"ნაყინსა და პიცას 15 წლის ასაკში თუ არ შეჭამ, აბა როდის უნდა გააკეთო ეს?" - კაია გერბერი

16 წლის კაია გერბერის პორთფოლიოში უკვე არის Teen Vogue-ის გადაღებები, კონტრაქტები Marc Jacobs-თან და Versace-სთან.

სწორედ Versace-ს უკანასკნელ ჩვენებაზე კაია პოდიუმზე დედასთან, სინდი კროუფორდთან ერთად გამოჩნდა. გაგაცნობთ კაია გერბერის ისტორიას - იმას, რაც გოგონამ თავად მოასწრო მსოფლიოსთვის ეამბო.

კაია, უფროსი ძმის, პრესლის მსგავსად სინდი კროუფორდმა სახლში, ლოს-ანჯელესში გააჩინა. მაშინ კროუფორდმა მისი სამოდელო კარიერა მეორე პლანზე გადაიტანა, რათა შვილებისთვის მეტი დრო დაეთმო. ბავშვების მამა, რენდი გერბერი ასევე ყოფილი მოდელი და კალიფორნიაში მოდის საუკეთესო სახლების მფლობელია.

კროუფორდი სახლსა და კარიერას ერთმანეთში არასდროს
ურევდა, ამიტომ კაიას დიდხანს არ ესმოდა, რომ დედამისი იმაზე მეტი იყო, ვიდრე უბრალოდ ლამაზი და კეთილი ქალი. "ვფიქრობ, მხოლოდ მერვე დაბადების დღეზე, დისნეილენდში მივხვდი რა ხდებოდა. მე პრინცესებთან მინდოდა ფოტოს გადაღება, ირგვლივ კი ყველას მასთან სურდა ფოტო" - სიცილით იხსენებს გოგონა.

რაც უფრო მეტად იზრდებოდა კაია, მით უფრო აშკარა ხდებოდა მისი მსგავსება დედასთან. წაბლისფერი თმა, შეუდარებელი კანი და სხეული მას სუპერდედისგან მემკვიდრეობით გადაეცა.



უკვე 10 წლის ასაკში Versace-ს მოდის სახლთან კაიამ პირველი კონტრაქტი გააფორმა. შემდეგ იყო Teen Vogue-ის გადაღებები, 13 წლისა კი IMG Models-ის კონტრაქტიანი მოდელი გახდა. თუმცა ამ ყველაფერმა ახალგაზრდა მოდელს თავბრუ ვერ დაახვია - ის სკოლაში გულმოდგინედ სწავლას აგრძელებდა, დროს ოჯახთან ერთად ატარებდა, მოდის ჩვენებებს კი ისე ეკიდება, როგორც ჰობს.

კაია 15 წლის იყო, როცა სკოლიდან დაბრუნებულმა შეიტყო, რომ სუნამოს Daisy by Marc Jacobs სახე გახდა.

კაიამ დიზაინერი მარკ ჯეიკობსი აღაფრთოვანა: "ის შესანიშნავი გოგონაა ყველა გაგებით. მისი სილამაზე, მომხიბვლელობა, მისი განუმეორებელი ინდივიდუალობა და პროფესიონალური ეთიკა ამტკიცებს, რომ ვაშლი ვაშლის ხის ახლოს ეცემა".

როცა კაიას 16 წელი შეუსრულდა, გადაწყვიტა მისთვის ჩვეული teen ჩარჩოებიდან გამოსულიყო და ეთამაშა, როგორც დიდს. მისთვის ტრიუმფალური აღმოჩნდა პირველი სეზონი. Marc Jacobs-სა და Calvin Klein-ის ჩვენებების შემდეგ, ის ნიუ-იორკში Alexander Wang, Fenty-სა და Coach-ის პოდიუმებზე ვიხილეთ. მილანში უკვე ელოდნენ Fendi, Prada, Moschino, Chanel  და მოდის სხვა სახლები. სინდი მას თითქმის ყველა ჩვენებაზე დაჰყვებოდა და ისე იქცეოდა, როგორც ტიპიური დედა: ქალიშვილის გამოსვლებს ტელეფონით იღებდა, კულისებში გარბოდა, რათა გაეგო, ხომარ მოშივდა გოგონას. სინდი გამოტყდა, რომ სიამოვნებით გადადებდა ქალიშვილის კარიერას რამდენიმე წლით, მაგრამ ცდილობს შვილებს საკუთარი რჩევებით თავი არ მოაბეზროს.

- "რჩევები, რომლებსაც მათ ვაძლევ, უფრო შეხსენებას ჰგავს - არასდროს დააგვიანონ, იყვნენ მომზადებულები, იყვნენ პროფესიონალები, არ გახდნენ ტელეფონზე დამოკიდებულები, ესაუბრონ ადამიანებს და გაერთონ. მხრებზე თავი ორივეს აქვს, მე არ ვღელავ".

როცა რეპორტიორები სინდით უფრო მეტად ინტერესდებიან, ვიდრე კაიათი, მას დედის "ჩრდილში" ყოფნა დისკომფორტს სულაც არ უქმნის. პირიქით, ვარსკვლავურ ოჯახზე ყოველთვის ნაზად და სიამაყით საუბრობს. "დედა ბუნებრივად იმდენად ლამაზია! ამას სერიოზულად ვამბობ, როცა ის დილით იღვიძებს, შესანიშნავად გამოიყურება. მისი სილამაზე ბუნებრიობაშია და არა სპეციალურ ვარცნილობასა და მაკიაჟში".

სამოდელო კარიერის მიღმა, კაია სწავლობს ან მეგობრებთან ერთად ერთობა, როგორც ჩვეულებრივი მოზარდი. ინსტაგრამზე მას 2 მლნ-ზე მეტი გამომწერი ჰყავს და ამას პასუხისმგებლობით ეკიდება:

- "მინდა მოზარდი გოგონებისთვის კარგი მაგალითი ვიყო. არცერთ სოციალურ ქსელს გულგრილად არ ვეკიდები. კარგის კეთება - ეს ისეთი მნიშვნელოვანია".
ვიდრე თაყვანისმცემლების ერთი ნაწილი კაია გერბერის სხეულით აღფრთოვანებულია, სხვები ფოტოებზე ანორექსიის ნიშნებს ეძებენ. Byrdie-სთან ინტერვიუში მან განაცხადა: "ფორმის შენარჩუნებაზე ნამდვილად ვფიქრობ, მაგრამ ამაზე ჩაციკლული არ ვარ. ბევრს ვმოძრაობ, მაგრამ არ მინდა გაღვიძებისთანავე სპორტდარბაზში გავრბოდე. როცა პიცას ან ნაყინს შემომთავაზებენ, შევჭამ. თუ ამას 15 წლის ასაკში არ გააკეთებ, აბა როდის არის ამის დრო?"
Chanel-ის ჩვენებაზე ის ნავარჯიშევი პრესის დემონტრირებას ახდენს, სიხარულით სეირნობს დედასთან ერთად ველოსიპედით ლოს-ანჯელესის ქუჩებში, დროს მეგობრებთან ერთად პიცერიაში ატარებს და ახალგაზრდობით ტკბება. მართლაც, როდის უნდა მისცე საკუთარ თავს ყველაფრის უფლება, თუარა 16 წლის ასაკში?


ანა ვერძაძე
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.