ნუკი კოშკელიშვილი Christmas mood

შობა-ახალმა წელმა დიდი ცვლილებები მოუტანა - მისი სიყვარული სწორედ ახალი წლის წინადღეებში დაიწყო. ახლა ნიუ-იორკშია, საყვარელი მეუღლის გვერდით და ახალ წელს ახალ ამპლუაში შეხვდება. ნუკი კოშკელიშვილი საახალწლო განწყობით "ბომონდის" ფურცლებიდან…



- ერთმანეთი შემთხვევით, სოციალური ქსელით გავიცანით. საუბარი ერთმანეთის მოკითხვით დავიწყეთ, მაგალითად: "აბა რა ხდება შენთან, საქართველოში?", ან "რა ხდება ნიუ-იორკში?" ნაცნობობა ნელ-ნელა მეგობრობაში გადაიზარდა. ამასობაში შეყვარებულს დავშორდი, ისიც დაშორდა… ზუსტად მახსოვს, წინასაახალწლო მზადება იყო. 10 დეკემბერს მომწერა, ჩემთან ჩამოდი, მგონი, მიყვარხარო. ახალი წელი ჩემთვის ჯადოსნური პერიოდია. 18 დეკემბერს უკვე ნიუ-იორკში

ვიყავი. ვიჯექი სასტუმროში და ვფიქრობდი, თუ არ მომეწონება, ნიუ-იორკში მოგზაურობა მაინც გამომივა-მეთქი.

"ქრისთმასის" ჯადოსნურობამ თავისი ქნა. როგორც ფილმებშია, აგუზგუზებული ბუხარი დამხვდა წინდებით, ერთ-ერთზე ჩემი სახელი ეწერა და მაშინ ვიგრძენი, რომ უკვე ოჯახის წევრი ვიყავი. ჩაიარა ზამთარმა, რომელსაც მოჰყვა ზაფხული და ზაფხულთან ერთად ჩემი ბენი საქართველოს ეწვია. საქართველოში უკეთ გავიცანით ერთმანეთი. მერე წავიდა და 6 თვის განმავლობაში ერთმანეთის ნახვა ვერ მოვახერხეთ. ისევ მოვიდა ზამთარი, ახალი წელი და ისევ ნიუ-იორკში აღმოვჩნდი. ერთ დღესაც ბენმა დაიჩოქა და ცოლობა მთხოვა, ახალ წელს სასწაულები ხდება, მიყვარხარ და ცოლობაზე შენი თანხმობა ჩემთვის სასწაული იქნებაო. ქორწინებას ერთ წელიწადში ვგეგმავდით, მაგრამ იმავე ზაფხულს ჩამოვიდა ბენი და დაქორწინება შემომთავაზა. ნიუ-იორკში სიყვარულის სურნელი ტრიალებს და აღარ გადავდოთო. ხომ იცით, საქართველოში რამდენი ნაცნობი მყავს. ყველას ვერ დავპატიჟებდი, ამიტომ ჰოლივუდის ვარსკვლავებივით ფარულად დავქორწინდით. ნიუ- იორკში მხოლოდ ჩემი უახლოესი მეგობრები ჩამოვიდნენ. 


- წინააღმდეგობები? ბევრი წინააღმდეგობის გადალახვა მოგვიხდა. როცა ამხელა მანძილზე ცხოვრობ, კონფლიქტები გარდაუვალია. დროც კი განსხვავებული გვქონდა. მე რომ ვიძინებდი, ის იღვიძებდა. მენტალობაც კი სხვა ჰქონდა. მაგრამ როცა ორი გული ერთნაირად ცემს, საათის თანაბრად წიკწიკს მნიშვნელობა ეკარგება.

- გადაწყვეტილება ადვილად და უცებ მივიღე. უცხო ქვეყანაში საცხოვრებლად გადასვლა რთულია, მაგრამ როცა მარტო არ ხარ, მაინც გიმსუბუქდება.. თან როცა იცი, რომ შენს მეორე ნახევარს შენი სჯერა. იუმორში თუ გადავიტან, ლარის მერე ადვილად შევეგუე იმას, რომ დოლარი დოლართან უცვლელია.

- ფილმებში რომ გინახავთ, ყველაფერი ისე იყო. ნამცხვრის, თეფშისა და სუფრის დიზაინზე ცალ-ცალკე ვიმუშავეთ. დიჯეი, ბენდი, რეპეტიცია… ბევრი სტრესიც ახლდა ამ ყველაფერს. მერე მივხვდი, რომ "გაპარვა" არც ისეთი სულელობა ყოფილა, როგორიც ადრე მეგონა.

- ნიუ იორკი? სასწაულია, უმაგრესია, ეგრევე გიყვარდება. თბილისიც მენატრება. ჩემი ქალაქის ქუჩები, ოჯახის წევრები. ჩემი ორი დაქალიც, რომლებთან ერთადაც გავიზარდე. 17 წელია, რაც ჩემი ოჯახის განუყოფელი წევრები არიან. ასეთ მეგობრებს აქ ვერ შეიძენ. ძირითადად, მენატრება ოჯახი, მეგობრები და სამსახური.

- ახალ ამპლუას ნელ-ნელა შევეგუე. მომწონს ის თავისუფლება, რომელსაც აქ ვგრძნობ. რასაც მინდა, იმას ვამბობ, დავდივარ შილიფად ჩაცმული და ჩემზე არავინ არაფერს ამბობს. ახალ გარემოს ადვილად მოვერგე. არც ჩემს სათვალეებზე გამოხატავენ გაკვირვებას, პირიქით, მოსწონთ.

- ბენი მუშაობს, მე მაღაზიებში დავდივარ. არასდროს მეგონა, თუ ჩემგან მზრუნველი ცოლი დადგებოდა. აღმოჩნდა, რომ ქართველი ცოლი ვარ კლასიკური გაგებით: ვრეცხავ, ვაცხობ, ყოველდღე კულინარიულ ექსპერიმენტებს მივმართავ. საჭმელს ყოველდღე ვამზადებ. ბენსაც ყოველდღე დასუფთავებული და დაუთოებული სამოსი ხვდება. მისი ძმაკაცები იძახიან, ჩვენც გვინდა ქართველი ცოლებიო.

- სამუშაოზე ვფიქრობ. ჯერჯერობით საბუთებს ვაწესრიგებ. როცა ამ პროცედურებს მოვრჩები, დავიწყებ სამუშაოს ძებნას. იმედი მაქვს, რა იცი, რა ხდება.

- ჩაცმის სტილი არ შემიცვლია. რატომ უნდა შემეცვალა. აქ ძალიან უყვართ და მოსწონთ ჩემი სიჭრელე და უცნაური სათვალეები. თავის მოვლას კი საქართველოში უკეთესად ვახერხებდი. მიყვარს ჩემი ქართველი კოსმეტოლოგი. საქართველოში ყველა მეგობრულადაა განწყობილი, შესაბამისად, გულიანად. მენატრება ეს დამოკიდებულება.

- ჩემთვის ყველაზე ბედნიერი პერიოდი შობა-ახალი წელია. ახალ წელს საყვარელ მეუღლესთან, ბენთან ერთად შევხვდები. გავაკეთებ გემრიელ კერძებს და შემდეგ მეგობრებთან გადავინაცვლებთ.

- რაც შეეხება ფოტოსესიას, მიყვარს საშასთან ერთად მუშაობა. ნიუ-იორკში ყველგან წინასაახალწლო განწყობა იგრძნობა. მიხარია, რომ "ბომონდში" ეს განწყობა იქნება მთავარი თემა. როგორც ხედავთ, შობა-ახალი წელი ჩემს ცხოვრებაში განსაკუთრებულ მოვლენებს უკავშირდება. ჩემი ცხოვრება შეცვალა. თქვენს მკითხველსაც ბედნიერი შობა-ახალი წელი მინდა ვუსურვო. დაე თქვენც იპოვოთ ნაძვის ხის ქვეშ საგზური ჭეშმარიტი სიყვარულისკენ. დამდეგ 2016 წელს გილოცავთ. უყვარდეთ და გიყვარდეთ.

like
0

კომენტარები

catherine 2016-01-21 06:53
ცხვირი გაიკეთა?? :(

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.