MERCEDES-BENZ FASHION WEEK-ის აქცენტები: AVTANDIL შემოდგომა 2017

8 მაისის ჩათვლით, თბილისი კიდევ ერთხელ გადაიქცა მსოფლიო მოდის ინდუსტრიის "ცხელ წერტილად": 4 მაისს ავთანდილმა Mercedes-Benz Fashion Week-ის მე-5 სეზონი გახსნა.


შეიძლება ითქვას, ეს ყველაზე მასშტაბური მოდის კვირეული იყო, რაც კი აქამდე თბილისში ჩატარებულა: MOMA თბილისმა და რამდენიმე განსხვავებულმა ლოკაციამ 44 ხელოვანს უმასპინძლა: მოდის კვირეულის ფარგლებში, ჩვენებებთან ერთად, რია ქებურიას, CHUBIKA-ს, ირმა შარიქაძის (Irma de Flore), Le Mocassin Zippe-ის, სიმონ მაჩაბლის, სოფო გონგლიაშვილის (Sopho Gongli), TAMRA-ს, უტა ბექაიას და ლია ბაგრატიონის არტვილა "გარიყულასთან" თანაარსებული პროექტის საინტერესო პერფორმანსები და პრეზენტაციები ვიხილეთ;

ახალგაზრდა დიზაინერის - ირაკლი რუსაძის ახალ პროექტ AZNAURI-ს ორიგინალურ პრეზენტაციასთან ერთად.


Mercedes-Benz Fashion Week -ზე წარმოდგენილი 44 ბრენდიდან ჩვენი ყურადღება 20-მა მათგანმა მიიპყრო, რომელთა ნაწილსაც შემდეგ ნომერშიც შემოგთავაზებთ. კვირეულის ამ სეზონის ფავორიტი კოლექცია be next-ის გამარჯვებული დიზაინერების -ანი ცინცქილაძის და ანა ოდიშელიძის მიერ შექმნილი ბრენდი BLIKVANGER-ია: ახალგაზრდული, ემოციური და განსხვავებული კოლექციით.

AVTANDIL შემოდგომა 2017

მოდის კვირეული ავთანდილმა გახსნა - სპორტული, ახალგაზრდული, AVTANDIL -ის მოდის სახლისთვის სრულიად განსხვავებული დეტალებით დატვირთული კოლექციით. დიზაინერის განცხადებით, ფუტურისტული სილუეტებით კონსტრუირებული კოლექცია სიურრეალისტურ პარალელურ სამყაროს ქმნილებებს ასახავს.

კოლექციის ერთ-ერთი შთაგონება ამერიკული ფეხბურთის უნიფორმა გახდა: დიდი ზომის მხრების ტენდენცია ავთანდილმა სრულიად ახლებური ფორმით გამოხატა სვიტერებში, კაბებში, ლაბადებსა და ქურთუკებში. კოლექციის ფარგლებში საინტერესო სიახლე ვიხილეთ - დიზაინერმა წელს პირველად სათვალეების და სამკაულების ხაზიც წარადგინა. ციფრული არტის შთაგონება ამჯერადაც კოლექციის ლაიტმოტივია - დიზაინერმა DIOR-ის მოდის სახლის გამოწვევა თამამად მიიღო და J’adore-ის ფრაზით დაპრინტული ღია ფეხსაცმელების მსგავსად გააფორმა კოლექციის დეტალები: ინტერნეტსივრცის სახასიათო, საბეჭდი მანქანის მსგავსი მთავრული შრიფტით საკუთარი სახელით რეზინის მასალები გააფორმა და მათი ინტეგრაცია ღია ფეხსაცმელებზე, ქამრის ადგილას თუ სახელოების გასწვრივ სხვადასხვა დატვირთვით მოახდინა. კოლექციის ორიგინალური დეტალი იყო ოლეგ ტიმჩენკოს "ჯარისკაცების" სილუეტები, რომლებიც ზოგ შემთხვევაში ტექნიკური ქსოვილის მაღალყელიან სვიტერზე დაპრინტული, ზოგჯერ - ქამრის საკიდის ფუნქციით, ზოგჯერ კი - სათვალეების სილუეტებში ინტეგრირებული გვხვდება: მხატვარი ოლეგ ტიმჩენკო კოლექციის ჩვენებას საპატიო სტუმრის სტატუსით ესწრებოდა და თუ მისი მოღიმარი გამომეტყველების მიხედვით ვიმსჯელებთ, კოსტიუმებმა დიდი მოწონება დაიმსახურა. საინტერესო აქსესუარია, ასევე, დიდი ზომის, ციფრული არტის პრინტებით გაფორმებული ჩანთები პატარა სახელურებით.

ახალი არ იქნება, თუ აღვნიშნავთ, რომ ავთანდილს ნებისმიერ მასალაზე ჩატარებული ექსპერიმენტი წარმატებული გამოსდის: კოლექციაში ერთმანეთს ჯინსი, ხავერდი, ტექნიკური ქსოვილები, მეტალის ფაქტურა, ბუნებრივი ტყავი, შიფონი, ლაბადის ქსოვილი და ბუმბულის ქურთუკის ტექნიკით დამუშავებული ქსოვილები შეუპირისპირა. მიუხედავად იმისა, რომ კოსტიუმების ნაწილი საკმაოდ  ფერადოვანი და ჭრელია, ფერების დახვეწილი შეხამება ამ სიჭრელეს საოცარ სიმსუბუქეს და ჰაეროვნებას სძენს.


კოლექცია თემატურად 2 ნაწილად შეიძლება გავყოთ: შედარებით ნაზი, ყვავილოვანი ელემენტებით და სპორტული, ურბანული ელემენტებით გაფორმებული კოსტიუმები. მიუხედავად იმისა, რომ მასში დიდი ზომის, მოცულობითი მხრები ჭარბობს, პუბლიკას არასოდეს ავიწყდება, რომ დიზაინერის შთაგონება ყოველთვის ქალია: აქ ვერ ნახავთ უფორმო სილუეტებს -ყველაზე მამაკაცურ სტილში გადაწყვეტილი ლუქებიც კი გამოყვანილი წელით და ტანზე მომდგარი დეტალებითაა დაგვირგვინებული. ალბათ უკვე ათასჯერ წაგიკითხავთ მოდის სახლების  პრესრელიზებში ფრაზა, თითქოს მათი კოლექცია "ქალის ძლიერი და სუსტი მხარეების პრეზენტირებას მამაკაცური და ქალური დეტალების ხარჯზე ახდენს. თუმცა გამოცდილი თვალი აუცილებლად მიხვდება, რომ ეს მოძრაობა ავთანდილის შემოქმედებაში ნამდვილად ორგანულია და დიზაინერის ესთეტიკის ანარეკლს წარმოადგენს. როგორც ყოველთვის, ტყავს ამჯერადაც განსაკუთრებული ადგილი აქვს მინიჭებული: უნაკლო ნაკერით შესრულებული ლაბადები, მაღალყელიანი ჩექმები და ბრენდის ლოგოს პერფორაციით გაფორმებული ქამრები ერთგვარად ჩარჩოში აქცევს ნაზ, თხელი ფაქტურის ქსოვილებს. დიზაინერმა ტყავით, ასევე "ლათინური"ტენდენციით - ფურფუშებიანი ან დიდი მხრებით გაფორმებული, ვიწრო ტყავის კაბები შემოგვთავაზა, ტექნიკური ტყავის მსგავსი ქსოვილით კი ციფრული არტის სტილში გადაწყვეტილი პრინტებით გაფორმებული ქვედაკაბები, რომლებსაც, ტყავის ფურფუშებიანი ქვედაკაბების მსგავსად, შიფონის ნაზი, დიდი ზომის ბლუზები შეუხამა. ტყავითვე შეასრულა თავისუფალი სილუეტის შარვლები და კლასიკური პერანგები, რომლებიც ზოგ შემთხვევაში ხავერდის სპორტულ შარვლებთან ერთად წარადგინა.
ულამაზესი _ ვერცხლისფერისა და რუხის კომბინაციებით იყო წარმოდგენილი ლაბადები, ბომბერის დეტალებით გაფორმებული გრძელი პალტოები და სპორტული, ვიწრო კაბები. კოლექციის ერთ-ერთი ძლიერი მხარე ბუმბულის ფაქტურის ვარიაციებია: ჟილეტები, ასიმეტრიული, ექსპერიმენტული ქურთუკები და პალტოები...

საოცრად ქალურია ტექნიკური ქსოვილით შესრულებული სპორტული ხაზიც კი: ვიწრო კომბინეზონები, კაბები, მაღალყელიანი სვიტერები და ქვედაკაბები, რომლებიც დაპრინტული ზოლების და ლოგოს პრინტით გაფორმებული რეზინის დეტალებითაა გაფორმებული. ტყავის და უხეში, ტექნიკური ფაქტურებისგან რადიკალურად განსხვავდება ყვავილოვანი კაბები, შიფონის ბლუზები, რომლებიც ასევე ყვავილებითაა გაფორმებული და სავარაუდოდ, ცივ ზამთარში გაზაფხულზე ოცნების რეტროსპექციას წარმოადგენს. კოლექციის საინტერესო აქცენტია ასევე ლაბადა-კაბები, რომლებიც შალის სადა ქსოვილისგანაა შესრულებული და ექსპერიმენტული კოსტიუმების შედარებით კლასიკურ ხაზს წარმოადგენს.
უამრავ ფავორიტ ლუქს შორის კი გამორჩეული ადგილი ჯინსის ორეულმა -ორიგინალურმა ქურთუკმა და განიერმა შარვალმა დაიკავა.

ტექსტი: ქეთი ფოფხაძე
ფოტო: ©MERCEDES-BENZ FASHION WEEK TBILISI, DAVID TCHALIDZE

"ბომონდი", ივნისი

like
0

კომენტარის დამატება
×
სახელი*
კომენტარი*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.