ამ ცნობილმა ადამიანებმა ცხოვრებაში ბევრი სირთულე დაძლიეს, გამოიარეს უამრავი დაბრკოლება და საკუთარი ოცნებებისა და მიზნების ახდენა შეძლეს. დღეს მოგიყვებით შთამაგონებელი ისტორიებზე, რომლებიც კიდევ ერთხელ შეგვახსენებს, რომ არასოდეს დავნებდეთ:

ოპრა უინფრი

ტელეწამყვანის ბიოგრაფიას შესაძლოა, პირდაპირ ვუწოდოთ, რომ ის ,,ეკლიანი გზებით“ იყო სავსე. მისი ოჯახი ძალიან ღარიბულად ცხოვრობდა და პატარა ოპრას ბავშვობიდანვე სხვადასხვა მძიმე სამუშაოს შესრულება უწევდა. მისი მშობლები განქორწინებულები იყვნენ და გოგონას ბებია ზრდიდა. თუმცა, ბებიის ავადმყოფობის გამო, საცხოვრებლად დედასთან გადავიდა. ოპრა პატარა ასაკში დაორსულდა და შვილი დაბადებიდან 2 კვირაში გარდაეცვალა. ერთხელ საჯარო გამოსვლის კონკურსში გაიმარჯვა, სტიპენდია მოიპოვა და ამის შემდეგ საკუთარ წარმატებას თავად ქმნის. დღეს უინფრი მსოფლიოში ერთ-ერთ ყველაზე მდიდარ და გავლენიან ქალად ითვლება.

ლეონარდო დიკაპრიო

ცნობილი მსახიობი ღარიბ ოჯახში გაიზარდა. მისი მშობლები მაშინ განქორწინდნენ, როდესაც ლეო ძალიან პატარა იყო. მომავალი მსახიობი დედასთან, მძიმე სოციალურ პირობებში იზრდებოდა, თუმცა მამასთანაც კარგი ურთიერთობა ჰქონდა. მისი მშობლები შემოქმედებითი ადამიანები იყვნენ და სწორედ ამან განაპირობა, რომ მანაც მსგავსი მიმართულება აირჩია. თავდაპირველად, უარს არც ერთ როლსა და შესაძლებლობაზე არ ამბობდა, ბევრს შრომობდა და დღეს ლეონარდო ჰოლივუდის ერთ-ერთი თვალსაჩინო ვარსკვლავია.

ნაომი უოტსი

ნაომის მშობლები მაშინ განქორწინდნენ, როდესაც გოგონა 4 წლის იყო. დედამისი მოდელად მუშაობდა და მსოფლიოს გარშემო მოგზაურობდა. ნაომიმ სკოლა 9-ჯერ შეიცვალა. 14 წლის ასაკში კი ავსტრალიაში გადავიდნენ საცხოვრებლად. დედამ სამსახიობო კურსებზე შეიყვანა. უამრავი წარუმატებლობისა და იმედგაცრუების მიუხედავად, გოგონა არ დანებდა და დღეს ის წარმატებული და მაღალანაზღაურებადი მსახიობია.

სარა ჯესიკა პარკერი

სარა მრავალშვილიან ოჯახში გაიზარდა, სადაც ძალიან უჭირდათ და ხშირად მძიმე სოციალური ფონი ჰქონდათ. ვარსკვლავმა ერთხელ თქვა, რომ მასთან დაბადების დღეები და სხვა დღესასწაულები არ აღინიშნებოდა, რადგან ოჯახს საკმარისი ფული არასოდეს ჰქონდა. თუმცა, სარას დედა ყოველთვის ცდილობდა, შანსი ხელიდან არ გაეშვა და შვილები კინოჩვენებების უფასო სეანსებზე წაეყვანა. სწორედ ამ პერიოდიდან შეუყვარდა პარკერს კინო და ერთ-ერთი ყველაზე მაღალანაზღაურებადი მსახიობი გახდა.

მარკ უოლბერგი

ჩვენი დროის ერთ-ერთი ყველაზე მაღალანაზღაურებადი მსახიობი 9-შვილიან ოჯახში გაიზარდა და 5 ძმასთან ერთად ერთ პატარა ოთახში იძინებდა. მისი ოჯახი ძალიან ღარიბულად ცხოვრობდა. გარდა ამისა, გარემო, სადაც მარკი იზრდებოდა, კრიმინალური იყო და ირგვლივ უამრავ დამნაშავე ცხოვრობდა.ახალგაზრდა ასაკში ბიჭი 2 წელი ციხეშიც იჯდა. თუმცა, შემდეგ სრულიად შეცვალა ცხოვრების წესი და საკუთარი ოცნება, რომ მსახიობი გამხდარიყო, აისრულა.

ჰოლი ბერი

ჰოლი ბერის მშობლები ერთმანეთს მაშინ დაშორდნენ, როდესაც გოგონა 4 წლის იყო. გარკვეული პერიოდის შემდეგ ისევ შერიგდნენ და მოგვიანებით მსახიობმა აღიარა, რომ მამამისი დედასა და დაზე სისტემატურად ძალადობდა. ჰოლის ცხოვრებაში იყო პერიოდი, როდესაც უსახლკაროთა თავშესაფარში ცხოვრობდა, მიმტანად მუშაობდა და ცდილობდა, საკუთარი ოცნებებისათვის ებრძოლა.

ჯოან როულინგი

ჯოან როულინგი 15 წლის იყო, როდესაც დედამისი მძიმედ დაავადდა და ოჯახზე ზრუნვა მთლიანად მის პასუხისმგებლობად იქცა. ხოლო, დაქორწინების შემდეგ ქმარმა შვილთან ერთად სახლიდან გამოაგდო და ქუჩაში აღმოჩნდა. ამის შემდეგ ჯოანმა ჰარი პოტერის შესახებ წიგნების სერია შექმნა და წარმოუდგენელ წარმატებას მიაღწია. „ამ წიგნს არ დავწერდი, ასეთი ღარიბი რომ არ ვყოფილიყავი.“ - თქვა ერთხელ როულინგმა.

სტივენ კინგი

სტივენის მამამ ოჯახი მიატოვა და ბავშვებზე ზრუნვა დედამ აიღო საკუთარ თავზე. ისინი ძალიან ღარიბულად ცხოვრობდნენ და ელემენტარული პირობები არ ჰქონდათ. უნივერსიტეტში, ბიბლიოთეკაში ნახევარ განაკვეთზე მუშაობისას, კინგი თავის მომავალ მეუღლეს, ტაბიტას შეხვდა. ტაბიტა იხსენებს: ,,ის ყველაზე ღარიბი სტუდენტი იყო, რომელიც კი უნივერსიტეტში შემხვედრია. რეზინის ფეხსაცმელი ეცვა, სხვა რომ არაფერი ჰქონდა.“ სტივენი ბენზინგასამართ სადგურზე მუშაობდა, გამოსცადა სხვადასხვა პროფესია და დღეს, მრავალი მარცხისა და წარუმატებლობის მიუხედავად, მსოფლიოში მისი სახელი უამრავმა ადამიანმა იცის.

ემინემი

ემინემს მძიმე ბავშვობა ჰქონდა. მისი ოჯახი ღარიბულად ცხოვრობდა, ხშირად უწევდა სკოლის შეცვლა და კლასელებიც დასცინოდნენ. იმის გამო, რომ კარგად მეცადინეობას ვერ ახერხებდა, მე-9 კლასში 3-ჯერ ჩატოვეს. ამის შემდეგ მან ადგილობრივ კლუბებში რეპი შესთავაზა მსმენელს და მალევე დიდი ყურადღება დაიმსახურა.

სელენა გომესი

სელენას მშობლები მაშინ განქორწინდნენ, როდესაც გოგონა 5 წლის იყო. მას დედა ზრდიდა, რომელიც მსახიობი იყო. მიუხედავად სოციალური გაჭირვებისა, გომესმა კარიერა ადრეული ასაკიდანვე დაიწყო. ამის შემდეგ მის ცხოვრებაში მრავალი განსაცდელი და ცუდი ამბავი იყო, შეექმნა ჯანმრთელობის სერიოზული პრობლემები, თუმცა დღეს ის ჩვენი დროის ერთ-ერთი ყველაზე წარმატებული ვარსკვლავია.