7 Days Looks: ქართველი მოდის ბლოგერი, სალი ბააზოვი მოდისა და სტილის შესახებ

ყოველთვის ყურადღების ცენტრში ექცევა, რადგან გამორჩეულია დახვეწილი გემოვნებით და სტილის შეგრძნებით.

სალი ბლოგერია. კარგად ერკვევა მოდის მიმდინარეობებში და თავის მოვლის საშაულებებში. ბლოგში აქტიურად განიხილავს ტენდენციებს და საინტერესო რჩევებს გვთავაზობს. მისი ბლოგი გემოვნებიანი ქალბატონებისთვის ნამდვილი გზამკვლევია.

- დიდი ხანია რაც მოდის სფერომ დაგაინტერესათ?
- ბავშვობიდან ვხატავ, ამიტომ მშობლებმა სამხატვრო კოლეჯში მიმიყვანეს, სადაც ჩემზე ასაკით უფროს სტუდენტებს მეზობელ აუდიტორიაში მოდაზე ლექციები უტარდებოდათ. დღესაც მახსოვს ის შეგრძნება, პირველად რომ მოვხვდი მათ აუდიტორიაში. ის ესკიზები, რომლებზეც გოგონები მუშაობდნენ. ამის შემდეგ მათთან ჩემი ვიზიტი სულ უფრო გახშირდა.

ყველაფერს დეტალურად მიხსნიდნენ - რატომ აკეთებდნენ, როგორ მუშაობდნენ და რა იყო ამ ყველაფრის მიზანი. განსაკუთრებით ერთი გოგოს ესკიზები და შეკერილი სამოსი მომწონდა. მას მონიკა ერქვა. ჩემზე გაცილებით უფროსი იყო. ისე მოხდა, რომ მე და მონიკა დავმეგობრდით.

 

ამასობაში გავიზარდე. მეტი ცოდნა შევიძინე. მონიკამ სამხატვრო აკადემიაში ჩააბარა მოდის დიზაინზე. ჩემთან სახლში ბევრი ღამე გაგვითენებია ხალიჩაზე გაშლილი ნაჭრებით, რომელსაც დილით სხვადასხვა სამოსის ფორმა ჰქონდა მიღებული. ძალიან შემიყვარდა ეს სფერო და ზუსტად ვიცოდი, რისი კეთება მსურდა. შევიძინე ჩემთვის საინტერესო ლიტერატურა და ამბიცია გამიჩნდა, რაც შეიძლება მეტი მცოდნოდა მოდის შესახებ, რომელიც მარტო ლამაზად ჩაცმა-დახურვას აღარ ნიშნავდა ჩემთვის.



- როგორ გეცვლებოდა გემოვნება?
- არ მიყვარს ერთფეროვნება, არ მაქვს ერთი კონკრეტული სტილი და ნებისმიერი სამოსი შემიძლია მოვირგო. ნებისმიერ ახალ ტენდენციას ისე მოვირგებ, რომ კომფორტულად ვიგრძნობ თავს. რაც მთავარია, ეს არ იქნება ხელოვნური. გემოვნება ასაკთან ერთად მეცვლება და ეს პროცესი გარდაუვალია ნებისმიერი ადამიანისთვის.

- რა არის თქვენთვის სტილი?
- სტილი არაცნობიერის არჩევანია, რომელიც ჩვენს შინაგან სამყაროს, მსოფლმხედველობას წარმოაჩენს. თუ მოდა გამოხატავს სხვის ხედვას ამა თუ იმ საკითხის მიმართ, სტილი საკუთარი პერსონის გამოხატულებაა. იგი განსაზღვრავს ჩვენს პერსონას, ისე, როგორც გვინდა დაგვინახოს საზოგადოებამ. თუმცა, სტილი მხოლოდ სამოსის საშუალებით არ გამოიხატება, ის დამოკიდებულია ადამიანის ქცევაზე, ზოგადად ცხოვრების წესზე.



- როგორ მეტყველებს ჩაცმის კულტურა ადამიანზე?
_ ჩაცმის კულტურა ადამიანის შინაგან სამყაროს განსაზღვრავს. რაც შეიძლება მისი წარმატების ან წარუმატებლობის მიზეზი გახდეს.

- რა გიყვარს მოდაში?
- სიგიჟე! იმ საზღვრების დარღვევა, რომელშიც ადამიანები ცხოვრობენ. არასტანდარტულობა და დიდი დოზით თავისუფლება.

- როგორია თქვენთვის იდეალური დღე?
- იდეალური დღე, აუცილებლად უნდა იყოს საქმიანი და პროდუქტიული. რომელიც მომავალი წარმატებისთვის წინ გადადგმული ნაბიჯი იქნება.

-ერთი ჩვეულებრივი დღე. მომიყევით თქვენს ყოველდღიურ რიტუალებზე?
- დილით - ჩვენი ძაღლების, ბარბისა და ბიბის თამაში, რომელიც აღვიძებენ გიგის. მათი თამაში, როგორც წესი, ჩხუბით სრულდება და მე და გიგი მათი გაშველებით ვფხიზლდებით. ხალათი ჩემთვის დილის განუყრელი აქსესუარია. ადგომისთანავე ვრთავ ჩაიდანს ყავისთვის და ბარბის და ბიბის საჭმელს ვაცხელებ. მხოლოდ ამის შემდეგ ვიღებ აბაზანას. ეს ჩემი დილის განუყრელი ნაწილია. რაც შეეხება დანარჩენ დღეს, ჩემი ყოველი დღე იმდენად დაუგეგმავია, რომ კონკრეტული განრიგი არ მაქვს.



- სახლის საქმე გიყვართ?
- სახლი ჩემი სუსტი წერტილია. აუცილებლად ყველაფერი იდეალურად უნდა იყოს დალაგებული და დახარისხებული, რაზეც ყოველდღიურად ვზრუნავ. ვერაფრით ვერ გავჩერდები არეულ ოთახში და ვუყურებ, მაგალითად, ფილმს. ანუ, ამით იმის თქმა მინდა, რომ ჩემს კომფორტს განსაზღვრავს წესრიგი. შესაბამისად, დალაგება ჩემი საყვარელი საქმიანობაა.

 - კერძების მომზადება თუ გეხერხებათ? საუკეთესო კერძი?..
- სახლში ერთადერთი ადგილი სამზარეულოა, რომელშიც ”ტრიალი” არ მიყვარს. იშვიათად ვამზადებ რაიმე კერძს, რომელიც აუცილებლად ჩემი მოგონილი იქნება. ყველაფერი უნდა იყოს უცხიმო და სასარგებლო. ამიტომ, სამზარეულოში ძირითადად გიგი ფუსფუსებს, თან კარგი კულინარია.



- რა პრინციპით შეარჩიე სამოსი სესიისთვის? რომელიმეზე თუ გქონიათ საინტერესო შოპინგი?
- ლუქების აწყობა და შეხამება ჩემი საყვარელი საქმეა. მსგავსი სესიების დროს ვითვალისწინებ ლოკაციას, ამინდს და თემატიკას. ჩემი გარდერობის 97% ფერადია. იშვიათად ვიცვამ შავ სამოსს. ასეთი გამონაკლისის შემთხვევაში სხვა ფერის დეტალები უნდა გამოიკვეთოს ან რაიმე აქსესუარს ვიყენებ, რომელსაც სხვა ტონალობა შეაქვს.



- მოგვიყევით თქვენი ბლოგის შესახებ. რა თემებს განიხილავთ?
- ჩემი ბლოგი 2 წელია, რაც ინტერნეტსივრცეში არსებობს.
ძირითადი თემები მოდა და სილამაზეა, რომელიც ითვალისწინებს როგორც რჩევებს, ასევე კონკრეტულ რეცეპტებს. თემებს ხშირ შემთხვევაში ირჩევს მკითხველი, ანუ მათთვის საინტერესო კითხვებით ვამზადებ პოსტს. რომელიც შეძლებისდაგვარად ამომწურავია და მათთვის საინტერესო კითხვებს პასუხობს. ხშირად ვაწყობ სხვადასხვა ტიპის გათამაშებას, რომელსაც ინსტაგრამისა და ფეისბუქის გვერდზე ვაანონსებ. ვინც პირველი უპასუხებს, ისაა გამარჯვებული. მალე სიახლეც გვექნება. ბლოგს დაემატება ახალი, ონლაინგაყიდვების უჯრა, სადაც მომხმარებელი ცისფერი თიხის შეძენას შეძლებს. ჩემს მკითხველს ყოველთვის რაღაც ახალსა და საინტერესოს ვთავაზობ.



- როგორ ხვდებით ახალ წელს?
- ახალი წელი დიდად არ მიყვარს. თუმცა, მომწონს წინასაახალწლო განწყობა. განსაკუთრებით ნაძვის ხის აწყობა მიზიდავს. დედა ნაძვის ხეს აწყობს, მე კი სახლს ვაფორმებ. ამის შემდეგ იწყება ჩემთვის ყველაზე სასიამოვნო საქმიანობა - ახლობელი ადამიანებისთვის საჩუქრების შეძენის, ლამაზად შეფუთვისა და ნაძვის ხის ქვეშ დაწყობის პროცესი.

ქეთი დარჩია

ჟურნალი ”ბომონდი”

იანვრის ნომერი

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.