ახალი სეზონი - ტენდენციების ცვლილებები და ალტერნატივების ძიება

ჩვენი ჟურნალისა და ვებგვერდის მკითხველთა უმრავლესობა, განსაკუთრებით გამოარჩევს ქ. ნ მანანა ანთელიძის ბლოგის საინტერესო თემებს, შინაარსსა და მისი კომპეტენციის მაღალ ხარისხს მოდისა და ხელოვნების სფეროში.
განსაკუთრებით საინტერესოა მისი ანალიტიკა და პროგნოზები. ნოემბრის ნომერში გთავაზობთ გასული მოდის კვირეულების შეჯამებასა და მოსალოდნელი ცვლილებების ანალიზს. საინტერესოა ახალი პოდიუმის ვარსკვლავების წარმატების ფორმულისა და საზოგადოების აზრის განხილვა. ,,პუბლიკას უყვარს სენსაციები მაგრამ პუბლიკის ყურადღება წარმატების საფუძველია".





- ოქტომბერში დასრულდა მოდის კვირეულები მსოფლიოს ოთხ უმთავრეს მოდურ ქალაქში: ნიუ-იორკში, ლონდონში, მილანსა და პარიზში. მანამდე კი პარიზში, როგორც ყოველთვის,
ზაფხულში ჩატარდა Haute Couture-ს კვირეული. რა არის, შენი აზრით, დამახასიათებელი ამ სეზონისთვის და მოხდა თუ არა რაიმე განსაკუთრებული ამ პერიოდში?


- ვფიქრობ, ერთ-ერთი მთავარი მოვლენა მოდის სახლ Dior-ის დაარსებიდან 70 წლისთავის აღნიშვნაა. რადგან Dior-ი საფრანგეთისთვის ბევრად მეტია, ვიდრე მოდის სახლი, ამ ღონისძიებამ განსაკუთრებული მნიშვნელობა და ფორმა შეიძინა.

პარიზში, Les Arts Decoratifs-ის მუზეუმში გაიხსნა გამოფენა: "კრისტიან დიორი - ოცნების დიზაინერი", სადაც, გარდა Christian Dior-ის საუკეთესო ნიმუშებისა, წარმოდგენილია მისი მემკვიდრეების გამორჩეული ნამუშევრებიც. 300-ზე მეტი საოცარი კაბა, ფეხსაცმელი, აქსესუარები, სამკაულები - ეს, რა თქმა უნდა, ჯადოსნური სანახაობაა, მაგრამ, ვფიქრობ, არანაკლებ მნიშვნელოვანია, რომ მუზეუმში გამოფენილია Christian Dior-ის პირადი სივრცის ნივთები. იგი გახლდათ ფერწერის, სკულპტურისა და ხელოვნების სხვა ნიმუშების კოლექციონერი და ეს კოლექცია არაერთხელ გამხდარა მისი შთაგონების წყარო. Christian Dior-ის ავთენტური სივრცის შექმნით მუზეუმი ხაზს უსვამს უწყვეტ კავშირს ავტორის პიროვნებას, ინტელექტსა და შემოქმედებას შორის. ამ არასტანდარტული გამოფენის ერთ-ერთი მიზანია, დაეხმაროს ახალგაზრდა დიზაინერებს, ჩასწვდნენ მაღალი მოდის სადავეებსა და მის პრინციპებს. არ არის საიდუმლო, რომ სულ უფრო ხშირად ისმის ეჭვი Haute Couture-ის სიცოცხლისუნარიანობის შესახებ. ალბათ ამავე, მაღალი მოდის კულტურისადმი მიზიდვის მიზნით, Haute Couture-ს ფეშენ-ვიკის მსვლელობის დროს პარიზში მიწვეულები იყვნენ ამერიკელი დიზაინერები: Monique Lhuillier, Proenza Schouler, Ritarde და ავსტრალიელი Toni Maticevski. მათ წარადგინეს კოლექციები, რომლებიც მოიცავდა მოდის ყველა მიმართულებას: Resort, Redi tu Wear, Couture. კრიტიკოსების განსაკუთრებული მოწონება დაიმსახურა Rotarde-ს კოლექციამ - ის ყველაზე მეტად შეიცავდა Couture-ს ნიშნებს.
აშკარაა მაღალი მოდის ფრანგული სინდიკატის მცდელობა, ააღორძინოს თითქოს პოზიციადაკარგული ტრადიციები. ეს ხდება მის მიმართ საფრანგეთის ხელისუფლების მომეტებული ყურადღების ფონზე.

- თუმცა, არ შემიძლია, არ აღვნიშნო, რომ Haute Couture ყოველთვის ითვლებოდა საფრანგეთში ნაციონალურ მონაპოვრად და სახელმწიფოს მხარდაჭერით სარგებლობდა. Haute Couture-ის ნაწარმი მიიჩნევა ხელოვნების ნიმუშად, როგორც ფერწერა, სკულპტურა, მუსიკა.


- დიახ, ეს ყოველთვის ასე იყო. და მაინც, დღევანდელი პრეზიდენტისა და მისი მეუღლის ყურადღება მოდის მიმართ განსაკუთრებით მაღალია. Cuzy Menkes-ი (Internetional Vogue Editor) წერს ახალგაზრდა დინამიკური პრეზიდენტის (ყველაზე ახალგაზრდა Napoleon-ის დროიდან) და ყველაზე ენერგიული, არაორდინარული პრეზიდენტის მეუღლის გავლენაზე საფრანგეთის ცხოვრების ყველა ასპექტზე, კერძოდ, მოდის სფეროზე და განსაკუთრებულად Haute Couture-ისადმი.





Cuzy Menkes-ი ხაზს უსვამს, რომ ეს დამოკიდებულება ეხმარება პარიზს, გადალახოს ტერორისტული შემოტევების შედეგები - სტაგნაცია, სულით დაცემა და აძლევს ძალას, გადალახოს შიში და მიუბრუნდეს მშვენიერებას.

და ვპასუხობ შენს შეკითხვას: რა არის განსაკუთრებული ამ პერიოდისთვის? შემიძლია, ვთქვა, რომ სწორედ ეს დამოკიდებულებაა ყველაზე მნიშვნელოვანი და განსაკუთრებული.

და კიდევ ერთი, ჩემი აზრით, ძალიან საინტერესო და მნიშვნელოვანი ამბავი მოდის სფეროში: Gucci უარს ამბობს ნატურალური ბეწვის გამოყენებაზე, მიუხედავად იმისა, რომ ყოველწლიური მოგება ბეწვის ნაწარმის გაყიდვიდან შეადგენს დაახლოებით 12 მილიონ დოლარს. ბრენდმა ხელი მოაწერა Fur Free Alliance-სთან, რომლის მიზანია ცხოველთა ხოცვის შემცირება გლობალურ-ეკოლოგიური გეგმის ფარგლებში. ნატურალურ ბეწვზე უკვე შარშან თქვა უარი Giorgio Armani-მ. ასევე არ მუშაობენ ნატურალურ ბეწვზე Calvin Klein, Boss, Ralph Lauren, Tommy Hilfiger და, რა თქმა უნდა, Stella MacCartny, რომელმაც უკვე დიდი ხანია, უარი თქვა ნატურალურ ბეწვსა და ტყავზე.

- ვფიქრობ, ახლო მომავალში ბევრი სხვა მოდის სახლი მიჰბაძავს Gucci-ს და უარს იტყვის ნატურალურ ბეწვზე, რადგან Gუცცი-ს ავტორიტეტი სამყაროში ძალიან დიდია. ჩვენს მკითხველებს ყოველთვის აინტერესებთ ცვლილებები, რომელიც ასხვავებს ახლანდელ ჩვენებებს წინა სეზონისგან. რა შეგიძლია ამის შესახებ მათ უთხრა?


- პირველ რიგში, შემიძლია აღვნიშნო, რომ ამ სეზონის კოლექციებში ნაკლებია oversize-ის ტანსაცმელი. მთავარი ტენდენციაა ადამიანის ბუნებრივი პროპორციების ხაზგასმით შექმნილი სამოსი. oversize-ის მთავარმა "მამამ" Demna Gvasalia-მ სეზონის ჩვენებაზე იგი მინიმალურად გამოიყენა, ეს კი ნიშნავს, რომ ამ ტენდენციის დრო იწურება. თავისი ახალი პოზიცია კი Demna-მ გააჟღერა ჯერ კიდევ ამა წლის მაისში. WWD-ს ინტერვიუში მან განაცხადა: "ის, რასაც მე ვაკეთებდი Vetements-ის ფარგლებში სამი წლის განმავლობაში, იყო "მაგარი", მაგრამ ყველაფერს თავისი დრო აქვს. შემდეგში ჩვენ განვავითარებთ სხვა საზღვრებში. აღმოსავლური ბლოკის თემა ამოწურულია, ასევე ანდერგრაუნდი". მართლაც, ამ ჩვენებაში ბევრი რამ იყო სხვაგვარად, მაგრამ რთულია ფორმულირება, როგორ. ვფიქრობ, წარსულის მკაფიო ალტერნატივა ჯერ კიდევ არ არის მოძებნილი. მაგრამ ის უთუოდ მოძებნის!

- სხვათა შორის, Virgil Abloh-მ (Off White) გამოკვეთილმა ანდერგრაუნდისტმა, ასევე უღალატა თავის უცვლელ ugly chick-ს - ახალი კოლექცია იყო ბევრად რბილი, ზოგჯერ ქალურიც.





- აი, მართლაც, სად მიდის, არ ვიცი! და აქვე მინდა აღვნიშნო ასეთი უცნაური წინააღმდეგობები. გამოკვეთილად ახალგაზრდულმა ბრენდებმა, რომლებიც მუშაობენ ე.წ. streetstyle ან luxery streetstyle-ში, აჩვენეს ნაკლებად "თავხედური", უფრო ქალური კოლექციები იმ დროს, როცა ლუქსკატეგორიის ცნობილმა მოდის სახლებმა თავიანთ კოლექციებში მეტად დემოკრატიული, ახალგაზრდობაზე ორიენტირებული კოლექციები წარმოადგინეს. ჩვენი ერთ-ერთი წინა სასაუბრო თემა სწორედ ლუქსკატეგორიის მოდის სახლების ამ ტენდენციას ეხებოდა.

და როგორც შედეგი, - რეზიუმე, რომ მიუხედავად კოლექციებში სპორტული ტანსაცმლის დიდი რაოდენობისა: Ralph Lauren, Dior, Izabel Marant  ..., ჯინსის ქსოვილის - Stella MacCartny, Balenciaga, Givanchi, Dior... - ამ სეზონზე იყო ნაჩვენები ბევრი მაქმანი, აბრეშუმი, ატლასი, - Jhon Galliano, Peter Pilotto, Alexander MacQuun, Rotarde, Preen.. - ბევრი ტოტალურად ბრჭყვიალა - Dolce&Gabbana, Gucci, Marc Jacobs...

- ასევე გასაკვირად ბევრი იყო ბუმბული, მაგალითად, - Saint Laurant-თან, Nina Ricci-სთან, Proenza Schouler-თან...


- აქვე არ შემიძლია, არ აღვნიშნო Saint Laurant-ის ჩვენება, რომელმაც ჩემზე უდიდესი შთაბეჭდილება მოახდინა. ახალგაზრდა Anthony Vaccarello-ს Saint Laurant-ის კრეატიული დირექტორი აწყობს გრანდიოზულ ჩვენებას (92 კოსტიუმი) ღამით, ღია ცის ქვეშ ბრჭყვიალა ეიფელის კოშკის ფონზე.
"მინდოდა მომეყოლა ისტორია Saint Laurant-ზე, პარიზზე..." ამბობს ის და ქმნის ახალგაზრდულ, ექსტრემალურად სექსუალურ და პროვოკაციულ კოლექციას. "Saint Laurant-ის გოგოს არ აქვს დეპრესია, მას უყვარს სიცოცხლე და სურს, სიამოვნება მიიღოს მისგან..." - ეს რეალური ლიდერის მკვეთრად განსხვავებული პოზიციაა და ზუსტად ეთანხმება იმ განწყობას, რომელიც შეიქმნა პარიზში "მაკრონების" მოსვლასთან დაკავშირებით.



- ფიქრობ, დაკვეთაა?


- შესაძლებელია. მთავარია, რომ ძალიან კარგი შედეგია!

- როცა ვიხილავთ მოდის კვირეულის სხვადასხვა ასპექტს, არ შეიძლება არ შევეხოთ მოდელების თემას და, პირველ რიგში, Kaia Gerber-ს, რომელიც ნიუ-იორკისა და ევროპული კვირეულების ფარგლებში მუდმივად ყურადღების ცენტრში იყო. მან იმუშავა დაახლოებით 20 დიზაინერთან და ხშირად პირველ პოზიციებზეა.



 - როგორ ფიქრობ, არის ის განსაკუთრებული, თუ მისი წარმატება განპირობებულია Cindy Crawford-ის შვილობით?


- იმის უარყოფა, რომ პირველადი ყურადღება მის მიმართ გამოწვეულია სუპერმოდელის შვილობით, შეუძლებელია. მახსოვს, რამდენიმე წლის წინ, როდესაც ის სულ ბავშვი იყო, როგორი "ნადირობა" ჰქონდათ გამოცხადებული მასზე სამოდელო სააგენტოებს და მოდის სახლებს. არა მხოლოდ იმიტომ, რომ უკვე ჩანდა, როგორი სრულყოფილი სამოდელო გარეგნობა ექნებოდა მას. მთავარი იყო მისი მსგავსება დედასთან, "90-იანის ლეგენდასთან" და კონტრაქტი "ახალგაზრდა Cindy Crawford-თან", რა თქმა უნდა, ძალიან მოგებიანი იქნებოდა კომერციულად.
პუბლიკას უყვარს სენსაციები, პუბლიკის ყურადღება წარმატების საფუძველია.

- ეს Kaia-სთან დაკავშირებული აჟიოტაჟი მახსენებს 2014 წლის ისტორიას, როდესაც პოდიუმზე Kandell Janner-ი გამოჩნდა. მის უკანაც ხომ მძლავრი ოჯახი დგას - Kardashian-Janner-ების რეალითიშოუების კლანი, Instagram-ის, Twitte-ის "ვარსკვლავები".


ამავე დროს, ის მიზანდასახულად ემზადებოდა თავისი ადგილის მოსაპოვებლად - დიდ პოდიუმზე გამოჩენამდე ორი წელი ლოს-ანჯელესის ერთ-ერთ სამოდელო სააგენტოსთან თანამშრომლობდა და უკვე ჰქონდა ფოტოსესიები ისეთ ჟურნალებში, როგორიცაა: Teen Vogue, American Cheerleader, Teen Prom და ბევრი სხვა. ამიტომ, როდესაც ხელი მოაწერა ხელშეკრულებას The Society Management-თან, ის უკვე თინეიჯერების კერპი იყო.


შედარებისთვის მინდა მოვიყვანო Lottie Moss-ი, Kate Moss-ის ნახევარდა. მას ყველა გზა ხსნილი აქვს, ძალიან ბევრი გაკეთდა და კეთდება მისი რეკლამირებისთვის, მაგრამ თვისებების - ინერტულობის, უსიცოცხლო გამომეტყველების გამო, არ აღმოჩნდა საინტერესო უმეტესი მოდის სახლისთვის. ყოველ შემთხვევაში, ჯერჯერობით ასეა.



რაც შეეხება Kaia Gerber-ს. მოდის ჟურნალები წლის აღმოჩენად ასახელებენ მასთან ერთად ათამდე ახალბედა მოდელს, რომლებსაც არანაირი ვარსკვლავური წინაპარი არ მოეძებნებათ. მათ შორის: Hianda Martinez (Dominican Republic), Shanell Nyasase (Kenya), Sijia Kang (China), რომლებიც ძალიან მომწონს. მაგრამ თუ შევადარებთ მოდელების გამოსვლას, აშკარა ხდება, რომ Kaia Gerber-ს ახასიათებს მეტი თავდაჯერებულობა და ეს აძლევს მას საშუალებას, თავისი ძლიერი მხარეები კარგად წარმოაჩინოს.




- მართლაც, ძალიან შთამბეჭდავი იყო მისი გამოსვლა Alexander Wang-თან, Moschino-სთან, Chanel-თან და ბევრ სხვასთან, მაგრამ არ შეიძლება არ აღვნიშნოთ, რამდენად დიდი მორალური მხარდაჭერა ჰქონდა მისთვის იმ ფაქტს, რომ Fashion week-ების პერიოდში მათი მთელი ოჯახი Omega-ს გახმაურებულ რეკლამა Familytime-ში გადაიღეს, სადაც პირველად ისტორიაში, ოჯახის ყველა წევრი ბრენდის სახე გახდა.


- დიახ, აი, სწორედ ამას ვგულისხმობდი. Sindy Crawford 1995 წლიდან Omega-ს სახეა, ახლა კი მისი, როგორც წერენ "დალოცვილი გენეტიკის მქონე" მთელმა ოჯახმა ეს სტატუსი მიიღო (სხვათა შორის, ოჯახის მამა მილიონერია).
და ეს არ არის ყველაფერი. Sindy Crawford -მა გამოუშვა Re/Done Jeans Cindy Crawford collectio და მისი პრეზენტაცია და დიდი სარეკლამო კომპანია Fashion Week-ებს დაემთხვა.


რა თქმა უნდა, ასეთმა beeckground-მა Kaia Gerber-ი განსაკუთრებული ყურადღების ობიექტად აქცია და მხოლოდ დროთა განმავლობაში გახდება ცნობილი, შეძლებს თუ არა გოგონა ამ მაღალი პოზიციის შენარჩუნებას, თუ სამოდელო სამყარო, რომელიც, როგორც ვიცით, ძალიან სასტიკია, როგორადაც უნდა შეუწყო ხელი, მისი არ არის.

ხომ ცნობილია, რომ წარსულის ყველა კაშკაშა მოდელი სწორედ რომ არ არის ვარსკვლავური მშობლების შვილი.

მანანა ანთელიძე

ჟურნალი "ბომონდი" (ნოემბრის ნომერი)
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.