სიმართლე გითხრათ, ამ კოლაბორაციის შესახებ ცალკე სტატიის დაწერას არ ვაპირებდი, არამედ იგი მთლიანი მოდის კვირეულის მიმოხილვის ერთ-ერთი ნაწილი უნდა ყოფილიყო, მაგრამ რაც უფრო მეტი გავიგე ორი საკმაოდ ცნობილი დიზაინერის თანამშრომლობის შესახებ, მიტ უფრო დავინტერესდი. სწორედ ამიტომ, საბაბი მაქვს ვიფიქრო, რომ თქვენც ისევე მოიხიბლებით, როგორც მე.

ბაკა ალავიძის
ბლოგი   

ორი დიდი ბრენდის თანამშრომლობას ყოველთვის კარგი შედეგი როდი აქვს. ისინი ძირითადად პუბლიკის ყურადღების მოპოვების გამო ქმნიან საერთო პროდუქტს.მაგრამ Valentino-სა და Undercover-ის კოლაბორაცია სასიამოვნო გამონაკლისია. მოდის სახლების ხელმძღვანელები, პიერპაოლო პიჩოლი და ჯუნ ტაკაჰაში პირველად გასულ წელს შეხვდნენ ტოკიოში და როგორც ჩანს, იმდენად კარგად გაუგეს ერთმანეთს, რომ თანამშრომლობა გადაწყვიტეს. მათი გაერთიანება ორ კოლექციას მოიცავს: ერთი ვალენტინოსთვის, ხოლო მეორე ანდერქავერისთვის (ორივე მათგანის ჩვენება პარიზში მოეწყო, 16 და 17 იანვარს).

ახალი ლოგო (VU), ახალი დიზაინი და მიმართულება. პიერპალოს მიზნად ჰქონდა ქუჩის სტილის გადატანა ატელიეში, ანუ სთრითვეარის უფრო მაღალ დონეზე აყვანა. ვალენტინოს კოლექცია გამოირჩევა სამოსზე დატანილი პრინტებით, რომლებიც სწორედ ჯუნ ტაკაჰაშიმ შექმნა (მსგავს პრინტებს მის კოლექციაშიც შეხვდებით). დიზაინერებისთვის მთავარი შთაგონების წყაროცნობილი ამერიკელი პოეტი, ედგარ ალან პო იყო. ბევრი მითი არსებობს იმის შესახებ, რომ ედგარს დროში მოგზაურობა შეეძლო. სამოსზე გამოსახული უცხოპლანეტელთა ხომალდები სწორედ ამის სიმბოლოა. კოლექციაში საოცრად გემოვნებიანად არის შერჩეული ფერთა შეხამებაც: მუქი ლურჯი მანტოები გაწყობილია წითელი, ცისფერი და თეთრი პრინტებით. თუ შთაგონების წყარო დროში მოგზაურობა იყო, ამ ორ დიზაინერს შორის თანამედროვე ეპოქას ვალენტინო ასახავს.

რაც შეეხება წარსულს, ანდერქავერის კოლექცია დროებით აწმყოს მოსწყდა. მაღალყელიანი, ნაქსოვი ხელთათმანები, ასევე ნაქსოვი ნიღბები, ფერადი ლაბადები და ბუმბულებით მორთული ბერეტები - ჯუნ ტაკაჰაშიმ ახალი ჩვენებით მეჩვიდმეტე საუკუნის დასავლეთ ევროპაში დაგვაბრუნა. ეს წამოწყება მთლიან კოლექციაში ისახება, მაგრამ სამოსის უმეტეს ნაწილს თანამედროვე სტილი აქვს. იაპონელი დიზაინერის შთაგონების წყარო 1971 წელს გამოშვებული ფილმი, „A Clockwork Orange” იყო. სწორედ ამიტომ, რამდენიმე მანტოსა და მაისურზე ამ ფილმის გმირების სახეებია გამოსახული. როგორც უკვე ვახსენე, ვალენტინოს კოლექციაში გამოყენებულ მფრინავი ხომალდის პრინტებს ანდერქავერშიც შეხვდებით. პასტელურისა და მუქი ფერების შერწყმით ტაკაჰაში იდუმალდა საინტერესო კოლექციას გვთავაზობს.

ასევე დაგაინტერესებთ:

ევროპაში მამაკაცების მოდის კვირეული დასრულდა

ყველაზე ტენდენციური ჩანთები, რომელიც 2019 წელს დაიპყრობს