ბრწყინვალე სტილი, ბრწყინვალე პოზიცია

დიზაინერმა და ქალის თანამედროვე მოდური სამოსის ხაზის დამფუძნებელმა მაქს აზრიამ აშშ-ის მოდის ბაზრის დაპყრობა თავისუფლად შეძლო.
1989 წელს აზრიამ წარმოადგინა პირველი ქალური ხაზი ბრენდ BCBG Max Azria-ს სახით და ამერიკელებს
შესთავაზა კოსტიუმები, საღამოს კაბები და ჯინსები, როგორც წმინდა ევროპული პროდუქტი. სწორედ ამ ნაბიჯით BCBG  პოპულარული გახდა აშშ-ში.



მაქსი 1949 წელს ტუნისში დაიბადა. ოჯახში ნაბოლარა, მეექვსე შვილი იყო. როცა ცამეტი წლის გახდა, მშობლები საცხოვრებლად საფრანგეთში გადავიდნენ და პარიზში დასახლდნენ. სწორედ აქ გადაწყვიტა მტკიცედ ახალგაზრდა მამაკაცმა, დიზაინერი გამხდარიყო. პირველად თავისი ნაწარმი პოდიუმზე 1970 წელს გაიტანა და მომდევნო თერთმეტი წელი თავგამოდებით იმუშავა, მაგრამ პარიზში სასურველ შედეგს ვერ მიაღწია და ემიგრანტის სტატუსით აშშ-ს მიაშურა.


ლოს-ანჯელესში ფეხის მოსაკიდებლად მაქსმა ქალის ჯინსის სამოსის შექმნა გადაწყვიტა და სრულიად განსხვავებული კონცეფციაშეიმუშავა. მან ბუტიკების მთელი ქსელი გახსნა ქალაქში სახელწოდებით: ჟესს.


უნდა ითქვას, რომ თავად კი არ იგონებდა მოდელებს, არამედ ამერიკული ჯინსების გადაკეთებით იყო დაკავებული, შემდეგ ამ პროდუქციას ევროპულად ასაღებდა და მას ფრანგული მოდის პიკად მოიხსენიებდა. ეს განსაკუთრებულობა - ამერიკულის ევროპულთან შერწყმა, თანაც უზადოდ, მაქს აზრიას საფირმო ნიშანი გახდა, რამაც უდიდესი წარმატება მოუტანა მოდის სამყაროში.



80-იანი წლების ბოლოს მაქსმა გაიცნო რუსი ემიგრანტი ლიუბოვ მაციევსკაია, რომელიც მომავალში მისი მეუღლე და ბიზნესში დამხმარე გახდა. 1989 წელს მათ ერთად დააარსეს `მოდის სახლი BCBG Max Azria. სახელი და ლოგოტიპი ლიუბოვმა მოიგონა. იდუმალი ასოები აბრევიატურაა პარიზული სლენგისა: bon chic, bon genre, რაც ნიშნავს: "ბრწყინვალე სტილი, ბრწყინვალე პოზიცია".

ისიც უნდა ითქვას, რომ დიზაინერმა თავისი კომპანიის ბუღალტრული საკითხები სრულყოფილად შეისწავლა. იგი არაჩვეულებრივად ერკვეოდა მოდის ბიზნესში, ნებისმიერ ოპერაციაში, რომელიც ვაჭრობის სფეროს ახასიათებდა და თავად აწარმოებდა საბუღალტრო აღრიცხვას. როცა ყველა სიახლე აითვისა, აზრიამ შექმნა საკუთარი, მნიშვნელოვნად გაუმჯობესებული მერჩენდაიზინგის კონცეფცია და მოდის ბაზრის დაპყრობა შეძლო.

მიუხედავად იმისა, რომ მაქს აზრია წარმოშობით ტუნისელი ფრანგია, ამერიკაში მან მეორე სამშობლო იპოვა და ღირსეული ამერიკელი გახდა. ამას ამტკიცებს თუნდაც ის, რომ უცხოელმა ლოს-ანჯელესში შეძლო თავისი იმპერიის დაარსება და არა ნიუ-იორკში.



დიზაინერი გამუდმებით ამტკიცებდა, რომ მოდის ინდუსტრიაში არავინ ეგულებოდა ისეთი, ვისთვისაც შეეძლო მიებაძა, მაგრამ არასდროს ავიწყდებოდა ორი მუზა, რაც მასში ყოველთვის უდიდეს შთაგონებას იწვევდა:

"ოდრი ჰეპბერნის ბრწყინვალება - მისი სუფთა, დახვეწილი სტილი დღემდე ჩემი კოლექციის დაუშრეტელი შთაგონების წყაროა. მეორე მუზა ჩემთვის თვითონ ლოს-ანჯელესი იყო, ქალაქი, სადაც ერთმანეთს ერწყმის სხვადასხვა მიმართულების დიდებული სიმრავლე - მუსიკა, თანამედროვე ტექნოლოგიები და გართობა - ესეც გამუდმებით სტიმულს მაძლევდა. ეს შეგრძნება შემიძლია შევადარო მზის სხივების ნაკადს, რომელიც უწყვეტად შენკენაა მომართული და ენერგიით გავსებს".



როგორც ჭეშმარიტმა საქმოსანმა, შექმნა საკუთარი მოდის სახლი, თან ისე, რომ თავის არსენალში მხოლოდ "ერთი მუჭა ტანსაცმელი მოეძევებოდა გამოსამზეურებლად. სამაგიეროდ, ამ "ერთმა მუჭა პროდუქციამ სახელოვნად აქცია. მისი შეკერილი უჩვეულო ქიშმირის სვიტერები და მაღალწელიანი კაბები baby doll-ის სტილში წარმატებით მიიღო მოდის სამყარომ. მერე და მერე, როცა მძლავრად მოიკიდა ფეხი, საღამოს კაბების, ჯინსის სამოსის, ფეხსაცმლის, სათვალეების, საცურაო კოსტიუმების, საცვლების, ჩანთებისა და ტყავის აქსესუარების კოლექციებიც დაამატა. რაც შეეხება მამაკაცებს, არც ისინი დარჩენია ჩრდილში. მათთვის აზრია უშვებს საქმიან კოსტიუმებს, ფეხსაცმელს, პერანგებსა და ქეჟუალის სტილის ტანსაცმელს.

გასული საუკუნის 90-იან წლებში, როგორც კი შეძლო თავისი ნიშის დაკავება, მაშინვე შეუდგა კოლექციების დახვეწას და თავისი იმპერიის გაფართოებას. ბუტიკს ბუტიკზე ხსნიდა და კლიენტებს დღითი დღე იზიდავდა. დღეს მისი პროდუქციის მყიდველების ასაკი 15-დან 60 წლამდე მერყეობს.



1996 წელს დიზაინერმა დააფუძნა To The Max, სპორტული ტანსაცმლის ახალგაზრდული ხაზი და თანამედროვე ქალის სამოსის მოდერნიზებასაც შეუდგა. იმავე წელს ბრენდი BCBG Max Azria პირველად გამოჩნდა ნიუ-იორკის მოდის კვირეულზე.

1998 წელს დიზაინერმა შეიძინა ფრანგული მოდის სახლი Herve Leger-ი, რომელიც ცნობილია დიდებული, მაცდუნებელი ოტ კუტიურის სამოსით. ასე გახდა მაქსი პირველი ამერიკელი დიზაინერი, რომელიც ფრანგული მოდის სახლს ფლობდა.

2007 წლის დასაწყისში მან ორივე ბრენდი _ თავისიც და ფრანგულიც გააერთიანა და სწრაფად გახდა პოპულარული. დღეს მაქს აზრია მოდის ერთ-ერთ კანონმდებლად მიიჩნევა და არცთუ უსაფუძვლოდ, მან ეს დაიმსახურა. დღეს მისი სამოსით წითელ ხალიჩაზე რონინებენ ბიონსე, ჯენიფერ ლოპესი, კეტრინ ზეტა-ჯონსი და ქეით უინსლეტი.



2008 წელს ნიუ-იორკის მოდის კვირეულზე დიზაინერმა წარმოადგინა  Max Azria and Herve Leger  by  Max Azria-ს კოლექცია და პირველი გახდა, ვინც ერთ მოდის კვირეულზე სამი ჩვენების გამართვის უფლება მიიღო.

გარდა ამისა, არ უნდა დაგვავიწყდეს, რომ დაახლოებით ოცი წლის წინ სწორედ მან გამოუშვა ქალის ხაზი "ზომა პლუსით", რითაც არა მხოლოდ გამხდარი გოგონები, ტანსრული ქალბატონებიც გაახარა. სწორედ მისი დამსახურებაა, რომ ჭარბწონიან ქალებსაც შეუძლიათ ელეგანტურად გამოიყურებოდნენ. ბუნებრივია, მისმა ამ კოლექციამ კოლოსალური წარმატება მოიპოვა.

იგი იმდენად ფლობდა მოდის ბაზრის საიდუმლოებებს, ალიანსებს ქმნიდა სხვადასხვა ლიდერ კომპანიასთან პარფიუმერიის, კვებისა და საყოფაცხოვრებო ტექნიკის სფეროში და აქაც წარმატებას აღწევდა.



ასე წარმოგვიდგა მაქს აზრიას ბრენდი მოდის სამყაროს გიგანტად. დღეს მაქსი მსოფლიოს სხვადასხვა ქვეყანაში 150-მდე მაღაზიას ფლობს - პარიზში, ლონდონში, ტოკიოში, ჰონკონგსა და ა.შ.

მას უამრავი ჯილდო აქვს მიღებული: `კალიფორნიის წლის დიზაინერი~ 1995 წელს, "ატლანტის წლის დიზაინერი" 1996 წელს, ჯილდო The Fashion Performance Award 1997 წელს... 1998 წელს კი მაქსი ამერიკის მოდის დიზაინერთა საბჭოს წევრი გახდა. იმავე წელს მიანიჭეს Divinr Designer's Women's Designer of the Year-ის პრემია, ხოლო მისი კომპანია ლოს-ანჯელესის საუკეთესო კერძო კომპანიების სიაში მოხვდა.

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.