ყველაზე მოდური ვიკი

მოდელი, დიზაინერი, მომღერალი და ტელევარსკვლავი - აი, როგორ შეიძლება ვიქტორია ბექჰემის დახასიათება. ყველაზე მოდური ქალბატონი ყოველმხრივ ნიჭიერია. 4 შვილის დედას შეუძლია კულინარიული ნიჭითაც იამაყოს.



სახელი: ვიქტორია კეროლაინ ბექჰემი
დაბადების თარიღი:
1974 წლის 17 აპრილი

ზოდიაქოს ნიშანი: ვერძი
ასაკი: 45 წლის
დაბადების ადგილი: ჰარპოუ, ესექსის საგრაფო, ინგლისი
სიმაღლე: 163 სმ
საქმიანობა: მომღერალი, მსახიობი, ფოტომოდელი, მოდელიერი, მწერალი
ოჯახური მდგომარეობა: დევიდ ბექჰემის მეუღლე



1996 წელს მუსიკალურ სამყაროში გამოჩნდა 20 წლის ვიქტორია ადამსი, ჯგუფ შპიცე Gირლ-ის წევრი. მისი საქმეების მმართველი, ბრიტანელი ანტერპრენიორი, კომპანია 19 Entertainment-ის დამფუძნებელი, საიმონ ფულერი იმთავითვე ამჩნევდა ახალგაზრდა მომღერალში მეწარმის ნიჭს, შემართებასა და მოდისადმი ინტერესს. ერთი წლის შემდეგ სწორედ ფულერმა გააცნო ვიქტორია და დევიდი ერთმანეთს.
ცნობილია, რომ 1996 წელს ბექჰემი საქართველოს, თბილისს ესტუმრა, მას საქართველოს ნაკრებთან მსოფლიოს თასის საკვალიფიკაციო მატჩი უნდა ეთამაშა. ფეხბურთელი იხსენებს, რომ საუკეთესო მეგობართან, გარი ნევილთან ერთად იმყოფებოდა სასტუმროს ნომერში, როდესაც ტელევიზორში Spice Girls-ის ახალი ვიდეო  Say You'll be There იხილა და თვალი მოჰკრა ვიქტორიას. გარის მიუბრუნდა და უთხრა, რომ სწორედ ეს ქალი უნდა ყოფილიყო მისი მეუღლე. რამდენიმე თვის შემდეგ მათ ერთმანეთი გაიცნეს და ურთიერთობაც გააბეს.



ვიქტორია ბექჰემი გულახდილად ჰყვება თავის ბავშვობაზე. ამბობს, რომ სკოლაში სიარული ეზიზღებოდა, რადგან ბავშვები საძაგლად ექცეოდნენ, ამიტომ მეგობრები არ ჰყავდა და მარტოს უხდებოდა თავის დაცვა. ამბობს, რომ ეს გამოწვეული იყო მისი გარეგნობით, რადგან გამხდარი, ფერმკრთალი და მეჩხერკბილება იყო. `ჩემზე ფიზიკურ და ფსიქოლოგიურ ზეწოლას ახორციელებდნენ, რამაც უფრო მებრძოლი გამხადა - ამბობს მისის ბექჰემი.

ქორწინების ადრეული პერიოდიდან ვიქტორია მხარს უჭერდა დევიდის ყველა წამოწყებას და ბიზნესსაქმიანობაში მისი მრჩეველი გახდა. ამის გამო ცინიკოსები ხშირად ამბობდნენ, მეუღლის ტალანტს ებღაუჭებაო, თუმცა ვიქტორია ბექჰემმა მომღერლის კარიერის დასრულებისა და დიდხნიანი შემოქმედებითი პაუზის შემდეგ გადაწყვიტა, ძალები როგორც დიზაინერს, მოესინჯა. მან შექმნა ქალის სამოსის კოლექცია და წარმატებით წარსდგა ნიუ-იორკის ფეშენვიკზე. მან შეძლო,
საკუთარი სახელობის ბრენდი შეექმნა და დღეს ის 300 მლნ ბრუნვის მქონე კომპანიის მფლობელია, რომელიც 2011 და 2014 წლებში გაერთიანებული სამეფოს საუკეთესო ბრენდად აღიარეს.



ვიქტორია მსოფლიოში ერთ-ერთი ყველაზე ცნობილი, მდიდარი და ლამაზი ქალბატონია. მან კონტრაქტი გააფორმა არმანის სახლთან ქვედასაცვლების კოლექციის რეკლამაზე, რაშიც უპრეცედენტო თანხა – 20 მილიონი დოლარი გადაუხადეს. ვიქტორია დასახელდა 2011 წლის ყველაზე `ფეშენდედად~. მან სამი ვაჟის შემდეგ მეოთხე, სანატრელი ქალიშვილი გააჩინა და თავისუფალ დროს შვილების გვერდით ატარებს.

შარშან ლონდონში, ბუკინგემის სასახლეში, ბრიტანეთის იმპერიის კავალრის ორდენით დაჯილდოების ოფიციალური ცერემონია გაიმართა. ჯილდო ფეხბურთელ დევიდ ბექჰემის მეუღლე ვიქტორია ბექჰემს პრინცმა უილიამმა გადასცა. ვიკი მოდის ინდუსტრიაში გამორჩეული კარიერის გამო დააჯილდოეს. ცერემონია მისი მეუღლის თანდასწრებით გაიმართა, რომელიც ორდენის კაველერი 2003 წელს გახდა. 2004 წელს ორდენი მას პირადად დედოფალმა ელისაბედ II-მ გადასცა.
ბრიტანეთის იმპერიის ორდენი 1917 წლიდან არსებობს. ის შესაძლოა სამხედრო მოსამსახურეს და სამოქალაქო პირსაც გადაეცეს.



როგორც აღნიშნავს, დევიდი მის ახალ საქმიანობას არასერიოზულად და უბრალო გატაცებად მიიჩნევდა, `მაგრამ მას შემდეგ, რაც დევიდმა ნახა კოლექცია, აღფრთოვანებული დარჩა და დააფასა ჩემი შრომა - ამბობს ვიქტორია.

თუმცა, როგორც ამბობენ, ხანდახან მდიდრებიც ტირიან. 2012 წელს აქტუალური იყო მითქმა-მოთქმა იმასთან დაკავშირებით, რომ ვიქტორია ბექჰემი დეპრესიაშია. `მე ძალიან კარგად ვარ, უბრალოდ, დავიღალე - განაცხადა მან ბოლოს, როცა არა მხოლოდ საქმემ, ჭორებმაც დაღალა. დაღლა კი, მისივე თქმით, უმცროსი ქალიშვილის უძილობამ და ავადმყოფობამ გამოიწვია.
ასეა თუ ისე, მსოფლიოს ერთ-ერთ მიმზიდველ წყვილთა შორის დღემდე მოიაზრება დევიდ ბექჰემი და მისი მეუღლე, მიუხედავად პრესაში ხანდახან აგორებული ცილისმწამებლური ჭორებისა.



2016 წელს წყვილმა ქორწინების მე-17 წლისთავი აღნიშნა: ,,17 წელი გავიდა მას შემდეგ, მე იღბლიანი მამაკაცი აღმოვჩნდი, რადგანაც შევხვდი ადამიანს, რომელსაც იგივე მიზნები, მუხტი და სურვილები აქვს, რაც მე. ჩვენ 4 შესანიშნავი შვილი გვყავს და მე მათ ამაზე მოსიყვარულე დედას ვერც ვუსურვებდი. მიყვარხარ!~. _ ასე მიულოცა მაშინ 40 წლის ფეხბურთელმა, დევიდ ბექჰემმა თავის მეუღლეს ქორწინების მე-17 წლისთავი.

ხშირ შემთხვევაში ჭორებსაც აქვს საფუძველი. როგორც ამბობენ, ვიკი ექსტრავაგანტური ლედია, რომელსაც არასოდეს ენანება ფული ხარჯოს... საკუთარი თავისთვის. ჰოლივუდელი კოლეგები განიკითხავენ ვიქტორიას ამის გამო, ალბათ იმიტომაც, რომ მას არასოდეს აქვს დრო ქველმოქმედებისთვის. ჰოლივუდური საზომითაც კი, ფეხბურთელის ცოლი არარეალურ თანხებს ხარჯავს და საოცარი `მადა~ აქვს.
მისი სიყვარული შოპინგისადმი იმდენად უსაზღვროა, რომ უკვე ავადმყოფობასა და მანიაში გადაეზარდა. მას არაერთხელ წასვლია გული მაღაზიებში, მხოლოდ იმიტომ, რომ ჭამა დავიწყებია!



Daily Mail-მა დაითვალა, რამდენ თანხას ხარჯავს მისის ბექჰემი საკუთარ თავზე:
5 ათასი დოლარი თვეში თმის კორექციისთვის. მის ვარცხნილობაზე დიდი ხანია ზრუნავს ცნობილი ლონდონელი და ყველაზე ძვირად ღირებული სტილისტი ბენ კუკი.
საღამოს რუჯი _ და განსაკუთრებით, გარუჯული ფეხები არცთუ იაფია _ კვირაში 300 დოლარი. რუჯის სპეციალისტები თავად მიდიან ვიქტორიასთან.
საზოგადოებაში გასვლის წინ მაკიაჟი ვარსკვლავს 2 500 დოლარი უჯდება. თვეში დაახლოებით 5 000 დოლარს ხარჯავს კოსმეტოლოგის მომსახურებაზე. კოსმეტიკური საშუალებების შესაძენად კი, კვირაში დაახლოებით 1 000 დოლარს.
ფრჩხილების დაგრძელება და ლაქი 1 000 დოლარი უჯდება ყოველთვე.
დაბოლოს, შეუძლია მხოლოდ ერთ დღეში მაღაზიებში დაახლოებით 40 ათასი ევრო დატოვოს და ამასთან შენაძენი დიდხანს გაუხსნელად ედოს სახლში.

სამაგიეროდ, სტილის თვალსაზრისით უფრო გემოვნებიანი და ბრწყინვალე ლედი, თუ დასავლურ პრესას დავუჯერებთ, _ სხვა არავინაა ვიკის გარდა. იგი მისაბაძი ქალბატონია, რომლისგანაც მსოფლიოს დანარჩენი ქალები სამოსის ფერთა შეხამებასა და სტილის თავისებურებებს სწავლობენ.



გთავაზობთ სტილის 8 წესს ვიქტორია ბექჰემისგან:

1. დაიცავით პროპორციები - ჩაიცვით ნაცრისფერი, მანჟეტებიანი შარვალი მუხლს ქვემოთ პალტოზე. საერთო ჯამში რა ეფექტს იღებთ? - ჩანხართ უფრო გამხდარი, თუ ამ ყველაფერს მაღალქუსლიან პლატფორმა ფეხსაცმელს შეუხამებთ, უფრო მაღალი გამოჩნდებით და, რაც მთავარია, მოდურ ქალბატონად იქცევით.
2. ჩაიცვით მაღალყელიანი ჩექმა მუხლს ქვემოთ კაბაზე - როგორ ვატაროთ მაღალყელიანი ჩექმა მიდი-კაბაზე? ვიქტორია ბექჰემს ამ ორის შეხამება შესანიშნავად შეუძლია. იგი იცვამს ტანზე მომდგარ მიდი-კაბას მაღალყელიან ჩექმასთან. მთავარია, რომ სამოსი ერთ ტონალობაში იყოს და ტანზე კარგად მომდგარი.
3. გამოკვეთეთ კლასიკური სილუეტი, თუ იცვამთ ფერად სამოსს - ვარდისფერი "მყვირალა" ფერია. ამიტომ, როცა მაისურიც და შარვალიც ასეთ ფერში გვაცვია, სიფრთხილეა საჭირო. ალბათ, მხოლოდ ვიქტორია ბექჰემს შეუძლია ეს ფერი ერთგვარად ჩრდილში მოაქციოს. არ გაიკეთოთ ვარდისფერ სამოსთან მძივები, რაიმე სახის სამკაული. საკმარისია მხოლოდ სათვალე. ვიქტორიას გაკვეთილებს თუ მივყვებით, ასეთ დროს უმჯებესია, თუ კანისფერ ფეხსაცმელს ჩავიცვამთ. ეს ერთგვარად ანეიტრალებს მყვირალა ვარდისფერს.
4. არამოდური კაბა შეგიძლიათ ტრენდად აქციოთ - ბოლოში აჭრილი კაბა გადასულია მოდიდან, თუმცა კლასიკურ ფეხსაცმელთან ერთად ეს კაბა საოცარია.
5. მაღალ დონეზე აიყვანეთ თქვენი ჩვეულებრივი, ყოველდღიური ჩაცმულობა და გახადეთ შესამჩნევი - მაღალქუსლიანი ჩექმა, თეთრი ბლუზა და გრძელი პალტო - ასე ჩაცმა ყველას შეგიძლიათ. თქვენი ყოველდღიური ლუქი გამორჩეული გახდება. აქ ქუსლიანი ფეხსაცმელი ყველაზე დიდ როლს თამაშობს.
6. მიეცით მამაკაცურ სამოსს ქალური ეფექტი - ვიქტორიას შეუძლია თავისი ვაჟების სამოსი თავად ჩაიცვას და საოცრად ქალურად გამოიყურებოდეს, სმოკინგითა და მამაკაცური შარვლით ის მათ ტერიტორიასაც იპყრობს, თუმცა, ამავდროულად, ფეხსაცმლითა და ჩანთით ქალურობას ინარჩუნებს
7. მყვირალა ფერი ჩაიცვით წელს ქვემოთ - ბექჰემი მყვირალა ფერის შარვალს თეთრ პერანგსა და პალტოს უხამებს. ასე ფერები ერთმანეთს ანეიტრალებს.
8. მოიქეცით ისე, რომ იბრწყინოთ - შექმენით სამოსის საშუალებით მაღალი და სუსტი სილუეტი. გადადგით ფართო ნაბიჯები. მიიპყარით ყურადღება აქსესუარით.


like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.