ბრენდი

თაკო მექვაბიძის გაზაფხული/ზაფხული 2018 წლის კაფსულა კოლექცია

თაკო მექვაბიძე:
2018 წლის გაზაფხული/ზაფხულის კოლექციის ინსპირაცია ზღვასთან, ჰაეროვნებასთან და კლასიკასთან ასოცირდება. სილუეტებიც შესაბამისი შევქმეენი - კომფორტული სილუეტის მქონე ჰაეროვანი აბრეშუმი ქალბატონებს მისცემს საშუალებას ერთდოულად იყვნენ ელეგანტურები, როგორც სანაპიროზე, ასევე კოქტეილის დაუვიწყარ საღამოეებზეც. თანამედროვე სამყაროს ერთ-ერთი გამოწვევა, ხომ დროის დეფიციტია, სწორედ ამიტომ ეს კოლექცია ისეთი ქალბატონებისთვის იქნება საინტერესო, რომლებიც იდეალურად უთავსებენ კომფორტსა და ელეგანტურობას, დასვენებას და გართობას...
თითოეულ სილუეეტს ზაფხულის ხასიათი მინიმალისტური ჩრდილის ეფექტებით მოაქვს, ამიტომაც შევარჩიე ამ კოლექციის სახელად „ჩრდილები“

Style/Photo - Lucas Pantskhava
Make Up - Meri Nakashidze









"ყველგან Versace" - ვარსკვლავების საყვარელი ბრენდი
ვერსაჩე ყველა ვარსკვლავის საყვარელი ბრენდია. ბრენდისადმი სიყვარული სხვადასხვა დაჯილდოების წითელი ხალიჩიდანაც ჩანს ხოლმე, როცა ათეულობით ვარსკვლავი ვერსაჩეს კაბებში და კოსტიუმებში იწონებს თავს. დონატელას ბოლო კოლექციის ერთ-ერთი ლუქი საკმაოდ წარმატებული აღმოჩნდა. ის უამრავმა ცნობილმა სახემ მოირგო, ასევე ვერსაჩეს ამ კომბინიზონს უამრავი ცნობილი გამოცემის ყდაზე და ფურცლებზე ვიხილავთ. კოსტიუმი გასულ ღამეს ახალგაზრდა მომღერალ Dua Lipa-საც ეცვა ნიუ იორკში. ასევე CFDA-ის წითელ ხალიჩაზე მოდელი ჯიჯი ჰადიდიც იწონებდა თავს.

ნახეთ ვარსკვლავების გალერეა:

დუა ლიპა



ჯიჯი ჰადიდი



სერენა ვილიამსი



ნაომი ქემპბელი



Vogue   ესპანეთი



ELLE ბრაზილია





TOP 8 ლუქი პარიზის მაღალი მოდის კვირეულიდან

გთავაზობთ 8 საუკეთესო ლუქს პარიზის ე.წ. "ოტ კუტურის" მოდის კვირეულიდან:

1. Iris Van Herpen



2. Christian Dior  



3.Givenchy



4. Chanel



5. Valentino



6. Maison Margiela



7. Armani Prive



8. Ronald Van Der Kemp

სანაპიროს ეკოსტილი
გაიცანით ბრენდი Fisch და 29 წლის შვედი დიზაინერი - აგნეს ფიშერი (Agnes Fischer), რომელიც საცურაო კოსტიუმების შესაქმნელად გადამუშავებულ სათევზაო ბადეებს იყენებს. ის აცხადებს, რომ თავისი შემოქმედებით სურს, ადამიანებს მოუწოდოს, პლანეტას მეტადგაუფრთხილდნენ.

რაც შეეხება კოსტიუმების დიზაინს, ფიშერის განცხადებით, მისი სურვილია, ისეთი საცურაო კოსტიუმები შექმნას, რომლებიც საღამოს გამოსასვლელი ლუქების ნაწილი გახდება.



აგნესის გარემოს დამზოგავი კონცეფციის ინსპირაცია კარიბის ზღვის აუზის კუნძული წმინდა ბართლომე, იგივე სანტ-ბართი გახდა. ბავშვობის წლები მშობლებთან ერთად იქ ხშირად გაუტარებია და როგორც აღნიშნა, კუნძულის ულამაზესი რიფები ზღვის დაბინძურების გამო დღეს ისეთივე ფერადოვანი აღარ არის, როგორიც ბავშვობიდან ახსოვს.




AVTANDIL - როცა სამოსში სქესი იკითხება
AVTANDIL - ერთ-ერთი სტაბილური სახელი და ქართული მოდის ისტორიაში ყველაზე მნიშვნელოვანი ბრენდია. მისი ისტორია ინდუსტრიის განვითარებასთან ერთად იწერებოდა. პატარა სახელოსნოში დიდი სიყვარულით დაწყებული საქმე მასშტაბურ წარმოებად გადაიქცა. როგორც დიზაინერი ავთო ცქვიტინიძე აღნიშნავს, "ავთანდილის" წარმატების საიდუმლო მის მუდმივ მოძრაობასა და განვითარების სურვილშია.



- ავთო, მიხარია, რომ ისევ შევხვდით ერთმანეთს თქვენს მარკაზე სასაუბროდ. როგორ ვითარდება მარკა "AVTANDIL" და რა სიახლეა თქვენს საქმიანობაში?

- წარმატებისა და წინსვლის უმთავრესი პრინციპი განვითარება, მუდმივი მოძრაობაა. არ უნდა გაჩერდე. სულ უნდა აგრძელებდე ძიებას და მარკის მენეჯმენტი სწორად უნდა გათვალო. მარკის მეორე ხაზი განვითარების პროცესშია. სიახლეა, რომ ამ ხაზის რებრენდინგი მიმდინარეობს - დარჩება მხოლოდ ქუჩის მოდა და სპორტული შიკი. გლამურული სამოსი კი მთლიანად პირველში, ანუ პრეტ ა პორტეს ხაზში გადაინაცვლებს. პარალელურად, მეორე ხაზს დაემატება მამაკაცის ხაზი. მამაკაცის ხაზსაც იგივე დატვირთვა ექნება, როგორიც ქალისას, გათვლილია ნებისმიერი გემოვნებისთვის. ორი წელია ამ პროცესების სწორად გათვლაზე ვმუშაობთ.



ვეძებთ სპეციალისტებსაც. მოლაპარაკებებს ვაწარმოებთ ფაბრიკებთან. სამუშაო, პრაქტიკულად დავასრულეთ და მარკა მზად არის მამაკაცის ხაზის გამოსაშვებად. მიუხედავად დიდი არჩევანისა, ქართველი მომხმარებელი პრეტენზიულია, განსაკუთრებით მამაკაცი. ქართველი მამაკაცი ყველაფერს არ იცვამს, ტონებიც მის გემოვნებას უნდა მიუსადაგო. იმავე საფასო პოლიტიკის მასმარკეტში, სხვაგან ასეთ წვრილმანებს არ ითვალისწინებენ. ამ შემთხვევაში ჩვენ შევჩერდით ფეშენმიმართულებით უფრო რეალიზებად, ქართულ ხასიათს მორგებულ მოდელებზე. ეს იმას არ ნიშნავს, რომ მოდის მიმდევარი მამაკაცები ამ სტილს ვერ მოირგებენ, ეს ხაზი ყველა სეგმენტზეა გათვლილი. ეს იქნება კაფსულა კოლექციები. ჯერჯერობით არ შევიტანთ კლასიკურ ხაზს. გოგონებისა და ბიჭების მოდელებში იქნება სტილი უნისექსი. მინდა, რომ ეს ხაზი სპორტ-შიკთან გაერთიანდეს და ერთი ხასიათის პროდუქტი მივიღოთ. ქალების ხაზი გაიყოფა. გლამური, როგორც აღვნიშნე პირველ ხაზში, ანუ ლუქსში გადავა.

- იმ კოლეციებს, რომელზეც ბოლო წლებში იმუშავეთ, ერთი ხაზი თუ აერთიანებს?

- ამ კოლექციებისთვის საერთო ხასიათი და ფერთა გამაა, ის სილუეტები, კონსტრუირება, რომელიც ძალიან ჩემია. ეს კონსტრუქციები მეორე ხაზში შედარებით გამარტივებული, ხოლო პირველ ხაზში შედარებით რთულია. პირველი ხაზი მხოლოდ ფრანგული ქსოვილით იკერება და ამიტომაცაა განსაკუთრებული. ქსოვილებს პარიზში ვიძენთ. ვთანამშრომლობთ რამდენიმე კომპანიასთან. მომავალი სეზონის ქსოვილს წინასწარ ვუკვეთთ. შესაბამისად, ქსოვილიც ტენდენციური და ტრენდულია.



- რა შეიცვალა მოდაში, რამდენად საინტერესო გახდა თანამედროვე ადამიანისთვის?

- მოდა ნელა, მაგრამ მაინც იცვლება... ნელ-ნელა ისევ ქალის სილუეტსა და ქალურობას უბრუნდება, რაც ძალიან მახარებს. დღემდე უნისექსი ითვლება ტრენდად, თუმცა დაბრუნდა შედარებით ვიწრო ქვედაბოლოები, ვიწრო შარვლები. თავისუფალი სამოსი და მძიმე ფეხსაცმელი ნელ-ნელა ტოვებს ტენდენციებს.

- როგორ ფიქრობთ, რა პროცესებმა გამოიწვია ეს ცვლილება?

- ეს უფრო ფსიქოლოგების თემაა. ამასთან, არ დაგვავიწყდეს, რომ მოდას პეპელასავით ხანმოკლე სიცოცხლე აქვს. დიდმა და ფართო ტანსაცმელმა ძალიან დიდხანს დაიპყრო მოდის სამყარო. როგორც ჩანს, საზოგადოებამ ამოწურა ეს სტილი, რომელიც მარტივი შესაკერია და გაცილებით პრაქტიკულიც. ასეთი სტილის სამოსი არ გაიძულებს, რომ მუდმივად ფორმაში იყოთ, უხეშად რომ ვთქვათ, მუდმივად თითის წვერებზე იდგეთ, რასაც ვერ ვიტყვით სხეულზე მომდგარ კონსტრუქციაზე. ქალური, წელში გამოყვანილი კაბა, ფაქტობრივად, ინდივიდუალური თარგით იკერება, მისი ტარება კი გარკვეულ მომზადებას უკავშირდება.



- მოდასთან ერთად თქვენი კოლექციებიც იცვლებოდა, მაგრამ ბოლომდე ქალურობის ერთგული დარჩით...

- არ მიყვარს, როცა სამოსში სქესი არ იკითხება. ასე მგონია, გაპრანჭვა ქალური ბუნებისთვისაა დამახასიათებელი. ის მხოლოდ მამაკაცისთვის არ იპრანჭება, საკუთარ თავსაც ეპრანჭება. ქალები სულ კოხტაობენ, ისინიც კი, რომლებიც არ მისდევენ მოდას და მიაჩნიათ, რომ მოდისგან განყენებულად ცხოვრობენ. სამსახურში არიან, მეგობრების წრეში თუ პურის საყიდლად, გაპრანჭვა არ ავიწყდებათ. მუდმივად მობილიზებულები არიან. ჩემი მოსაზრებით, ქალის არსებობა დედამიწას აბედნიერებს, სწორედ ამ მისიით შეიქმნა. დიდი როლი აქვს ქალს საზოგადოებასა და კაცობრიობის ისტორიაში და მამაკაცის ცხოვრებაშიც. მოდა ძალიან ჩამოჰგავს მის ცვალებად ხასიათს, ამიტომაც იცვლება ხშირად სილუეტიც, თმის ტენდენციებიც და ფერთა გამაც. მთელი ინდუსტრიები ჩართულია ამ პროცესში. ფეხსაცმლისა და ჩანთის ფორმებზეც კი არ წყდება მუშაობა. ამ ვნებამ ესთეტიკური მედიცინის მიმართულებითაც გადაინაცვლა. აქტუალური გახდა სავარჯიშო დარბაზები, შესაბამისად ფორმის შენარჩუნება. ბოლო წლებია, ხელმისაწვდომი და ტენდენციური გახდა გაახალგაზრდავება. ადამიანს არ უნდა დაბერება.



- სწორედ ეს ტრენდულობა და ვნება იწვევს გარკვეულ დრამასაც...

- გააჩნია, რამდენად ჯანმრთელად მიუდგები ამ საკითხს, რამდენად ძლიერი ხარ, რომ მსხვერპლად არ იქცე, ინფორმაციის ოვერდოზი არ მოგივიდეს. ყველაფერმა დანევროზებულ არსებად არ უნდა გაქციოს: მოკლე თმაა მოდაში და თმა შეიჭრა, მერე დაიბერო ტუჩები და ცხვირი აიპრიხო... ტენდენციების მიხედვით იცვალო მკერდისა და დუნდულების ფორმები. თუ ვარდისფერია ტენდენციური და შენ მწვანე გაცვია, ამით არაფერი შავდება.

- მოდის ისტორიაში ყველაზე საინტერესო პერიოდად რომელს თვლით?

- არც ერთს. პერიოდი ნაკლებად საინტერესოა. უფრო ინდივიდუალურად განვიხილავ დიზაინერებს. გენიალური იყო მაქქუინის პერიოდი. ასევე საინტერესო და განსაკუთრებული _ რალფ სიმონსის. ახლა დემნა გვასალიას დროა... ეს დიზაინერები ერთმანეთისგან რადიკალურად განსხვავდებიან.



- რაში ვლინდება თქვენთვის თანამედროვე მოდის ინდუსტრიაში დემნა გვასალიას ფენომენი?

- დემნა მსოფლიომ აიტაცა და ალბათ ყველაზე პოპულარული ბრენდი აქვს. "ბალენსიაგას" გაყიდვებმა ყველა მოდის სახლისას გადააჭარბა. საზოგადოების მოწონება-არმოწონებაზე არაა ლაპარაკი. ეს დიზაინერი ყველაზე აღიარებული და მოთხოვნადია მსოფლიოში. ის თავის მოვალეობას საუკეთესოდ ასრულებს. მეორე საკითხია, მის სამოსს თქვენ ატარებთ თუ არა.

- მე უფრო მეორე საკითხი მაინტერესებს... როცა საქმე უძვირეს და ყველაზე პროვოკაციულ პროდუქციას ეხება..

- ასეთ თემებს არ ვუღრმავდები. დემნამ საჭირო დროს საჭირო განაცხადი გააკეთა, ამაზე იმოქმედა სხვა მოდის სახლებში მიღებულმა უდიდესმა პრაქტიკამ, სწორმა ადგილმაც და სწორმა მენეჯმენტმაც... სწორად აგორებულმა სკანდალებმაც, პროვოკაციამ და იუმორმაც და ეს ყველაფერი უმაღლეს დონეზეა შეფუთული და მოწოდებული.



- თქვენი ბოლო ნამუშევრებიდან რომელ კოლექციას გამოარჩევდით, რომელია მათ შორის თქვენი ფავორიტი?

- ყოველი კოლექცია ჩემთვის გამორჩეული და ინდივიდუალურია. ყოველ კოლექციას თავისი დრო, ხასიათი და ემოცია აქვს. ტენდენციების მსხვერპლი ნამდვილად არ ვარ. თუკი ვიცი წინასწარ, რომელი ფერთა გამაა მოდური, შემიძლია ამ გამაზე უარი ვთქვა, ან საზოგადოებას საკუთარ ინტერპრეტაციებს ვთავაზობ. ვფიქრობ, მოდა ასე უფრო საინტერესოა და საზოგადოებასაც უფრო მოსწონს. ასეთ მონსტრ პირობებში, როცა ნებისმიერი საფასო პოლიტიკის ნაწარმის კონკურენციაა, როცა მონსტრი კომპანიების ერთმანეთთან ბრძოლა მიმდინარეობს და ჩემი მარკა ისევ არ კარგავს აქტუალურობას, ეს სასიხარულოა. ისიც სასიხარულოა, როცა არა მარტო ქართულ ბაზარზე, არამედ ევროპულზეც გთვლიან საინტერესო ბრენდად, რომლის პროდუქციასაც სიამოვნებით ატარებენ და რომ ჩემი მარკის სამოსის მომხმარებელი ძალიან გაახალგაზრდავდა. 16-17 წლის გოგონები სიამოვნებით იმოსებიან. ვფიქრობ, ეს მარკის დიდი გამარჯვებაა. ამ ტენდენციას მუდმივი სიახლით, მუდმივი განვითარებით ვხსნი. ასევე მნიშვნელოვანია, რომ ჩემს საქმეს გულით ვაკეთებ. ეს კოლექციები დიდი სიყვარულით კეთდება და არასდროს ვატყუებ მომხმარებელს.



- როგორ შეიძლება დიზაინერმა მოგვატყუოს?

- იოლად გამოვძვრე. ჩვენს ბაზარზე უამრავი ასეთი შემთხვევაა: თვალსა და ხელს შუა ფუჭდება საუკეთესო კვების ობიექტები. როგორც კი ვითარდებიან ქსელები, პროდუქციას აფუჭებენ, ძალისხმევას აკლებენ. ასეთი რამ არ უნდა იკადრო. საქმეში გული, სიყვარული უნდა ჩადო.

- თქვენს ბოლო კოლექციაზე, რომელიც მოდის კვირეულზე წარმოადგინეთ, როგორ იმუშავეთ?

- ეს ეხებოდა ადამიანის შინაგანი სამყაროს გამოტანას, სხვებისთვის ჩვენებას, ან პირიქით - დამალვას. შესაბამისად, შიდა, ფერად სარჩულებზე ბევრი ვიმუშავე. ვთვლი, რომ საზოგადოება ადამიანს სტერეოტიპებით აღიქვამს. მაგალითად, შენ ჩემთვის ხარ ერთ ფერთა გამაში. მე არ ვუღრმავდები და არც შენ მაჩვენებ, რა ფერები მოგწონს სინამდვილეში. ფასადს მიღმა რა სამყაროს ატარებ. ამიტომ, ამ კოლექციის სამოსი, გარედან ერთ ტონალობაში გადავწყვიტე, ხოლო ტანსაცმლის სარჩული ფერადი იყო. სარჩული ზოგან ნაწილობრივ ჩანდა, ზოგან მთლიანად, ან დახურული იყო. იცვლებოდა იმის მიხედვით, როგორ იღებს ადამიანს საზოგადოება, ან თავად ადამიანი როგორ აჩვენებს მას თავს. წამყვანი თემა იყო შავი პიჯაკი, რომელსაც ჭრელი სარჩული მივუსადაგე. პიჯაკი ორმხრივია. სურვილისამებრ ფერადი სარჩულის გამოჩენა და ღილით დამაგრებაა შესაძლებელი. ღილს ამ შემთხვევაში სიმბოლური დატვირთვა აქვს.



- თქვენთან რა შინაგან ცვლილებას უკავშირდება ამ თემით დაინტერესება?
- ყოველივე შეიძლება ასაკმა ან ემოციურმა ფონმა განსაზღვრა. ყველა ადამიანს აქვს ასეთი პერიოდი. ავთანდილს თვლიან სერიოზულ, წარმატებულ, მდიდარ, მოვლილ მამაკაცად. ტელევიზიის საშუალებით შეიძლება იციან, რომ იუმორის გრძნობაც მაქვს, რომ ჩემთან იოლია ურთიერთობა და არ ვარ ქედმაღალი. ამის იქით რას ვგრძნობ, რა ნიუანსებისგან შედგება ჩემი პიროვნება, არ იციან. არც არის საჭირო, ყველაფერი იცოდნენ. მხოლოდ რამდენიმე პიროვნებას აქვს ჩემი შინაგანი სამყაროს დანახვის უფლება. ჩემი ბოლო კოლექციის მთავარი თემა ეს იყო.

- ეს საინტერესო საკითხია, რაც ალბათ, ყველა თქვენს თაყვანისმცემელს აინტერესებს... ვინ არიან ეს ადამიანები და როგორ ირჩევთ მეგობრებს?

- ესენი არიან ოჯახის წევრები, ჩემი მეუღლე და უახლოესი მეგობრები. მათთან უკვე წლები მაკავშირებს. 17-20 წლის ასაკში ეს თემა არ დაგაინტერესებს, რადგან ამ დროს სხვა თემები შემოდის, სხვა საზრუნავი გაქვს. მას შემდეგ ბევრი რამ იცვლება, ადამიანებით იმედგაცრუებაც არცთუ იშვიათია... და, როგორ ქრებიან შენი ცხოვრებიდან ისინი... რას ნიშნავს "ქრებიან" და არაფერს განვიცდი? _ ქრებიან ნიშნავს, რომ ისე ქრებიან, რომ არც განვიცდი. თუ განვიცდი, მაშინ არ გამქრალან. ეს ნიშნავს, რომ ამ ადამიანთან კომუნიკაცია შევწყვიტე. ასეთებიც მომხდარა. რაც უფრო გავიზარდე, უფრო ვისწავლე თავდაცვა. ადამიანებიც აღარ ქრებიან, რადგან ზედმეტად აღარავის ვუშვებ ახლოს. გამარჯობის თქმიდან უკვე ვიცი, რა დამაკავშირებს ამა თუ იმ ადამიანთან. ჩემთვის ახალი ადამიანი ახალი შთაბეჭდილების, კომუნიკაციის საშუალებაა. ისიც აღარ მახსოვს, ბოლო პერიოდში ვინ დავიახლოვე და ამაში ადამიანებისგან მოყენებულ ტკივილს სულაც არ ვგულისხმობ. გავიზარდე და დროს აღარ ვხარჯავ ასეთ კომუნიკაციებზე.



- თუ გაქვთ რაიმე სიმბოლო, რომელიც კოლექციიდან კოლექციაში გადადის?

- ეს გახლავთ ოლეგ ტიმჩენკოს "ჯარისკაცი~, რომელიც სხვადასხვა სახით გადადის კოლექციებში. უცვლელად გადაგვაქვს მისი სილუეტი და ყოველთვის განსხვავებული ხასიათით "გვეჩითება". ჩემთვის სიმბოლურია ეს ჯარისკაცი, ვერ ამოვწურე. დიდი ხნის სიცოცხლე აქვს.

- ჩვენ ვსაუბრობთ ლუქსხაზზე. როგორ იწარმოება მეორე ხაზი და რა სიახლეს გვპირდება?

- წინასწარ გვაქვს გათვლილი, როგორ სილუეტზე იქნება მოთხოვნა. რაც ფერთა გამასაც ეხება. რადგან ჩვენი მომხმარებელთა ნაწილი უცხო ქვეყნის მოქალაქეა, ფერთა გამაში არ ვიზღუდავ თავს.



- მასმარკეტის მთავარი პრინციპი რა არის?

- კოლექცია ყველასთვის მისაღები, პრაქტიკული უნდა იყოს. ამ სამოსში მაღალი მოდის ელემენტები არ უნდა იკითხებოდეს. ფეშენზე არ უნდა იყოს გათვლილი, რადგან ასეთი სამოსი მაინც ძვირად ღირებულია. რატომ უნდა შევთავაზო ის მეორე ხაზის მომხმარებელს თუ არსებობს პირველი, ლუქს ხაზი? მეორე ხაზში რჩება ჯინსიც. ის ყოველთვისაა ჩემს კოლექციებში. იცვლება მისი ფორმები, ტექნოლოგიები, იხეხება კიდეც... ამ თვალსაზრისით ყველაზე უცვეთელი, საინტერესო, მოდური სამოსია.

- კომპანიის რებრენდინგის შემდეგ რას გეგმავთ?

- ჯერჯერობით რებრენდინგია ჩვენი უმთავრესი საზრუნავი. სწორი გათვლები უნდა დავდოთ. ვაგრძელებთ მუშაობას. მოდა ბრუნავს და სულაც არ ჰგავს ისეთ ბიზნესს, რომელსაც ერთხელ ჩაუშვებ და დასრულებული სახე აქვს. ყოველ 6 თვეში სამ სხვადასხვა კოლექციაზე ვმუშაობ. ამას მე-4, მამაკაცის ხაზი დაემატა. ჩემი მარკის სამოსს მსოფლიოს მრავალ ქვეყანაში იხილავთ, მათი ჩამოთვლაც კი შორს წაგვიყვანდა. ალბათ, მხოლოდ აფრიკაში ვერ წააწყდებით. ეს სქემა უკვე აწყობილია. ჩვენგან ინფორმაცია მიწოდებული აქვს მილანისა და პარიზის შოურუმების სათავო ოფისებს, საიდანაც ეს ინფორმაცია სხვადასხვა ქვეყანაში ნაწილდება. დახურული ინფორმაცია შეიცავს ბაიერების სიასაც.


ქეთი დარჩია
Versace-ს ყველაზე გრძელი სარეკლამო კამპანია
იტალიურმა ბრენდმა Versace-მ რამდენიმე დღის წინ სოციალურ ქსელებზე გაავრცელა, თავიანთი ახალი კოლექციის სარეკლამო კამპანიის ფოტოები და ვიდეობი. რა თქმა უნდა ბრენდის ახალი ფოტოსესია და ვიდეობი უყურადღებოდ არავის დარჩენია. ვერსაჩემ მსოფლიოს ყველაზე გრძელი სარეკლამო კამპანიის ფოტო წარუდგინა.


ფოტოში 54 მოდელი მონაწილეობს, რომლებიც ჩამწყრივებულები არიან ერთ ხაზზე და პოზირებენ. კამპანიაში მონაწილეობენ ისეთი მოდელები, როგორებიც არიან: ჯიჯი ჰადიდი, ბელა ჰადიდი, კაია გერბერი, სტელა მაქსვილი და სხვა. ფოტოები გადაღებულია ლეგენდარული ფოტოგრაფის, სტივენ მეიზელის მიერ.




შემოდგომა 2018-ის კოლექციის კამპანიასთან ერთად მოდელებმა, ბრენდის კრეატიულ დირექტორთან დონატელა ვერსაჩესთან ერთად, ჩაწერეს ვიდეო სადაც მსოფლიოს კიდევ ერთხელ ახსენებენ, რომ ბრენდს ჰქვია ვერსაჩე და არა ვერსაჩი. შეაგხსენებთ, რომ მსოფლიოში ძალიან ბევრი ადამიანი, განსაკუთრებით ინგლისურენოვანი ერები ბრენდს ვერსაჩის ეძახიან.








LORD-ი კვლავ გიორგი ქებურიას კოსტიუმს ირჩევს
მოულოდნელობა აღარ არის, რომ ცნობილი ვარსკვლავები არჩევანს ქართველ ნიჭიერ დიზაინერებზე აკეთებენ. სოციალურ ქსელებში გავრცელდა ინფორმაცია, რომ ახალგაზრდა, დიზანერის გიორგი ქებურიას კაბა ცნობილმა ვარკვლავმა LORD-მა უკვე მეორედ მოირგო.
როგორც დიზაინერი აღნიშნავს, Mercedes Benz Fashion Week Tbilisi-ზე კოლექციის გამოტანა ერთგვარი პლატფორმაა მსოფლიო მოდის ინდუსტრიაში სახელის დასამკვიდრებლად. ქებურიასთვის, ეს პირველი წარმატება არ არის, დიზაინერის ცნობილი სათვალეებით შთაგონებული რიანა, დები ჰადიდები, კორტნი კარდაშიანი და სოლანჟი არიან.

ასევე გიორგი ქებურიას კოსტიუმი ყველასთვის ცნობილმა პოპ დივამ ლედი გაგამაც მოირგო

- ლედი გაგას პირადი სტილისტი, ბრენდენ მაქსველი დამიკავშირდა და რამდენიმე კოსტიუმის გაგზავნა მთხოვა. ჩემი კოლექცია ვოგის საიტზე ნახა. ამ კოლექციას დიდი გამოხმაურება ჰქონდა. მის შესახებ საიტზეც დაიწერა და ბევრი სტილისტიც დამიკავშირდა.
ჩვენება Dolce & Gabbana Alta Moda კომოს ტბაზე
6 ივლისს კომოს ლეგენდარულ ტბაზე Dolce & Gabbana-ს ჩვენება გაიმართა. მოდის იტალიელმა გენიოსებმა სტეფანო გაბანამ და დომენიკო დოლჩემ ტრადიციულად ცნობილი სახეები შეკრიბეს არა მხოლოდ შოუს „პირველ რიგებში“, არამედ იმპროვიზაციულ პოდიუმზეც.
გასაოცარი ბუნებისა და უძველესი შადრევნის გარშემო მოძრაობდნენ, როგორც მოდელები, ისე ბრენდის ერთგული თაყვანისმცემლები. ჩვენება პრინცესა დიანას ძმისშვილმა ლედი კიტი სპენსერმა გახსნა. მას მოჰყვნენ ეშლი გრემი, ჰელენა კრისტენსენი, ნაომი კემპბელი და ბევრი სხვა.

მოდელებს შორის აღმოჩნდა მეი მასკიც - მოდის შემფასებელი და ილონ მასკის დედა. ის ნაზ მწვანე ფერის კაბაში გამოვიდა, რომელიც გაფორმებული იყო ბუმბულებით, თავზე კი ყვავილებიანი თავსაბურავი ეკეთა. დომენიკო დოლჩეს თქმით შთაგანების მთავარი წყარო კომოს ტბა გახდა. აქედანაა მშვენიერი პეიზაჟები კაბაზე და ყვავილები უზარმაზარ ტიარებში. ისიამოვნეთ.



ანა ვერძაძე


ასევე დაგაინტერესებთ: 

Chanel - მა კოკო შანელის საყვარელ ქალაქებს კოლექცია მიუძღვნა
მსოფლიოს ტრენდად ქცეული ემოციები - SOLD OUT !
თქვენ არ ხედავთ იმას, რაც აქამდე არ გინახავთ. არ ისმენთ, იმას რაც აქამდე არ გსმენიათ, თქვენ გაქვთ შესაძლებლობა, იფიქროთ შემოქმედებით მუხტზე, კულტურის არსზე, როგორც იარაღზე - თქვენ უბრალოდ კითხულობთ ქვეტექსტს, რაც აქამდე არ წაგიკითხავთ.
დათა ალექსეევი

ამბობენ, რომ პოლიტიკას ხელოვნებასთან არ აქვს არანაირი კავშირი. თუ ასეა, როგორ დამკვიდრდა ღირებულება „კულტურა როგორც სოციალური ინსტუმენტი“? ან „ხელოვნება როგორც იარაღი“? ვფიქრობ, ეს რიტორიკული შეკითხვა წერტილს დაუსვამს სოციალური ღირებულებებისა და კულტურის სფეროს გამიჯვნის არარეალურ თეორიას. ოდითგანვე, სანამ ტერმინი შემოქმედებითი ან კრეატიული ინდუსტრია დამკიდრდებოდა, კულტურა მსოფლიოს მართავდა, უარეს შემთხვევაში კი პირიქით. ამ დროს რევოლუციურ ნაბიჯებს გააჩნდა უპირატესობა ეპოქათაშორის მცირე, თუმცა უმნიშვნელოვანეს ცვლილებებში.



საიდან მოვდივართ?

ხშირად გვავიწყდება საიდან მოვდივართ, არ ვფიქრობთ მიზეზებზე, ვსაუბრობთ საბაბზე, ვივიწყებთ სასრულს და ვფიქრობთ უსასრულობაზე. შემოქმედების ყველაზე დიდი მუხტი ეგზისტენციის არქეტიპიდან მოდის. დემნა გვასალიას უახლესმა, 2019 წლის გაზაფხულის კოლექციამ ეს არგუმენტი ნამდვილად განამტკიცა.
VETEMENTS-მა კიდევ ერთხელ აალაპარაკა მსოფლიო, ამჯერად ყურადღების ეპიცენტრში საქართველო მოექცა .


ნოსტალგია, გენოციდი, პოლიტიკა, ომი

„ვფიქრობ, აქამდე არ მქონდა საკმარისი თავდაჯერებულობა, რომ ასეთი კოლექცია წარმომედგინა. 10 წლის ვიყავი, როცა ჩემი სახლი დაბომბეს და დევნილი აღმოვჩნდი ჩემს სამშობლოში. მე და ჩემი ძმა 90-იან წლებში გავიზარდეთ, ჩვენთვის მძიმე იყო ომი, რომელიც გადავიტანეთ. მინდოდა ჩემი ფობიები დამემარხა, მყარად დავდგომოდი შიშს, ბრაზს, ტკივილს, რომლის გახსენებაც აქამდე უბრალოდ არ მინდოდა. მე ვურჩიე ჩემს ფსიქოლოგს, დასწრებოდა ჩვენებას, რადგან ეს შოუ ბევრ პასუხგაუცემელ შეკითხვაზე გასცემდა მას პასუხს, დღეს კი შემოქმედებითად ბედნიერი ვარ“ - დემნა გვასალია

დემნა გვასალიას 2019 წლის კოლექციის ლაიტმოტივი არა, მოდური შოუ არამედ ქვეტექსტებად დაშლილი ფილმის ეპიზოდები იყო, რომელიც მტკივნეულად გადატანილ ემოციებზე მოგვითხრობდა. ანდერგრაუნდ კულტურის რუხმა კარდინალმა საქართველო მსოფლიო მოდის ასპარესზე გამოიტანა. კოლექციაში შეხვდებით ქართულ დროშას, გალაკტიონის ამონარიდებს, გენოციდზე გაკეთებულ აქცენტებს უახლეს ისტორიასთან ერთად “We dance toghether, we figth together”. თითქოს წლების განმავლობაში დაგროვილი პროტესტი, „რუსული ჩექმით“ დაწყებული „მტირალი აფხაზეთით“ დამთავრებული ერთ ლიმიტირებულ კოლექციად გადაიქცა, რომელიც „წუთ-ნახევარში“ გაყიდული იქნება“

იყიდება ისტორია!

ხშირად ამბობენ, რომ როდესაც სპეციალური ასორტიმენტის ტიპის პროდუქტს ვყიდულობთ, ხარისხზე მეტად ღირებულება, მისი შინაარსი, ისტორია და ფასეულობა გვაინტერესებს. წარმოგიდგენიათ ხვალინდელი დღე? მსოფლიო მოდის ინდუსტრიაში რევოლუციონერი ქართველი დიზაინერის ახალი „ტანსაცმელი“ მოდის დედაქალქების ქუჩებსა და კვირეულების „სთრითსთაილს“ დაიპყრობს, უამრავი ქვეტექსტით, იარაღით, რომლის შესახებაც არაფერი გინახავთ, არაფერი გსმენიათ, უბრალოდ ახლა კითხულობთ.

ჟურნალი „ბომონდი“
ივლისის ნომერი




ყველაზე მიმზიდველი აქსესუარის ორიგინალური კონცეფცია - ცაგო ყანჩაველი

ცაგო ყანჩაველი - ქართველი დიზაინერი, რომელიც უკვე 8 წელია აქსესუარების კეთებითაა დაკავებული, ხოლო ბოლო 3 წელია ორიგინალურ ჩანთებსაც ქმნის 

„აქსესუარების კეთების დროს მასალა მაძლევს ინსპირაციას.

ვიყენებ კერამიკას, ვერცხლს, ცხოველების, ადამიანის ფიგურებს. რაც შეეხება წელის ჩანთებს, აქ ჩემი შთაგონების წყარო ველოსიპედის ხის გვერდებიანი ჩანთა იყო“.

ფოტო - Lucas Pantskhava


დიზაინერი უნიკალურ ჩანთებსა და აქსესუარებს საკუთარ სახელოსნოში აწარმოებს.
როგორც ცაგო ჰყვება, ეს საქმიანობა მისთვის ერთადერთია და შემოსავლის სხვა წყაროებს არ მიმართავს. ონლაინ მაღაზიის წყალობით ბრენდის ცნობადობა და გაყიდვებიც სულ უფრო მეტად იზრდება. პროდუქცია გაყიდვადია მთელი მსოფლიოს მასშტაბით.


 

ანა ვერძაძე 
ჟურნალისტი

მისი უდიდებულესობა ფრანჩესკო რისო
მარნი იტალიური ბრენდია, რომელიც ქალის, მამაკაცისა და ბავშვის სამოსს, ფეხსაცმელსა და აქსესუარებს ქმნის. უშვებს ასევე პარფიუმერიასაც. იგი 1994 წელს ცოლ-ქმარმა - კონსუელო და ჯანი კასტილიონებმა დააარსეს.



კონსუელო კასტილიონი შვეიცარიელია. მას შემდეგ, რაც იგი ცოლად გაჰყვა ბეწვეულის კომპანიის Giwi Furs-ის პრეზიდენტს, ტანსაცმლის საკუთარი მარკის ჩამოყალიბება გადაწყვიტა.
მარნი კასტილიონების ოჯახური ბიზნესია. 2014 წლისთვის ბრენდის კრეატიული დირექტორი კონსუელო გახლდათ, ხოლო ჯანი კომპანიის აღმასრულებელი დირექტორია. მათი ქალიშვილი, კაროლინა სპეცპროექტებსა და ონლაინმაღაზიებზე მუშაობს, ვაჟიშვილი ჯოვანი კი საცალო ვაჭრობის განყოფილებას უძღვება.

თავდაპირველად მარნის კოლექცია მხოლოდ ბეწვისგან მზადდებოდა, მაგრამ მოგვიანებით კონსუელომ საკუთარი სტილი იპოვა, რაც მომგებიანი გამოდგა ახალგაზრდა ბრედისთვის. შედეგად მივიღეთ ქალებისთვის განკუთვნილი გამორჩეული სამოსი, რომელიც შესრულებულია მეოცე საუკუნის 70-იანი წლების სულისკვეთებით. ტანსაცმლის თავისუფალი სილუეტი ბრენდის დამახასიათებელი ნიშანია.



მეგობრული, თავისუფალი და კაშკაშა ქეჟუალი - ასე შეიძლება დავახასიათოთ მარნის თითოეული კოლექცია. ელეგანტური კოსტიუმები დანახვისთანავე იპყრობს ყურადღებას.

2017 წელს, მილანის მოდის კვირეულის განმავლობაში, ხმა დაირხა, რომ მარნის 2017 გაზაფხული-ზაფხულის კოლექცია კონსუელო კასტილიონის ბოლო ჩვენება იქნებაო. ინფორმაცია მალევე დადასტურდა - კასტილიონმა კრეატიული დირექტორის მოვალეობები მოიხსნა და ამ პოზიციაზე ფრანჩესკო რისო მოიწვია.

ახალ მთავარ დიზაინერზე, ფრანჩესკო რისოზე, ბევრი არაფერია ცნობილი: ვიცით მხოლოდ ის, რომ სწავლობდა პოლიმოდას ფლორენციულ კოლეჯში, ნიუ-იორკის მოდის ტექნოლოგიის ინსტიტუტში და ლონდონის სენ მარტინის კოლეჯში, თუმცა ესეც საკმარისია, რომ მისი ტალანტი ვირწმუნოთ.



ფრანჩესკო რისომ თავისი კარიერა Blumarine-ში დაიწყო, შემდეგ მუშაობდა Alessandro Dell'acqua-სა და Anna Molinari-ში, 2008 წლიდან კი საქმიანობდა Prada-ში -  ქმნიდა ქალის სამოსის კოლექციებს და დაკავებული იყო ბრენდის სპეციალური პროექტებით.

მარნის პირველი კოლექცია ფრანჩესკო რისოს, ახალი კრეატიული დირექტორის ხელმძღვანელობით მოდის მესვეურებმა იხილეს 2017 წლის შემოდგომა-ზამთრის კოლექციების ჩვენებაზე.

რაც შეეხება კონსუელო კასტილიონის, მან საკუთარი ბრენდის კრეატიული დირექტორის პოსტი პირადი მიზეზების გამო დატოვა.



- ჩემთვის სულისშემძვრელად სასიამოვნო იყო განვლილი 20 წელი. ამ ხნის განმავლობაში ჩამოვაყალიბე ბრენდი, რომელსაც უკვე თავისი ხელწერა აქვს. ჩვენი სამოსის დიზაინს დღეს ყველა ცნობს. ამ ყველაფერს კი ჩემი დიდი ოჯახის თანადგომით მივაღწიე. და აი, ახლა დადგა დრო, როცა პირად ცხოვრებას მივხედო. მადლობა მინდა გადავუხადო ყველა იმ ადამიანს, რომლებსაც ჩემი სჯეროდათ და ამ ფანტასტიკურ წლებში გვერდით დამიდგნენ. ბრენდის ისტორიას კი ფრანჩესკო რისო გააგრძელებს, რომელიც გამოცდილი დიზაინერია და ჩვენს იმედებს აუცილებლად გაამართლებს. ჩვენ გვჯერა მისი. - განაცხადა დიზაინერმა.

Chanel - მა კოკო შანელის საყვარელ ქალაქებს კოლექცია მიუძღვნა
Chanel-მა სამი არომატისგან Les Eaux de Chanel-ი შექმნა. ხაზი გაბრიელ შანელის საყვარელ ქალაქებს ეძღვნება, რომლებთანაც მას განსაკუთრებული ურთიერთობა აკავშირებდა - მათ შორისაა დოვილი, ბიარიცი და ვენეცია.



დოვილი ადგილია, სადაც ყველაფერი დაიწყო. 1913 წელს აქ Chanel-ის პირველი ბუტიკი გაიხსნა. პარფიუმერმა ოლივიე პოლჟმა ეს ადგილი „გამოსახა“ ფორთოხლის კანის, ბაზილიკის ფოთლის, ჟასმინისა და პაჩულის დახმარებით.
„ვალდებულება არ მქონდა ზუსტად გადმომეცა ადგილის ატმოსფერო. მე უფრო მსურდა ქალაქის მკვიდრის ზღვისკენ გაქცევის სურვილი ამეხდინა“ - ამბობს ის.



ბიარიცი - მეორე ქალაქი, სადაც შანელმა Chanel-ის ნივთების გაყიდვა დაიწყო - ეს დოვილიდან მხოლოდ 2 წლის შემდეგ მოხდა. „არომატების კოლექციის უმრავლესობა წყალთანაა დაკავშირებული. მინდოდა ისეთი განცდა შემექმნა, რომ ამ კომპოზიციის თითოეული ელემენტი მარილის შხეფებით გაჯერებულს ჰგავდეს“ - ამბობს პარფიუმერი.



ვენეცია - ეს არის გაბრიელის შთაგონების ადგილი. აქ ზღვა მხატვარი და ხელოვანი ადამიანია, აქ ერთმანეთს ერწყმის აღმოსავლეთი და დასავლეთი- ასეთივეა არომატი. ახალი ციტრუსი ნეროლის ტკბილ ნოტას ეხამება. „ჩემთვის მნიშვნელოვანი იყო, რომ კომპოზიციაში აღმოსავლეთთან სიახლოვე იგძნობოდეს, რაც Chanel -თვის ბაროკოს სინონიმია. სამი არომატიდან ეს ყველაზე ურბანულია“ - ამბობს პოლჟი.



ანა ვერძაძე