მოგზაურობა

სად ვიმოგზაუროთ? ტასმანია - რომანტიკული და ნატურალისტური კუნძული
კუნძული ტასმანია ავსტრალიასთან მდებარეობს. 1642 წელს იგი ჰოლანდიელმა მოგზაურმა აბელ ტასმანმა აღმოაჩინა და ჰოლანდიელი გენერალ-გუბერნატორის, ვან დიმენის პატივსაცემად "ვან დიმენის მიწა" დაარქვა, ხოლო ტასმანია 1856 წელს უწოდეს. კუნძულს გარს ორი ოკეანე ეკვრის - ინდოეთის და წყნარი.

კუნძული ისეთ შთაბეჭდილებას ქმნის, როგორიც ჰოლივუდურ ფილმებში გინახავთ - ირგვლივ მხოლოდ მთები და კლდეები მოჩანს. ბუნება მართლაც ულამაზესი და შთამბეჭდავია. ავსტრალიაში იგი ყველაზე მთიანი ადგილია. არ არის მთლად თბილი მხარე, იქ არასდროს ცხელა ისე, როგორც ჩვენთან და ჰაერის საშუალო ტემპერატურა ზაფხულობით 17-21 გრადუსია, სამაგიეროდ ზამთარია თბილი  - ჰაერის მაქსიმალური ტემპერატურა, მაგალითად, თებერვალში, მხოლოდ +13 გრადუსს აღწევს. ასე რომ, ზაფხულში შეგიძლიათ სიცხეს გაექცეთ, ზამთარში კი სიცივეს და ტასმანიას მიაშუროთ.



სანახაობრივად საოცარი ქვეყანაა - მცირე მოსახლეობით, ვრცელი ტყეებითა და უმშვენიერესი პარკებით. აქაურ ტყეებს წვიმის ტყეებს უწოდებენ, რადგან კუნძული უხვნალექიანობით გამოირჩევა. ბლომადაა ტბები, მდინარეები და ჩანჩქერები, რომლებიც ივსება წვიმის წყლით და კვებავს ტყეებს. წვიმის ტყეები სურნელოვანია, რადგან ვეებერთელა ევკალიპტები იზრდება. არსებობს ევკალიპტის რამდენიმე სახეობა: სამეფო და განის, მირტისებრნი, კანინჰემის ნოტაფაგუსები. ყვავის ასევე ანტარქტიკული დიქსონიები და ფრანკლინის დაკრიდიუმები. გარდა ამისა, შეხვდებით აბანოზის აკაციებსა და სასაფრასებს. სწორედ ამიტომაც, ტასმანია ხეტყის წარმოებით არის ცნობილი.

კუნძულზე წლების განმავლობაში იმდენი ხე მოიჭრა, გარკვეული ტერიტორია უდაბნოდ იქცა, რომელსაც ქუინსტაუნის უდაბნო შეარქვეს.

ტასმანიის ტყეებში უამრავ ცხოველსა და ფრინველს გადაეყრებით. განსაკუთრებით საინტერესოა ჩანთოსანი ცხოველი, რომელსაც "ტასმანიის ეშმაკს" უწოდებენ, სამწუხაროდ, ეს ჯიში გადაშენების პირასაა და წითელ წიგნშია შეტანილი. ფრინველთაგან აღსანიშნავია ძალიან ლამაზი თხელნისკარტა ქარიშხალა.



კუნძული თავდაპირველად მხოლოდ აბორიგენებით იყო დასახლებული. აბელ ტასმანი პირველი ევროპელი იყო, რომელმაც ტასმანიის მიწაზე ფეხი დადგა. მოგვიანებით, როცა კუნძულის ათვისება ევროპელებმა დაიწყეს, პირველი `მობინადრეებიც~ გამოჩნდნენ - კატორღელები და მათი დამცველი რაზმები. აქ ძირითადად, სამუდამო კატორღამისჯილები მოჰყავდათ და ამუშავებდნენ. მათი ამოცანა იყო სოფლის მეურნეობისა და მრეწველობის განვითარება. თანდათან მოსახლეობამ მატება იწყო. კატორღელთა ციხის, პორტარტურის, გარშემო და მაკუორის ყურეში მოსახლეობის რაოდენობა წლიდან წლამდე იზრდებოდა. 50 წლის განმავლობაში დაახლოებით 75 000 პატიმარი დაასახლეს ტასმანიაში.

დღეს ტასმანია ავსტრალიის კავშირის ერთ-ერთი შტატია და კუნძულზე სწორედ ამ სახელმწიფოს კანონმდებლობა მოქმედებს.

ტასმანიაში დაახლოებით 500 000-მდე ადამიანი ცხოვრობს. მოსახლეობის ძირითად ნაწილს ანგლოავსტრალიელები შეადგენენ, აბორიგენთაგან მხოლოდ 1 პროცენტი შემორჩა. მოსახლეობის უმრავლესობა ქრისტიანია. ლაპარაკობენ ინგლისურ ენაზე.



კუნძულზე ყველა პირობაა შექმნილი ტურისტებისთვის. უმსხვილესი კომპანია, რომელიც ჩამოსულთა გართობაზე ზრუნავს, არის "ფედერალ გრუპი", რომელიც რამდენიმე ოტელსა და ორ კაზინოს აერთიანებს.

კუნძული მთელ ავსტრალიაში ყველაზე ნატურალისტურ და რომანტიკულ კუნძულად მიიჩნევა.
ტასმანიის დედაქალაქია ჰობარტი. იგი საზღვაო ქალაქია და სიღრმით მეორე პორტია მსოფლიოში, ამ მხრივ მხოლოდ რიო-დე-ჟანეიროს ჩამორჩება.

ტასმანიაში მელბურნიდან საკრუიზო ლაინერით ჩადიან. ერთობ კომფორტული ტრანსპორტია მყუდრო კაიუტებითა და ეგზოტიკური ლანჩით. რაც მთავარია, ბევრ ლუდს გთავაზობენ. საღამოს ჩაჯდებით ლაინერში და დილით უკვე ტასმანიაში ხართ.



დევენპორტში თვალში მოგხვდებათ მაღალ გორაკზე აღმართული სათვალთვალო კოშკი, რომელიც ხომალდებს ღამით გზას უნათებს. იგი ავსტრალიის დროშის ფერებშია შეღებილი - თეთრ და წითელ ზოლებში.

ჩანჩქერებამდე რომ მიაღწიოთ, 7-კილომეტრიანი ვიწრო მოპირკეთებული ბილიკი უნდა გაიაროთ. გზა ისეთი ვიწროა, ორი მანქანა ერთმანეთს გვერდს ვერ აუქცევს. როგორც კი ჩანჩქერებს მიუახლოვდებით, გამაყრუებელი გუგუნის ხმას გაიგონებთ. წყალი სუფთაა და კამკამა, თამამად შეგიძლიათ იბანაოთ.

ქალაქი ლონსესტონი ტასმანიის მეორე მსხვილი ქალაქია და განსაკუთრებული სილამაზით გამოირჩევა. სამეფო ხიდი დიდებული სანახაობაა, ყურადღებას ნამდვილად იმსახურებს. ხიდს გადაივლით და კატარაქტ გორგიში მოხვდებით. აქვეა ნაკრძალის მსგავსი პარკი, სადაც ფარშავანგები დასეირნობენ. ირგვლივ უამრავი ყვავილია, მათი სურნელი დაგატკბობთ. აქედან აუცილებლად გადადით ლოუ სიდში, სადაც ლავანდის უზარმაზარი მინდორია - მთელ მინდორზე წრიულად დარგული ლავანდები ულამაზესი სანახავია. მას პარფიუმერიაში იყენებენ.



ნაციონალური პარკი ფრეიცინეტი 1916 წელს გაშენდა და ტასმანიის აღმოსავლეთით მდებარეობს. განთქმულია წითელი და ვარდისფერი გრანიტის ფორმაციებითა და გრანიტის მწვერვალებით. აქ არის რამდენიმე ქვიშიანი პლაჟი, რომელიც ტურისტებისა და ადგილობრივებისთვისაა განკუთვნილი.
აქაური ზღვა ფირუზისფერია. სწორედ ამიტომაა, რომ ტურისტები საბანაოდ და კატამარინით გასასეირნებლად სწორედ ამ ადგილს ამჯობინებენ. ზოგი თევზაობს, ზოგი დაივინგით ერთობა. სხვათა შორის, ფრენდლი-ბიჩზე სერფინგით შეგიძლიათ დაკავდეთ. იქვეა თაფლობის თვისთვის განკუთვნილი პატარა კოტეჯები, რომლებიც რომანტიკულ განწყობას შეგიქმნით. თქვენ სიახლოვეს დელფინები ისრიალებენ.

ნაციონალურ პარკში უხვადაა კუზიანი ვეშაპები, რომელთა დანახვა ლაინერიდანაც შეიძლება. ისინი ჯგუფ-ჯგუფად გადაადგილდებიან.



ტასმანიის სამხრეთ-დასავლეთში მეორე ნაციონალური პარკია და იგი სიდიდით დანარჩენ პარკებს აღემატება. პარკის დათვალიერება ველურ ბუნებას მოგაგონებთ. გეგონებათ, ათასი საუკუნით უკან გადაინაცვლეთ. პარკიდან მხოლოდ ერთი გზა გადის - ქალაქ სტრეტგორდონისკენ. ასე რომ, სახმელეთო ტრანსპორტით მასთან ახლოს ვერ მიხვალთ _ ან ფეხით უნდა წახვიდეთ, ან ნავით, ან საჰაერო ტრანსპორტით ისარგებლოთ.

მიიჩნევა, რომ სწორედ ამ მიდამოებშია ტასმანიაში საუკეთესო თევზჭერის ადგილები. გორდონისა და პედერის ტბებში ყველა ცდილობს, კალმახი დაიჭიროს. მეორე სათევზაო ადგილი კი დამბა ედგარ-დამია.

ლონსესტონის საუკეთესო სასტუმროა პეპერს-ჰოტელი. იგი ვიქტორიანულ სტილშია მოწყობილი, რადგან თვითონ ქალაქი ლონსესტონი ერთ-ერთი უძველესია ტასმანიაში. თუმცა, იქვე, გვერდით თანამედროვე სავაჭრო ცენტრის შენობაა წამოჭიმული.



უჩვეულო სასტუმრო თავისი სტილითა და ზღვის თემატიკით გაფორმებული დიზაინით დიდ შთაბეჭდილებას ახდენს. ინტერიერის მოსაწყობად გამოყენებულია მხოლოდ ხის მასალა და ოკეანის ჩამქრალი ფერები. სასტუმროში 60 ნომერია, მაგრამ ბრწყინვალე.

საინტერესო დასათვალიერებელია პორტ-არტურის ციხის ნანგრევები. ეს ციხე თავის დროზე ყველაზე საშიში იყო მთელ მსოფლიოში. მის ხსენებაზე ადამიანებს ჟრუანტელი უვლიდათ. აქ გამოკეტილი ჰყავდათ განსაკუთრებით მძიმე დამნაშავეები, მათ შორის ისინიც, ვინც სხვა ციხეებიდან ერთხელ უკვე სცადეს გაქცევა. მათი დაცვა ნამდვილი გმირობა იყო.

ციხე 60 კორპუსისგან შედგებოდა. მასში 80 ერთკამერიანი საკანი შედიოდა, ასევე, მორგი, ჰოსპიტალი, კათოლიკური სამლოცველო, კათედრალური ტაძარი, ფსიქიატრიული საავადმყოფო, საცხობი, სამრეცხაო, სამზარეულო და კომენდანტის რეზიდენცია. შენობის უდიდესი ნაწილი ძლიერი ხანძრის დროს განადგურდა, გადარჩა მხოლოდ ის ნაწილი, რომელიც ქვით იყო ნაგები. ახლა პორტ-არტურის ციხე მხოლოდ ტურისტების მისაზიდავადაა განკუთვნილი.



რაც შეეხება სამზარეულოს... თავდაპირველად, როცა ტასმანია კოლონიალურ პირობებში იმყოფებოდა, ინგლისური სამზარეულო ბატონობდა, მაგრამ დროთა განმავლობაში ვითარება შეიცვალა. სხვა ქვეყნებიდან ჩამოვიდნენ ემიგრანტები და გემოვნებაც შეიცვალა. დღეს კუნძულზე ევროპული სამზარეულოს ფართო ასორტიმენტია წარმოდგენილი, რესტორნებში ყოველთვის მოიძებნება თქვენთვის სასურველი იაფფასიანი თუ ძვირად ღირებული გემრიელი კერძი.

ტასმანიაში რამდენიმე ღვინის ქარხანაცაა, ასე რომ, მათი დაჭაშნიკებაც არ გაწყენდათ. კუნძული განთქმულია ლუდით. განსაკუთრებული მოთხოვნაა ორი სახეობის ლუდზე - ბოაგსსა და კასკადეზე. რაც შეეხება ზღვის პროდუქტებს, რა გინდა, სულო და გულო, აქ არ ნახოთ და არ იგემოთ. თუ იქვე, მახლობლად მდებარე კუნძულ კინგს ესტუმრებით და რძის პროდუქტების მოყვარული ხართ, უამრავი სახეობის ყველის დაგემოვნებასაც შეძლებთ.



ტურისტების მოსაზიდად კუნძულზე ყოველწლიურად უამრავი ღონისძიება ტარდება. ყველაზე მოდური და ხალხმრავალია რეგატა სიდნეი-ჰობარტი, რომელიც სიდნეიში იწყება საჩუქრების დღეს და 3-4 დღის შემდეგ ჰობარტში მთავრდება - ჭამისა და ღვინის ყოველწლიური ფესტივალის, `ტასმანიის გემოს~ ჩატარების დროს. ეს დღესასწაული ჩვენს "თბილისობას" ჰგავს თავისი კონცერტებითა და სადეგუსტაციო ღვინოებით.

ტარდება ასევე ავტორბოლა - რალი "ტარგა ტასმანია", რომელიც მსოფლიო კლასის მრბოლელებს იზიდავს. მისი ეტაპები იმართება მთელ კუნძულზე და 5 დღე გრძელდება. საინტერესოა სამდღიანი სასოფლო-სამეურნეო შოუ "აგფესტი", რომელიც სოფელ კარიკში მაისის დასაწყისში ტარდება.





წელიწადში სამჯერ სხვადასხვა მუსიკალური ფესტივალიც ეწყობა, რომელზე დასასწრებადაც მსოფლიოს სხვადასხვა კუთხიდან ჩამოდიან მელომანები. ყველაზე ხანგრძლივი ხელოვნების ფესტივალია, რადგან სრული ათი დღე გრძელდება.

როგორც ხედავთ, ისტორიული თვალსაზრისით ტასმანიაში ბევრი არაფერია სანახავი, მაგრამ სასიამოვნო დასვენებას აუცილებლად მოახერხებს ყველა, ვისაც მთა, ტყე და ზღვა უყვარს.


ნანათე ნელსონი




კვიპროსი - მლაშე ტბა ფლამენგოებით
საფოსტო ბარათი-მლაშე ტბა ფლამენგოებით. ეს არის კადრი, რომელიც კვიპროსზე ჩასულს დაგხვდება და არასოდეს დაგავიწყდება და ამ ფოტოს სუვენირად წამოიყოლებ.
ნაპოლეონი, სასახლე და სხვა ამბები
პრინცესობაზე ოცნება ბევრი გოგონას ბავშვობის აუხდენელ ოცნებად რჩება დღესაც. ოცნება პრინცესობაზე არის სიმბოლო უმანკოების, სილამაზისა და ძლიერი სურვილის. ეს არის პოზიტიური ლამაზი ფიქრები, რომელიც ყველას გვქონდა ბავშვობაში. სასახლე ულამაზესი ბაღებითა და შადრევნებით, მეფე-დედოფალი ლორდებითა და რაინდებით გარშემორტყმული, პრინცესები სეფექალებთან ერთად, მეჯლისები, ვერცხლის ლანგრები, ფაიფურის სერვიზები, ოქროს აზარფეშები, მუსიკოსები და მეფის მასხარა… ეს წარმოსახვა ზღაპრის კითხვისას სხვა განზომილებაში გვაგრძნობინებდა თავს.

საფრანგეთში მოგზაურობისას სასახლე ფონტენბლოს ნახვისას მქონდა განცდა, რომ ისტორიის ნაწილი ვიყავი, იმ ისტორიისა, როცა სასახლე რეზიდენცია იყო საფრანგეთის მონარქების ლუი VII -დან დაწყებული ნაპოლეონ III-ით დამთავრებული. საუკუნეების განმავლობაში ხელშეუხლებლად დარჩენილი სასახლე თავისი აპარტამენტებითა და ძვირფასი ავეჯით ვერცხლითა და ოქროთი მოვარაყებული, ხეზე კვეთით შესრულებული კარები, გობელინითა და ცნობილი მხატვრების ტილოებით მორთული ოთახები, უზარმაზარი ფარდებიანი საწოლები…. გიტოვებენ განცდას, რომ გრძნობ ისტორიისა და განგრძობადობის სურნელს. და მეც ვტკბებოდი წარსულის მტვრის სუნთან შერეული სიძველის არომატით. რენესანსის სასახლე ცნობილია, როგორც ყველაზე მდიდრული სასახლე მსოფლიოში და სწორედ ფონტენბლომ გააცნო რენესანსული სტილი საფრანგეთს.

მისი ინტერიერი და ექსტერიერი მუდმივად იცვლებოდა საუკუნეების განმავლობაში, თითოეული მონარქი, რომელსაც ამ სასახლეში ცხოვრება უწევდა, რაღაცას ცვლიდა და თავისას ამატებდა… ფრანსის I-ის გალერია, რომელიც აკავშირებს მეფის აპარტამენტებს სამლოცველოსთან იტალიურ რენესანსულ სტილშია გადაწყვეტილი.

ულამაზესი, ცხენის ნალის მქონე კიბეები, რომლებიც სასახლეს წინა მხრიდან ამშვენებს, ჰენრი II და კატრინ დე მედიჩის იდეა იყო. ჰენრი IV-ის მეფობის დროს მოიხატა სალონების ჭერი, მოწვეული მხატვრები კი არც მეტი და არც ნაკლები Ambroise Dubois და Toussaint Dubreuil იყვნენ.

სასახლე ბევრი ისტორიული მომენტებითაა ცნობილი, თუმცა ყველაზე მეტად დამაინტერესა რომის პაპის პიუს VII-ს ვიზიტმა. პაპი ნაპოლეონის პატიმარი იყო, თუმცა ამას ვერ იტყვით მისი აპარტამენტების ნახვისას. პაპი, რომელიც ფონტენბლოს სასახლეში 1812 წლის 20 ივნისს ჩავიდა, 19 თვის განმავლობაში ცხოვრობდა იქ და სუსტი ჯანმრთელობის გამო არც არასოდეს დაუტოვებია სასახლე. მანამდე კი, 1804 წელს სწორედ ოპიუს VII-ემ აკურთხა ნაპოლეონი იმპერატორად ფონტენბლოს სასახლეში.

მეფის საძინებელი კი სატახტო ოთახად გადააკეთეს ნაპოლეონისთვის, რომელსაც დღესაც აღტაცებაში მოჰყავს მნახველი. ყველაზე მეტი ცვლილება სასახლის ინტერიერმა ნაპოლეონის დროს განიცადა, როცა იმპერატორმა და იმპერატრიცამ სასახლე ახალ იმპერატორულ სტილში მოაწყეს. მათ მოიფიქრეს სასახლისთვის შემოევლოთ ორნამენტებით მოჭედილი რკინის გალავანი და ჭიშკარი, საიდანაც სასახლის ფასადის დანახვა შესაძლებელი იქნებოდა.

და ბოლოს, აღნიშვნის ღირსია დედოფლის საძინებელი, რომლის დასაკუთრებაზე, როგორც ამბობენ ბრძოლა იყო გამოცხადებული. ყველა დროის დედოფალს და იმპერატრიცას აქ ეძინა. საწოლი და ბუდუარი დედოფლის ოთახის გვერდით სპეციალურად მარია ანტუანეტასთვის შეიქმნა, მაგრამ საფრანგეთის რევოლუციამდე ის არც ჩასულა. თუმცა ნაპოლეონის ორივე ცოლი აქტიურად იყენებდა ამ საძინებელს.

ატალია ბერიანიძის ბლოგი


ასევე დაგაინტერესებთ: 

იმოგზაურე დრომომანისტას სტილში
მარაქეში - ღმერთის მიწა თუ წითელი ქალაქი
მარაქეში აფრიკის კონტინენტის მარგალიტია. "ღმერთის მიწასაც" უწოდებდნენ, რომლის ულამაზეს ხასიათს სხვადასხვა კულტურათა ერთობლიობა ქმნის. ფერადი, მოზაიკური და ულამაზესი ფლორით გამორჩეული "წითელი ქალაქი" კრისტი გოგსაძისთვის დაუვიწყარ შთაბეჭდილებად გადაიქცა.



- როგორ აღმოჩნდით მარაქეშში. ემზადებოდით ამ მოგზაურობისთვის?

- პროფესიიდან გამომდინარე, წელს დატვირთული გრაფიკი მქონდა. ხშირად მომიწია მოგზაურობამ. თითოეული წინასწარ დაგეგმილ პროექტებთან იყო დაკავშირებული. 2 კვირით გავემგზავრე კუბაში. ფანტასტიკური დრო გავატარე, მაგრამ ამავე დროს ძალიან ბევრი ვიმუშავე. "გუჩის" დაკვეთილი პროექტი იყო და კლიენტი მაღალი ხარისხის შედეგს ელოდა. იყო ბევრი სხვა ვოიაჟიც... ამიტომ ძალიან მომინდა, 10 დღე განტვირთვისთვის ამეღო და საკუთარი თავისთვის დამეთმო. გადავწყვიტე, ისეთ ადგილას- წავსულიყავი, სადაც ევროპისგან სრულიად განსხვავებული კულტურა, საინტერესო გარემო დამხვდებოდა. ამ შემთხვევაში მარაქეში და ზოგადად მაროკო ყველაზე სწორი არჩევანი იყო.



- ნივთები, რომელიც მოგზაურობისთვის შეარჩიეთ... ლუქები, რომელიც მოუხდებოდა მაროკოს?

- ვიცოდი, აპრილის ბოლოს მზიანი და თბილი ამინდი დამხვდებოდა. ძირითადად ზაფხულის სამოსსა და აქსესუარებზე გავაკეთე არჩევანი. დასასვენებლად მივდიოდი და გადაღებები და ლუქები წინასწარ არ დამიგეგმავს. ძირითადად ჭრელი და ფერადი სამოსი შევარჩიე. გავითვალისწინე ადგილობრივი კულტურა და მათი მოთხოვნებიც.


- როგორი შთაბეჭდილება დატოვა თქვენზე მარაქეშმა, რას შეადარებდით ამ გრძნობას?

- ჩემთვის ძალიან ეგზოტიკური და მიმზიდველი იყო `წითელი ქალაქი", ძველი მედინა. პირველად ვიყავი აფრიკის კონტინენტზე და განცდაც განსხვავებული და სასიამოვნო იყო. ადვილად შევედი კონტაქტში ადგილობრივ მოსახლეობასთან. ფრანგული მათი ერთ-ერთი ოფიციალური ენაა და ენის ბარიერი არ გვქონია. ძალიან დადებითი და პოზიტიური შთაბეჭდილებებით სავსე დავბრუნდი პარიზში.



- რომელი ადგილები მოინახულეთ. გაიხსენეთ ყველაზე შთამბეჭდავი რა იყო თქვენთვის ამ მოგზაურობისას?

- მაჟორელის ბაღი, სადაც ცნობილი ლურჯი ვილა მდებარეობს. ვილა ფრანგმა არტისტმა ჟაკ მაჟორელმა ააშენა, მოგვიანებით კი ივ სენ ლორანმა და მისმა პარტნიორმა პიერ ბერჟემ შეიძინეს, რესტავრირება გაუკეთეს და მუზეუმად აქციეს, მოვინახულე ივ სენ ლორანის მუზეუმი, რომელიც ოფიციალურად 2017 წელს გაიხნა. ეს შენობა ულამაზესი არქიტექტურით გამოირჩევა. ძალიან შთამბეჭდავი იყო ბაჰიას სასახლე მოზაიკური მორთულობით და ბაღებით და, რაღა თქმა უნდა, სუკი (უზარმაზარი ბაზარი) მედინას ცენტრში. სამწუხაროდ, ჩემი ვიზიტის დროს რესტავრაციის გამო დახურული დამხვდა "ბენ იუსეფ მადრასა", რომელიც მე-14 საუკუნეში დაარსდა, როგორც მუსლიმანური სკოლა. ეს ადგილი ამჟამად ისტორიული ღირსშესანიშნაობაა. მის სანახავად მარაქეშში აუცილებლად დავბრუნდები.

- მაროკოს ეგზოტიკური ფლორა და ფაუნა ალბათ შთამბეჭდავია

- განსაკუთრებით ფლორა... იქიდან გამომდინარე, რომ უამრავი სახის მცენარე ვნახე როგორც "მაჟორელის", ასევე სასტუმრო "მამუნიას" ულამაზეს ბაღებში. რაც შეეხება ფაუნას, ქალაქში, ცენტრალურ მოედანზე, შეხვდებით ბევრი სახეობის ცხოველს, რომლებსაც მაროკოელები ტურისტების მისაზიდად იყენებენ. შესაძლებელია აქლემით გასირნება ქალაქგარეთ, პალმებით სავსე უზარმაზარ ბაღში, ან უდაბნოში. ორივე არაჩვეულებრივი არჩევანია, განსაკუთრებით საღამოს, მზის ჩასვლისას.



- როგორ ცხოვრობს ადგილობრივი მოსახლეობა?

- მაროკოში ძირითადად მამაკაცები მუშაობენ, ოჯახს ისინი არჩენენ. მანდილოსნები კი სახლში რჩებიან საოჯახო საქმეების მისახედად. თუმცა, ტურისტების ნაკადის მატებასთან ერთად მანდილოსნებსაც ბევრი საქმე გაუჩნდათ. 10 დღე ქალაქგარეთ, ვილაში დავრჩი. არაჩვეულებრივ მზარეულს, ახალგაზრდა ქალს მოჰქონდა საუზმე. მერე, შინ ბრუნდებოდა, რომ ბავშვები სკოლიდან გამოეყვანა. მაროკო ქვეყანაა, სადაც პატრიარქატი დომინირებს.

- მარაქეში გასაოცარი ფერადოვნებით გამოირჩევა. როგორ იცვამენ იქაურები?

- ფერადი სამოსით იმოსებიან. ორ განსხვავებულ სტილს წააწყდებით: ტრადიციულს და თანამედროვეს. მანდილოსნების უმეტესობა ტრადიციულ სამოსს ანიჭებს უპირატესობას. გამოირჩევიან ფეხსაცმლით - ბაბუშებით, რომელიც სასიარულოდ ძალიან მოსახერხებელია.



- თუ ნახეთ მათი ხელნაკეთი ნივთები და ტანსაცმელი?

- რა თქმა უნდა. სუკში სამჯერ ვიყავი. რამდენიმე საათი გავატარე იქ. აქ ყველაფერს ნახავთ, _ დაწყებული ადგილობრივი, ტრადიციული ნივთებით, ყველა ცნობილი ბრენდის ფეიქით დამთავრებული. მაროკო გამოირჩევა ადგილობრივი წარმოების ხალიჩებით, ლამპებით, ჭურჭელით და საინტერესო საყოფაცხოვრებო ნივთებით.

- ეს ეგზოტიკური მხარე არაერთხელ ყოფილა ცნობილი დიზაინერების ინსპირაციის წყარო. თქვენზეც მოახდინა გავლენა?

- ნამდვილად დიდი ინსპირაცია იყო, განსაკუთრებით ინტერიერის დიზაინისა და დეკორის მიმართულებით. ბევრი იდეა დაიბადა ადგილობრივი სასტუმროების, ე.წ. რიადების ინტერიერის დათვალიერებისას, მათი შტრიხებისა და დეტალების გამოყენება და ფრანგული დიზაინის კონტექსტში ჩასმაა შესაძლებელი.

- ფოტოსესიისთვის როგორ შეარჩიეთ ადგილები და კოსტიუმები?

- როგორც უკვე აღვნიშნე, პროფესიული განტვირთვა მინდოდა, ამიტომ ფოტოსესიები არ დამიგეგმავს. მოვერიდე ტურისტული ადგილების გადაღებას. მინდოდა ფოტო უფრო მხატვრული გამოსულიყო.



- როგორია მათი სამზარეულო, რაიმე საინტერესო აღმოაჩინეთ?

- მიირთმევენ ბევრ ბოსტნეულს და ხილს. კერძი, რომელიც ყველაზე მეტად დამამახსოვრდა, არის ბოსტნეულით და ხორცით, თიხის ჭურჭელში დამზადებული "ტაჟინი".

- დრო რომ გავა რა შემორჩება მაროკოდან მეხსიერებას?

- პირველ რიგში, მათი მოზაიკური ნამუშევრები. მარაქეში ამ ულამაზესი ნაკეთობების გარეშე წარმოუდგენელია. დამამახსოვრდება ულამაზესი მზის ჩასვლა, როცა ჰორიზონტზე თბილი ფერთა გამაა. დღის ეს მონაკვეთი ჩემს საყვარელ შთაბეჭდილებად იქცა.

- თუ იშოპინგეთ მაროკოში და რა ნივთები შეემატა თქვენს აქსესუარებსა და გარდერობს?

- ვიშოპინგე დაგეგმილზე მეტი. ვიყიდე უამრავი ჭურჭელი და აქსესუარი სამზარეულოსთვის. ძალიან მინდოდა, შემეძინა მაროკოსთვის დამახასიათებელი შუშის ჩაის ჭიქები, რომლებსაც პარიზში ცივი სასმელებისთვის ვიყენებ. რაღა თქმა უნდა, შევიძინე მოწნული ჩანთები და კალათები ზაფხულისთვის, ხელით მოხატული ფეხსაცმელები აფრიკული სიმბოლოებით. ახლა თითოეული ეს ნივთი მარაქეშს და იმ ულამაზეს 10 დღეს მახსენებს.



ასევე დაგაინტერესებთ:

ჰალკიდიკი - საუკეთესო ადგილი ზღვის მოყვარულთათვის
ინდოეთი - კონტრასტების ქვეყანა
იმოგზაურე დრომომანისტას სტილში

დაიწყო შვებულებების ბუმი… სხვადასხვა მიმართულებით მიეშურებიან ველოსიპედით, მანქანით, მიკროავტობუსით, მატარებლით, თვითმფრინავით. ტრანსპორტს ან მანძილს რა მნიშვნელობა აქვს, მთავარი შენი დროა, მოგზაურობის დრო.

სანამ გეგმებსა და ფინანსებზე იფიქრებ, გადახედე დრომომანისტას სასურველ მიმართულებებს და მასთან ერთად აღმოაჩინე ახალი შესაძლებლობები.



ალაჩათი, თურქეთი
ქათქათა ქალაქი ლურჯი დეტალებითა და ულამაზესი ყვავილებით, ეგეოსის ზღვაზე სანაპირო ზოლითა და ხელმისაწვდომოობით (თავის ორეულ სანტორინთან შედარებით) ნამდვილი სამოთხეა მოგზაურებისა და ფოტომოყვარულებისთვის. აგრილა, იგივე ალაჩათი მდებარეობს თურქეთში, იზმირთან ახლოს და იქ მოხვედრა თბილისიდან ავტობუსითაც არის შესაძლებელი.


ხორვატიის კუნძულები
ვისაც ზღვა და გარუჯვა უყვარს ხორვატიის კუნძულები კორჩულა, ჰვარი, შიპანი, ლოკრუმი, ლოპუდი, საუკეთესო გადაწყვეტილებაა შვებულებისთვის. კლდოვანი, ქვიშიანი და ნუდისტური პლაჟები და სუფთა ზღვა ბევრ დამსვენებელს იზიდავს. კუნძულებს შორის გადაადგილება ბორანით ხდება. ამ კუნძულებზე ყველაფერია: გართობა, უკაცრიელი სანაპიროები, ლამაზი ბუნება, ისტორია, კულტურა… ბოლო-ბოლო კორჩულა, ხომ უდიდესი მოგზაურის მარკო პოლოს სამშობლოა, მარტო ეს მიზეზიც კმარა მოგზაურისთვის იქ მოსახვედრად.


კვიპროსი
საფოსტო ბარათი-მლაშე ტბა ფლამენგოებით. ეს არის კადრი, რომელიც კვიპროსზე ჩასულს დაგხვდება და არასოდეს დაგავიწყდება და ამ ფოტოს სუვენირად წამოიყოლებ. კვიპროსის რესპუბლიკა სიდიდით მესამე კუნძულია ხმელთაშუა ზღვის აუზში. სანახავი აქ ბევრია: ლარნაკა, აია-ნაპა, პაფოსი, მაკენზის და ფინიკუდესის სანაპიროები, ნისი ბიჩი, წმინდა ლაზარეს ეკლესია, სადაც წმ. ლაზარეს ნაწილები და სარკოფაგია, კლდოვანი სანაპირო კაპო გრეკო ბუნებრივი ქვის ხიდით, ლურჯი ლაგუნა და აფროდიტეს დაბადების ადგილი, სადაც ზღვის ქაფიდან იშვა სილამაზის ქალღმერთი. ლეგენდის თანახმად, ყველა ქალმა უნდა იპკუროს ზღვის ქაფი სახეზე ან განიბანოს, აფროდიტესავით ლამაზი და მიმზიდველი რომ იყოს მთელი ცხოვრება.

არ აქვს მნიშვნელობა, აქედან რომელიმეს აირჩევ, სხვა ნაცნობ ევროპულ ადგილებს ესტუმრები თუ საქართველოს კურორტებზე დაისვენებ, მთავარია ნებისმიერი სიტუაციიდან მაქსიმალური სიამოვნება მიიღო, დაისვენო, განიტვირთო, დაკავდე უსაქმურობით, აღმოაჩინო ახალი ადგილები და გადაიღო უამრავი ფოტო.

სასიამოვნო დასვენებას გისურვებთ!


ატალია ბერიანიძის ბლოგი



საუკეთესო ადგილი დუბაიში ზაფხულის გასატარებლად

Palazzo Versace– ნეოკლასიკური შედევრი მსუბუქი არაბული არქიტექტურით! 

გასულ წელს ბრენდ Versace-ს კრეატიულმა დირექტორმა დონატელა ვერსაჩემ, დუბაიში ახალი 5 ვარსკვლავიანი სასტუმრო გახსნა Palazzo Versace. “სასტუმრო ვერსაჩეს ცხოვრების სტილის ნამდვილი სიმბოლოა”-განაცხადა დონატელამ. 215 სასტუმრო ნომრისგან და 169 რეზიდენციისგან შემდგარ სასტუმროში ყველაფერი House of Versace-სია, ავეჯიდან დაწყებული ჭურჭლით დამთავრებული. 

ღია და დახურული აუზები, შიდა ბაღები, რესტორნები, ბარები,მოზაიკის ჭერი, იატაკი და რათქმაუნდა ყველან ბრენდის ლოგო ამ ყველაფრის ერთობლიობა ბერძნულ-რომაულ სტილს ქმნის სასტუმროში, რაც ვერსაჩეს დიდებისა და ფუფუნების სიმბოლოა. 

Palazzo Versace 2018 წლის ერთ-ერთ საუკეთესო სასტუმროდ აღიარეს დუბაიში.

ნახეთ გალერეა:





ჰალკიდიკი - საუკეთესო ადგილი ზღვის მოყვარულთათვის
საბერძნეთი მსოფლიოშია განთქმული გასაოცარი კუნძულებით, მათ შორისაა ჰალკიდიკის ნახევარკუნძული, რომელიც ეგეოსის ზღვის სამხრეთ-დასავლეთ სანაპიროზე, მაგრამ ქვეყნის აღმოსავლეთ ნაწილში, ბერძნული მაკედონიის პროვინციაში მდებარეობს. იგი ჩვენი პლანეტის ულამაზესი ადგილია და სრულიად სამართლიანად მიიჩნევა ბერძნული კურორტების ჭეშმარიტ მარგალიტად. ეს არის ტურიზმის ცენტრი იდეალური ეკოლოგიითა და არაჩვეულებრივი ხმელთაშუაზღვისეული კლიმატით.

ლეგენდების კვალდაკვალ

ჰალკიდიკიზე უამრავი მითი, ლეგენდა და თქმულება არსებობს. საბერძნეთი ხომ მითების სიმრავლით ყოველთვის გამოირჩეოდა. ნახევარკუნძული ფორმით პოსეიდონის სამკბილას მოგვაგონებს. ერთ-ერთი თქმულების თანახმად, უძველეს დროში ტიტანებს - სიტონს და ათონს - ქალთევზა პოლინა შუყვარდათ და ერთმანეთში ვერ მორიგდნენ, ვერაფრით გადაწყვიტეს, იგი ვისი საკუთრება უნდა გამხდარიყო. მათი დავა ხანგრძლივად გაგრძელდა, რამაც ზღვის ღმერთი პოსეიდონი უსაზღვროდ განარისხა. როგორც ლეგენდა მოგვითხრობს, მან თავისი სამკბილა განრისხებულმა მოიქნია, რის გამოც კუნძული პოსეიდონის სამკბილას დაემსგავსა.



ნახევარკუნძულის პირველ "კბილს" სახელი მაკედონიის მეფის, კასანდრას პატივსაცემად ეწოდა. მეორე "კბილის" სახელი მომდინარეობს ტიტან სიტონის სახელიდან, ხოლო მესამე "კბილის", ათონის სახელი გიგანტ ათონს უკავშირდება. პირველად ნახევარკუნძულ ჰალკიდიკის სახელს ჰეროდოტეს მიერ აღწერილ ბერძენ-სპარტელთა ომების ისტორიაში ვხვდებით.

პირველი "კბილი", კასანდრა, ყოველდღიურად იზიდავს უამრავ დამსვენებელსა და ტურისტს მსოფლიოს სხვადასხვა ქვეყნიდან. ადგილობრივი სოფლების უმრავლესობა სწორედ ამ რეგიონშია განლაგებული განსაკუთრებულად სასარგებლო ჰავისა და საოცარი ბუნების გამო. რეგიონი საინტერესოა არქიტექტურული და ისტორიული ძეგლებით, რომლებიც სხვადასხვა ეპოქაშია შექმნილი.

გზა სამკბილასკენ

ნახევარკუნძულის დედაქალაქია პოლიგიროსი. იგი სალონიკიდან 220 კილომეტრითაა დაშორებული და ათონის მთით არის ცნობილი. ათონის ავტონომიაში 20 მართლმადიდებლური მონასტერია გაერთიანებული. რეგიონი კონსტანტინოპოლის პატრიარქის დაქვემდებარებაშია.



ჰალკიდიკის უკიდურეს აღმოსავლეთით მდებარეობს კასანდრას მუნიციპალიტეტი. საბერძნეთის ეს ნაწილი პოპულარული ტურისტული ადგილი 50-იანი წლებიდან გახდა, როდესაც სალონიკის მცხოვრებლებმა ზაფხულის არდადეგებზე ნახევარკუნძულს მიაკითხეს. მალე ჰალკიდიკი მთელი ევროპისთვის ტურისტული დანიშნულების ადგილად იქცა.
ეგეოსის ზღვა საოცრად სუფთაა, საოცრად ლურჯი და _ მინერალებით გაჯერებული. კასანდრასა და სიტონიას შორის, ყურეში, ზღვა ძალიან მშვიდია. იგი ამ მხარეს იშვიათად ღელავს, სამაგიეროდ, ათონის მთის მხარეს არსებული ზღვის ნაწილი ვეებერთელა ტალღებითაა ცნობილი.

ტურისტული მომსახურება

ჰალკიდიკში ჩასვლა შეიძლება როგორც თვითმფრინავით, ასევე ავტობუსით. ეს უკანასკნელი შედარებით იაფი ჯდება.
კასანდრას ნახევარკუნძულზე ავტომობილების ტრასა ზღვის სანაპიროს მიუყვება, რომელიც ულამაზეს სოფლებს გაივლის. ზუსტად ამ ტრასის ორივე მხარესაა განთავსებული სასტუმროების კომპლექსები.



კასანდრას მთელი საკურორტო ნაწილი აჭრელებულია სხვადასხვა ზომის სასტუმროებით. შეხვდებით როგორც იაფფასიან, ისე პრემიუმკლასისას, გააჩნია, რა შესაძლებლობის პატრონი ბრძანდებით.

თეოფანეს სასახლე - ეს არის კომპლექსი, სადაც განთავსებულია 3 ძირითადი კორპუსი ვარსკვლავების მიხედვით. ამ სასტუმროში შეგიძლიათ იქირაოთ როგორც სამი, ისე ხუთვარსკვლავიანი ულტრაკლასის ნომრები. სასტუმრო დამსვენებელს ემსახურება ძირითადად ინკლუზიური პრინციპით.
Sani Beach Club, შეიძლება ითქვას, ჰიპერკლასის სასტუმროა, რომელიც ორი ბლოკისგან შედგება. ერთ-ერთში სტანდარტული, ხოლო მეორეში მაღალი კლასის ნომრები საკუთარი ტერასებითაა განთავსებული.

ეს ორი სასტუმრო არც ისე ხელმისაწვდომია დატვირთული სეზონის განმავლობაში. თუმცა, არსებობს უფრო მარტივი გამოსავალიც. კასანდრაში შედარებით დაბალფასიანი სასტუმროებიცაა, რომლებიც მომხმარებელს იაფ, მაგრამ მაინც ევროპული ხარისხის სერვისს სთავაზობენ.



ბერძნული სამზარეულო

საბერძნეთი ცნობილია თავისი სამზარეულოთი. რაც მთავარია, კერძები უგემრიელესია, გარდა ამისა, ნოყიერი. თითქოს პატარა ულუფები იმდენად დაგანაყრებთ, რომ შეიძლება მთელი დღის განმავლობაში მხოლოდ სადილი გეყოთ.


გადაადგილების საშუალებები

სასურველი ტურის შეკვეთა სასტუმროშივეა შესაძლებელი. ტუროპერატორები სამი ტიპის ტრანსპორტს იყენებენ: ავტობუსს, მიკროავტობუსსა და სედანის ტიპის ავტომობილს პრივატტურისთვის. მიკროავტობუსის დაქირავება საუკეთესო გამოსავალია, რადგან ფასიც მისაღებია, უფრო კომფორტულადაც იგრძნობთ თავს და მთელი დღის განმავლობაში ბევრი რამის ნახვასაც მოასწრებთ.



ღირსშესანიშნაობები

ჰალკიდიკიზე ვიზიტისას არ შეიძლება არ მოინახულოთ მეტეორა, რომელიც ათონის მთის შემდეგ მნიშვნელობით მეორე მართლმადიდებლური სამონასტრო კომპლექსია. მართალია, ტური მეტეორამდე მთელი დღე გრძელდება, მაგრამ მგზავრობა ძალიან კომფორტულია და მიკროავტობუსი გზაში რამდენჯერმე აჩერებს. გაჩერებებს შორის ერთ-ერთი საინტერესო ადგილია ჩანჩქერი, რომლის გარშემოც ფეხით შეგიძლიათ გაისეირნოთ. სანახაობა ნამდვილად შთამბეჭდავია. გზად დედათა მონასტერთანაც შეჩერდებით, რომელიც თავისი არქიტექტურული ღირებულებით მართლაც საოცრებაა. გარდა ამისა, შემოგარენში იყიდება მონასტერში დამზადებული სახის კრემები და ნელსაცხებლები, რომელიც, ქალბატონების საყურადღებოდ ვიტყვი, საოცარ ეფექტს ახდენს.



თერმული წყლები

არის ასევე ექსკურსია, რომელიც ყოველმა ჩვენგანმა უნდა მოინახულოს ჰალკიდიკიში ყოფნისას. ეს გახლავთ თერმული წყლები. ვფიქრობ, საინტერესოა იმ ადგილის ნახვა, სადაც ბრძოლებისგან დაღლილი ალექსანდრე მაკედონელი ისვენებდა. სწორედ ამ ტერიტორიაზეა განთავსებული ბალნეოლოგიური კურორტი პატარა სასტუმროთი, სადაც ბევრი პენსიონერი ისვენებს. თერმული წყლები დადებითად მოქმედებს სახსრების დაავადებაზე, ასევე ადამიანის კანსა და თმაზე.
აქვეა მცირე ბაზრობა, სადაც იყიდება ალპური ზონის თაფლი, სხვადასხვა ხილის მურაბები. აქვე შეიძლება შეიძინოთ არაჩვეულებრივი მალამოები.



სხვა ტურები

ნახევარკუნძულზე ტურისტული თვალსაზრისით სხვა ტურებიც შეგიძლიათ მოსინჯოთ. მაგალითად, ტური ნავით ათონის მთის გარშემო. თუ იღბლიან დროს დაამთხვიეთ, შეიძლება იხილოთ ათონელი ბერების მიერ წმინდა ხატების გამოსვენების რიტუალი და ივახშმოთ ათონის შესასვლელთან.
საინტერესოა ორდღიანი ტური სალონიკის მიმართულებით, იქიდან - მეტეორაზე და ბოლოს კუნძულ კორფუზე, სადაც წმინდა სპირიდონ ტრიმიფუნტელის საფლავია.

გარდა ამისა, უნიკალური ლანდშაფტის მქონე კურორტზე შეგიძლიათ იდეალურად დაისვენოთ, დატკბეთ უმშვენიერესი პლაჟებით, რადგან ისინი ნებისმიერი ადამიანის გემოვნებას დააკმაყოფილებს. აქ შეგიძლიათ დაკავდეთ წყლის სპორტის სხვადასხვა სახეობით, რადგან თითოეული პლაჟი აღჭურვილია ამისთვის საჭირო აუცილებელი ინვენტარით.
ჰალკიდიკი არისტოტელეს სამშობლოა. იგი განთქმულია პეტრალონის გამოქვაბულით, ოლინტოსის არქეოლოგიური მღვიმითა და უნიკალური არქეოლოგიური ძეგლებით, რომლებიც არავის ტოვებს გულგრილს უნიკალური სტილისა და კულტურული მნიშვნელობის გათვალისწინებით.

მერწმუნეთ, მოგზაურობა ჰალკიდიკის ნახევარკუნძულზე წარუშლელ შთაბეჭდილებას დატოვებს თქვენზე. სხვა მრავალ სიკეთესთან ერთად, თქვენ გელით მშვიდი დასვენება და, რაც მთავარია, მზის ჩასვლის რომანტიკული სცენების ნახვა.

მხატვრების ზღაპრული სოფელი საფრანგეთში
პატარა მომხიბვლელი სოფელი ბარბიზონი, რომელიც მდებარეობს საფრანგეთში ფონტენბლოს ტყის პირას, ხელოვნების მოყვარულთათვის ნამდვილი სამოთხეა.



მიმზიდველი ტურისტებისთვის მე-19 საუკუნეში ბარბიზონის სკოლით გახდა. ამ მოძრაობაში ჩართულნი იყვნენ იმპრესიონისტები Théodore Rousseau, Jean-Baptiste Corot, Charles-Francois Daubigny და Jean-François Millet, რომლებიც 1830-1875 წლებში ბარბიზონში გადმოსახლდნენ და თავიანთ შთაგონებას ამ სოფლის პეიზაჟებში პოულობდნენ.



სასტუმრო “Auberge Ganne” მათი შეხვედრის ადგილი ამჟამად მუზეუმია, სადაც მხატვრების ნამუშევრებია გამოფენილი.



სოფლის მთავარ ქუჩაზე სეირნობისას ნახავთ ლამაზ სახლებს, მაღაზიებს, რესტორნებს, სამხატვრო გალერეებსა და სტუდიებს. სახლები ზღაპრიდან გადმოხატულს ჰგავს და ერთი ნახვით აჯადოებენ მნახველს.



აქ ყველაფერი ხელოვნების ნიმუშია, თითოეული დეტალი, ნახატები ქუჩის კედლებზე, შენობების არქიტექტურა, ლამაზი ტყე , რომელიც სოფელს გარს აკრავს და ამ ყველაფრის შემხედვარეს არ მიკვირს, რატომ აირჩიეს მხატვრებმა ეს სოფელი დასამკვიდრებლად.



ამავე ქუჩაზეა მოქანდაკეების, ფოტოგრაფებისა და ხელნაკეთი ნივთების გალერეა-მაღაზიები, სადაც სურვილის შემთხვევაში სასურველი ნივთის შეძენას შეძლებთ.

ატალია ბერიანიძის ბლოგი

ასევე დაგაინტერესებთ:


 "სილამაზის" მოკლე ისტორია



რეალური ზღაპარი გრანიტის კუნძულებზე
ირგვლივ…უჩვეულო პალმის ტყეები, საოცარი მარჯნები და ზღაპრული სანაპიროა გადაშლილი. აქ ყველაფერია, რომ თავი მიწიერ სამოთხეში იგრძნოთ.
ინდოეთი - კონტრასტების ქვეყანა
ინდოეთი საოცრებებითა და იდუმალებით აღსავსე ზღაპრული სიმდიდრისა და, ამავდროულად, უკიდურესი სიღარიბის ქვეყანაა, თავბრუდამხვევი სიმაღლის მთებითა და გაუვალი ტყეებით, დიდებული ტაძრებითა და ღარიბების ქოხმახებით. ეს არის უდიდესი რელიგიისა და უდიდესი წმინდანების ადგილი. ქვეყანა, სადაც შეიძლება სულისა და ხორცის თავისუფლებას ეზიარო.
რა მჭირდება იდეალური მოგზაურობისთვის?
1.Louis Vuitton-ის ელეგანტური და კლასიკური სამეული ლეგენდარული მონოგრამებით. გემოვნებიანი არჩევანის საიდუმლო კომპლექტურობაშია: დიდი სახელურებიანი ჩანთა, საფულე/ქლათჩი ტაკასი მურაკამისთან ერთად დამუშავებული multicolore მონოგრამით და პასპორტის ქეისი.






2.ტუჩების დამცავი საცხის 2 სახეობა დღის და საღამოს მაკიაჟისთვის. ARTDECO- ს ბეჟი ფერის ტუჩსაცხი დღის განმავლობაში ყველაზე შესაფერისი გადაწყვეტილებაა. მატებს ტუჩს ბზინვარებას, ანიჭებს მას სირბილეს და გლუვ იერს.
MAYBELLINE -ის წითელი ტუჩსაცხი კი ყველაზე ტრენდული და ვინტაჟურია, განსაკუთრებით მათთვის, ვისაც ჩემსავით არ უყვარს მაკიაჟის ტარება. წაისვი წითელი ტუჩსაცხი და ნებისმიერ ადგილას ყველაზე მომხიბვლელი იქნები.




3.H&M-ის ავიატორები ჩემი ყოველდღიური არჩევანია, რადგან ის ნებისმიერ იმიჯს იდეალურად უხდება. ორიგინალური და მოდური CHANEL BLACK HALF TINT WITH WAVY ARMS სათვალე კი ყველგან იქცევს ყურადღებას, სადაც არ უნდა წავიდე, რაც თავდაჯერებას მმატებს.



ნატალია ბერიანიძის ბლოგი

ასევე დაგაინტერესებთ:


მოდა სერიალში
რა ხდის ქალს უფრო მიმზიდველს?

 - მოგზაურობა! ამბობენ, ქალი, რაც უფრო მეტს მოგზაურობს, მით უფრო ჭკვიანი, სექსუალური და მომხიბვლელია.