებაში ისინი ყოველთვის სხვადასხვა იმიჯით ჩნდებიან. თქვენი აზრით, ყველაზე საინტერესო იმიჯი რომელ არტისტს აქვს?
-როცა ამ სფეროში პროფესიონალი ხარ, ადვილია იმიჯების შეცვლა, ახლის შექმნა. მათთვის საუკეთესო მეიქაპ არტისტები მუშაობენ. მაგალითად, ზოგს აქცენტი წარბზე აქვს გადატანილი და ეს იმიჯი მისია. მიყვარს ემი ვაინჰაუსი. ერთი შეხედვით ხომ ზედმეტად დიდ, არაპროპორციულ `ისრებს~ იკეთებდა, მაგრამ ვთვლი, რომ უხდებოდა, რომელიც მის ხასიათს უსვამდა ხაზს. ეს გახლავთ ჩემთვის მაკიაჟის დანიშნულება. შემიძლია გითხრათ, რომელი სელებრითის იმიჯზეა მოთხოვნა, ანუ რომელს ბაძავენ. მაგალითად, ქიმ ქარდაშიანის მაკიაჟზეა ყველაზე დიდი მოხოვნა. ეს გახლავთ ნატურალურ, ბუნებრივ ფერებში გადაწყვეტილი მაკიაჟი. ამ დროს ბუნებრივი არაფერია. იყენებს რუჯის ეფექტს, რაც ბევრ ქალბატონს მოსწონს.

- როცა ქალბატონი ითხოვს ქიმ ქარდაშიანის მაკიაჟს, მას რას სთავაზობთ?
- ეს ნიშნავს, რომ უნდათ: ყავისფერი, უფრო ბრინჯაოსფერი, ან ოქროსფერი შეფერილობის თვალის ჩრდილი, გრძელი წამწამები, წარბზე გადატანილი აქცენტი. კანი აუცილებლად ბრინჯაოთი უნდა იყოს შეფერილი. გამოკვეთილი უნდა ჰქონდეს კონტურები და ტუჩი უნდა ჰქონდეს ხორცისფერი. მომწონს ბევრი ანდერგრაუნდ მეიქაპ არტისტები, რომლებიც მაგრები არიან, მაგრამ არ ჩანან. მათ თავიანთი არხები აქვთ, სადაც მუშაობენ. ძირითადად, "ინსტაგრამზე" შეხვდებით მათ ნამუშევრებს. საოცარი ნამუშევრები აქვთ. ყველას თავისი, ინდივიდუალური სტილი აქვს. ზოგიერთის ძლიერი მხარე კარგი წარბია. ზოგის ნატურალური ლუქები, ზოგი საოცრად პროპორციულ კონტურებს აკეთებს. იმდენად დიდი ოსტატები არიან, სახის აბსოლუტური რეკონსტრუქცია შეუძლიათ.

- თავად როგორ მაკიაჟს იკეთებთ?
- ყოველდღე ახალ ტექნიკას ეუფლები, თუნდაც კოლეგის მუშაობის პროცესი ყურებით. ერთმანეთისგან ბევრს ვითვისებთ. რაც შეეხება ჩემს იმიჯს, ვინც მიცნობს, იცის, მათ შორის ჩემმა კოლეგებმაც, რომ ჩემი სტილის ნაწილია ღია ტუჩის ფერი და შავი, წითელი აგურისფერში გარდამავალი ჩრდილები, ან შავი ტუჩი და შავი `ისრები~. ეს გახლავთ ჩემი ყოველდღიური ლუქი, რომელიც მომწონს. შეღებვის პროცესი მიყვარს. შემიძლია ჩვეულებრივ დროზე ერთი საათით ადრე გავიღვიძო, რომ წყნარად დავისხა ყავა და შევუდგე მაკიაჟის კეთების პროცესს.

- ნიუიორკელი ქალბატონები როგორ მაკიაჟს ანიჭებენ უპირატესობას?
- ნიუ-იორკში ერთნაირად შეღებილ ქალბატონს ვერ ნახავთ, რაც მომწონს. იქ ტრენდად ითვლება ის, რაც მას უხდება და მოსწონს. რადგან ყველას სადღაც ეჩქარება და დროში შეზღუდულები არიან, ნატურალურად გამოიყურებიან. არის ის კატეგორიაც, ვისაც მაკიაჟი არ აინტერესებს. ამავდროულად, შეხვდები გოგონას, რომელსაც მკვეთრი პასტელის ფერებში გადაწყვეტილი მაკიაჟი უსვია, ყველაფერი ერთად: დაყენებული წარბი, `ისრები~, წითელი პომადა და ფერადი ჩრდილები. რასაც ნიუ-იორკის ქუჩებში ვერ შეხვდებით, ეს შაბლონურობაა. ყველა რაღაცით გამორჩეულია. როცა პროდუქციის შესაძენად შემოდიან ქალბატონები, ყოველთვის ვეკითხები დილით რამდენ ხანს ანდომებენ მომზადებას. როცა ადამიანი დაკავებულია და სამსახურში მიიჩქარის, მარტივად მოსახმარ პროდუქციას ვურჩევთ.

- ამ მხრივ რა ტენდენცია შეინიშნება თბილისის ქუჩებში, რაც თქვენს მზერას არ გამოეპარა?..
- ვისურვებდი, რომ ჩვენი ქალბატონები მეტად გახსნილები იყვნენ. ცოტა არაორდინარულები, რაც მათ ინდივიდუალურობას გაუსვამს ხაზს. შეიძლება ასეც ითქვას, რომ ზედმეტად თავშეკავებულები არიან. ვერ ვხედავ თბილისში გიჟურ, რისკიან მაკიაჟს, მრავალფეროვნებას. თუმცა ისიც მომწონს, რომ ჩვენს ქალბატონებს მოწესრიგებული კანი აქვთ და ნატურალურობაზე აქვთ აქცენტი.

- ხშირად ახერხებთ თბილისში ჩამოსვლას?
- სამსახურის გამო ხშირად ვერ ჩამოვდივარ. მიყვარს საქართველოს ბუნება, სიმწვანე, თბილისის არქიტექტურა. განსხვავებული და ლამაზი ქალაქი გვაქვს. მომწონს ჩვენი არასტანდარტული სახლები, ვიწრო ქუჩები, რაც განსხვავებულია ნიუ-იორკისგან. მიუხედავად იმისა, რომ ნიუ-იორკიც მიყვარს და ვთვლი, რომ უმაგრესი ქალაქია. მენატრება ჩვენი კულტურა, კერძები. დაუსრულებლად შემიძლია საქართველოზე ლაპარაკი.

- მოგვიყევით პროექტის შესახებ, რომელზეც ასევე საინტერესო მეიქაპ არტისტთან, ლანა მატახერიასთან ერთად იმუშავეთ?
- ლანასთან ვმეგობრობ და ძალიან მიყვარს. ვთვლი, რომ პროფესიონალი, საუკეთესო მეიქაპ არტისტია. პროექტზე მუშაობა რომ შემომთავაზა, დავინტერესდი. ეჭვიც არ შემპარვია, რომ კარგი პროექტი გამოვიდოდა. მინდა მადლობა გადავუხადო, რომ ჩემს ქვეყანაში საკუთარი შესაძლებლობების გამოვლენის საშუალება მომცა. საკმაოდ არაორდინარულ თემას შევეხეთ, - გლამურისა და პანკის სინთეზს. ეს სტილი მე მახასიათებს. ყოველთვის მინდოდა ისეთ პროექტზე მემუშავა, სადაც ჩემს ხასიათს წარმოვაჩენდი. ამაში დარწმუნდება "ბომონდის" ერთგული მკითხველი და ვფიქრობ, რომ მოეწონება.

ქეთი დარჩია

ჟურნალი "ბომონდი"

like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.