მზესუმზირა, როგორც ეროვნული ყვავილი, უკვე დიდი ხანია უკრაინელების ცხოვრებაში მნიშვნელოვან ადგილს იკავებს. მაგრამ მას შემდეგ, რაც რუსეთი ქვეყნის ტერიტორიაზე შეიჭრა, მცენარე წინააღმდეგობის, ერთიანობისა და იმედის გლობალურ სიმბოლოდ იქცა.

ბოლო დღეებში, ადამიანები მთელი მსოფლიოდან აზიარებენ მზესუმზირების ფოტოებს, სხვადასხვა სოციალურ ქსელში წერენ პოსტებს, შესაბამის სიმბოლოს ამატებენ ტანსაცმელსა თუ თმის აქსესუარს. ერთ-ერთ გავრცელებულ ვიდეოში უკრაინელი ქალი რუს ჯარისკაცს ეუბნება, რომ ჯიბეში ჩაიდოს მზესუმზირის თესლი, რადგანაც როცა მოკვდება, იმ ადგილზე სწორედ ეს მცენარე ამოვიდეს.

ორშაბათს, ამერიკის შეერთებული შტატების პირველი ლედი, ჯილ ბაიდენი დააფიქსირეს პირბადით, რომელზეც მზესუმზირაა გამოსახული. ხოლო შემდეგ დღეს კაბის სახელოზე ჰქონდა ყვავილის სიმბოლო.

მხატვრები აქტიურად ხატავენ მზესუმზირას, ხოლო ისინი, ვინც ერთხელ მაინც ეწვივნენ უკრაინას და მისი გაუთავებელი, ყვითელი მინდვრები ნახეს, დაუღალავად აზიარებენ ფოტოებს და ამით სოლიდარობასა და სიყვარულს გამოხატავენ. კანონმდებლები, პოლიტიკოსები ატარებენ ლურჯ და ყვითელ ფერებს, შესაბამის სიმბოლოებს, რათა მხარი დაუჭირონ უკრაინას.

1996 წლის ზაფხულში ოფიციალურმა პირებმა მზესუმზირა სამხრეთ უკრაინაში, პერვომაისკის სარაკეტო ბაზაზე ქვეყნიდან ბირთვული იარაღის გატანის აღსანიშნავად დარგეს. აღნიშნულ ცერემონიაზე აღინიშნა უკრაინიდან მსოფლიოში სიდიდით მესამე ბირთვული არსენალის გატანა, რომელიც მან 1991 წელს საბჭოთა კავშირის დაშლის შემდეგ მიიღო.

მსოფლიოს მასშტაბით უკრაინის დასახმარებლად, საქველმოქმედო მიზნით ყიდიან მათ ეროვნულ ყვავილს და შემოსულ თანხას მთლიანად რიცხავენ ანგარიშებზე.