ესპანეთი ვიღაცისთვის კორიდის ქვეყანაა, ვიღაცისთვის კი ადგილი, სადაც მოდის სახლ Delpozo-ს არსებობის ისტორია დაიწყო.
ესპანელი ჯოზეფ (ხოსეპ) ფონტი ერთ-ერთი ყველაზე სიცოცხლით სავსე დიზაინერია მათ შორის, ვინც ნიუ-იორკის მოდის კვირეულებზე გამოსულა, მაგრამ მისი კოლექციები უფრო რთული აღსაქმელია, ვიდრე ერთი შეხედვით ჩანს.



დიზაინერი ხშირად მიმართავს ფერწერულ ნამუშევრებს, ამასთან, არცთუ ძალიან ცნობილი მხატვრების ტილოებს და მათ შთაგონების წყაროდ იყენებს. სწორედ ამიტომ გამოირჩევა მისი კოლექციები მკვეთრი ფერებითა და "მსუყე" ფორმებით.



მცირე რაკურსი ისტორიიდან

ტანსაცმლისა და აქსესუარების მწარმოებელი ბრენდის, Delpozo-ს ისტორია 44 წლის წინ, 1974 წელს, ესპანელი დიზაინერის, ხესუს დელ პოზოს მიერ მადრიდში პირველი მაღაზიის გახსნით დაიწყო. თავდაპირველად კუტიურიე მხოლოდ მამაკაცის კოსტიუმებზე მუშაობდა, მაგრამ გარკვეული დროის შემდეგ ქალის სამოსის შეკერვაც დაიწყო. მან მოგვიანებით კიდევ უფრო გააფართოვა ასორტიმენტი და საქორწინო კაბებისა და პარფიუმერიის გამოშვებას მიჰყო ხელი. ბრენდი თითქმის მაშინვე იქცა პოპულარულად არა მხოლოდ ესპანეთში, არამედ საფრანგეთსა და იაპონიაშიც კი. რაოდენ უცნაურიც უნდა იყოს, თვითონ დელ პოზოს ძალზე მოკრძალებული ამბიციები ჰქონდა, იგი არ მიისწრაფოდა საერთაშორისო აღიარებისკენ.



დიზაინერი დიდი სიამოვნებით კერავდა ესპანური კინოსა და თეატრის მსახიობებისთვის. იგი განსაკუთრებით პედრო ალმოდოვარის ფილმებით იხიბლებოდა და მისთვის უდიდესი პატივი იყო, პედროს ფილმებისთვის კოსტიუმები შეექმნა.

ბრენდის ფილოსოფია

არქიტექტურული სილუეტებისა და ნაქარგების შერწყმით შექმნილმა სამოსმა, რომლის დასამზადებლად ხესუს დელ პოზო მინას, ბისერსსა და კრისტალებს იყენებდა, დიზაინერი კლასიკოსად ჯერ კიდევ მისსავე სიცოცხლეში აქცია.სწორედ ამ მიდგომით დაინერგა მოდაში სახელწოდება პრეტ-ა-ცოუტურე. 1989 წელს დელ პოზომ სამოდელო სფეროში უდიდესი დამსახურებისთვის კრისტობალ ბალენსიაგას სახელობის პრემია მიიღო, ხოლო ერთი წლის შემდეგ ჯილდო - "ოქროს მედალი ხელოვნების წინაშე დამსახურებისთვის". ეს პრემია თავის დროზე მოიპოვეს სალვადორ დალიმ, ხუან მირომ და ლუის ბუნუელმა.



ესპანური მემკვიდრეობა

2011 წელს, დელ პოზოს გარდაცვალების შემდეგ, Delpozo-ს ხელმძღვანელობამ მიიღო გადაწყვეტილება, ბრენდის კრეატიული პოლიტიკა შეეცვალა, რათა მარკა საერთაშორისო არენაზე გასულიყო. ამ მიზნით კრეატიული დირექტორის პოსტზე მოიწვიეს ახალგაზრდა არქიტექტორი, ჯოზეფ ფონტი. დიზაინერი პირველად მოდის კვირეულზე შეამჩნიეს, სადაც თავისი კოლექციის დემონსტრირებას ახდენდა.



ჯოზეფმა შეძლო, ბრენდ Delpozo-ს მსოფლიო აღიარებისთვის მიეღწია. ახალმა კრეატიულმა დირექტორმა იცოდა, რაოდენ მნიშვნელოვანი მისია დაეკისრა - მას უნდა შეექმნა "ლუქსკლასის ბრენდი", ამიტომ დაუღალავად შეუდგა მუშაობას.



ესპანური მარკის პრესტიჟი და პოპულარობა დღითი დღე იზრდება, რასაც მსოფლიო ბაზარზე მისი ავტორიტეტი და წარმატება მოწმობს. როგორც თავად დირექტორი აცხადებს, შემოქმედებითი ჯგუფი გაჩერებას არ აპირებს - მოდის სახლს შორს მიმავალი გეგმები აქვს.



ფონტის კრეატიული ხაზის მთავარი განსაკუთრებულობა ის არქიტექტურული სტილია, რაც მის მიერ შექმნილ Delpozo-ს მოდელებს ახასიათებს, სახელდობრ: ხაზების ფილიგრანული დახვეწილობა, გამოკვეთილი სილუეტი, ბრწყინვალება და დიდებულება. უცვლელი დარჩა ბრენდისთვის დამახასიათებელი ტრადიციული სტილი - კლასიკურისა და ავანგარდული დეტალების შერწყმა.

ნანა ნებიერიძე