ნანუკა გოგოჩაიშვილის ნიუ-იორკული შთაბეჭდილებები სიურრეალისტური ფორმით

ნანუკა გოგიჩაიშვილს ვიცნობთ როგორც წარმატებულ მოდელს, რომელიც გამოდიოდა პოდიუმზე და მონაწილეობდა ფოტოსესიებში, თანამშრომლობდა მსოფლიოს სხვადასხვა ქვეყნის სამოდელო სააგენტოებთან.
მოულოდნელად ის ახალი ამპლუით გამოჩნდა. ნანუკას, როგორც მხატვარს, ნაკლებად იცნობს საზოგადოება. თავად კი აღნიშნავს, რომ ხატავს ბავშვობიდან და სოციალურ ქსელში განთავსებულმა მისმა ნამუშევრებმა ერთ-ერთი ამერიკული სააგენტო დააინტერესა. ასე აღმოჩნდა ჩვენთვის კარგად ცნობილი მოდელი ამერიკაში სრულიად სხვა სფეროში. მას უკვე რამდენიმე გამოფენაში აქვს მონაწილეობა მიღებული. სამშობლოში დაბრუნებას ჯერ არ აპირებს, რადგან მისთვის საინტერესო წინადადებები ისევ ამერიკას უკავშირდება.



- ნანუკა, როდის და რატომ აღმოჩნდით
ნიუ-იორკში?

- პირველად არ ვარ ამერიკაში. ამერიკაში ყოველთვის განსაკუთრებული მისია მაქვს... ძირითადად სამოდელო სფეროში ვსაქმიანობდი. მილანის სააგენტოსთან ვთანამშრომლობდი. იქიდან ახალი დაბრუნებული ვიყავი თბილისში. შინ, ოჯახის წევრებთან ყოფნა მსურდა, სექტემბრის სეზონისთვის წასვლა გადავდე. თავისუფალი დრო მქონდა და შემეძლო, მთლიანად ხატვისთვის დამეთმო. ეს დრო რამდენიმე ნამუშევარზე მუშაობას მოვანდომე და მერე სოციალურ ქსელში ავტვირთე. მოულოდნელად ერთ-ერთი კომპანია დაინტერესდა ჩემი ნამუშევრებით. დეკემბერში მივიღე წინადადება, რომ გამოფენა მომეწყო. მოლაპარაკებების შემდეგ ბილეთი გამომიგზავნეს და 1-ლ თებერვალს გამოფენა დავნიშნეთ. იმდენად საინტერესოდ ჩაიარა ამ ღონისძიებამ, რომ მალევე მეორე გამოფენაზე მივიღე წინადადება. ახლაც საქმიანი შეხვედრა მაქვს ლოს-ანჯელესში.

- რას საქმიანობთ და რა გეგმები გაქვთ?
- ვხატავ, ბევრს ვმუშაობ საკუთარ თავზე. მოგეხსენებათ, როგორც მხატვარს, დიდი გამოცდილება არ მაქვს და მინდა, ახლა მივიღო. მსურს, გავიზარდო, ავითვისო სხვადასხვა ტექნიკა. ამ მხრივ არ ვჩერდები. იმდენად საინტერესოდ წარიმართა ჩემი საქმიანობა, რომ თავს მოდუნების უფლებას არ ვაძლევ.




- ამბობენ, რომ ნიუ-იორკში ყველას აქვს წარმატების შანსი. თქვენ როგორ აპირებთ ამ შანსის გამოყენებას?
- ჩემს სურვილებზე წინასწარ ლაპარაკი არ მიყვარს. მირჩევნია, მას შემდეგ განვაცხადო ხმამაღლა, როცა ასრულდება. საერთოდ, მიზანმიმართული ვარ, ჩემი სურვილების განსახორციელებლად ძალ-ღონეს არ ვიშურებ. მჯერა, რომ რასაც დავიშთაბეჭდილებები სახავ მიზნად, აუცილებლად ასრულდება. ასე იყო ყოველთვის. რასაკვირველია, ახლაც მაქვს ჩემი გეგმები, სურვილები, რომელზეც მოგვიანებით ვისაუბრებ, როგორც მოგახსენეთ, მას შემდეგ, რაც ასრულდება.

- გაიხსენეთ ის ემოციური მუხტი, რომელმაც ხატვა დაგაწყებინათ.
- ემოციური მუხტი არ მახსოვს, რადგან 3 წლიდან ვხატავ, მაშინ შეიქმნა ჩემი პირველი ნამუშევრები. რადგან სამოდელო კარიერით ვიყავი დაკავებული, ინტენსიურად ვეღარ ვხატავდი. მთლიანად გადავერთე ამ საქმიანობაზე, ამასთან, ერთ ადგილას იშვიათად ვიყავი, მიწევდა ბევრი მოგზაურობა და ხატვის არც დრო მქონდა, არც შესაძლებლობა. ისე გამოვიდა, რომ ბავშვობის მერე 5-წლიანი პაუზა მქონდა ხატვაში და 2 წლის წინ გავაგრძელე, მას შემდეგ, რაც ამერიკიდან დავბრუნდი.



- რომელი მიმართულება მოგწონთ მხატვრობაში და თქვენ რომელ ჟანრში მუშაობთ?
- ჩემი ნამუშევრები ძირითადად სიურრეალისტურია. ისე გამოვიდა, რომ ამ ჟანრში უკეთ გადმოვცემ ნააზრევს. ხშირად ვკითხულობ და მიღებული შთაბეჭდილების გადმოცემა მსურს. წაკითხულის ჩემეული ხედვა მინდა გადმოვცე, განსაკუთრებით ის ემოცია, რომელიც მივიღე.

- როგორი განწყობა გჭირდებათ, რომ ხატოთ?
- მთავარია, მქონდეს დღის განათება. ძირითადად ვხატავ დილის 10 საათიდან 2.30 სთ-მდე. ეს დრო ჩემთვის იდეალურია, რადგან დღის შუქზე მიწევს მუშაობა. ვერ ვმუშაობ ღამე, როცა განათების სისტემაა ჩასართავი. თუმცა არის შემთხვევები, როცა შთაგონება მქონია და ღამეც მიმუშავია.

- თუ შეგცვალათ ამერიკამ და მოახდინა თუ არა გავლენა თქვენს ჩაცმის სტილზე?
- ალბათ შევიცვალე, თუმცა ნაკლებად ვგრძნობ. დროთა განმავლობაში კიდევ მეტად გამოიკვეთება. ვიცვამ განწყობის შესაბამისად, მომწონს სხვადასხვა სტილის სამოსი, თუმცა მასში აუცილებლად კომფორტულად უნდა ვგრძნობდე თავს.



- როგორია თქვენი ყოველდღიური ცხოვრება?
- აქტიური ადამიანი ვარ და გეოგრაფიულ მდებარეობას, სად ვიქნები, დიდი მნიშვნელობა არ აქვს. აქაც აქტიურად ვცხოვრობ, თუმცა განრიგს ვითვალიწინებ, რომელიც ყოველთვის გაწერილია. ჩემი დღე მაინც ამაზეა დამოკიდებული.

- აპირებთ დაბრუნებას?
- რასაკვირველია, ვაპირებ. თუმცა აქ ჩემი გეგმები მაქვს, რომელიც უნდა განვახორციელო. როგორც გითხარით, მაქვს შემოთავაზებები გამოფენებზე. ამიტომ დაბრუნებაზე ამ ეტაპზე ნაკლებად ვფიქრობ.

ქეთი დარჩია
like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.