ნინო კუზანოვა: ჩვეულებრივი Workaholic მოდური აქცენტებით

მთავარ თვისებად მხოლოდ ერთ სიტყვას ასახელებს – Workaholic, რომელიც ითარგმნება როგორც "შრომისმოყვარე", თუმცა გაცილებით აღმატებულ ფორმას გულისხმობს.

ადრეულ წლებში, მშობლების მიერ ჩანერგილი ჩვეულება დღესაც საათივით მუშაობს, - როცა გაჩერებულია, დანაშაულის შეგრძნება ეუფლება, ჰგონია, რომ რაღაცას აშავებს. შრომა მისი ჩვეული მდგომარეობაა, ამიტომ ბევრს ასწრებს: პროფესიით კარდეოლოგ-რეანიმატოლოგია, პარალელურად ტელეკომპანია "იმედის" შოუს, Prime Show ერთ-ერთი წამყვანია.

ამავე ტელეკომპანიაში სამედიცინო სფეროზე გადაცემის წაყვანასაც გეგმავს. ნინო ნადირაძე-კუზანოვაზე მოგახსენებთ, რომელიც ყოველთვის საზოგადოების ყურადღების ცენტრშია. ჰყავს ბევრი თაყვანისმცემელი, - პაციენტებისთვის საყვარელი ექიმია და არაერთი ადამიანის სიცოცხლე გადაურჩენია, ხოლო

მაყურებლისთვის დახვეწილი იუმორის მქონე არაჩვეულებრივი ქალბატონია.



ნინო ნადირაძე-კუზანოვა:


- ვერ ვიტყვი, რომ პროფესია ოჯახის ტრადიციიდან გამომდინარე ავირჩიე, - მამა მათემატიკოსია, დედა ეკონომისტი. რატომღაც, ექიმის პროფესია რომანტიკულად მეჩვენებოდა, დღემდე ასეა. ერთი პერიოდი სამხატვრო აკადემიაში ჩაბარება მინდოდა, მაგრამ ჩემმა პრაგმატულმა გონებამ სრულიად სხვა გადაწყვეტილება მიმაღებინა. ოჯახის წევრებმაც მირჩიეს, ხატვას არავინ გიშლის, ჯერ პროფესია აირჩიეო. გადაწყვეტილების მიღებაში ტექნიკური უნარები, გონება და ადამიანის სიყვარული დამეხმარა, რადგან ვთვლი, თუ ადამიანი არ გიყვარს, ექიმობა დანაშაულია. არასდროს მინანია ეს გადაწყვეტილება.


- კარდიოლოგია ერთ-ერთი რთული მიმართულებაა და რატომღაც, მამაკაცურ საქმეს უკავშირებენ...…


- მიმაჩნია, რომ სამედიცინო სფეროში ყველა მიმართულება თავისებურად რთულია. ცხოვრებაში არასდროს მიძებნია იოლი გზები. კარდიოლოგია არ უკავშირდება ერთჯერად ავადმყოფობას, რომელსაც მკურნალობით მოარჩენ. როცა ადამიანს გულთან დაკავშირებული პრობლემები აქვს, ხანგრძლივი დროის განმავლობაში სჭირდება მკურნალობა. ამიტომ ჩემს პაციენტებთან ამასობაში მეგობრული, ახლო დამოკიდებულება ჩამომიყალიბდა. ჩემთვის ეს ურთიერთობები ძვირფასია და ბევრს ნიშნავს.


- გქონიათ პროფესიის არჩევანში დაეჭვება, როცა სირთულეებს წააწყდით?


- არასდროს. ყოველთვის მაინტერესებდა როგორი რეაქცია მექნებოდა პაციენტის გარდაცვალებაზე. ვფიქრობდი, რომ ეს ისეთი სტრესი იქნებოდა, შეიძლება ამ პროფესიაზე უარიც მეთქვა. როცა ასეთი რამ მოხდა, ჩემდა გასაკვირად, მშვიდად მივიღე. მაშინ ძალიან ახალგაზრდა ვიყავი. იმ ადამიანის გარდაცვალება იმდენად ლოგიკური იყო, თითქოს შეგუებულიც ვიყავი და ღამის მორიგეობის გაგრძელებაც კი შევძელი.


- ექიმებში ალბათ არსებობს თავდაცვითი რეფლექსი, რომ სტრესისგან პაციენტად არ იქცე?


- ექიმების სიცოცხლის ხანგრძლივობა, სხვა პროფესიის ადამიანებთან შედარებით ხანმოკლეა, სიცოცხლისთვის საშიშ პროფესიადაც ითვლება.


- თავდაცვითი მექანიზმები როდის ყალიბდება?


- ასაკსა და დიდ პრაქტიკასთან ერთად ყალიბდება. ყველაფერს ეჩვევა ადამიანი. ამას თუ არ მიეჩვევა ექიმი, განწირული იქნება. ამასთან, ექიმს ემოციამ არ უნდა სძლიოს. ყოველთვის მობილიზებული უნდა იყო.


- თქვენს ფეისბუქგვერდზე ხშირად გწერენ პაციენტები, რომ სიცოცხლე აჩუქეთ...


- ასეთი შემთხვევები ხშირია. მეამაყება, რომ ისინი ბევრნი არიან.


- თქვენი პირველი სამსახური...


- ინსტიტუტი რომ დავამთავრე, მუშაობა მაშინდელი "ლეჩკომბინატის" კარდეოლოგიურ განყოფილებაში დავიწყე. საკმაოდ დიდხანს ვიმუშავე და კარგი პრაქტიკა მივიღე. სამსახურებს ხშირად არ ვიცვლიდი. კოლექტივის ცვლა მიმძიმს. მოგვიანებით "ლეჩკომბინატი" გაიყიდა და ამის გამო შევიცვალე სამსახური. შემდეგ მუშაობა კლინიკა "ლანცეტში" გავაგრძელე, ვიყავი კლინიკური დირექტორი და კარდეოლოგიური დეპარტამენტის ხელმძღვანელი. კლინიკის მეპატრონესთან უთანხმოების გამო სამსახურიდან წამოვედი.
- როგორი თვისებები უნდა ჰქონდეს ექიმს?


- არასდროს უნდა დაისვენო. მუდმივად სიახლეების კურსში უნდა იყო. განსაკუთრებით თანამედროვე სამყაროში, როცა სიახლეები ელვის სისწრაფით იცვლება. ასევე, პაციენტის პრობლემა გულთან ახლოს უნდა მიგქონდეს, არ უნდა განასხვავებდე მათ პირველხარისხოვან და მეორეხარისხოვან პაციენტებად. და რაც მნიშვნელოვანია, კოლეგისთვის კითხვის დასმა არასდროს უნდა გეშინოდეს. ბევრს ახასიათებს თვისება, რომ იხტიბარს არ იტეხენ და შეცდომას მაშინ უშვებენ. არასდროს უნდა დაივიწყო, "ერთი თავი კარგია, მაგრამ ორი – უკეთესი".


- ერთი თემის სხვადასხვა მხარეს წარმოვადგენთ. ჩვენთვის, არაექიმებისთვის კლინიკა უსიამოვნო ღელვას უკავშირდება. თქვენთვის კი საყვარელ პროფესიას.


- ეს კარგად მესმის და, ვცდილობ, ყოველთვის გაღიმებული ვიყო. კოპებშეკრული არასდროს ვხვდები პაციენტს, რომ მეტი სტრესი არ მივაყენო. თუმცა, სიმართლეს არასდროს ვუმალავ.

- როგორ იქცევით მაშინ, როცა პაციენტს უიმედო მდგომარეობა აქვს?


- ეს ის შემთხვევაა, როცა ვტყუი. ახლობლებს სიმართლეს ვაგებინებ. ვერ ავეწყვე დასავლურ მიდგომას, არ შემიძლია პაციენტს ვუთხრა, რომ 1-2-3 თვის სიცოცხლე დარჩა. ჩემთვისაც მძიმეა, როცა ვერ ვშველი.


- ლოგიკური იქნებოდა, რომ შეგეცვალათ მიმართულება და ესთეტიკურ მედიცინაში გადასულიყავით.


- ვთვლი, რომ ქირურგია მაინც მამაკაცური საქმეა. არ არის აუცილებელი ცოლ-ქმარი ერთ სფეროს ემსახურებოდეს. თან ეს მიმართულება მიყვარს. სხვათა შორის, ჩემი მეუღლე და მამამთილი ჩემი პაციენტები არიან. გუგაც კმაყოფილია, რომ კარდიოლოგი მეუღლე ჰყავს, ასე უფრო მშვიდადაა. მე მის ჯანმრთელობაზე ვიზრუნებ, ის ჩემს გარეგნობაზე, რაც იდეალური თანხმობაა.


- შვილები აპირებენ ტრადიციის გაგრძელებას?


- ბაია მომავალი სტომატოლოგია. ძალიან მოქნილი ხელები აქვს, ვფიქრობ მისგან საუკეთესო სტომატოლოგი დადგება. ეს ნიჭი ალბათ გენეტიკასაც უნდა "დავაბრალოთ". ვნახოთ, ივიკო რა გზას აირჩევს. ჯერ გადაწყვეტილება არ მიუღია. შეიძლება პლასტიკური ქირურგიც გახდეს. ჯერ 13 წლისაა.


- ვისაუბროთ თქვენს სტილზე. როგორ იცვლება თქვენი სტილი?


- სამსახურშიც ვცდილობ ქალურობის შენარჩუნებას. მოუწესრიგებელი არასდროს ვარ, არც შინ, არც სამსახურში. მიყვარს ყველანაირი სტილის სამოსი. თუმცა ვერასდროს ჩავიცვამ ქუსლიან ფეხსაცმელზე სპორტულ შარვალს, ვერც მაღალქუსლიან სპორტულ ფეხსაცმელს, მაგალითად ბოტასს. რაც უნდა ტრენდული იყოს, არ შემიძლია.


- თქვენი სტილი ხშირად იცვლებოდა?


- ასაკთან ერთად ბევრ დათმობაზე წავედი. ისე ხშირად ვერ ვიცვამ მოკლე ქვედაკაბას, ვერც სხეულზე ზედმეტად მომდგარ შარვალს. ის, რასაც ახალგაზრდა ასაკი იტანს, 40 წლის ზევით სასაცილოდ ჩანს. ვცდილობ თავდაჭერილი ვიყო.
- სოციალურ ქსელში ხშირად დებთ ფოტოს შოპინგის მერე. როგორც ვხვდები ეს პროცესი ძალიან გიყვართ...
- ერთეული გამონაკლისის გარდა არ შევხვედრივარ ქალს, ვისაც შოპინგი არ უყვარს.


- გსიამოვნებთ შოპინგი?


- რაც უფრო მეტი სამოსი გაქვს, მით უფრო გაწვალებს კითხვა "რა ჩავიცვა?" გგონია, რომ სწორედ ის ნივთი არ გაქვს, რაც ასე გჭირდება. ეს ჩემი ერთადერთი მინუსია. ვერ ვკმაყოფილდები შენაძენით.


- ყოველთვის იცით რა გინდათ?


- არასდროს ვეძებ, რადგან ვიცი რა მჭირდება. ამიტომ ნივთების თაროზე შენახვა არ მახასიათებს. ყოველ შენაძენს შესანიშნავად ვიყენებ.


- სამოსს სად ყიდულობთ?


- ყველგან, თბილისშიც არის ჩემთვის სასურველი მაღაზიები.


- თავს როგორ უვლით?


- არანაირად. ერთადერთი, საღამოს ვიცილებ მაკიაჟს და საცხს ვისვამ. დღისა და ღამის საცხსაც არ ვყოფ. ადრე ვიყენებდი Chanel-ის პროდუქციას, ახლა Silsey-ზე გადავედი.


- ფიტნესს მიმართავთ?


- რაც კიბიდან გადმოვვარდი, ვარჯიში შევწყვიტე და ამ მხრივ ცოტა მოვდუნდი. მე გემრიელად კვებაც მიყვარს, ხერხემლის პრობლემებმაც გამიარა და სპორტულ ცხოვრებას სასწრაფოდ უნდა დავუბრუნდე. ანატომია მშვენივრად ვიცი, შესაბამისად ზუსტად ვიცი, რომელი კუნთი როგორ უნდა ვამუშაო.


- დაბოლოს, ტელეკომპანია "იმედში" სატელევიზიო შოუს Prime Show წამყვანად გიხილეთ, რაც ახალი რაკურსი იყო საზოგადოებისთვის?


- შოუს გარდა, ტელეკომპანია "იმედზე", სამედიცინო თემაზე გადაცემა უნდა წავიყვანო. ვფიქრობ, ეს გადაცემაც საინტერესო გამოვა და წაადგება მაყურებელს. თავად, ყველაფერი ახალი მაინტერესებს და ვთვლი, რომ ასე უფრო სახალისოა ცხოვრება. რაც მთავარია, ვასწრებ, საქმე არასდროს მღლის. ბევრ ახალ ადამიანთან მიხდება ურთიერთობა, რაც ჩემთვის კარგი გამოცდილებაა. გადაცემების მომზადების შემდეგ ცხოვრებას კიდევ სხვა კუთხიდან შევხედე. ტელევიზიაში რადიკალურად განსხვავებული ტემპები და ურთიერთობებია. მე განსხვავებულად ვაფასებ ყველაზე დაძაბულ სიტუაციასაც. სხვები რომ ფუსფუსებენ და ღელავენ, ამ პროცესს სიკვდილ-სიცოცხლის რაკურსიდან ვუყურებ. ჩემთვის წარმოუდგენელია, როგორ შეიძლება ინერვიულო, როცა განათება არასწორადაა დაყენებული, როცა გაცილებით დრამატული სიტუაციები არსებობს. ამ სიმშვიდეშიც ექიმის პროფესია მეხმარება.

ქეთი დარჩია
ფოტო: გიორგი ცაავა

"ი", ს 

like
0

კომენტარები

bela 2017-05-25 15:48
ise am gogom tavisi frofesiis shesabami gadacema rom waiyvanos uketesia, aq ra shuashia, cotani arian profesionali wamyvanebi
nika 2017-05-25 15:46
bevri arafrofesionali zis mag shoushi da es ar aris swori, mxolod vizualit gaqvt gatvlili gadacema, ras metyveleben, sheudzliat tu ara laparakiamas arfiqrobt, amit mayurebels agizianebt

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.