ავთანდილის კომპიუტერული თამაშებით შთაგონებული შემოდგომა-ზამთრის კოლექცია

Mercedes-Benzის მოდის კვირეული ავთანდილმა არასტანდარტულ ლოკაციაზე გახსნა: ჩვენებების უმეტესობისგან განსხვავებით, რომლებიც ზურაბ წერეთლის თანამედროვე ხელოვნების მუზეუმში გაიმართა, დიზაინერმა ამჯერადაც ორიგინალური ადგილი იპოვა და ციფრული შტრიხებით გაფორმებული კოლექცია მთაწმინდის პარკში მდებარე კლუბ Underwheel-ში აჩვენა.


ავთანდილის კოლექციის შთამაგონებელი დღევანდელობის განუყოფელი ნაწილი  კომპიუტერული თამაშები გახდა. "ახალი ათასწლეული ტექნოლოგიების ერაა, ვირტუალურმა რეალობამ სინამდვილე ჩაანაცვლა, კომპიუტერულმა თამაშებმა კი ადამიანური ურთიერთობები შეცვალა. რთულია, დღეს განსაზღვრო, სად გადის ზღვარი რეალობასა და ციფრულ სამყაროს შორის", - ნათქვამი იყო კოლექციაზე მოდის სახლის განაცხადში. როგორც აღნიშნეს, ავთანდილმა სწორედ ვირტუალური რეალობის ეკლექტიკური

ბუნება აღმოაჩინა და სპონტანურად შემოდგომა-ზამთრის კოლექციად გარდაქმნა.


კონცეპტუალურ ხელოვნებაში შთაგონებას ბევრი დიზაინერი ეძებს. კომპიუტერული თამაშების თემატიკა პირველად KENO-მ 2014 წელს გამოიყენა და კოსტიუმებზე ციფრული და ნეტის ხელოვან - ქორი არქანჯელის (Cory Arcangel) მიერ შექმნილი "სუპერმარიოს" ღრუბლები დაიტანა: მოდის სახლის დიზაინერებმა ქეროლ ლიმმა და ჰუმბერტო ლეონმა არქანჯელის პრინტებით უზონრო კედები, პერანგები და iPad-ის ქეისებიც კი გააფორმეს.


მიუხედავად იმისა, რომ ავთანდილის მოდის სახლის ხელწერა უხეში ქსოვილებით შექმნილი ტანსაცმელი, მკაცრი ნაკერები და გეომეტრიული სილუეტებია, მის კოლექციებში ყოველთვის მოიძებნება ქალური მოტივები, რაც დიზაინერს ქართულ ბაზარზე არსებული ყველა სხვა ბრენდისგან გამოარჩევს. ავთანდილი ზუსტად ხედავს, როგორია სექსუალური ქალი. სიმბოლური იყო ფაქტი, რომ ჩვენება 80-იანების ლეგენდარულმა მოდელმა, ჰელმუტ ნიუტონისა და ბევრი იმდროინდელი ფოტოგრაფის მუზამ - სილვია გობელმა გახსნა. ავსტრიელი მოდელი ყოველთვის განსაკუთრებულად ქალური სილუეტით გამოირჩეოდა და წარმატებული ფოტოკარიერის პარალელურად, ისეთი დიზაინერების კოსტიუმებს წარადგენდა, როგორიც, მაგალითად, აზედინ ალაიაა.

ამჯერად ავთანდილმა ტყავისა და შალის უხეშ ფაქტურებს ზოგ შემთხვევაში შიფონი, ზოგჯერ კი წელში გამოყვანილი სილუეტი შეუფარდა და მაყურებელი კიდევ ერთხელ დაარწმუნა, რომ ის მთელ მსოფლიოში გაბატონებულ ანდროგენულ ტენდენციებს "ბრმად" არ მიჰყვება. მკაცრ, კლასიკურ შარვლებს გრძელი, კოჭებამდე დაშვებული ბლუზები შეუხამა და ამით ყველა ადამიანში არსებული ქალური და მამაკაცური საწყისების ჰარმონია შექმნა.


კონტრასტული სილუეტებით აგებული კაბები და პიჯაკები, მეტალის ფაქტურით, ცნობილი კომპიუტერული თამაშების ლოგოებით და წარწერებით იყო გაფორმებული. გარკვეულ ხაზს სპორტლუქსის გეომეტრიული ელემენტები მიჰყვებოდა, ფეხსაც¬მელები კი კოლექციის მასკულანურ შტრიხს წარმოადგენდა _ კოსტიუმებს კედები ან "სამხედრო სტილის" ჩექმები ჰქონდა მორგებული.


კოლექციის ყველაზე ძლიერი მხარე, ერთმნიშვნელოვნად პიქსელის გამოსახულების მქონე ტვიდის ქსოვილები და მათზე დატანებული ციფრული ფიგურებია, რომლებიც კომპიუტ-ერული თამაშების ფრაგმენტებს წარმოადგენს. სტუმრებმა აქცენტი ოუტწეარ-ზე გააკეთეს: სკრუპულოზული სიზუსტით დაგეგმარებული და შემდეგ დანგრეული ფორმების მქონე პიჯაკები და პალტოები ერთნაირად უხდება როგორც კლასიკურ, ასევე სპორტული სტილის ლუქებს. დანარჩენი კი თქვენ გადაწყვიტეთ - კონტრასტული, ექსპერიმენტული მოსაცმელები გირჩევნიათ თუ შინდისფერი, კლასიკური ინგლისური საყელოთი გაწყობილი.


მეორე მხრივ, კოლექციის უდავოდ ძლიერი მხარე მაკიაჟი იყო, რაც, სხვა ბევრი ჩვენებისგან განსხვავებით, დიზაინერს თავიდანვე კარგად ნაფიქრი და გააზრებული ჰქონდა.

like
0

კომენტარის დამატება

სახელი*
აღწერა*
კომენტარი, რომელიც შეიცავს უხამსობას, დისკრედიტაციას, შეურაცხყოფას, ძალადობისკენ მოწოდებას, სიძულვილის ენას, კომერციული ხასიათის რეკლამას, წაიშლება საიტის ადმინისტრაციის მიერ.