სამოდელო ბიზნესის რუხი კარდინალები


მსოფლიო მოდამ წლების განმავლობაში არაერთი ცვლილება განიცადა. ამ მხრივ "მოდურ ამინდს" ყველაზე მსხვილი "მოთამაშეები", ანუ დიზაინერები ქმნიან. მათი პროფესიონალიზმი და გამოცდილება მოდის სამყაროს სრულიად სხვაგვარად წარმოგვიდგენს.

გაგაცნობთ მოდის იმპერიის რუხ
კარდინალებს.

პოლიმოდა ერთადერთი იტალიური ინსტიტუტია, რომელიც, Global Fashion School Rankings  2016-ის რეიტინგის მიხედვით, მსოფლიო მოდის საგანმანათლებლო დაწესებულებების საუკეთესო ათეულში შედის. პოლიმოდას წარჩინებული კურსდამთავრებულები მოდურ ჩვენებებს მთელ ევროპაში თავისებურ ელფერს სძენენ..



ჯანფრანკო ვილეგასი, Selfmade by Gianfranco Villegas-ს შემქმნელი

ახალგაზრდა ჯანფრანკო ვილეგასმა 2013 წელს დაამთავრა პოლიმოდას ინსტიტუტი და მაშინვე განსაზღვრა მოდაში თავისი მიმართულება კრეატივის განხრით - შექმნა ბრენდი Selfmade by Gianfranco Villegas.. დღეს ამ ბრენდის სამოსი შეგიძლიათ შეიძინოთ იაპონიაში, საფრანგეთში, აშშ-ში... ბრენდის ბოლო, შემოდგომა-ზამთრის კოლექცია პარიზის მოდის კვირეულზე წარმოადგინეს.



ფრანჩესკო რისო, Marni-ს კრეატიული დირექტორი

2016 წლის ბოლოს ცნობილი გახდა, რომ კონსუელო კასტილიონიმ, Marni-ს სახლის დამფუძნებელმა, რომელმაც 22 წელი დაყო თავის პოსტზე, კომპანია დატოვა. დიდებული ქალბატონი შეცვალა ფრანჩესკო რისომ, რომელიც მანამდე ანა მოლივარისთან ერთად Blumarine-ში მუშაობდა ალესანდრო ლე აკვასთან, 2008 წლიდან კი Prada-სთან თანამშრომლობდა. ფრანჩესკომ, რომელიც ადრე არა მარტო ბრენდების კოლექციებზე, არამედ სოციალურ პროექტებზეც მუშაობდა, მშვენივრად გაართვა თავი ახალ პოზიციას და 2017 წელს Marni-ს პირველი, შემოდგომა-ზამთრის კოლექცია წარმოადგინა პარიზის მოდის კვირეულზე, რამაც უდიდესი მოწონება დაიმსახურა.



იტალო ზუკელი, Calvin Klein-ის მამაკაცის ხაზის კრეატიული დირექტორი (2004-2016)

შარშან ფრანცისკო კოსტამ და იტალო ზუკელიმ, Calvin Klein-ის ქალისა და მამაკაცის ხაზის დიზაინერებმა, კომპანია დატოვეს. ისინი მამაკაცის ხაზს ბრენდში 2004 წლიდან ქმნიდნენ. კომპანიამ მათი პოსტიდან წასვლა სტრატეგიის შეცვლით ახსნა, თან დაამატა, რომ უმჯობესი იქნებოდა, ორივე ხაზი ერთი ადამიანის მფლობელობაში გადასულიყო. ისინი რაფ სიმონსმა შეცვალა.



ალესანდრო ტრინკონე, Alessandro Trincone-ს დამფუძნებელი

იაპონიის უდიდესმა თაყვანისმცემელმა, ალესანდრო ტრინკონემ, თავისი კოლექციით 2016 წელს ნიუ-იორკში, ახალგაზრდა ტალანტების გამოვლენის მოდის კვირეულზე, გვარიანი ხმაური გამოიწვია. ტრინკონეს შექმნილი სამოსი კი ამერიკელმა ჰიპ-ჰოპშემსრულებელმა Young Thug-მა თავისი ალბომის, No, My Name Is jeffery-ის გარეკანისთვის გამოიყენა. საბოლოოდ დიზაინერიც მოგებული დარჩა და მომღერალიც. ამჟამად ტრინკონე წარმოგვიდგენს კოლექციას, რომელიც ამომავალი მზის ქვეყნის შთაგონებით შეიქმნა.



Comme Des Garcons-ის პრეზიდენტი, ედრიან იოფე

უდიდესი იაპონური მარკის, Comme Des Garcons-ის პრეზიდენტი, ედრიან იოფე სამხრეთ აფრიკაში დაიბადა. მიიღო თუ არა ლინგვისტის დიპლომი, 24 წლისა იაპონიაში გაემგზავრა. ოსაკაში დამკვიდრდა და კარგა ხანს ერთ-ერთ ბარში ჭურჭლის მრეცხავად მუშაობდა. კარგა ხანს ფიქრობდა, რომ მონასტერში წასულიყო და ამ განზრახვით ლონდონში გაემგზავრა, მაგრამ თავისი დის დაჟინებული თხოვნით, რომელსაც ტანსაცმლის პატარა ფირმა ჰქონდა და საკუთარი მარკით უშვებდა კოლექციებს, სამუშაოდ მასთან დარჩა, რათა ფირმის მართვაში დახმარებოდა. 34 წლის ასაკში კი იგი Comme Des Garcons-ის კომერციული დირექტორი გახდა. მალე მან რომანი გააბა ბრენდის დამფუძნებელ რეი კავაკუბოსთან და მას შემდეგ დღემდე, უკვე 30 წელია, ერთად არიან, როგორც ბიზნესპარტნიორები. იოფეს მუშაობის პერიოდში ბრენდის წლიურმა ბრუნვამ 200.000.000 დოლარს გადააჭარბა. ეს კავაკუბოსა და ედრიან იოფეს შემოქმედებითი პროცესის უდიდესი დამსახურებაა.



რაფ სიმონსი, Calvin Klein-ის კრეატიული დირექტორი

სახელმოხვეჭილი დიზაინერი, რაფ სიმონსი 1968 წელს ბელგიის ერთ პატარა სოფელში, სამხედროს ოჯახში დაიბადა. 23 წლისამ გენტის კოლეჯი დაამთავრა "სამრეწველო დიზაინისა და ავეჯის დიზაინის" განხრით. ამის შემდეგ სამუშაოდ მოეწყო ცნობილი ანტვერპენელი ექვსეულის ერთ-ერთ წევრთან, ვალტერ ვან ბეირენდონკთან. სწორედ მისი დამსახურებით მოხვდა სიმონსი პირველად მოდის კვირეულზე, ეს იყო მარტინ მარჯიელას შოუ. სწორედ ამის შემდეგ დაიწყო მან მოდის იმპერიაში თავის დამკვიდრება.

1993 წელს მამაკაცის დამოუკიდებელი ხაზი შექმნა, ხოლო ჩვენება ორი წლის შემდეგ მოაწყო. 1997 წელს კი ისეთი შოუ გამართა პარიზში, რომ ყველა გააოგნა. იგი უმალ შეამჩნიეს მოდური ჟურნალის რედაქტორებმა და სხვა დიზაინერებმა და რაფი იტალიურ ბრენდ Ruffo Research-ის ორი კოლექციის შესაქმნელად მიიწვიეს.

2000 წელს რაფმა დროებით შეაჩერა თავისი ხაზი, რადგან ვენის უნივერსტიტეტში მოდის განყოფილებას ჩაუდგა სათავეში. ამ პოზიციაზე დაახლოებით ხუთი წელი იმუშავა. შემდეგ ხელშეკრულება გააფორმა კომპანია gysemans Clothing Industry-სთან, კვლავ აამუშავა თავისი ხაზი, ხოლო 2004 წელს მამაკაცის ტანსაცმლის ახალი ხაზი, Raf by Raf Simons გამოუშვა.

2005 წელს მოდელიერმა ახალი შემოთავაზება მიიღო და მოდის სახლ Jil Sander-ის კრეატიული დირექტორი გახდა, სადაც 7 წელი დაყო. პარალელურად რამდენიმე სხვადასხვა ბრენდისთვის კაფსულა-კოლექციები შექმნა.

2012 წელს იგი Dიორ-ში გადავიდა, სადაც ქალის ხაზის კრეატიული დირექტორის პოზიცია შესთავაზეს, თუმცა 2015 წელს რაფ სიმონსმა Dior დატოვა და ამჟამად Calvin Klein-ს უდგას სათავეში.



ბრუნო პავლოვსკი, მოდის სახლ Chanel-ის პრეზიდენტი

იგი თვალყურს ადევნებს ჩჰანელ-ის სახლის მუშაობას, ხელს უწყობს ახალგაზრდა დიზაინერებს შემდგომი განვითარებისთვის და კარლ ლაგერფელდს ყველანაირად გვერდით უდგას, ეხმარება მას ახალი პროექტების განხორციელებაში. "Chanel-ის სახლის მუშაობა გარანტიაა იმისა, რომ მისი კრეატიულობა მომავალი 50 წლის განმავლობაშიც გააგრძელებს განვითარებას", - აცხადებს ბრუნო.

2017 წელს სწორედ მან შეუწყო ხელი, რომ მოდის მუზეუმის, Palais Galliera-ს პირველ სართულზე შანელის გალერეა გახსნილიყო სახელწოდებით, Gabrielle Chanel.



გურამ და დემნა გვასალიები, მოდის სახლი Vetements

ძმებმა წარმატებული ტანდემი შექმნეს.Vetements-ი სულ რაღაც ოთხი წელია, შეიქმნა, მაგრამ მარკაზე უკვე მთელი მსოფლიო ლაპარაკობს. ოთხი წელი ძალიან ცოტა დროა სახელის მოსახვეჭად, თუმცა ეს მოხერხდა. ამ ბიზნესში მთავარი გურამია, CEO Vetements. სწორედ ის იღებს სტრატეგიულ გადაწყვეტილებებს, დემნა კი მარკის კრეატიულ მხარეს განაგებს. დემნა ეკონომისტია, გურამს _ იურიდიული. ამჟამად ბრენდი ახალ შტაბბინაში გადადის, ციურიხში, სადაც გადასახადები პარიზთან შედარებით ბევრად ნაკლებია. ძმები, რაც დღე გადის, უფრო და უფრო მეტ კლიენტს იზიდავენ თავიანთი კრეატიულობით. კიდევ ერთი ძლიერი სვლა - მოდის კვირეულის ჩვეულ ჩარჩოებში არსებულ შოუზე უარის თქმა. ამის ნაცვლად Vetements-მა Haute Couture-ზე წარმოადგინა ქალის ტანსაცმლის კოლექცია. გურამის თქმით, ეს ყველაზე მომგებიანი დროა ბაიარების ყურადღების მოსაზიდად. როგორც ცნობილია, მაღალი მოდის კვირეულებზე ჩვენებები ბევრი არ არის, ხოლო იანვარსა და ივნისში, როგორც წესი, ბაიერები `სავსე ჯიბეებით~ მოდიან სეზონთაშორისი კოლექციების სანახავად, რომელიც Haute Couture-მდე ცოტა ხნით ადრე იმართება.

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.